Mga diyos-diyosan na naman an sinasamba kan dakul na Israelita, kaya itinugot ni Jehova na masakop kan mga Filisteo an lugar ninda. Pero may mga Israelita na nagsusunod pa man giraray ki Jehova. Saro sainda si Manoa. Mayo sindang aki kan agom niya. Sarong aldaw, nagsugo si Jehova nin anghel sa agom ni Manoa. Sinabihan ini kan anghel: ‘Magkakaaki ka nin sarong lalaki. Ililigtas niya an Israel sa mga Filisteo. Magigi siyang sarong Nazareo.’ Aram mo kun ano an mga Nazareo? Mga espesyal sindang lingkod ni Jehova. Dai sinda puwedeng magpaputol nin buhok.

Pag-abot nin panahon, namundag an aki ni Manoa, asin pinangaranan niya ining Samson. Kan magdakula si Samson, ginibo siya ni Jehova na magin makusugon. Kaya niyang gumadan nin leon gamit sana an kamot niya. Sa sarong pagkakataon, solong ginadan ni Samson an 30 Filisteo. Angguton saiya an mga Filisteo kaya naghahanap sinda nin paagi para gadanon siya. Sarong banggi, kan nagtuturog si Samson sa Gaza, nagduman an mga Filisteo sa trangkahan kan siyudad asin naghalat tanganing gadanon siya pagkaaga. Pero kan matangang banggi, nagbuhat si Samson dangan nagduman sa trangkahan kan siyudad tapos tinangkas iyan sa lanob. Pinasan niya an trangkahan asin dinara iyan sa tuktok kan sarong bukid na harani sa Hebron!

Pag-abot nin panahon, nagduman an mga Filisteo sa kailusyon ni Samson na si Delaila, asin nagsabi: ‘Tatawan mi ika nin 5,500 na pidasong pirak pag naaraman mo kun ta’no ta makusugon si Samson. Gusto mi siyang dakupon para ipreso.’ Gusto ni Delaila su kuwarta kaya nag-uyon siya. Kan inot, habong sabihon saiya ni Samson kun taano ta makusugon siya. Pero pigparapirit ni Delaila si Samson kaya naituga niya an saiyang sekreto. Sinabi niya ki Delaila: ‘Dai pa lamang napuputulan an sakuyang buhok dahil Nazareo ako. Pag pinutol an  buhok ko, mawawara an sakong kusog.’ Nasala talaga si Samson kan sinabi niya iyan, ano?

Dali-daling sinabi ni Delaila sa mga Filisteo: ‘Aram ko na an sekreto niya!’ Pinaturog niya si Samson sa may tuhod niya, tapos nag-apod siya nin maputol kan buhok kaini. Pakatapos nagkurahaw si Delaila: ‘Samson, may mga Filisteo!’ Napagmata si Samson, pero wara na an kusog niya. Dinakop siya kan mga Filisteo, binuta, dangan iprineso.

Sarong aldaw, dakulon na Filisteo an nagtiripon sa templo kan diyos nindang si Dagon. Nagkukururahaw sinda: ‘Itinao sato si Samson kan satuyang diyos! Iluwas si Samson! Kalwagan ta siya.’ Pinatindog ninda siya sa tahaw nin duwang harigi, asin pigparakantiyawan. Namibi si Samson: ‘O Jehova, tawan mo po giraray ako nin kusog.’ Kan panahon na ini, naglaba na giraray an buhok ni Samson. Ginamit niya an bilog niyang kusog para itumba an mga harigi kan templo. Nagaba an bilog na templo, kaya nagadan an gabos na tawong yaon duman pati na si Samson.