1. Ano an katuyuhan nin Diyos para sa mga tawo?

 AN Diyos may magayunon na katuyuhan para sa mga tawo. Linalang niya an inot na lalaki saka babayi, si Adan asin Eva, tanganing mag-istar sa sarong magayon na hardin. Katuyuhan niya na magkaigwa sinda nin mga aki, gibuhon nindang paraiso an bilog na daga, asin atamanon an mga hayop.—Genesis 1:28; 2:8, 9, 15; hilingon an Dagdag na Impormasyon 6.

2. (a) Paano ta naaraman na gigibuhon nin Diyos an saiyang katuyuhan? (b) Ano an sinasabi kan Bibliya manungod sa pag-istar sa daga sagkod lamang?

² Sa hiling mo, makakaistar pa daw kita sa sarong paraiso? Sinasabi sa sato ni Jehova: “Iyan an katuyuhan ko asin gigibuhon ko iyan.” (Isaias 46:9-11, NW; 55:11) Iyo, gigibuhon niya an saiyang katuyuhan, asin daing makakapugol sa saiya. Sinabi ni Jehova na ‘dai niya basta linalang an daga na mayong katuyuhan.’ (Isaias 45:18, NW) Gusto niyang istaran nin mga tawo an bilog na daga. Anong klase nin mga tawo an gusto nin Diyos na mag-istar digdi, asin gurano kahaloy? Sinasabi kan Bibliya: “Magigin pagsadiri kan mga matanos [o, masinunod] an daga, asin maistar sinda diyan sagkod lamang.”—Salmo 37:29, NW; Kapahayagan 21:3, 4.

3. Huling nagkakahilang asin nagagadan an mga tawo, ano an tibaad ihapot mo?

³ Pero ngunyan, an mga tawo nagkakahilang asin nagagadan. Sa dakul na lugar, may mga nag-iiriwal saka naggagaradanan. Siguradong bako ini an katuyuhan nin Diyos. Anong nangyari, saka taano? An Bibliya sana an makakapaliwanag.

4, 5. (a) Siisay an nakipag-ulay ki Eva paagi sa sarong halas sa hardin nin Eden? (b) Paano puwedeng magin parahabon an sarong tawong onesto?

⁴ Sinasabi kan Bibliya na an Diyos may kaiwal na “inaapod Diyablo asin Satanas.” Sa hardin nin Eden, ginamit ni Satanas an sarong halas tanganing kaulayon si Eva. (Kapahayagan 12:9; Genesis 3:1) Pinaluwas niya na su halas an nagtataram.—Hilingon an Dagdag na Impormasyon 7.

⁵ An Diyos daw an naggibo ki Satanas na Diyablo? Bako! Sarong anghel, na haloy na kaidtong nasa langit kan pighahanda nin Diyos an daga para ki Adan asin Eva, an nagbago asin nagin Diyablo. (Job 38:4, 7) Paano iyan nangyari? Buweno, paano nagbabago asin nagigin parahabon an sarong tawong onesto? Bako man siyang parahabon kan ipinangaki siya. Pero pigmawot niya an sarong bagay na bako man saiya. Pigparaisip niya iyan kaya lalong nagkusog an saiyang salang pagmawot. Dangan, kan magkaigwa nin pagkakataon, hinabon niya iyan. Siya an naggibo sa sadiri niya na magin parahabon.—Basahon an Santiago 1:13-15; hilingon an Dagdag na Impormasyon 8.

6. Paano nagin kaiwal nin Diyos an sarong anghel?

⁶ Ini an nangyari sa anghel na idto. Pagkalalang ni Jehova ki Adan asin Eva, sinabihan niya sinda na magkaigwa nin mga aki asin panuon an daga. (Genesis 1:27, 28) Tibaad inisip kan anghel na idto, ‘Puwedeng ako an sambahon kan mga tawo imbes na si Jehova!’ Mantang pigpaparaisip niya iyan, mas nagkusog man an pagmawot niya na makua an para ki Jehova. Gusto kan anghel na idto na sambahon siya kan mga tawo. Kaya nagsabi siya nin bakong totoo ki Eva asin nadaya niya ini. (Basahon an Genesis 3:1-5.) Sa paggibo kaiyan, nagi siyang Satanas na Diyablo, sarong kaiwal nin Diyos.

7. (a) Taano ta nagadan si Adan asin Eva? (b) Taano ta naggugurang kita asin nagagadan?

⁷ Sinuway ni Adan asin Eva an Diyos, asin kinakan ninda  an bunga. (Genesis 2:17; 3:6) Nagkasala sinda ki Jehova, asin pag-abot nin panahon nagadan sinda arog kan sinabi ni Jehova. (Genesis 3:17-19) Dahil mga makasalan man an mga aki ni Adan asin Eva, nagagadan man sinda. (Basahon an Roma 5:12.) Para masabutan kun taano ta nagin mga makasalan man an mga aki ni Adan asin Eva, isipon an halimbawang ini. Magibo ka ngaya nin tinapay gamit an liyanera na may rukmi. Sigurado, magkakaigwa man nin rukmi an tinapay na arog kan sa liyanera. Kan suwayon ni Adan an Diyos, nagin makasalan si Adan. Huling mga aki kita ni Adan, gabos kita makasalan man, o may “rukmi” kapareho niya. Asin dahil gabos kita makasalan, naggugurang kita asin nagagadan.—Roma 3:23; hilingon an Dagdag na Impormasyon 9.

8, 9. (a) Ano an gusto ni Satanas na isipon ni Adan asin Eva? (b) Taano ta dai tulos ginadan ni Jehova an mga rebelde?

⁸ Pinunan ni Satanas an rebelyon laban ki Jehova kan impluwensiyahan niya si Adan asin Eva na suwayon an Diyos. Gusto niyang isipon ni Adan asin Eva na si Jehova putikon asin maraot na tagapamahala na habong itao an pinakamarahay sa sainda. Gustong paluwason ni Satanas na dai kaipuhan kan mga tawo na sabihan sinda kan Diyos kun ano an dapat nindang gibuhon, asin na si Adan saka Eva an dapat magdesisyon para sa sadiri ninda kun ano an tama asin kun ano an sala. Kaya ano an gigibuhon ni Jehova? Puwede niya kutang gadanon na sana an mga rebelde para tapuson an rebelyon. Pero mapapatunayan daw kaiyan na putikon si Satanas? Dai.

⁹ Kaya dai tulos ginadan ni Jehova an mga rebelde. Imbes, tinawan niya nin panahon an mga tawo na pamahalaan an sadiri ninda. Paagi kaiyan, magigin malinaw na putikon si Satanas asin na aram ni Jehova kun ano an pinakamarahay para sa mga tawo. Dakul pa kitang manunudan mapadapit diyan sa Kapitulo 11. Pero ano an masasabi mo sa desisyon ni  Adan asin Eva? Tama daw na maniwala sinda ki Satanas asin suwayon an Diyos? Si Jehova an nagtao kan gabos na yaon ki Adan asin Eva. Tinawan niya sinda nin perpektong buhay, magayon na istaran, asin nakakaugmang trabaho. Pero si Satanas, wara pa lamang ngani nin nagigibong ano man na karahayan sa sainda. Kun ika, anong gigibuhon mo?

10. Anong mahalagang pagpili an kaipuhan gibuhon kan lambang saro sa sato?

 ¹⁰ Kaipuhan man kan lambang saro sa sato ngunyan na magpili, asin buhay ta an nakataya diyan. Puwede tang pilion na magsunod ki Jehova bilang satong Tagapamahala asin makatabang sa pagpatunay na putikon si Satanas. O nasa sato kun pipilion ta si Satanas bilang satong tagapamahala. (Salmo 73:28; basahon an Talinhaga 27:11.) Kakadikit sanang tawo sa kinaban na ini an nagsusunod sa Diyos. An totoo, bako siya an tagapamahala kan kinaban. Kun bako an Diyos, siisay palan?

11, 12. (a) Ano an manunudan niyato sa pag-alok ni Satanas ki Jesus? (b) Anong mga teksto an nagpapahiling na si Satanas an namamahala sa kinaban?

¹¹ Aram ni Jesus kun siisay talaga an namamahala sa kinaban. Sarong beses, “ipinahiling [ni Satanas] sa saiya an gabos na kahadian kan kinaban pati an kamurawayan kan mga iyan.” Dangan nanuga si Satanas ki Jesus: “Itatao ko sa saimo an gabos na bagay na ini basta lumuhod ka asin sumamba sa sako.” (Mateo 4:8, 9; Lucas 4:5, 6) Haputon an sadiri, ‘Maiaalok daw ni Satanas ki Jesus an mga kahadian na idto kun bako man iyan saiya?’ Dai. Kaya talagang ki Satanas an gabos na gobyerno.

¹² Tibaad maihapot mo: ‘Paano man nangyari na si Satanas an tagapamahala kan kinaban? Bakong si Jehova an Diyos na Makakamhan sa Gabos na naglalang kan uniberso?’ (Kapahayagan 4:11) Iyo, pero malinaw na inapod ni Jesus si Satanas na “an tagapamahala kan kinaban na ini.” (Juan 12:31; 14:30; 16:11) Inapod ni apostol Pablo si Satanas na Diyablo na “diyos kan sistemang ini nin mga bagay.” (2 Corinto 4:3, 4) Asin isinurat ni apostol Juan na “an bilog na kinaban nasa kapangyarihan kan saro na maraot.”—1 Juan 5:19.

13. Taano ta kaipuhan niyato nin bagong kinaban?

¹³ Mas lalo pang nagigin peligroso an kinaban na ini. May mga giyera, korapsiyon, pagsagin-sagin, asin kadahasan maski sain. Dai kayang halion kan mga tawo an gabos na problemang ini, dawa anong gibuhon ninda. Pero madali nang tapuson nin Diyos an maraot na kinaban na ini sa saiyang giyera nin Armagedon, asin sasalidahan niya iyan nin matanos na bagong kinaban.—Kapahayagan 16:14-16; hilingon an Dagdag na Impormasyon 10.

14. Siisay an pinili nin Diyos na magin Hadi kan Saiyang Kahadian? Ano an ihinula kan Bibliya mapadapit ki Jesus?

¹⁴ Pinili ni Jehova si Jesu-Cristo na magin Hadi kan Saiyang gobyerno, o Kahadian, sa langit. Pirang ribong taon na an nakaagi, ihinula kan Bibliya na mamamahala si Jesus bilang “Prinsipe nin Katuninungan” asin na an saiyang gobyerno dai nuarin man matatapos. (Isaias 9:6, 7, NW) Itinukdo ni Jesus sa saiyang mga parasunod na ipamibi an gobyernong ini kan sabihon niya: “Dumatong lugod an Kahadian mo. Mangyari lugod an buot mo, kun paano sa langit, siring man sa daga.” (Mateo 6:10) Sa Kapitulo 8, manunudan ta kun paano sasalidahan kan Kahadian nin Diyos an mga gobyerno sa kinaban. (Basahon an Daniel 2:44.) Dangan, gigibuhon kan Kahadian nin Diyos na magin magayunon na paraiso an bilog na daga.—Hilingon an Dagdag na Impormasyon 11.

15. Ano an “bagong daga”?

¹⁵ Nanunuga an Bibliya: “Igwa nin bagong mga langit asin sarong bagong daga na hinahalat niyato,” asin “sa mga ini magdadanay an katanusan.” (2 Pedro 3:13; Isaias 65:17) Kun minsan, pag sinasambit sa Bibliya an tataramon na “daga,” an mga tawo digdi sa daga an pinapanungdan kaiyan. (Genesis 11:1, NW) Kaya an matanos na “bagong daga” nanunungod sa gabos na tawo na nagsusunod sa Diyos asin binebendisyunan niya.

16. Anong magayunon na regalo an itatao nin Diyos sa mga maistar sa saiyang bagong kinaban, asin ano an dapat tang gibuhon tanganing mag-ako kan regalong ini?

 ¹⁶ Nanuga si Jesus na an mga maistar sa bagong kinaban nin Diyos tatawan nin “buhay na daing katapusan.” (Marcos 10:30) Ano an dapat tang gibuhon tanganing mag-ako kan regalong ini? Basahon tabi an Juan 3:16 asin 17:3 tanganing maaraman an simbag. Aramon ta ngunyan kun ano an sinasabi kan Bibliya sa magigin buhay sa Paraiso digdi sa daga.

17, 18. Taano ta nakakasigurado kita na magkakaigwa nin katuninungan sa bilog na daga asin magigin tiwasay kita?

¹⁷ Mawawara na an mga maraot, giyera, krimen, asin kadahasan. Mayo nang matatadang maraot na tawo sa daga. (Salmo 37:10, 11) ‘Papapunduhon nin Diyos an mga giyera sa bilog na daga.’ (Salmo 46:9, NW; Isaias 2:4) An daga mapapano nin mga tawong namumuot asin nagsusunod sa Diyos. Padagos na magigin matuninong an kinaban.—Salmo 72:7.

¹⁸ Magigin tiwasay an mga lingkod ni Jehova. Kan mga panahon kan Bibliya, pag nagsusunod an mga Israelita sa Diyos, ligtas sinda ta pinoprotektaran niya sinda. (Levitico 25:18, 19) Sa Paraiso, mawawara na an ano man na kinakatakutan ta. Pirmi na kitang tiwasay!—Basahon an Isaias 32:18; Miqueas 4:4.

19. Paano kita makakasigurado na magigin abunda an kakanon sa bagong kinaban nin Diyos?

¹⁹ Magigin abunda an kakanon. “An tipasi sa ibabaw kan daga magigin abunda; sa alituktok kan kabukidan, iyan masurobra.” (Salmo 72:16, NW) ‘Bebendisyunan kita kan satong Diyos’ na si Jehova, asin ‘an daga magtatao kan bunga kaiyan.’—Salmo 67:6.

20. Taano ta nakakasigurado kita na magigin paraiso an bilog na daga?

²⁰ Magigin paraiso an bilog na daga. An mga tawo magkakaigwa nin magagayon na harong saka hardin. (Basahon an Isaias 65:21-24; Kapahayagan 11:18.) An bilog na daga  magigin arog kagayon kan hardin nin Eden. Padagos na itatao ni Jehova an gabos na kaipuhan ta. Sinasabi kan Bibliya mapadapit sa saiya: “Ibinubuka mo an saimong kamot asin an lambang bagay na may buhay pinapaniguan mo an mawot.”—Salmo 145:16, NW.

21. Paano niyato naaraman na magkakaigwa nin katuninungan an mga tawo saka mga hayop?

²¹ Iribang mabubuhay nin matuninong an mga tawo saka mga hayop. Dai na kukulgan kan mga hayop an mga tawo. Mamamatian kan mga aki na ligtas sinda dawa pa kaibanan an mga hayop na maiisog ngunyan.—Basahon an Isaias 11:6-9; 65:25.

22. Ano an gigibuhon ni Jesus sa mga may hilang?

²² Mayo nang magkakahilang. Kan si Jesus yaon digdi sa daga, dakul an pinarahay niya. (Mateo 9:35; Marcos 1:40-42; Juan 5:5-9) Pero bilang Hadi kan Kahadian nin Diyos, paparahayon ni Jesus an gabos na may hilang. Mayo na nin masabing, ‘May hilang ako.’—Isaias 33:24; 35:5, 6.

23. Ano an gigibuhon nin Diyos sa mga nagadan?

²³ Mabubuhay giraray an mga gadan. Nanunuga an Diyos na bubuhayon niya an milyon-milyon na tawong nagadan. “Bubuhayon liwat nin Diyos an mga matanos pati an mga bakong matanos.”—Basahon an Juan 5:28, 29; Gibo 24:15.

24. Ano an masasabi mo kun manungod sa pag-istar sa Paraiso?

²⁴ Gabos kita may pagpipilian. Puwede tang mas midbidon pa si Jehova asin paglingkudan siya, o puwede man na gibuhon niyato an ano man na gusto ta. Kun pipilion niyato na maglingkod ki Jehova, magkakaigwa kita nin magayunon na puturo. Kan makiulay ki Jesus an sarong lalaki na girumdumon siya pagkagadan niya, nangako saiya si Jesus: “Makakaibanan taka sa Paraiso.” (Lucas 23:43) Aramon ta an iba pang impormasyon mapadapit ki Jesu-Cristo asin kun paano niya uutubon an magayunon na mga panuga nin Diyos.