1. Taano ta mahalagang maaraman niyato an manungod sa mga anghel?

 GUSTO ni Jehova na mabisto ta an saiyang pamilya. An mga anghel miyembro kan pamilya nin Diyos. Sa Bibliya, inaapod sindang ‘mga aki nin Diyos.’ (Job 38:7) Ano an ginigibo kan mga anghel? Paano ninda tinabangan an mga tawo kan inot na panahon? Matatabangan daw ninda kita ngunyan?—Hilingon an Dagdag na Impormasyon 8.

2. Sain hali an mga anghel? Gurano sinda kadakul?

² Kaipuhan tang maaraman kun sain hali an mga anghel. Sinasabi sa sato kan Colosas 1:16 na pagkatapos lalangon ni Jehova si Jesus, “an gabos na iba pang bagay linalang sa langit asin sa daga.” Kaiba diyan an mga anghel. Gurano sinda kadakul? Sinasabi kan Bibliya na may ginatos na milyon na mga anghel.—Salmo 103:20; Kapahayagan 5:11.

3. Ano an sinasabi sa sato kan Job 38:4-7 manungod sa mga anghel?

³ Itinutukdo man kan Bibliya na linalang ni Jehova an mga anghel bago an daga. Ano daw an namatian kan mga anghel kan mahiling ninda an daga? Sinasabi sa sato kan libro nin Job na ugmahon sindang marhay. Sarong pamilya sinda na iribang naglilingkod ki Jehova.—Job 38:4-7.

4. Taano ta masasabi niyato na an mga anghel interesado sa mga tawo?

⁴ Puon pa kaidto, interesado na an mga anghel sa mga tawo asin sa katuyuhan ni Jehova para sa daga saka sa mga  tawo. (Talinhaga 8:30, 31; 1 Pedro 1:11, 12) Siguradong namundo sindang marhay kan magrebelde si Adan asin Eva. Asin siguradong mas namumundo sinda ngunyan huling an kadaklan sa mga tawo dai nagsusunod ki Jehova. Pero pag may sarong nagkasala na nagbabasol tapos minabalik sa Diyos, ugmahon kaiyan an mga anghel. (Lucas 15:10) Interesadong marhay an mga anghel sa mga naglilingkod sa Diyos. Ginagamit ni Jehova an mga anghel para tabangan saka protektaran an mga lingkod niya digdi sa daga. (Hebreo 1:7, 14) Pag-ulayan ta an pirang halimbawa kaini.

5. Paano tinabangan kan mga anghel an mga lingkod nin Diyos kaidto?

 ⁵ Nagsugo kaidto si Jehova nin duwang anghel para tabangan si Lot asin an pamilya kaini na makadulag kan paraon an siyudad nin Sodoma asin Gomora. (Genesis 19:15, 16) Pakalihis nin ginatos na taon, kan ihulog si propeta Daniel sa lungib nin mga leon, mayong nangyaring maraot saiya huling ‘isinugo nin Diyos an saiyang anghel na iyo an nagtikom sa nguso kan mga leon.’ (Daniel 6:22) Asin kan mapreso si apostol Pedro, nagsugo si Jehova nin sarong anghel para tabangan siyang makaluwas. (Gibo 12:6-11) Tinabangan man si Jesus kan mga anghel kan nasa daga pa siya. Halimbawa kaidtong pagkatapos niyang mabawtismuhan, mababasa ta sa Bibliya na ‘tinabangan siya kan mga anghel.’ (Marcos 1:13) Asin kan banggi bago gadanon si Jesus, “pinakusog siya” nin sarong anghel.—Lucas 22:43.

6. (a) Paano niyato naaraman na tinatabangan nin mga anghel an mga lingkod nin Diyos ngunyan? (b) Anong mga hapot an sisimbagon niyato?

⁶ Dai na ngunyan nagpapahiling sa mga tawo an mga anghel. Pero ginagamit pa man giraray sinda nin Diyos para tabangan an saiyang mga lingkod ngunyan. An Bibliya nagsasabi: ‘An anghel ni Jehova nagbabantay sa palibot kan mga natatakot sa Saiya, asin [iliniligtas] niya sinda.’ (Salmo 34:7) Taano ta kaipuhan niyato kan proteksiyon ninda? Huling igwa kita nin makusog na mga kaiwal na gusto kitang gibuhan nin maraot. Sairisay sinda? Sain sinda hali? Ano an mga paagi ninda para gibuhan kita nin maraot? Para masimbag an mga iyan, pag-ulayan ta an mga nangyari dai nahaloy pagkalalang ki Adan asin Eva.

7. Taano ta dinadaya ni Satanas an mga tawo?

⁷ Naaraman ta sa Kapitulo 3 na may sarong anghel na nagrebelde sa Diyos asin gustong mamahala sa mga tawo. Inaapod siya kan Bibliya na Satanas na Diyablo.  (Kapahayagan 12:9) Gusto ni Satanas na magrebelde man sa Diyos an mga tawo. Nadaya niya si Eva, asin puon kaidto nadaya niya man an kadaklan na tawo. Pero may mga nagdanay na masinunod ki Jehova, arog ni Abel, Enoc, asin Noe.—Hebreo 11:4, 5, 7.

8. (a) Paano nagin demonyo an ibang mga anghel? (b) Ano an ginibo kan mga demonyo tanganing dai madamay sa Baha?

⁸ Kan panahon ni Noe, may mga anghel na nagrebelde asin binayaan an saindang istaran sa langit para mamuhay bilang tawo digdi sa daga. Taano? Sinasabi sa sato kan Bibliya na gusto kaya nindang magkaigwa nin agom. (Basahon an Genesis 6:2.) Pero bakong tama na mag-agom an mga anghel. (Judas 6) Arog kan maraot na mga anghel na iyan, nagin maraot asin bayolente man an kadaklan na tawo kan panahon na idto. Kaya nagdesisyon si Jehova na puhuon an maraot na mga tawo paagi sa pagpaabot nin baha sa bilog na daga. Pero ilinigtas niya an maimbod niyang mga lingkod. (Genesis 7:17, 23) Tanganing dai madamay, nagbalik sa langit an maraot na mga anghel. Inaapod sinda kan Bibliya na mga demonyo. Kuminampi sinda ki Satanas sa pagrebelde, kaya nagin tagapamahala ninda an Diyablo.—Mateo 9:34.

9. (a) Ano an nangyari sa mga demonyo kan magbalik sinda sa langit? (b) Ano an sunod na aaramon ta?

⁹ Huli sa pagrebelde kan mga demonyo, dai na sinda inako ni Jehova sa saiyang pamilya. (2 Pedro 2:4) Mayo na sindang kapangyarihan na magin tawo, pero padagos pa man giraray sindang “nandadaya sa bilog na kinaban.” (Kapahayagan 12:9; 1 Juan 5:19) Aramon ta kun paano ninda dinadaya an kadakul na tawo.—Basahon an 2 Corinto 2:11.

10. Paano dinadaya kan mga demonyo an mga tawo?

¹⁰ Dakul nin paagi an mga demonyo para dayaon an mga tawo. Pag nakikipag-ulay an mga tawo sa mga demonyo, ginigibo  ninda iyan nin direkta o paagi sa ibang tawo, arog nin parasantigwar o sarong psychic. An pakikipag-ulay na iyan inaapod na demonismo o espiritismo. Pero ipinagbubuot sa sato kan Bibliya na rayuan an ano man na bagay na konektado sa mga demonyo. (Galacia 5:19-21) Taano? Kun paanong an sarong paraayam naggagamit nin silo o litag para makadakop nin mga hayop, naggagamit man an mga demonyo nin mga pandadaya tanganing masilo asin makontrol an mga tawo.—Hilingon an Dagdag na Impormasyon 26.

11. Ano an panghuhula, asin taano ta dapat niyatong likayan iyan?

¹¹ Saro sa mga pandadaya na ginagamit ninda iyo an panghuhula. Paggamit iyan kan misteryosong mga kapangyarihan tanganing aramon an mangyayari sa maabot na panahon o an mga bagay na dai pa aram. May mga naghuhula paagi sa paghiling sa mga bituon, paghanap nin mga senyales, pagbasa nin mga barahang tarot, paggamit nin bolang kristal, o pagbasa nin palad. Iniisip kan dakul na mayo man nin maraot diyan, pero bako iyan totoo. Peligrosong marhay iyan. Halimbawa, ipinapahiling kan Bibliya na magkasabwat an mga demonyo saka an mga parahula. Sa Gibo 16:16-18, mababasa ta an manungod sa sarong “maraot na espiritu,” o demonyo, na nagtao sa sarong babayi nin “kakayahan na manghula.” Kan paluwason ni apostol Pablo an demonyo, nawara na an kakayahan kan babayi na manghula.

12. (a) Taano ta peligroso na purbaran na makipag-ulay sa mga gadan? (b) Taano ta nungkang makikiiba an mga lingkod nin Diyos sa mga kaugalian na may koneksiyon sa mga demonyo?

¹² May saro pang pandadaya na ginagamit an mga demonyo. Pinapaniwala ninda kita na puwedeng makaulay an mga gadan asin na an mga gadan buhay pa talaga sa kun sain na lugar asin kaya kitang kaulayon o kulgan. Halimbawa, an saro na nagadanan nin amigo o kapamilya puwedeng magduman sa sarong tawo, arog nin espiritista, na kaya daang makipag-ulay sa gadan. Tibaad magsabi an espiritista nin sarong detalye manungod sa nagadan na amigo o kapamilya  saka arugon pa ngani an boses kaini. (1 Samuel 28:3-19) Dakul na mga kaugalian may koneksiyon sa gadan an base man sa paniniwala na nabubuhay pa daa an mga gadan sa kun sain na lugar. Tibaad kaiba digdi an mga ritwal manungod sa lubong, pagselebrar kan anibersaryo nin gadan, mga dulot para sa gadan, asin mga ritwal sa pagkabalo, pagpatente, o lamay. Kun an sarong Kristiyano dai magpartisipar sa mga kaugalian na ini, tibaad anggutan, insultuhon, o rayuan siya kan saiyang mga kapamilya o kabaryo. Pero aram kan mga Kristiyano na an mga gadan dai na nabubuhay sa kun sain na lugar. Imposible na makaulay ta sinda, asin dai ninda kita kayang gibuhan nin maraot. (Salmo 115:17) Dapat kitang mag-ingat. Nungkang purbaran na makipag-ulay sa mga gadan o sa mga demonyo asin dai nuarin man makiiba sa ano man na kaugalian na may koneksiyon sa mga demonyo.—Basahon an Deuteronomio 18:10, 11; Isaias 8:19.

13. Ano an nakayang gibuhon kan mga tawo na dating takot sa mga demonyo?

¹³ Apuwera sa pandadaya, tinatakot man kan mga demonyo an mga tawo. Aram ni Satanas asin kan saiyang mga demonyo na “halipot na sana an [saindang] panahon” bago sinda halion nin Diyos digdi sa daga, kaya mas mabangis saka mas agresibo na sinda ngunyan. (Kapahayagan 12:12, 17) Pero dakul na tawo an nakayang halion an takot ninda sa mga demonyo. Paano ninda iyan nagibo?

14. Arog kan mga Kristiyano kan inot na siglo, paano kita makakabutas sa kontrol kan mga demonyo?

¹⁴ Sinasabi sa sato kan Bibliya kun paano ta malalabanan an mga demonyo asin kun paano kita makakabutas sa kontrol ninda. Halimbawa, may mga taga siyudad nin Efeso kaidto na nakikipag-ulay sa mga demonyo bago ninda nanudan an katotoohan. Paano sinda nakabutas sa kontrol  ninda? An Bibliya nagsasabi: “An dakul sa mga nagsasagibo nin mahika tiniripon an saindang mga libro asin sinurulo iyan sa atubangan kan gabos.” (Gibo 19:19) Huling gusto nindang magin Kristiyano, sinurulo ninda an gabos na libro ninda sa pagmamahika. Arog man kaiyan an dapat gibuhon ngunyan. Dapat na halion kan gabos na gustong maglingkod ki Jehova an ano man na bagay na may koneksiyon sa mga demonyo. Kaiba diyan an mga libro, magasin, horoscope, pelikula, musika, kawat, pati ngani mga poster na nagpapahiling na garo baga mayo man nin maraot o nakakaugma pa ngani an mahika, mga demonyo, o mga misteryosong kapangyarihan. Kaiba man diyan an mga bagay na isinusulot kan mga tawo na pangontra sa maraot na mga espiritu.—1 Corinto 10:21.

15. Ano pa an kaipuhan niyatong gibuhon tanganing malabanan si Satanas asin an mga demonyo?

¹⁵ Mga pirang taon pakatapos na suluon kan mga taga Efeso an mga libro ninda sa pagmamahika, nagsurat si apostol Pablo na kaipuhan pa man giraray nindang ‘makipaglaban tumang sa maraot na mga espiritu.’ (Efeso 6:12) Iyo, dawa ngani sinurulo na ninda an mga libro, pinupurbaran pa man giraray kan mga demonyo na gibuhan sinda nin maraot. Kaya ano pa an kaipuhan nindang gibuhon? Sinabi sa sainda ni Pablo: “Kuanon nindo an dakulang kalasag nin pagtubod, na paagi kaiyan masisigbo [o, masasangga] nindo an gabos na nagkakalayong mga pana kan saro na maraot.” (Efeso 6:16) Kun paanong napoprotektaran kan kalasag an suldados pag nasa ralaban, poprotektaran man kita kan satong pagtubod. Kun lubos kitang nagtitiwala na poprotektaran kita ni Jehova, malalabanan ta si Satanas asin an mga demonyo.—Mateo 17:20.

16. Paano ta pa mas mapapakusog an satong pagtubod ki Jehova?

¹⁶ Paano ta pa mas mapapakusog an satong pagtubod ki Jehova? Kaipuhan niyatong aroaldaw na basahon an Bibliya saka pirming magtiwala na poprotektaran kita ni Jehova.  Kun makusog an pagtitiwala ta ki Jehova, mayong magigibo sato si Satanas asin an mga demonyo.—1 Juan 5:5.

17. Ano pa an puwedeng magin proteksiyon ta laban sa mga demonyo?

¹⁷ Ano pa an kaipuhan gibuhon kan mga Kristiyano sa Efeso? Nakaistar sinda sa sarong siyudad na lakop an demonismo. Kaya sinabi sa sainda ni Pablo: “Padagos kamong mamibi sa lambang kamugtakan.” (Efeso 6:18) Kaipuhan nindang hagadon pirmi ki Jehova na protektaran sinda. Kumusta man kita? Nabubuhay man kita sa kinaban na lakop an demonismo. Kaya kaipuhan man niyatong hagadon ki Jehova na protektaran kita, asin kaipuhan tang gamiton an saiyang pangaran pag namimibi kita. (Basahon an Talinhaga 18:10.) Kun padagos niyatong hahagadon an tabang ni Jehova na iligtas kita ki Satanas, sisimbagon ni Jehova an mga pamibi ta.—Salmo 145:19; Mateo 6:13.

18, 19. (a) Paano ta madadaog si Satanas asin an mga demonyo? (b) Anong hapot an sisimbagon sa masunod na kapitulo?

¹⁸ Kun hahalion ta an gabos na bagay sa buhay ta na may koneksiyon sa demonismo asin magtitiwala na poprotektaran kita ni Jehova, malalabanan ta si Satanas asin an mga demonyo. Dai kita dapat matakot sainda. (Basahon an Santiago 4:7, 8.) Mas makapangyarihan na marhay si Jehova kisa sa mga demonyo. Pinadusahan sinda ni Jehova kan panahon ni Noe, asin paparaon niya sinda pag-abot nin panahon. (Judas 6) Tandaan, dai kita nagsosolo sa laban. Ginagamit ni Jehova an saiyang mga anghel para protektaran kita. (2 Hade 6:15-17) Makakapagtiwala kita na sa tabang ni Jehova, madadaog ta si Satanas asin an mga demonyo.—1 Pedro 5:6, 7; 2 Pedro 2:9.

¹⁹ Pero kun si Satanas asin an mga demonyo an dahilan kan grabeng pagsakit, taano ta dai pa sinda pinapara kan Diyos? Sisimbagon an hapot na ini sa masunod na kapitulo.