1, 2. Ano an ihinayag ni apostol Juan manongod sa huring banggi na si Jesus nakaibanan kan mga apostol?

 IDINUDUTDOT sa tinta nin sarong gurang nang lalaki an saiyang pansurat, asin kadakol kan nagigirumdoman nia. An saiyang ngaran Juan, asin sia an huring nabubuhay pang apostol ni Jesu-Cristo. Ngonyan na mga 100 anyos na, ginigirumdom ni Juan an sarong dai nanggad malilingawan na banggi kaidtong mga pitong dekada na an nakaagi​—an huring banggi na si Jesus nakaibanan nia asin kan saiyang mga kapwa apostol bago Sia magadan. Sa paggiya sa saiya kan banal na espiritu nin Dios, nagirumdoman asin ikinasurat ni Juan an mga pangyayari sa detalyadong marhay na paagi.

² Kan bangging iyan, malinaw na sinabi ni Jesus na sia madali nang gadanon. Si Juan sana an naghayag kan dahelan kun taano ta sinabi ni Jesus na sia maagi sa siring na makologon na kagadanan: “Tangani na maaraman kan kinaban na namomotan ko an Ama, kun ano an itinaong togon sako kan Ama, iyan an ginigibo ko. Buhat kamo, humale na kita digdi.”​—Juan 14:31.

 3. Paano ipinaheling ni Jesus na namomotan nia an saiyang Ama?

³ “Namomotan ko an Ama.” Mayo na nin ibang mas mahalaga pa dian para ki Jesus. Bako man huling pigparaorootro niang sabihon iyan. Sa katunayan, sa rekord kan Biblia, sa Juan 14:31 sana niato maheheling na direktang marhay na ipinahayag ni Jesus an saiyang pagkamoot sa saiyang Ama. Pero, namuhay si Jesus sono sa mga tataramon na iyan. An saiyang pagkamoot ki Jehova heling-heling sa aroaldaw. An kosog nin boot ni Jesus, an saiyang pagkuyog, asin an saiyang pakatagal gabos ebidensia kan saiyang pagkamoot sa Dios. An bilog niang ministeryo motibado kan pagkamoot na ini.

4, 5. Anong klaseng pagkamoot an pinapaoswag kan Biblia, asin ano an masasabi manongod sa pagkamoot ni Jesus ki Jehova?

⁴ Ngonyan, tibaad iniisip nin nagkapira na an pagkamoot sarong maluyang kualidad. Tibaad naiisip ninda an manongod sa mga berso nin pagkamoot asin kundiman, tibaad pati ngani an  pagkalula huli sa kaogmahan na kun beses konektado sa romantikong pagkamoot. Talagang tinotokar kan Biblia an manongod sa romantikong pagkamoot, pero sa mas may dignidad na paagi na bakong arog kan lakop na ginigibo ngonyan. (Talinhaga 5:15-21) Pero, mas tinatawan nin atension kan Tataramon nin Dios an pagtokar sa saro pang klase nin pagkamoot. An pagkamoot na ini bako sanang makosogon na pagmate o emosyon na madaling mawara; ni iyan sarong relasyon na mabublay asin isip sana an ginagamit. Kalabot dian an puso sagkod an isip. An siring na pagkamoot naggigikan sa kairairaroming pagkatawo, iyan ginigiyahan asin kaoyon nin halangkawon na mga prinsipyo, asin ipinapaheling iyan sa positibong paghiro. Iyan bako nanggad na kalokohan sana. “An pagkamoot nungka na nasusudya,” an sabi kan Tataramon nin Dios.​—1 Corinto 13:8.

⁵ Sa gabos na tawong nabuhay kasuarin man, si Jesus an pangenot na namomoot ki Jehova. Mayo nin siisay man na nakalabi ki Jesus sa pag-otob sa mga tataramon na kinotar nia mismo bilang an nakakalabi sa gabos na pagboot nin Dios: “Kamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Marcos 12:30) Paano napatalubo ni Jesus an siring na pagkamoot? Paano nia napagdanay na makosog an saiyang pagkamoot sa Dios kan panahon na sia nasa daga? Asin paano niato sia maaarog?

6, 7. Paano niato naaaraman na an ilinaladawan sa Talinhaga 8:22-31 iyo an Aki nin Dios, bakong an kualidad na kadonongan?

⁶ Naprobaran na daw nindong gumibo nin sarong proyekto kaiba nin sarong katood asin nanompongan nindo na bilang resulta kaiyan kamong duwa nagin mas marahay asin mas dayupot na magkatood? An nakakaogmang eksperyensiang iyan puedeng makatabang saindo na masabotan an pagkamoot na tuminalubo sa pag-oltanan ni Jehova asin kan saiyang bugtong na Aki. Parate niatong nasasambitan an Talinhaga 8:30, alagad siyasaton niatong marhay an bersikulong iyan base sa konteksto kaiyan. Sa bersikulo 22 sagkod 31, maheheling niato an ipinasabong na paglaladawan  sa personipikasyon nin kadonongan. Paano niato naaaraman na an mga tataramon na ini nanonongod sa Aki nin Dios?

⁷ Sa bersikulo 22, an kadonongan nagsasabi: “Si Jehova mismo an guminibo sa sako bilang kapinonan kan saiyang dalan, an pinakaenot sa saiyang mga nagibo kan suanoy na mga panahon.” Bakong an kualidad na kadonongan an seguradong kalabot digdi, huli ta iyan dai noarin man ‘ginibo.’ Dai iyan noarin man nagkaigwa nin kapinonan huling si Jehova nag-eeksister sa gabos na panahon asin sia madonong sa gabos na panahon. (Salmo 90:2) Minsan siring, an Aki nin Dios iyo “an panganay sa gabos na linalang.” Sia ginibo, o linalang; sia an kaenot-enote sa gabos na ginibo ni Jehova. (Colosas 1:15) An Aki naenot pang mag-eksister kisa sa daga asin sa kalangitan, siring kan isinasaysay sa Talinhaga. Asin bilang an Tataramon, an mismong Representante sa Pagtaram nin Dios, sia an sangkap na kapahayagan kan kadonongan ni Jehova.​—Juan 1:1.

 8. Ano an ginigibo kaidto kan Aki durante kan saiyang buhay bago nagin tawo, asin ano an tibaad maisip niato kun naghahanga kita sa mga linalang?

⁸ Ano an ginigibo kaidto kan Aki durante kan halawigon na panahon bago sia nagdigdi sa daga? An bersikulo 30 nagsasabi sa sato na sia yaon sa kataed nin Dios bilang “pangenot na trabahador.” Ano an boot sabihon kaiyan? An Colosas 1:16 nagpapaliwanag: “Paagi sa saiya an gabos na iba pang bagay linalang sa kalangitan asin sa daga . . . An gabos na iba pang bagay linalang paagi sa saiya asin para sa saiya.” Kaya bilang Kaglalang, ginamit ni Jehova an saiyang Aki, an Pangenot na Trabahador, sa paggibo kan gabos na iba pang linalang​—poon sa espiritung mga linalang sa langit sagkod sa grabe kadakulang pisikal na uniberso, pati na an daga kabale an makangangalas na laen-laen na tanom asin hayop, saka an pinakahalangkaw na klaseng linalang sa daga: an katawohan. Sa nagkapirang bagay, an pagtinabangan na ini kan Ama asin kan Aki puede niatong iagid sa sarong arkitekto na nagtatrabaho kaiba nin sarong paratogdok, o kontratista, na iyo an nagtotogdok nin eksakto sono sa mga disenyo na ekspertong ginibo kan arkitekto. Kun nakakamate kita nin may pagkangirhat na paggalang sa ano man na aspekto nin paglalang, an totoo inoomaw niato an Dakulang Arkitekto. (Salmo 19:1) Minsan siring, tibaad magirumdoman man niato an halawig asin maogmang pagtinabangan kan Kaglalang asin kan saiyang “pangenot na trabahador.”

9, 10. (a) Ano an nagpakosog sa bogkos nin pagkamoot ni Jehova asin kan saiyang Aki? (b) Ano an puedeng magpakosog sa bogkos nin pagkamoot nindo sa saindong langitnon na Ama?

 ⁹ Kun an duwang tawong bakong sangkap pirmeng nagtatrabaho na magkaibanan, kun beses nadedepisilan sindang magkasundo. Bakong arog kaiyan si Jehova asin an saiyang Aki! An Aki nagtrabaho sa laog nin halawigon na panahon kaiba kan Ama asin ‘naogma sa atubangan nia sa gabos na panahon.’ (Talinhaga 8:30) Iyo, sia naogmang marhay na kaibanan sia kan saiyang Ama, asin pareho an namamatean ninda. Naturalmente, an Aki orog pang nagin kapareho kan saiyang Ama, na nakanood na arogon an mga kualidad nin Dios. Kun siring, bakong makangangalas na nagin makosog na marhay an bogkos nin pagkamoot kan Ama asin kan Aki! Angay sanang apodon iyan na an pinakahaloy asin pinakamakosog na bogkos nin pagkamoot sa bilog na uniberso.

¹⁰ Pero, ano daw an puedeng magin kahulogan kaiyan para sa sato? Tibaad isipon nindo na nungka kamong magkakaigwa nin arog kaiyan na bogkos nin pagkamoot ki Jehova. Totoo, mayo sa sato an igwa nin halangkaw na kamugtakan na arog kan Aki. Minsan siring, igwa nanggad kita nin pambihirang oportunidad. Girumdomon, orog na duminayupot si Jesus sa saiyang Ama paagi sa pagtrabaho na kaibanan Nia. Mamomoton na inaalok sa sato ni Jehova an oportunidad na magin “mga kapwa trabahador” nia. (1 Corinto 3:9) Mantang sinusunod niato an halimbawa ni Jesus sa ministeryo, maninigo na pirme niatong isaisip na kita mga kapwa trabahador nin Dios. Sa siring, orog pang minakosog an bogkos nin pagkamoot na nagpapangyari sa sato na magin kasaro ni Jehova. Igwa pa daw nin maorog dian na pribilehio?

11-13. (a) Taano ta nakakatabang na isipon na sarong buhay na bagay an pagkamoot, asin paano pinagdanay na makosog kan hoben na si Jesus an saiyang pagkamoot ki Jehova? (b) Paano ipinaheling kan Aki nin Dios an saiyang interes na makanood ki Jehova, bago magdigdi sa daga saka kan magin tawo sia kan huri?

¹¹ Sa dakol na paagi, nakakatabang na isipon na sarong buhay na bagay an pagkamoot sa satong puso. Arog nin sarong magayon na masitas sa harong, an pagkamoot kaipuhan na atamanon asin asikasohon  tangani na iyan tumalubo asin tumubang. Kun papabayaan asin dai aatamanon, iyan maluluyos asin magagadan. Dai ipinasipara sana ni Jesus an saiyang pagkamoot ki Jehova. Pinagdanay nia iyan na makosog asin buhay sa bilog na panahon na yaon sia digdi sa daga. Helingon niato kun paano.

¹² Isipon giraray nindo an pangyayari kan an hoben na si Jesus magtaram sa templo sa Jerusalem. Girumdoma an saiyang mga tataramon sa saiyang nahahadit na mga magurang: “Taano ta kaipuhan nindo akong hanapon? Dai kamo nakakaaram na ako dapat na nasa harong kan sakong Ama?” (Lucas 2:49) Bilang sarong aki, minalataw na si Jesus mayo pa nin ano man na nagigirumdoman manongod sa saiyang buhay bago nagin tawo. Pero, makosogon an pagkamoot nia sa saiyang Ama, si Jehova. Aram nia na an siring na pagkamoot natural sana na ikakapahayag sa pagsamba. Kaya mayo nin ibang lugar digdi sa daga na nagustohan ni Jesus kisa sa harong kan saiyang Ama para sa dalisay na pagsamba. Gustohon niang yaon sia dian asin habo niang maghale. Dugang pa, bako siang daing girong na nagmamasid sana. Gustong-gusto niang makanood manongod ki Jehova asin ipahayag kun ano an aram nia. An siring na saboot dai nagpoon kan sia 12 anyos, ni natapos man iyan sa edad na iyan.

¹³ Sa saiyang buhay kaidto bago sia nagin tawo, an Aki gustong-gustong makanood sa saiyang Ama. An sarong hula na nakasurat sa Isaias 50:4-6 naghahayag na tinawan ni Jehova nin espesyal na pagtotokdo an saiyang Aki mapadapit sa saiyang papel bilang Mesiyas. Minsan ngani kaiba sa nanodan nia sa pagtotokdo na iyan an manongod sa nagkapira sa mga kasakitan na mangyayari sa Linahidan ni Jehova, an Aki gustong-gustong makanood. Kan huri, kan yaon na si Jesus digdi sa daga asin magin nasa edad na, gustong-gusto pa man giraray niang magduman sa harong kan saiyang Ama saka makikabtang sa pagsamba asin sa pagtotokdo na gustong maheling ni Jehova na ginigibo sa saiyang harong. Sa siring, isinasaysay kan Biblia na si Jesus dayaday na presente sa templo asin sa sinagoga. (Lucas 4:16; 19:47) Kun gusto niatong papagdanayon na buhay asin makosog an satong pagkamoot ki Jehova, kaipuhan na magin mahigos kita sa pag-atender sa Kristianong mga pagtiripon, na dian niato sinasamba si Jehova saka pinapararom an satong kaaraman asin pagpahalaga sa saiya.

14, 15. (a) Taano ta gusto ni Jesus na magsolosolo? (b) Paano naghahayag nin kadayupotan asin paggalang an mga pamibi ni Jesus sa saiyang Ama?

 ¹⁴ Pinagdanay man na makosog ni Jesus an saiyang pagkamoot ki Jehova paagi sa pamimibi nin regular. Minsan ngani sia makikatood asin mahilig makiibaiba, risang marhay na mahalaga sa saiya an pagsolosolo. Halimbawa, an Lucas 5:16 nagsasabi: “Padagos siang nagsolosolo sa mga desierto asin namimibi.” Kaagid kaiyan, an Mateo 14:23 nagsasabi: “Sa kahurihurihi, kan mapahale na an mga kadaklan, solo siang nagtukad sa bukid tanganing mamibi. Dawa banggi na, yaon sia duman na solo-solo.” Ginusto ni Jesus na magsolosolo digdi asin sa iba pang kamugtakan, bakong huli ta sia ermitanyo o habo niang makaibanan an iba, kundi huling gusto nia na solong makaibanan si Jehova, na makipag-olay nin daing pag-alangan sa saiyang Ama sa pamibi.

¹⁵ Kun sia namimibi, kun beses ginagamit ni Jesus an ekspresyon na “Abba, Ama.” (Marcos 14:36) Kan panahon ni Jesus, an “Abba” sarong dayupot na tataramon para sa “ama,” sarong tataramon na ginagamit sa laog nin pamilya. Sa parate kaiba iyan sa enot na mga tataramon na nanonodan nin sarong aki. Pero, magalang iyan. Minsan ngani an tataramon na iyan naghahayag kan kadayupotan kan Aki na nakikipag-olay sa saiyang namomotan na Ama, iyan nagpaparisa man nin hararom na paggalang sa autoridad ni Jehova bilang ama. Maheheling niato an kadayupotan asin paggalang na iyan sa bilog na isinurat na mga pamibi ni Jesus. Halimbawa, sa Juan kapitulo 17, isinurat ni apostol Juan an halawig asin odok sa pusong pamibi ni Jesus sa ultimong banggi Nia. Talagang nakakapahiro sa boot na analisaron niato an pamibing iyan asin mahalagang marhay na arogon niato iyan​—siempre, bakong paagi sa pag-otro sa mga tataramon ni Jesus kundi sa paghanap nin mga paagi na makipag-olay nin gikan sa puso sa satong langitnon na Ama sa pinakaparateng magigibo niato. Sa paggibo kaiyan, mapapagdanay niato na buhay asin makosog an satong pagkamoot sa saiya.

16, 17. (a) Paano ipinahayag ni Jesus sa tataramon an pagkamoot nia sa saiyang Ama? (b) Paano ilinadawan ni Jesus an pagigin buka an palad kan saiyang Ama?

¹⁶ Siring sa nasabi niato kasubago, si Jesus dai paorootrong nagsabing “Namomotan ko an Ama.” Minsan siring, dakol na beses na talagang ipinahayag ni Jesus sa tataramon an pagkamoot nia sa saiyang  Ama. Paano? Si Jesus mismo nagsabi: “Hayag takang inoomaw, Ama, Kagurangnan kan langit asin daga.” (Mateo 11:25) Kan pinag-aadalan an Kabtang 2 kan librong ini, naheling niato na gustohon na marhay ni Jesus na omawon an saiyang Ama paagi sa pagtabang sa mga tawo na mamidbid ninda Sia. Halimbawa, inagid nia si Jehova sa sarong ama na gustong-gusto nanggad na patawadon an saiyang sumbikalan na aki kaya hinalat nia an pag-abot kan nagsosolsol na hoben na lalaki, naheling nia ini sa harayo, asin duminalagan sia tanganing sabaton asin kugoson ini. (Lucas 15:20) Siisay na makakabasa kan tekstong iyan an dai mapapahiro kan pagkaladawan ni Jesus sa pagkamoot asin pagpapatawad ni Jehova?

¹⁷ Parateng inoomaw ni Jesus an saiyang Ama huli sa Saiyang pagigin buka an palad. Ginamit nia an halimbawa nin bakong sangkap na mga magurang tanganing ipaheling na makakasierto nanggad kita na itatao sa sato gabos kan satong Ama an banal na espiritu na kaipuhan niato. (Lucas 11:13) Nagtaram man si Jesus manongod sa paglaom na may kabootan na marhay na inaalok kan Ama. May paghidaw na ilinadawan ni Jesus an saiya mismong paglaom na ikabalik sa dating kamugtakan sa kataed kan saiyang Ama sa langit. (Juan 14:28; 17:5) Sinabi nia sa saiyang mga parasunod an manongod sa paglaom na itinao ni Jehova sa “sadangoton na aripompon” ni Cristo​—an mag-erok sa langit asin mamahala kaiba kan Mesiyanikong Hade. (Lucas 12:32; Juan 14:2) Asin rinanga nia kan paglaom na mabuhay sa Paraiso an sarong madali nang magadan na paragibo nin maraot. (Lucas 23:43) Siertong nakatabang ki Jesus na mapagdanay na makosog an saiyang pagkamoot ki Jehova an pagtaram manongod sa kadakulaan kan pagigin buka an palad kan saiyang Ama sa mga paaging ini. Naeksperyensiahan kan dakol sa mga parasunod ni Cristo na mayo nin orog na makakapakosog kan saindang pagkamoot ki Jehova o kan saindang pagtubod sa saiya kundi an pagtaram manongod sa saiya asin sa paglaom na itinatao nia para sa mga namomoot sa saiya.

18. Ano an pinakaimportanteng paagi na kaipuhan niatong sunodon si Jesus, asin taano?

¹⁸ Sa gabos na paagi na kaipuhan niatong sunodon si Jesus, mayo nin mas importante kisa digdi: Kamotan niato si Jehova sa bilog  niatong puso, kalag, isip, asin kosog. (Lucas 10:27) An siring na pagkamoot dai nasosokol paagi sana sa kun gurano kakosog na namamatean niato iyan kundi sa pagigin totoo kan satong mga gibo. Si Jesus dai nakontento na makamate sana nin pagkamoot sa saiyang Ama ni na magsabi sanang, “Namomotan ko an Ama.” Sia nagsabi: “Tangani na maaraman kan kinaban na namomotan ko an Ama, kun ano an itinaong togon sako kan Ama, iyan an ginigibo ko.” (Juan 14:31) Nagsahot si Satanas na mayo nin tawo na maglilingkod ki Jehova huli sa daing kaimotan na pagkamoot. (Job 2:4, 5) Tanganing ikatao an pinakamarahay na simbag na posible sa grabeng pagpakaraot ni Satanas, may kosog nin boot na naghiro si Jesus asin ipinaheling nia sa kinaban kun gurano an pagkamoot nia sa saiyang Ama. Sia nagkuyog sagkod pa ngani sa pagsakripisyo kan saiyang buhay. Masunod daw kamo ki Jesus? Ipapaheling daw nindo sa kinaban na talagang namomotan nindo si Jehova Dios?

19, 20. (a) Sa anong importanteng mga dahelan gusto niatong magin regular sa pag-atender sa Kristianong mga pagtiripon? (b) Puede niatong mansayon bilang ano an satong personal na pag-adal, paghorophorop, asin pamibi?

¹⁹ Igwa kita nin hararom na espirituwal na pangangaipo na ipaheling an siring na pagkamoot. Sa siring, inareglo ni Jehova na sumamba kita sa paagi na naaataman asin napapakosog an satong pagkamoot sa satong Ama. Kun kamo nag-aatender sa Kristianong mga pagtiripon, pagmaigotan na girumdomon na yaon kamo dian tanganing sambahon an saindong Dios. Kaiba sa mga aspekto kan pagsambang iyan an pag-ayon sa odok sa pusong pamibi, pag-awit nin mga awit nin pag-omaw, atentong paghinanyog, asin pagpartisipar kun posible. An siring na mga pagtiripon nagtatao man sa saindo nin oportunidad na parigonon an boot kan mga kapwa Kristiano. (Hebreo 10:24, 25) An pagsamba ki Jehova nin regular sa Kristianong mga pagtiripon makakatabang sa saindo na orog pang kumosog an saindong pagkamoot sa Dios.

²⁰ Kapareho nanggad kaiyan an masasabi dapit sa personal na pag-adal, paghorophorop, asin pamimibi. Isipon nindo ini bilang mga paagi tanganing solo nindong makaibanan si Jehova. Mantang pinag-aadalan nindo an nasusurat na Tataramon nin Dios asin hinohorophorop iyan, ipinapasabot sa saindo ni Jehova an  saiyang kaisipan. Mantang kamo namimibi, ipinapahayag nindo sa saiya an nasa puso nindo. Girumdomon na bako sanang paghagad sa Dios an kabale sa pamibi. An pamibi saro man na oportunidad na pasalamatan si Jehova sa mga bendisyon na inako nindo asin na omawon sia huli sa makangangalas niang mga gibo. (Salmo 146:1) Saro pa, an pag-omaw ki Jehova sa publiko na may kagayagayahan asin entusiasmo iyo an pinakamarahay na paagi na pasalamatan si Jehova asin ipaheling na namomotan nindo sia.

21. Gurano kaimportante an pagkamoot ki Jehova, asin ano an pag-oolayan sa masurunod na kapitulo?

²¹ An pagkamoot sa Dios an pinakaliabe sa daing sagkod na kaogmahan nindo. Iyan sana kutana an kaipuhan ni Adan asin Eva tanganing magin mapanggana​—asin iyan an sarong bagay na dai ninda napatalubo. Iyan an pinakaimportanteng bagay na kaipuhan nindo tanganing mapangganahan an ano man na pagbalo sa pagtubod, ikasikwal an ano man na sugot, matagalan an ano man na kasakitan. Iyan an pinakamahalagang kabtang kan pagigin parasunod ni Jesus. Siempre, an pagkamoot sa Dios konektado sa pagkamoot sa satong kapwa tawo. (1 Juan 4:20) Sa masurunod na kapitulo, sisiyasaton niato kun paano ipinaheling ni Jesus an saiyang pagkamoot sa mga tawo. Sa sunod na kapitulo, pag-oolayan niato kun taano ta kadakol na tawo an nakamate na madaling dolokon si Jesus.