1. Ano sa parati an sinasabi kan Bibliya mapadapit sa disiplina?

PAG nadadangog mo an tataramon na “disiplina,” ano an naiisip mo? Tibaad maisip mo tulos an padusa o kastigo, pero bako lang iyan an kaiba diyan. Marahay an sinasabi kan Bibliya mapadapit sa disiplina. Kun minsan, sinasambit iyan kaiba nin kaaraman, kadunungan, pagkamuot, asin buhay. (Tal. 1:2-7; 4:11-13, NW) Huli iyan ta an disiplina nin Diyos sarong kapahayagan kan saiyang pagkamuot sa sato asin kan saiyang pagmawot na makamtan ta an buhay na daing katapusan. (Heb. 12:6) Puwedeng may kaibang pagsagwi an saiyang pagdisiplina, pero nungka iyan na nakakaraot o maringis. Sa katunayan, an kahulugan kan “disiplina” panginot nang nanunungod sa pagtutukdo, arog kan ginigibo nin sarong magurang sa saiyang namumutan na aki.

2, 3. Paano kalabot sa disiplina an pagtukdo asin pagpadusa? (Hilingon an ritrato sa itaas.)

² Pag-isipan an halimbawang ini: Nagkakawat nin bola an aking si Johnny asin pinapauntol-untol niya iyan sa laog kan harong. Sinabi kan saiyang ina: “Johnny, aram mo man bagang dai ka dapat magkawat nin bola sa laog kan harong! ’Baad makapasa ka.” Pero dai siya nagsunod sa sinabi kan saiyang ina, asin nagpadagos lang sa pagkawat nin bola. Dangan aksidente niyang napasa an flower vase. Paano siya didisiplinahon kan saiyang ina? Puwede niyang tukduan ini asin tawan nin  kinakaipuhan na padusa. Sa pagtukdo niya ki Johnny, puwede niyang ipagirumdom kun taano ta sala an ginibo kaini. Gusto niyang masabutan ni Johnny kun taano ta sarong kadunungan an pagsunod sa mga magurang, na ipinapaliwanag na kaipuhan asin rasonable an mga susundon na itinatao ninda. Dangan, tanganing maiduon niya an mga itinukdo niya, tibaad tawan niya ini nin angay na padusa. Halimbawa, puwede niyang kuanon asin itago nguna an bola sa laog nin pirang panahon. Paagi kaiyan, maitatadom sa isip ni Johnny na an pagsuway may kasunod na konsekwensiya.

³ Bilang miyembro kan Kristiyanong kongregasyon, parte kita kan pamilya nin Diyos. (1 Tim. 3:15) Kaya, iginagalang ta an deretso ni Jehova na magbugtak nin mga pamantayan asin magtao nin mamumuton na disiplina pag binalga ta iyan. Saro pa, kun an satong paggawi magkaigwa nin maraot na konsekwensiya, maipapagirumdom sa sato kan saiyang disiplina kun gurano kaimportante an pagkuyog sa satong Ama sa langit. (Gal. 6:7) Nagmamalasakit na marhay sa sato an Diyos asin gusto niya kitang makalikay sa makulog na mga konsekwensiya.—1 Ped. 5:6, 7.

4. (a) Anong klaseng pagsasanay an binebendisyunan ni Jehova? (b) Ano an pag-uulayan niyato sa artikulong ini?

⁴ Paagi sa pagtao nin disiplina na basado sa Kasuratan, puwede tang matabangan an satong aki o an tinutukduan ta sa Bibliya na maabot an pasuhan na magin parasunod ni Cristo. An Tataramon nin Diyos, na iyo an panginot na kasangkapan ta sa pagsasanay, nakakatabang sa sato na ‘magdisiplina uyon sa matanos na pamantayan.’ Kaya puwede tang matabangan an satong aki o tinutukduan sa Bibliya na ‘utubon an gabos na bagay na ipinagbuot sa sato ni Jesus.’ (2 Tim. 3:16; Mat. 28:19, 20) Binebendisyunan ni Jehova an arog kaining pagsasanay para andamon an mga tinutukduan na gumibo nin dakul pang disipulo ni Cristo. (Basahon an Tito 2:11-14.) Pag-ulayan ta ngunyan an simbag sa tulong mahalagang hapot: (1) Paano nahihiling sa pagdisiplina nin Diyos an saiyang pagkamuot sa sato? (2) Ano an manunudan niyato sa mga dinisiplina nin Diyos kaidto? (3) Pag nagdidisiplina kita, paano ta maaarog si Jehova asin an saiyang Aki?

5. Sa anong mga paagi nahihiling sa disiplina ni Jehova na namumutan niya kita?

⁵ Huling namumutan kita ni Jehova, itinatanos niya kita, tinutukduan, asin sinasanay tanganing magdanay kita sa saiyang pagkamuot asin sa dalan pasiring sa buhay. (1 Juan 4:16) Nungka niya kitang minemenos o iniinsulto, kaya dai ta namamatian na mayo kitang halaga. (Tal. 12:18) Imbes, tinatawan kita ni Jehova nin dignidad. Nagpopokus siya sa satong marahay na mga kuwalidad asin iginagalang an satong libertad na magdesisyon. Arog daw kaiyan an pagmansay mo sa disiplina nin Diyos, iyan man hali sa saiyang Tataramon, sa basado sa Bibliyang mga publikasyon, sa Kristiyanong mga magurang, o sa mga elder? An totoo, inaarog kan mga elder an pagkamuot ni Jehova sa sato pag hinihinguwa nindang itanos kita sa mahuyo asin mamumuton na paagi pag “napapasala na” kita asin tibaad dai ta iyan narerealisar.—Gal. 6:1.

6. Paano nahihiling sa disiplina an pagkamuot nin Diyos dawa kun may kaiba iyan na mga restriksiyon?

⁶ Pero kun minsan, tibaad bako lang basta pagsadol o pagtanos an kaipuhan. Kun an saro makagibo nin magabat na kasalan, tibaad kaipuhan na halian siya nin mga pribilehiyo sa kongregasyon. Dawa kun iyan an mangyari, mahihiling sa itinaong disiplina an pagkamuot ni Jehova sa sato. Halimbawa, kun an saro halian nin mga pribilehiyo, puwedeng matabangan siya kaiyan na marealisar kun gurano kaimportante na urog siyang magpokus sa personal na pag-adal nin Bibliya, paghurop-hurop, asin pagpamibi. Paagi kaiyan, mapapakusog an saiyang espirituwalidad. (Sal. 19:7) Pag-abot nin panahon, puwedeng maibalik sa saiya an mga pribilehiyo niya. Mahihiling dawa sa areglo nin pagtitiwalag an pagkamuot ni Jehova huling napoprotektaran kaiyan an kongregasyon sa maraot na mga impluwensiya. (1 Cor. 5:6, 7, 11) Asin huling pirming makatanusan an disiplinang itinatao nin Diyos, an pagtitiwalag makakatabang  sa nagkasala na masabutan kun gurano kagabat an saiyang kasalan asin mapahiro siyang magsulsol.—Gibo 3:19.

7. Siisay si Sebna, asin anong maraot na ugali an nagpuon na mahiling sa saiya?

⁷ Tanganing iduon an kahalagahan kan disiplina, pag-ulayan ta an duwang indibidwal na dinisiplina ni Jehova: si Sebna, na nabuhay kan panahon ni Hading Hezekias, asin si Graham, na sarong brother sa panahon niyato. Bilang mayordomo na ‘pinaniwalaan kan harong’—na minalataw na ki Hezekias—dakula an awtoridad ni Sebna. (Isa. 22:15) Pero nakakamundo ta nagi siyang mapalangkaw, asin nagmawot nin kaumawan para sa saiyang sadiri. Nagpagibo pa ngani siya nin magarbong lulubngan para sa sadiri niya, asin nagsakay sa ‘mamuraway na mga karwahe’!—Isa. 22:16-18.

8. Paano dinisiplina ni Jehova si Sebna, asin ano an resulta kaiyan?

⁸ Huling nagmawot si Sebna nin kaumawan para sa saiyang sadiri, ‘hinali siya nin Diyos sa saiyang katungdan’ asin isinalida sa saiya si Eliakim. (Isa. 22:19-21, BPV *) Nangyari ini kan naghuhuma an hadi kan Asiria na si Sennacherib na sasalakayon niya an Jerusalem. Pakalihis nin pirang panahon, nagsugo an hading iyan nin haralangkaw na opisyal pasiring sa Jerusalem, kaiba an sarong dakulang hukbo, tanganing paluyahon an buot kan mga Judio asin takuton si Hezekias para sumuko ini. (2 Ha. 18:17-25) Isinugo si Eliakim tanganing makipag-ulay sa mga opisyal, pero dai siya solong nagduman. May kaiba siyang duwa—an saro iyo si Sebna, na naglilingkod na bilang sekretaryo. Bako daw na ipinaparisa kaini na si Sebna dai naghinanakit asin dai naanggot kundi mapakumbabang inako an mas hababang posisyon? Ano an manunudan niyato sa istoryang ini? Pag-ulayan ta an tulo.

9-11. (a) Anong mahalagang mga leksiyon an manunudan ta sa eksperyensiya ni Sebna? (b) Paano ka napakusog kan pagtratar ni Jehova ki Sebna?

⁹ Inot, nawara ki Sebna an saiyang posisyon. Ipinapagirumdom sa sato kan eksperyensiya niya na “an pagigin orgulyoso sinusundan nin pagbagsak, asin an kapalangkawan sinusundan nin pagkatumba.” (Tal. 16:18, NW) Kun may mga pribilehiyo ka sa kongregasyon asin iniisip kan iba na importante ka, hihinguwahon mo daw na magdanay na mapakumbaba? Itatao mo daw ki Jehova an kaumawan sa mga abilidad na igwa ka o sa marahay na mga bagay na nagibo mo? (1 Cor. 4:7) Si apostol Pablo nagsurat: “Sinasabihan ko an lambang saro diyan sa saindo na dai magin sobra an hiling sa sadiri, kundi ipahiling nindo na igwa kamo nin tultol na isip.”—Roma 12:3.

¹⁰ Ikaduwa, posibleng ipinapahiling ni Jehova sa magabat na pagdisiplina niya ki Sebna na naniniwala siyang puwede pa ining magbago. (Tal. 3:11, 12) Marahayon na halimbawa nanggad iyan  para sa mga nawaran nin mga pribilehiyo sa paglilingkod sa kongregasyon nin Diyos ngunyan! Imbes na maanggot o maghinanakit, lugod na padagos sindang maglingkod sa Diyos sa abot kan saindang makakaya sa bago nindang kamugtakan, na ibinibilang na kapahayagan kan pagkamuot ni Jehova an pagdisiplina. Tandaan, kun magpapakumbaba kita, an satong Ama dai kita ibibilang na mayo nang pag-asang magbago. (Basahon an 1 Pedro 5:6, 7.) An mamumuton na disiplina nin Diyos sarong paagi na minomolde niya kita, kaya lugod na magdanay kitang madaling moldehon sa saiyang kamot.

¹¹ Ikatulo, may manunudan na mahalagang leksiyon sa pagtratar ni Jehova ki Sebna an mga tinawan nin awtoridad na magtao nin disiplina, arog nin mga magurang asin mga elder. Ano iyan? Totoo na ipinapahiling kan pagdisiplina ni Jehova na ikinakaungis niya an maraot, pero ipinapahiling man kaiyan na nagmamalasakit siya sa nagkasala. Kun saro kang magurang o elder asin kaipuhan mong magtao nin disiplina, aarugon mo daw si Jehova, na ikinakaungis an maraot pero hinihiling man an marahay na mga kuwalidad kan saimong aki o kapagtubod?—Jud. 22, 23.

12-14. (a) Ano an reaksiyon kan iba sa disiplina nin Diyos? (b) Paano an Tataramon nin Diyos nakatabang sa sarong brother na mabago an saiyang sabuot, asin ano an resulta kaiyan?

¹² Nakakamundo ta pagkatapos mag-ako nin disiplina, may mga tawong mas nagpokus sa kulog kan disiplina asin irinarayo pa ngani an sadiri sa Diyos asin sa saiyang banwaan. (Heb. 3:12, 13) Pero nangangahulugan daw iyan na mayo na sindang pag-asang matabangan asin magbago? Pag-isipan an eksperyensiya ni Graham na natiwalag, pero pag-abot nin panahon nakabalik, tapos nagin inaktibo. Pakalihis nin pirang taon, nakiulay siya sa sarong elder na nakipag-amigo sa saiya na tukduan siya sa Bibliya.

¹³ Nag-istorya an elder: “Nasakitan si Graham na mahali an pagigin orgulyoso niya. Mapagkritika siya sa mga elder na nagkapot kan kaso niya. Kaya sa pirang magkakasunod na pag-adal mi, pinag-ulayan mi an mga teksto mapadapit sa pagigin orgulyoso asin an mga epekto kaiyan. Nagpuon nang mahiling nin malinaw ni Graham an sadiri niya sa arog-salming na Tataramon nin Diyos, asin dai niya nagustuhan an nahiling niya! Makangangalas an nagin epekto kaiyan! Pagkatapos niyang akuon na nabuta siya kan ‘tabla’ nin pagigin orgulyoso asin na problema niya talaga an pagigin mapagkritika, pinunan niyang magbago tulos. Regular na siyang nag-atender sa mga pagtiripon, maigot na nag-adal kan Tataramon nin Diyos, asin aroaldaw na namibi. Ginibo na man niya an mga paninimbagan niya sa espirituwal bilang payo kan pamilya, na ikinaugmang marhay kan saiyang agom asin mga aki.”—Luc. 6:41, 42; Sant. 1:23-25.

¹⁴ Sinabi pa kan elder: “Sarong aldaw, may sinabi sako si Graham na nakataros sa puso ko. Sabi niya: ‘Haloy ko nang aram an katotoohan, asin nagpayunir pa ngani ako. Pero ngunyan ko lang talaga masasabing namumutan ko si Jehova.’ Dai nahaloy, tinawan siya nin asignasyon bilang microphone handler sa Kingdom Hall—sarong pribilehiyo na pinahalagahan niyang marhay. Nanudan ko sa halimbawa niya na kun an saro magpapakumbaba ki Jehova paagi sa pag-ako kan disiplina, bebendisyunan nanggad siya!”

15. Kun gusto tang makaabot sa puso an itinatao tang disiplina, ano an dapat niyatong gibuhon?

¹⁵ Tanganing magin marahay na paratukdo, kaipuhan ta ngunang magin marahay na estudyante. (1 Tim. 4:15, 16) Sa kaagid na paagi, an mga tinawan nin Diyos nin awtoridad na magtao nin disiplina dapat na sinda mismo padagos man na nagpapasakop nin gikan sa buot sa paggiya ni Jehova. Paagi sa mapakumbaba nindang pagpapasakop, makukua ninda an respeto kan iba asin magkakaigwa sinda nin katalingkasan sa pagtaram pag nagtatao nin pagsasanay asin sadol. Pag-isipan an halimbawa ni Jesus.

16. Ano an mga manunudan niyato ki Jesus mapadapit sa pagtao nin angay na disiplina asin epektibong pagtutukdo?

 ¹⁶ Pirming makinuyog si Jesus sa saiyang Ama, dawa kan masakiton iyan gibuhon. (Mat. 26:39) Sinasabi niya sa mga tawo na hali sa saiyang Ama an mga itinutukdo niya asin an saiyang kadunungan. (Juan 5:19, 30) Mapakumbaba asin makinuyog si Jesus, kaya gustong-gusto siya kan mga tawong sadiyosan an puso asin nakatabang iyan sa saiya na magin mapagmalasakit asin mabuot na paratukdo. (Basahon an Mateo 11:29.) An mabuot niyang mga tataramon nakapakusog sa mga tawong garo baga lanog na tambo o mitsang madali nang maparong. (Mat. 12:20) Dawa sa mga sitwasyon na masakit magdanay na mapasensiya, nagin mabuot asin mamumuton si Jesus. Risang-risa iyan kan itanos niya an saiyang mga apostol huli sa pagigin makasadiri asin ambisyoso.—Mar. 9:33-37; Luc. 22:24-27.

17. Anong marahayon na mga kuwalidad an makakatabang sa mga elder na magin epektibong pastor kan aripumpon nin Diyos?

¹⁷ Pag nagtatao nin basado sa Kasuratan na disiplina an mga elder, kaipuhan nindang arugon si Cristo. Paagi kaini, ipinapahiling ninda na gusto nindang magpagiya sa Diyos asin sa saiyang Aki. Si apostol Pedro nagsurat: “Pasturan nindo an aripumpon nin Diyos na nasa pangangataman nindo, na naglilingkod bilang mga paraataman, bako sa paaging napipiritan, kundi ginigibo iyan nin gikan sa buot sa atubangan nin Diyos; bako dahil sa pagkamuot sa materyal na pakinabang, kundi dahil gusto talaga nindo; asin dai dinodominar an mga sadiri nin Diyos, kundi nagigin mga halimbawa sa aripumpon.” (1 Ped. 5:2-4) An mga paraataman na maugmang nagpapasakop sa Diyos asin ki Cristo, na iyo an payo kan kongregasyon, siguradong makikinabang pati man an mga nasa pangangataman ninda.—Isa. 32:1, 2, 17, 18.

18. (a) Ano an inaasahan ni Jehova na gigibuhon kan mga magurang? (b) Paano tinatabangan nin Diyos an mga magurang tanganing magibo an saindang mga responsabilidad?

¹⁸ Aplikado man sa pamilya an pundamental na mga prinsipyong iyan. Sinabihan an mga payo nin pamilya: “Dai nindo pagpaangguton an saindong mga aki, kundi padagos sindang padakulaon sa disiplina asin sadol ni Jehova.” (Efe. 6:4) Gurano kaseryoso an bagay na ini? Sinasabi kan Talinhaga 19:18: ‘Disiplinahon mo an saimong aki mantang igwa pa nin panahon. Kun dai mo iyan gigibuhon, ika an nagtatabang saiya sa pagraot kan saiyang sadiri.’ (BPV) Iyo, maninimbag ki Jehova an Kristiyanong mga magurang kun dai ninda didisiplinahon nin tama an saindang aki! (1 Sam. 3:12-14) Pero tinatawan ni Jehova nin kadunungan asin kusog na kinakaipuhan an mga magurang na mapakumbabang hinahagad iyan sa pamibi asin nagsasarig sa saiyang Tataramon asin banal na espiritu para sa paggiya.—Basahon an Santiago 1:5.

19, 20. (a) Anong mga bendisyon an makakamtan niyato kun aakuon ta an disiplina nin Diyos? (b) Ano an pag-uulayan ta sa sunod na artikulo?

¹⁹ Kun aakuon ta an disiplina nin Diyos asin aarugon si Jehova asin si Jesus sa pagdidisiplina, kadakul-dakul na bendisyon an makakamtan ta. Nagigin matuninong an satong pamilya asin kongregasyon. Asin namamatian kan lambang saro na talagang namumutan, pinapahalagahan, asin tiwasay sinda—panamit pa sana ini kan mga bendisyon na makakamtan ta sa maabot na panahon. (Sal. 72:7) Iyo, masasabi niyatong tinutukduan kita kan disiplina ni Jehova, kun paano iribang mabuhay sagkod lamang na may katuninungan asin pagkauruyon bilang pamilya na si Jehova an Ama. (Basahon an Isaias 11:9.) Kun arog kaiyan an paghiling ta sa disiplina nin Diyos, mas mapapahalagahan niyato kun ano talaga iyan: sarong magayon na kapahayagan kan daing kapantay na pagkamuot nin Diyos sa sato.

²⁰ Sa masunod na artikulo, urog pa niyatong pag-uulayan an mga aspekto nin disiplina sa laog kan pamilya asin kongregasyon. Pag-uulayan ta man an mapadapit sa disiplina sa sadiri asin an sarong bagay na mas urog pa kisa sa ano man na temporaryong kulog na puwede tang mamatian huli sa disiplina.