Iinaalok ta nin libre an satong basado sa Bibliyang mga materyal, kaya iniisip kan iba na puwede iyan i-copy asin i-post sa ibang website o sa social media. Pero, an paggibo kaiyan nagbabalgar sa Kasunduan sa Paggamit * (Terms of Use) kan satuyang website asin nagresulta sa darakulang problema. Arog kan malinaw na pagkasabi sa Kasunduan, mayo nin siisay man an tinutugutan na “i-post sa Internet (ano man na website, site na ginagamit sa pag-share kan mga file o video, saka sa social network) an mga artwork, elektronikong publikasyon, trademark, musika, ritrato, video, o artikulo kan website na ini.” Taano ta kaipuhan an restriksiyon na iyan?

May copyright an gabos na materyal sa satong mga website. May mga apostata asin parakontra na ginagamit sa saindang website an satong mga publikasyon tanganing akiton an mga Saksi ni Jehova asin an iba na buksan an saindang website. Pero, may ilinaag sa mga site na iyan na mga materyal na may katuyuhan na papagdudahon an mga nagbabasa. (Sal. 26:4; Tal. 22:5) Ginagamit man kan iba an mga materyal sa satong mga publikasyon o an satong jw.org logo sa mga advertisement, o sa mga produkto na ipinapabakal ninda, asin sa mga mobile app. Nagkua kita nin proteksiyon sa copyright asin trademark, kaya may legal kitang basehan na ipapundo an salang paggamit na iyan. (Tal. 27:12) Pero kun tinutugutan ta an mga tawo, dawa pa mga kapagtubod, na i-post sa ibang site an satong digital na mga materyal o gamiton an satong jw.org trademark sa mga produkto tanganing ipabakal, tibaad dai suportaran kan mga korte an satong mga paghihinguwa na papunduhon an mga  nagkokontra asin an mga negosyante sa paggamit kaiyan.

Puwedeng magin peligroso an pag-download kan satong mga publikasyon sa ibang site apuwera sa jw.org. Sa “maimbod asin mapagmansay na uripon” sana ipinagkatiwala ni Jehova an paninimbagan na magtao nin espirituwal na kakanon. (Mat. 24:45) An opisyal na mga website sana kan organisasyon—www.dan124.com, tv.dan124.com, asin wol.dan124.com—an ginagamit kan “uripon” para magpublikar nin espirituwal na kakanon. Asin igwa sana kitang tulong opisyal na app para sa mga mobile device—JW Language^®, JW Library^®, asin JW Library Sign Language^®. Makakasigurado kita na mayo ini nin ano man na advertisement o kontaminasyon kan kinaban ni Satanas. Kun sa ibang paagihan maagi an espirituwal na kakanon, mayong kasiguruhan kun baga dai iyan nabago o nakontaminar.—Sal. 18:26; 19:8.

Saro pa, kun ipo-post ta an satong mga publikasyon sa mga website na puwedeng maglaag nin comment, matatawan ta nin lugar an mga apostata asin an iba pang nagkikritika na papagdudahon kita sa organisasyon ni Jehova. May mga tugang na nakikabtang sa mga online na debate kaya nakapagtao lugod sinda nin katuyawan sa pangaran ni Jehova. Bakong angay na lugar an mga online forum tanganing ‘may kahuyuan na magtukdo sa mga mahilig magkontra.’ (2 Tim. 2:23-25; 1 Tim. 6:3-5) Napag-araman man na may mga naggigibo nin mapandayang mga account sa social media asin nin mga website gamit an ngaran kan organisasyon, Namamahalang Grupo, o kan mga miyembro kaiyan. Pero, mayong miyembro kan Namamahalang Grupo an igwa nin personal na Web page o nagpapartisipar sa arin man na social media site.

Nakakatabang sa pagpalakop kan “maugmang bareta” an pagrekomendar kan jw.org sa mga tawo. (Mat. 24:14) Padagos na pinapauswag an itinatao sa satong digital na mga kasangkapan na magagamit sa ministeryo. Gusto tang makinabang diyan an gabos. Kaya, arog kan sinasabi sa Kasunduan sa Paggamit, puwede kang magpadara sa e-mail nin digital na kopya nin sarong publikasyon o mag-share nin link pasiring sa sarong materyal sa jw.org. Pag irinerekomendar ta sa mga interesado an satong opisyal na mga website, ikinokonektar ta sinda sa iyo sanang tunay na gikanan nin espirituwal na kakanon, “an maimbod asin mapagmansay na uripon.”