1-2. Paano ta masusundan an mga lakad ni Jesus? Iilustrar.

IMAHINARA na kaiba ka sa sarong grupo na naglalakaw sa peligrosong disyerto. Sarong eksperyensiyadong tagagiya an nasa inutan nindo. Mantang naglalakaw siya, nagwawalat siya nin mga tanda, o gira, sa baybay. Tapos, dai mo na mahiling an tagagiya! Alagad dai ka nataranta saka an mga kagrupo mo. Yaon an mga gira kan tagagiya asin sinundan nindong marhay iyan!

² Bilang tunay na mga Kristiyano, garo man sana kita naglalakaw sa sarong peligrosong disyerto—an maraot na kinaban na ini. Marahay na sana ta tinawan kita ni Jehova nin perpektong Tagagiya—an saiyang Aking si Jesu-Cristo na an mga lakad puwede tang maingat na sundan. (1 Ped. 2:21) Sigun sa sarong reperensiya sa Bibliya, ikinukumparar digdi ni Pedro si Jesus sa sarong tagagiya. Arog sa sarong tagagiya na nagwawalat nin mga tanda, nagwalat si Jesus nin mga gira, o mga lakad, na puwede tang sundan. Pag-ulayan ta an tulong hapot manungod sa pagsunod sa mga lakad niya: Ano an buot sabihon kan pagsunod sa mga lakad ni Jesus? Taano ta dapat tang gibuhon iyan? Paano ta magigibo iyan?

3. Ano an buot sabihon kan pagsunod sa mga lakad?

³ Ano an buot sabihon kan pagsunod sa mga lakad? Sa Bibliya, an mga tataramon na “maglakaw” asin “mga bitis” nanunungod kun minsan sa pamumuhay nin sarong tawo. (Gen. 6:9; Tal. 4:26) An paagi nin pamumuhay nin saro maiaagid sa mga gira, o mga lakad, na nawawalat niya mantang naglalakaw siya. Kaya an pagsunod sa mga lakad nin saro nangangahulugan na sundan an saiyang halimbawa, o arugon siya.

4. Ano an buot sabihon kan pagsunod sa mga lakad ni Jesus?

 ⁴ Kaya, ano an buot sabihon kan pagsunod sa mga lakad ni Jesus? Sa simpleng pagtaram, nangangahulugan iyan na arugon an saiyang halimbawa. Sa satong temang teksto, espesipikong nagkokomento si apostol Pedro manungod sa pagigin marahayon na halimbawa ni Jesus sa pagtagal sa kasakitan; pero maaarog niyato si Jesus sa dakul pang ibang paagi. (1 Ped. 2:18-25) Iyo, an bilog na buhay ni Jesus—gabos na sinabi asin ginibo niya—sarong halimbawa para sundan niyato.

5. Maaarog daw talaga kan bakong perpektong mga tawo an perpektong halimbawa ni Jesus? Ipaliwanag.

⁵ Bako kitang perpekto, kaya maaarog ta daw talaga si Jesus? Iyo. Girumdumon na an sinabi sato ni Pedro iyo na ‘maingat na sundan an mga lakad’ ni Jesus, bako na perpektong sundan iyan. Kun maingat tang sinusundan an mga lakad niya, na ginigibo an pinakamakakaya ta dawa bako kitang perpekto, sinusunod ta an sinabi ni apostol Juan: “Padagos na maglakaw siring kan paglakaw kan sarong idto [si Jesus].”—1 Juan 2:6.

6-7. Taano ta nasabi ta na an pagsunod sa mga lakad ni Jesus lalong makakaparani sato ki Jehova?

⁶ An pagsunod sa mga lakad ni Jesus lalong makakaparani sato ki Jehova. Taano? Inot, nagpahiling si Jesus nin pambihirang halimbawa sa kun paano mamumuhay sa paaging nakakapaugma sa Diyos. (Juan 8:29) Kaya paagi sa pagsunod sa mga lakad ni Jesus, mapapaugma ta si Jehova. Asin makakasigurado kita na an satong Ama sa langit marani sa mga nagmamaigot na magin amigo niya.—Sant. 4:8.

⁷ Ikaduwa, perpektong inarog ni Jesus an saiyang Ama. Kaya nasabi ni Jesus: “An siisay man na nakahiling na sa sako nakahiling na man sa Ama.” (Juan 14:9) Pag inaarog ta an mga kuwalidad ni Jesus asin kun paano niya tinatrato an iba—halimbawa, an grabeng pagkahirak niya sa may leproso, an empatiya niya sa sarong  babaying may malalang hilang, an pagmalasakit niya sa mga nagadanan nin mahal sa buhay—inaarog ta man si Jehova. (Mar. 1:40, 41; 5:25-34; Juan 11:33-35) Mantang mas inaarog ta si Jehova, nagigin mas harani man kita saiya.

8. Ipaliwanag kun taano ta makakatabang sato an pagsunod sa mga lakad ni Jesus na ‘madaog’ an kinaban.

⁸ An pagsunod sa mga lakad ni Jesus nakakatabang sato na dai malingling kan maraot na kinaban na ini. Sa huring banggi kan buhay ni Jesus digdi sa daga, nasabi niya: “Dinaog ko an kinaban.” (Juan 16:33) An buot sabihon niya, dai niya tinugutan na maimpluwensiyahan siya kan kaisipan, mga pasuhan, asin kan paggawi kan kinaban na ini. Nungkang tinugutan ni Jesus na mawara an pokus niya sa dahilan kun taano ta isinugo siya digdi sa daga—an mabindikar si Jehova. Kumusta kita? Dakul na bagay sa kinaban na ini an puwedeng makalingling sato. Pero kun, arog ni Jesus, magdadanay kitang nakapokus sa paggibo kan kabutan ni Jehova, ‘madadaog’ ta man an kinaban.—1 Juan 5:5.

9. Ano an dapat tang gibuhon para magdanay sa dalan pasiring sa buhay na daing katapusan?

⁹ An pagsunod sa mga lakad ni Jesus naggigiya pasiring sa buhay na daing katapusan. Kan maghapot an sarong mayaman na hoben na lalaki kun ano an kaipuhan niyang gibuhon para magkaigwa nin buhay na daing katapusan, nagsimbag si Jesus: “Madya, magin parasunod taka.” (Mat. 19:16-21) Sa nagkapirang Judio na dai nagtutubod na siya an Cristo, sinabi ni Jesus: “An sakuyang mga karnero [nagsusunod] sa sako. Tinatawan ko sinda nin buhay na daing katapusan.” (Juan 10:24-29) Sinabi ni Jesus ki Nicodemo, na miyembro kan Sanhedrin asin na nagkainteres sa mga katukduan ni Jesus, na an mga “nagtutubod sa saiya [magkakaigwa] nin buhay na daing katapusan.” (Juan 3:16) Ipinapahiling tang nagtutubod kita ki Jesus pag isinasabuhay ta an mga itinukdo niya paagi sa saiyang mga sinabi asin ginibo. Kun gigibuhon ta iyan, magdadanay kita sa dalan pasiring sa buhay na daing katapusan.—Mat. 7:14.

10. Ano an kaipuhan tang gibuhon para mas “mamidbid” ta pa si Jesus? (Juan 17:3)

¹⁰ Bago ta maingat na masundan an mga lakad ni Jesus, kaipuhan ta nguna siyang mamidbid. (Basahon an Juan 17:3.) An ‘pagmidbid’ ki Jesus sarong nagpapadagos na proseso. Kaipuhan tang padagos na mas mamidbid pa siya—an mga kuwalidad niya, kaisipan, asin mga pamantayan. Gurano man kita kahaloy nang nasa katotoohan, kaipuhan na padagos kitang magmaigot na mamidbid si Jehova asin an saiyang Aki.

11. Ano an mahihiling ta sa apat na Ebanghelyo?

¹¹ Para makatabang sato na mamidbid an saiyang Aki, mamumuton na iiniba ni Jehova sa Tataramon niya an apat na Ebanghelyo. Yaon sa mga Ebanghelyo an istorya kan buhay asin ministeryo ni Jesus. Mababasa ta diyan an mga sinabi ni Jesus, mga ginibo, saka an mga namatian niya. Tinatabangan kita kan apat na librong  ini na “maingat [na] isip-isipon” an halimbawa ni Jesus. (Heb. 12:3) Kaya garo man sana igwa iyan kan mga lakad na iwinalat ni Jesus. Kaya paagi sa pag-adal kan mga Ebanghelyo, puwede tang padagos na mamidbid si Jesus. Bilang resulta, maingat niyatong masusundan an saiyang mga lakad.

12. Paano kita lubos na makikinabang sa mga Ebanghelyo?

¹² Para lubos na makinabang sa mga Ebanghelyo, bako lang basta pagbasa an kaipuhan tang gibuhon. Kaipuhan tang tawan nin panahon na maingat iyan na pag-adalan asin hurop-hurupon. (Jos. 1:8) Pag-ulayan ta an duwang suhestiyon na makakatabang sato na hurop-hurupon an mga Ebanghelyo asin isabuhay an mga binabasa ta diyan.

13. Ano an puwede mong gibuhon para magin buhay na buhay an mga istorya sa Ebanghelyo?

¹³ Inot, gibuhon na buhay na buhay an mga istorya sa Ebanghelyo. Gamiton an imahinasyon mo para mahiling, madangog, asin mamatian an mga nangyayari. Para magibo iyan, mag-research sa mga pantabang sa pag-adal na itinatao kan organisasyon ni Jehova. Aramon an konteksto—an mga pangyayari bago o pagkatapos kan tekstong pinag-aadalan mo. Maghanap nin mga impormasyon manungod sa mga tawo asin mga lugar na sinambit sa istorya. Ikumparar an istoryang pinag-aadalan mo sa iyo man sanang istorya na nasa ibang Ebanghelyo. Kun minsan, iniiba kan sarong kagsurat nin Ebanghelyo an sarong importanteng detalye na dai iniba kan saro pang kagsurat.

14-15. Ano an kaipuhan tang gibuhon para isabuhay an mga nanunudan ta sa mga istorya sa Ebanghelyo?

¹⁴ Ikaduwa, isabuhay an mga istorya sa Ebanghelyo. (Juan 13:17) Pagkatapos mong maingat na pag-adalan an sarong istorya sa Ebanghelyo, haputon an sadiri: ‘May leksiyon daw digdi na puwede kong isabuhay? Paano ko gagamiton an istoryang ini para tabangan an iba?’ Mag-isip nin sarong indibidwal, dangan sa angay na pagkakataon, sabihon saiya sa mamumuton asin mataktikang paagi an leksiyon na nanudan mo.

¹⁵ Pag-ulayan ta an sarong halimbawa kun paano ta gigibuhon an duwang suhestiyon na ini. Siyasaton ta an istorya manungod sa dukhang  babaying balo na pinagmasdan ni Jesus sa templo.

16. Iistorya an eksena na mababasa sa Marcos 12:41.

¹⁶ Gibuhon na buhay na buhay an istorya. (Basahon an Marcos 12:41.) Imahinara an eksena. Nisan 11, 33 C.E. kaidto—mayo nang sarong semana bago an kagadanan ni Jesus. Haros bilog na aldaw na nagtukdo si Jesus sa templo. Pigpaparakontra siya kan mga lider nin relihiyon. Bago kaiyan, pigkuwestiyon kan nagkapira sainda an awtoridad niya. Pinurbaran pa ngani kan iba na dakupon siya sa saiyang itinataram paagi sa dipisil na mga hapot. (Mar. 11:27-33; 12:13-34) Dangan naglipat si Jesus sa ibang parte kan templo. Digdi—na posibleng marhay na sa inaapod na Patyo kan mga Babayi—nahihiling niya an mga lalagan nin kontribusyon harani sa mga lanob kan patyo. Nagtukaw siya asin nagpuon na magmasid sa mga tawong naghuhulog nin kontribusyon. Nahihiling niya an dakul na mayaman na naghuhulog nin dakul na sinsilyo. Posibleng harani siya ta nadangog niya ngani an kalansing kan mga sinsilyong ihinuhulog ninda sa mga lalagan.

17. Ano an ginibo kan dukhang babaying balo na binanggit sa Marcos 12:42?

¹⁷ Basahon an Marcos 12:42. Pag-aban-aban, narisa ni Jesus an sarong babayi. Saro siyang “dukha na babaying balo.” (Luc. 21:2) Masakiton an pagbuhay niya; posibleng marhay na nasasakitan siyang makua an panginot na mga pangangaipo niya. Pero nagduman man giraray siya sa saro sa mga lalagan asin maingat na naghulog nin duwang sadit na sinsilyo, na posibleng haros dai lamang nagkalansing kan ihulog niya—duwang sinsilyong lepta, an pinakasadit na sinsilyong ginagamit kan panahon na idto. Kulang pa ngani iyan para makabakal nin sarong dignos, na saro sa pinakabaratong gamgam na ipinapabakal bilang pagkakan.

18. Sigun sa Marcos 12:43, 44, ano an sinabi ni Jesus manungod sa kontribusyon kan babaying balo?

¹⁸ Basahon an Marcos 12:43, 44. Naghangang marhay si Jesus sa babaying balong ini. Kaya inapod niya an saiyang mga disipulo, itinukdo an babaying balo, asin sinabi: “An pobreng balong ini naghulog nin labi sa gabos na iba [pa].” Dangan sinabi niya: “Huli ta sinda [lalo na an mayayaman] gabos naghulog hali sa sobra ninda, pero siya, maski tios, naghulog siya kan gabos na igwa siya, an saiyang bilog na pagbuhay.” Kan itao kan maimbod na babaying balong ini an ultimong kuwarta niya kan aldaw na idto, ipinagkakatiwala niya sa mapagmakulog na kamot ni Jehova an buhay niya.—Sal. 26:3.

19. Anong mahalagang leksiyon an manunudan ta sa sinabi ni Jesus manungod sa dukhang babaying balo?

¹⁹ Isabuhay an istorya. Haputon an sadiri, ‘Ano an manunudan ko sa sinabi ni Jesus manungod sa dukhang babaying balo?’ Pag-isipan an balo. Siguradong gusto niya na mas dakul pa kuta an maitao ki Jehova. Pero ginibo niya an magigibo niya; itinao niya an pinakamakakaya niya ki Jehova. Asin aram ni Jesus na an kontribusyon kan babaying balo mahalagang marhay sa paghiling kan saiyang Ama. Ini an mahalagang leksiyon para sa sato: Nauugma si Jehova pag itinatao ta an pinakamakakaya ta—an satong bilog na puso asin bilog na kalag na paglilingkod. (Mat. 22:37; Col. 3:23) Nauugma nanggad si Jehova pag nahihiling niyang ginigibo ta an gabos tang makakaya! Aplikado an prinsipyong iyan sa kun gurano kadakul na panahon asin kusog an maitatao ta sa satong pagsamba, kaiba na an ministeryo asin mga pagtiripon.

20. Paano mo maisasabuhay an leksiyon sa istorya manungod sa babaying balo? Magtao nin halimbawa.

²⁰ Paano mo isasabuhay an leksiyon sa istoryang ini manungod sa babaying balo? Mag-isip nin mga indibidwal na nangangaipong asiguraron na nauugma si Jehova sa mga paghihinguwa ninda. Halimbawa, may bisto ka daw na may  edad nang sister na tibaad nakokonsiyensiya o nakakamating dai siyang serbi huling bako nang arog kaidto kadakul an nagigibo niya sa ministeryo dahil maluya na an hawak niya? O may bisto ka daw na brother na may nagdadanay asin makulog na hilang na pinangluluyahan nin buot dahil dai siya nakakaatender sa gabos na pagtiripon sa Kingdom Hall? Tabangan sinda paagi sa pagsabi nin “nakakapakusog” na mga tataramon. (Efe. 4:29) Iistorya sainda an marahayon na leksiyon na nanudan ta manungod sa dukhang babaying balo. An saimong nakakapakusog na mga tataramon makakaasigurar sainda na nauugma si Jehova pag itinatao ta saiya an pinakamakakaya ta. (Tal. 15:23; 1 Tes. 5:11) Pag kinokomendaran mo an iba sa pagtao ninda kan pinakamakakaya ninda ki Jehova—iyan man garo baga saditon—maingat mong sinusundan an mga lakad ni Jesus.

21. Ano an determinado mong gibuhon?

²¹ Nagpapasalamat nanggad kita na tinawan kita kan mga istorya sa Ebanghelyo nin dakulon na detalye manungod sa buhay ni Jesus, na nakakatabang sato na maarog siya, o maingat na masundan an mga lakad niya! Sa saimong personal na pag-adal o sa Pampamilyang Pagsamba, puwede ka daw gumibo nin sarong proyekto na nakapokus sa mga Ebanghelyo? Girumdumon na tanganing lubos na makinabang sa arog kaiyan na pag-adal, kaipuhan tang hinguwahon na magin buhay na buhay an mga istorya asin isabuhay iyan. Apuwera sa kaipuhan niyatong arugon an mga ginibo ni Jesus, kaipuhan ta man na maghinanyog sa mga sinabi niya. Sa sunod na artikulo, pag-uulayan ta kun ano an manunudan ta sa huring mga tataramon ni Jesus bilang tawo.