1-2. Arog kan ipinapahiling kan eksperyensiya ni Angelito, ano an dapat na gibuhon kan lambang saro sa sato?

SAKSI ni Jehova daw an mga magurang mo? Kun iyo, tandaan na dai namamana an personal na relasyon ki Jehova. Lingkod man nin Diyos o bako an mga magurang niyato, dapat na pakusugon kan lambang saro sa sato an personal na relasyon niyato ki Jehova.

² Pag-isipan an eksperyensiya kan brother na si Angelito. Nagdakula siya sa pamilyang Saksi. Minsan siring kan hoben pa siya, namatian niya na bako siyang arog kaiyan kaharani sa Diyos. Sinabi niya, “Naglilingkod ako kaidto ki Jehova dahil lang ta gusto ko an ginigibo kan pamilya ko.” Pero nagdesisyon si Angelito na magtao nin mas dakul na panahon sa pagbasa kan Tataramon nin Diyos asin paghurop-hurop kaiyan, saka mas parati na siyang namimibi ki Jehova. An resulta? Sinabi ni Angelito, “Nanudan ko na an solamenteng paagi para magin harani sa namumutan kong Ama na si Jehova iyo na midbidon ko mismo siya.” Base sa eksperyensiya ni Angelito, mapapaisip kita manungod sa mahalagang mga hapot: Ano an pagkakalain kan bisto ta si Jehova asin kan midbid ta siyang marhay? Asin ano an magigibo ta para mamidbid tang marhay si Jehova?

3. Ano an pagkakalain kan bisto ta si Jehova asin kan midbid ta siyang marhay?

³ Masasabi niyato na bisto nin saro si Jehova kun aram niya an pangaran nin Diyos o kun pamilyar siya sa nagkapirang bagay na  sinabi o ginibo Niya. Pero bako sana iyan an kaipuhan para mamidbid ta talaga si Jehova. Kaipuhan tang magtao nin panahon para maaraman an mapadapit ki Jehova asin an saiyang magagayon na kuwalidad. Dangan saka ta sana masasabutan kun taano ta sinabi asin ginibo niya an sarong bagay. Makakatabang iyan sa sato na maaraman kun baga inuuyunan niya an satong mga iniisip, desisyon, asin mga ginigibo. Pag aram na niyato kun ano an gusto ni Jehova na gibuhon ta, kaipuhan niyatong humiro kauyon kan naaraman ta.

4. Paano makakatabang sa sato an pagkonsiderar sa mga halimbawa sa Bibliya?

⁴ May mga tawo na tibaad tuya-tuyaon kita dahil sa gusto tang maglingkod ki Jehova, asin tibaad lalo pa ngani ninda kitang kontrahon pag nagpuon na kitang makiasosyar sa mga lingkod niya. Pero kun nagtitiwala kita ki Jehova, dai niya kita nuarin man papabayaan. Sa paaging iyan, nagbubugtak kita nin pundasyon kan pakikiamigo niyato sa Diyos na magpapadagos sagkod na kita nabubuhay. Posible daw talagang mamidbid tang marhay si Jehova? Iyo nanggad! Pinapatunayan kan mga halimbawa kan bakong perpektong mga tawo, arog ni Moises asin ni Hading David, na posible iyan. Mantang pinag-iisipan an saindang mga ginibo, sisimbagon niyato an duwang hapot: Paano ninda namidbid si Jehova? Asin ano an mga manunudan niyato sa saindang halimbawa?

5. Ano an pinili ni Moises?

⁵ Naghiro si Moises kauyon kan naaraman niya. Kan mga 40 anyos na si Moises, pinili niyang makiiba-iba sa banwaan nin Diyos, an mga Hebreo, imbes na mabisto bilang “aki kan aking babayi ni Faraon.” (Heb. 11:24) Binayaan ni Moises an sarong prominenteng posisyon. Dahil sa pagkampi niya sa mga Hebreo, na mga uripon kaidto sa Ehipto, nameligro siya sa grabeng kaanggutan ni Faraon na sarong makapangyarihan na tagapamahala na ibinibilang na diyos. Pambihirang pagpahiling nanggad iyan nin pagtubod! Nagtiwala si Moises ki Jehova. An siring na tiwala masarig na pundasyon nin nagdadanay na relasyon.—Tal. 3:5.

6. Ano an manunudan niyato sa halimbawa ni Moises?

⁶ Ano an manunudan niyato sa halimbawa ni Moises? Arog niya, gabos kita kaipuhan na magdesisyon: Pipilion daw niyatong maglingkod sa Diyos asin makiiba-iba sa saiyang mga lingkod? Tibaad kaipuhan niyatong gumibo nin mga pagsasakripisyo para maglingkod sa Diyos, asin tibaad kontrahon kita kan mga dai nakakamidbid ki Jehova. Pero kun nagtitiwala kita sa satong Ama sa langit, makakaasa nanggad kita sa tabang niya!

7-8. Ano an padagos na ginibo ni Moises?

⁷ Padagos na nagkua si Moises nin kaaraman manungod sa mga kuwalidad ni Jehova asin padagos na ginibo an Saiyang kabutan. Halimbawa, kan sinabi ni Jehova ki Moises na panginutan an nasyon nin Israel sa pagluwas sa pagkabihag sa Ehipto, mayo siyang tiwala sa sadiri asin pauruutro niyang sinabi ki Jehova na pagmati niya bako siyang kuwalipikado. Nagsimbag an Diyos na may tunay na pagmalasakit asin tinabangan si Moises. (Ex. 4:10-16) Bilang resulta, naipaabot ni Moises ki Faraon an magabat na mga mensahe nin paghukom. Dangan nahiling ni Moises kun paano ginamit ni Jehova an Saiyang kapangyarihan mantang iliniligtas Niya an mga Israelita asin linalaglag si Faraon saka an hukbo kaini sa Dagat na Pula.—Ex. 14:26-31; Sal. 136:15.

⁸ Pagkatapos na panginutan ni Moises an mga Israelita sa pagluwas sa Ehipto, pirmi na sana sindang nagrereklamo. Pero dawa arog kaiyan, nahiling ni Moises an halabang pasensiya ni Jehova sa pagtrato Niya sa banwaan na pinatalingkas Niya sa pagkauripon. (Sal. 78:40-43) Nahiling man ni Moises an pambihirang  kapakumbabaan ni Jehova kan dai Niya na dinagos an iniisip Niya huli sa pakiulay ni Moises.—Ex. 32:9-14.

9. Base sa Hebreo 11:27, gurano kaharani an relasyon ni Moises ki Jehova?

⁹ Pagkahali sa Ehipto, nagin haraning marhay an relasyon ni Moises ki Jehova na garo baga nahihiling niya an saiyang Ama sa langit. (Basahon an Hebreo 11:27.) Para iparisa kun gurano kaharani an relasyon na iyan, sinasabi kan Bibliya: ‘Hampangan kun makipag-ulay [si Jehova] ki Moises, siring sa sarong tawo na nakikipag-ulay sa saiyang katuod.’—Ex. 33:11, An Marahay na Bareta Biblia.

10. Ano an kaipuhan niyatong gibuhon para mamidbid niyatong marhay si Jehova?

¹⁰ Ano an manunudan niyato digdi? Para mamidbid niyatong marhay si Jehova, bako lang pagkua nin kaaraman manungod sa mga kuwalidad niya an kaipuhan kundi pati man an paggibo kan saiyang kabutan. An kabutan ni Jehova ngunyan iyo na “an gabos na klase nin tawo maligtas asin makaabot sa tamang kaaraman mapadapit sa katotoohan.” (1 Tim. 2:3, 4) An sarong paagi na ginigibo ta an kabutan nin Diyos iyo an pagtukdo sa iba manungod ki Jehova.

11. Paano niyato lalo pang namimidbid si Jehova mantang nagtutukdo kita sa iba manungod sa saiya?

¹¹ Sa parati, lalo ta pang namimidbid si Jehova pag nagtutukdo kita sa iba manungod sa saiya. Halimbawa, nahihiling niyato an malinaw na patunay kan pagmalasakit ni Jehova pag ginigiyahan niya kita para makaulay an mga tawong igwang pusong nasa tamang kamugtakan. (Juan 6:44; Gibo 13:48) Nahihiling niyato an puwersa kan kapangyarihan kan Tataramon nin Diyos pag nahihiling ta na ipinupundo na kan satong mga inaadalan sa Bibliya an maraot nindang mga gibo asin nagpupuon nang isulot an bagong personalidad. (Col. 3:9, 10) Asin nahihiling niyato an patunay kan pasensiya nin Diyos huling tinatawan niya an mga tawo sa satong teritoryo nin dakul na oportunidad na makanuod dapit sa saiya asin maligtas.—Roma 10:13-15.

12. Arog kan mababasa sa Exodo 33:13, ano an hinagad ni Moises, asin taano?

¹² Dai binaliwala ni Moises an saiyang relasyon ki Jehova. Dawa ngani nakagibo na kaidto si Moises nin mga milagro paagi sa pangaran nin Diyos, magalang na hinagad niya ki Jehova na tugutan siyang mas mamidbid pa Siya. (Basahon an Exodo 33:13.) Labing 80 anyos na si Moises kan sinabi niya iyan, pero aram niyang dakul pa siyang dapat manudan manungod sa saiyang mamumuton na Ama sa langit.

13. Ano an sarong paagi na mapapatunayan niyato na pinapahalagahan ta an pakikiamigo niyato sa Diyos?

¹³ Ano an manunudan niyato digdi? Gurano man kita kahaloy nang naglilingkod ki Jehova, dai ta nuarin man dapat baliwalaon an relasyon niyato sa saiya. An sarong paagi na mapapatunayan niyato na pinapahalagahan ta an satong pakikiamigo sa Diyos iyo an pakikipag-ulay sa saiya sa pamibi.

14. Taano ta mahalagang marhay an pamibi para lalo ta pang mamidbid an Diyos?

¹⁴ An marahay na komunikasyon an pinakabuhay nin makusog na relasyon. Kaya rumani sa Diyos paagi sa parating pagpamibi, na dai nuarin man natatakot na sabihon an mga iniisip asin namamatian mo. (Efe. 6:18) Si Krista, na taga Turkey nagsabi: “Nagkukusog an pagkamuot ko ki Jehova asin an tiwala ko sa saiya sa kada beses na sinasabi ko sa saiya sa pamibi an mga iniisip ko dangan pag nahihiling kong tinatabangan niya ako. Pag nahihiling ko kun paano sinisimbag ni Jehova an mga pamibi ko, nakakatabang iyan sako na ibilang si Jehova na Ama saka Amigo.”

15. Ano an sinabi ni Jehova mapadapit ki Hading David?

¹⁵ Namundag si Hading David sa sarong nasyon na dusay sa Diyos na Jehova. Pero bako  lang iyan an dahilan kaya nagsunod siya sa relihiyosong mga tradisyon kan pamilya niya. Pinakusog niya man mismo an saiyang relasyon sa Diyos, asin namutan siyang marhay ni Jehova. Sinabi mismo ni Jehova na si David “sarong lalaking inuuyunan kan [Saiyang] puso.” (Gibo 13:22) Paano nagin haraning marhay si David ki Jehova?

16. Ano an nanudan ni David manungod ki Jehova paagi sa pagmasid sa mga linalang?

¹⁶ Nakanuod si David manungod ki Jehova paagi sa mga linalang. Kan aki pa si David, dakul na oras siyang nasa luwas huling nag-aataman siya kan mga karnero kan saiyang ama. Posibleng diyan siya nagpuon na maghurop-hurop manungod sa mga bagay na ginibo ni Jehova. Halimbawa, mantang pinagmamasdan ni David an kalangitan sa banggi, bako lang an ribo-ribong bituon an nahiling niya kundi pati man an mga kuwalidad kan Saro na naggibo kaiyan. Napahiro siyang magsurat: ‘An kalangitan nagbabareta kan kamurawayan nin Diyos, asin an kahiwasan nagpapahayag kan ginibo nin saiyang mga kamot.’ (Sal. 19:1, 2) Kan hinurop-hurop ni David an pagkagibo sa mga tawo, nasabutan niya kun gurano kadunong si Jehova. (Sal. 139:14) Mantang hinihinguwa ni David na masabutan an mga ginibo ni Jehova, narealisar niya kun gurano siya kasadit kumpara ki Jehova.—Sal. 139:6.

17. Ano an manunudan niyato kun huhurop-hurupon ta an dapit sa mga linalang?

¹⁷ Ano an manunudan niyato digdi? Magin interesado sa mga linalang. Dai sana basta makontento na nabubuhay ka sa magayunon na kinaban na ginibo ni Jehova; magtao nin panahon para apresyaron iyan! Sa pang-aroaldaw mong buhay, hurop-hurupon kun ano an itinutukdo sa saimo manungod ki Jehova kan mga linalang na nasa palibot mo—an mga tinanom, mga hayop, asin an katawuhan. Dangan sa kada aldaw, lalo mong mamimidbid an saimong mamumuton na Ama. (Roma 1:20) Asin mahihiling mo na mas lalo mo siyang mamumutan sa paglihis nin mga aldaw.

18. Arog kan mababasa niyato sa Salmo 18, ano an aram ni David?

¹⁸ Aram ni David na tinatabangan siya ni Jehova. Halimbawa, kan prinotektaran ni David an karnero kan saiyang ama sa leon asin oso, aram niyang si Jehova an nagtabang sa saiya para madaog an mabangis na mga hayop. Kan nadaog ni David an higanteng parapakilaban na si Goliat, malinaw ki David na si Jehova an nasa likod niya. (1 Sam. 17:37) Asin kan nakadulag siya sa maimon na si Hading Saul, aram ni David na si Jehova an nagligtas sa saiya. (Sal. 18, NW, superskripsiyon) Kun orgulyosong tawo si David, aakuon niya gayod an gabos na onra sa mga kapangganahan na idto. Pero mapakumbaba siya kaya nahiling niya na si Jehova an nagtatabang sa saiya.—Sal. 138:6.

19. Ano an manunudan niyato sa halimbawa ni David?

¹⁹ Ano an manunudan niyato digdi? Apuwera sa paghagad ki Jehova nin tabang, dapat man niyatong hinguwahon na marisa kun nuarin asin kun paano niya kita tinatabangan. Kun mapakumbaba niyatong inaako an satong mga limitasyon, malinaw tang mahihiling kun paano ni Jehova hinihipnuan kun ano an kulang sa sato. Asin sa kada marisa niyato an tabang ni Jehova, nagkukusog man an relasyon ta sa saiya. Napatunayan ini ni Isaac, sarong brother na taga Fiji na naglilingkod ki Jehova sa laog nin dakul nang taon. Sinabi niya: “Pag binabalikan ko an mga pangyayari sa buhay ko, nahihiling ko kun paano ako tinabangan ni Jehova puon kaidtong makipag-adal ako nin Bibliya sagkod sa ngunyan. Kaya nagin totoong-totoo sako si Jehova.”

20. Ano an manunudan ta mapadapit sa relasyon ni David sa Diyos?

²⁰ Inarog ni David an mga kuwalidad ni Jehova. Linalang kita ni Jehova na may kakayahan na maarog an saiyang mga kuwalidad. (Gen. 1:26) Mantang mas naaaraman ta an mga kuwalidad ni  Jehova, nagigin mas madali man sa sato na arugon siya. Namidbid na marhay ni David an saiyang Ama sa langit, kaya naarog niya si Jehova sa paagi nin pagtrato niya sa iba. Pag-isipan an sarong halimbawa. Nagkasala si David ki Jehova kan makisambay siya ki Bat-seba asin kan ipagadan niya an agom kaini. (2 Sam. 11:1-4, 15) Pero pinili ni Jehova na magpahiling nin pagkahirak ki David, sarong lalaki na nagpahiling man nin pagkahirak sa iba. Dahil sa marahay na relasyon ni David ki Jehova, namutan siyang marhay kan mga Israelita asin ginamit siya ni Jehova bilang halimbawa para sa ibang mga hadi kan Israel.—1 Ha. 15:11; 2 Ha. 14:1-3.

21. Kauyon kan sinasabi sa Efeso 4:24 asin 5:1, ano an magigin resulta kun magigin mga “paraarog [kita] sa Diyos”?

²¹ Ano an manunudan niyato digdi? Dapat na magin mga “paraarog [kita] sa Diyos.” Pag ginigibo niyato iyan, dai sana kita nakikinabang kundi nakakatabang man iyan na mas mamidbid ta siya. Kun inaarog ta an saiyang personalidad, pinapatunayan niyato na kita mga aki niya.—Basahon an Efeso 4:24; 5:1.

22-23. Ano an mangyayari kun iaaplikar ta an mga nanunudan niyato dapit ki Jehova?

²² Arog kan naaraman niyato, makakanuod kita dapit ki Jehova paagi sa saiyang mga linalang asin sa saiyang Tataramon, an Bibliya. An daing kaagid na librong iyan igwa nin kadakul na halimbawa nin maimbod na mga lingkod nin Diyos na puwede niyatong arugon, arog ni Moises asin David. Ginibo na ni Jehova an kabtang niya. Kaipuhan ta man gibuhon an kabtang ta para makanuod na marhay manungod sa saiya.

²³ Dai nanggad matatapos an pagkua niyato nin kaaraman dapit ki Jehova. (Par. 3:11) Pero an mahalaga bako kun gurano kadakul kan aram niyato mapadapit sa saiya kundi kun ano an satong ginigibo sa naaraman niyato. Kun isasabuhay niyato an satong mga nanunudan asin hihinguwahon na maarog an satuyang mamumuton na Ama, padagos siyang marani sa sato. (Sant. 4:8) Paagi sa saiyang Tataramon, sinisigurado niya sa satuya na dai niya nuarin man babayaan an mga naghihinguwang mamidbid siya.