ANO an mamamatian mo pag nakaresibi ka nin nakakapakusog na surat hali sa sarong dayupot na amigo? An Kristiyanong disipulo na si Timoteo nakaresibi nin arog kaiyan na surat hali ki apostol Pablo. An surat na iyan iyo an libro sa Bibliya na 2 Timoteo. Siguradong gustong-gusto na ni Timoteo na maghanap nin sarong matuninong na lugar tanganing mabasa kun ano an sinabi kan saiyang namumutan na amigo. Tibaad inisip ni Timoteo: ‘Kumusta na kaya si Pablo? May sadol daw siya para sa sako kun paano mamansayon an sakong asignasyon? Makakatabang daw sako an surat na ini na magin mapanggana sa sakong Kristiyanong ministeryo asin makatabang sa iba?’ Arog kan maaaraman ta, bako lang simbag sa mga hapot na iyan an nakua ni Timoteo sa mahalagang marhay na surat na ini. Pero sa ngunyan, magpokus kita sa pirang mahalagang punto kan kapaki-pakinabang na sadol na makukua sa surat na ini.

Sa kapinunan pa sana kan surat, namatian na ni Timoteo kun gurano sinda kadayupot ni Pablo. May pagpapadangat na inapod siya ni Pablo na “sakuyang namumutan na aki.” (2 Tim. 1:2) Dawa posibleng labing 30 anyos na si Timoteo kan maresibi an surat na ini, kan mga 65 C.E., saro na siyang eksperyensiyadong magurang sa kongregasyon. Labing sampulong taon niyang nakaibanan si Pablo sa gibuhon asin dakulon siyang nanudan.

Siguradong napakusog na marhay si Timoteo na maaraman na padagos na maimbod na nagtatagal si Pablo sa ibong nin mga kasakitan. Nakapreso si Pablo sa Roma asin madali nang gadanon. (2 Tim. 1:15, 16; 4:6-8) Hiling-hiling ni Timoteo an kusog nin buot kan apostol huling sinabi ni Pablo: “Padagos kong tinatagalan an gabos na bagay.” (2 Tim. 2:8-13) Arog ni Timoteo, mapapakusog kita kan marahayon na halimbawa nin pakatagal ni Pablo.

Dinagka ni Pablo si Timoteo na mansayon na mahalagang marhay an saiyang asignasyon sa paglilingkod sa Diyos. Gusto ni Pablo na “palaadon [ni Timoteo] siring sa kalayo an balaog nin Diyos” na inako kaini. (2 Tim. 1:6) Ginamit ni Pablo an terminong khaʹri·sma para sa “balaog.” An terminong iyan sa Griego panginot nang nanunungod sa sarong libre asin dai na kutana maninigong regalo. Inako ni Timoteo an regalong ini kan pilion siya para sa sarong espesyal na paglilingkod sa kongregasyon.—1 Tim. 4:14.

Ano an dapat na gibuhon ni Timoteo sa regalong ini? Mantang binabasa niya an ekspresyon na “palaadon  . . . siring sa kalayo,” tibaad naisip niya an kalayo pag naggagatong sa harong na kun minsan nagigin baga na sana. An mga bagang iyan kaipuhan na ukagon tanganing magkalayo asin mas mag-init. Sarong diksiyonaryo an nagsasabi na an Griegong pandiwa (a·na·zo·py·reʹo) na ginamit ni Pablo nangangahulugan na “pukawon liwat, ibalik, paypayan para magkalayo,” an buot sabihon, “magin ganado asin maigot sa sarong gibuhon.” Garo man sana sinasadol ni Pablo ki Timoteo: ‘Gibuhon mo an pinakamakakaya mo sa saimong asignasyon!’ Ngunyan, iyan man an dapat tang gibuhon—magin maigot sa satong paglilingkod.

Sa pagpapadagos sa pagbasa kan surat kan saiyang namumutan na amigo, nabasa ni Timoteo an saro pang ekspresyon na makakatabang sa saiya na magin mapanggana sa ministeryo niya. Sinabi ni Pablo: “Ingatan mo an marahayon na bagay na ini na ipinagkatiwala sa saimo paagi sa banal na espiritu na yaon sa satuya.” (2 Tim. 1:14) Ano an marahayon na bagay na iyan na ipinagkatiwala ki Timoteo? Sa sinundan na bersikulo sinambit ni Pablo an “marahay na mga tataramon,” an katotoohan na yaon sa Kasuratan. (2 Tim. 1:13) Bilang sarong Kristiyanong ministro, kaipuhan ni Timoteo na ihulit an katotoohan sa laog asin sa luwas kan kongregasyon. (2 Tim. 4:1-5) Ninombrahan man si Timoteo bilang sarong magurang na mapastor sa aripumpon nin Diyos. (1 Ped. 5:2) Maiingatan ni Timoteo an marahayon na bagay na ipinagkatiwala sa saiya—an katotoohan na kaipuhan niyang itukdo—paagi sa pagsarig sa banal na espiritu ni Jehova asin sa Saiyang Tataramon.—2 Tim. 3:14-17.

Ngunyan, ipinagkatiwala man sa sato an katotoohan na itinutukdo ta sa satong Kristiyanong ministeryo. (Mat. 28:19, 20) Mapagdadanay ta an satong pagpapahalaga sa marahayon na bagay na ini paagi sa pagigin matiyaga sa pagpamibi asin pagkaigwa nin marahay na rutina sa pag-adal kan Tataramon nin Diyos. (Roma 12:11, 12; 1 Tim. 4:13, 15, 16) Tibaad magkaigwa man kita nin dagdag na asignasyon na maglingkod bilang elder sa kongregasyon o sa bilog na panahon na ministeryo. Pag nag-ako kita nin arog kaiyan na mahalagang asignasyon, dapat na magin mapakumbaba kita asin magsarig sa Diyos para sa tabang. Kaya maiingatan, o mapoprotektaran, ta an marahayon na bagay na ipinagkatiwala sa sato paagi sa pagpapahalagang marhay diyan asin pagsarig ki Jehova para sa tabang.

Kabtang kan mga asignasyon ni Timoteo an pagsasanay sa iba na manudan man an ginigibo niya. Kaya dinagka ni Pablo si Timoteo: “Kun mapadapit sa mga bagay na nadangog mo sa sako . . . , ipagkatiwala mo . . . sa masasarigan na mga lalaki, asin sinda man magigin lubos na kuwalipikado na magtukdo sa iba.” (2 Tim. 2:2) Iyo, may manunudan si Timoteo sa saiyang Kristiyanong mga tugang asin dapat man na tukduan niya sinda. Mahalaga na iyan man an pagmaigutan na gibuhon kan lambang paraataman sa Kristiyanong kongregasyon ngunyan. An sarong marahay na paraataman dai ipinapanguri an saiyang kaaraman manungod sa sarong gibuhon. Imbes, tinutukduan niya an iba tanganing aram man ninda kun paano gigibuhon iyan. Dai siya natatakot na tibaad masapawan siya ninda huling mas dakul na sindang aram o mas matibay na saiya. An buot sabihon, bako sana su mga simpleng bagay manungod sa sarong gibuhon an itutukdo kan paraataman. Gusto niyang tabangan an saiyang mga sinasanay na magkaigwa nin marahay na paghusgar asin pakasabot—na magin maygurang sa espirituwal. Paagi kaiyan, mas makakatabang sa kongregasyon an masasarigan na mga lalaki na tinukduan niya.

Siguradong pinahalagahan na marhay ni Timoteo an nakakapakusog na surat saiya ni Pablo. Posibleng marhay na pauruutro niyang binasa an mahalagang sadol na yaon diyan asin hinurop-hurop kun paano niya iyan maiaaplikar sa pinakamarahay na paagi sa saiyang mga asignasyon.

Gusto ta man na iaplikar an sadol na iyan. Paano? Pagmaigutan ta na palaadon siring sa kalayo an balaog na inako niyato, ingatan an marahayon na bagay na ipinagkatiwala sa sato, asin ihiras sa iba an satong mga eksperyensiya asin kaaraman. Sa paggibo kaiyan, arog kan sinabi ni Pablo ki Timoteo, ‘lubos niyatong mauutob an satong ministeryo.’—2 Tim. 4:5.