1. Taano ta ibang-iba an panahon na kinabubuhayan niyato?

NABUBUHAY kita sa panahon na talagang ibang-iba kisa sa ano man na panahon sa kasaysayan. Arog kan ihinula kan Bibliya, tinitipon ni Jehova “an sarong dakulang kadaklan . . . hali sa gabos na nasyon asin tribo asin banwaan saka lengguwahe.” An mga natipon iyo an minakompuwesto sa sarong ‘makusog na nasyon’ na may labing walong milyon na maugmang siyudadano na “nagtatao [sa Diyos] nin sagradong paglilingkod aldaw asin banggi.” (Kap. 7:9, 15; Isa. 60:22) Dai pa nangyari na nagkaigwa nin arog kaini kadakul na tawong namumuot sa Diyos asin sa saindang kapwa.

2. Anong salang klase nin pagkamuot an hiling-hiling sa mga tawong suway sa Diyos? (Hilingon an ritrato sa itaas.)

² Pero ihinula man kan ipinasabong na Kasuratan na sa satong panahon, igwa nin sala asin makasadiring klase nin pagkamuot na magigin hiling-hiling sa mga tawong suway sa Diyos. Isinurat ni apostol Pablo: “Sa huring mga aldaw . . . an mga tawo magigin interesado na sana sa sadiri nindang kapakanan, mamumuton sa kuwarta, . . . mas gusto pang magpasiram-siram imbes na magpahiling nin pagkamuot sa Diyos.” (2 Tim. 3:1-4) An makasadiring klaseng ini nin pagkamuot bakong kauyon kan  Kristiyanong pagkamuot; kabaliktaran ini kaiyan. An pag-abot sa makasadiring mga pasuhan dai nagtatao sa mga tawo kan kaugmahan na inaasahan ninda. Imbes, an resulta kaiyan sarong makasadiring kinaban na “masakit” pamuhayan.

3. Ano an pag-uulayan niyato sa artikulong ini, asin taano?

³ Aram ni Pablo na an lakop na makasadiring pagkamuot na ini puwedeng makadanyar sa mga Kristiyano. Kaya nagpatanid siya na “rumayo” sa mga tawong igwa kan salang klase nin pagkamuot na iyan. (2 Tim. 3:5) Pero dai ta man biyong malilikayan an mga tawong arog kaiyan. Kaya paano niyato rarayuan an nakapalibot sa sato na kinabanon na mga ugali tanganing mapaugma si Jehova, an Diyos nin pagkamuot? Hilingon niyato an pagkakalain kan diyosnon na pagkamuot sa pagkamuot na ilinaladawan sa 2 Timoteo 3:2-4. Makakatabang ini na masiyasat niyato an satong sadiri tanganing maipahiling ta an klase nin pagkamuot na nagtatao nin tunay na pagkakontento asin kaugmahan.

4. Taano ta mayong maraot sa pagkaigwa nin tamang pagkamuot sa sadiri?

⁴ “An mga tawo magigin interesado na sana sa sadiri nindang kapakanan,” an sabi kan pinasabngan na apostol. Sala daw na mamutan niyato an satong sadiri? Bako. Normal iyan saka kaipuhan ta ngani na magkaigwa nin tamang pagkamuot sa satong sadiri. Iyan an pagkadisenyo ni Jehova sa sato. Sinabi ni Jesus: “Kamutan mo an saimong kapwa nin siring sa saimong sadiri.” (Mar. 12:31) Kun dai niyato namumutan an satong sadiri, dai ta man mamumutan an satong kapwa. Mababasa man niyato sa Bibliya: “Dapat na mamutan nin mga agom na lalaki an saindang mga agom nin siring sa sadiri nindang hawak. An lalaking namumuot sa saiyang agom namumuot sa saiyang sadiri, huling mayo nin tawong naungis kasuarin man sa sadiri niyang hawak, kundi pinapakakan niya ini asin inaataman.” (Efe. 5:28, 29) Kaya mayong maraot sa pagkaigwa nin tamang pagkamuot sa sadiri.

5. Paano mo masasabing an saro sobra an pagkamuot sa saiyang sadiri?

⁵ An pagkamuot sa sadiri na sinambit sa 2 Timoteo 3:2 bakong normal asin bakong tamang pagkamuot. Biribid asin makasadiring pagkamuot iyan. An mga tawong may arog kaiyan na pagkamuot sobra an hiling sa sadiri. (Basahon an Roma 12:3.) An panginot na iniisip ninda iyo an kapakanan ninda bako an sa iba. Pag nagkakaproblema, an iba an binabasol imbes na akuon na paninimbagan ninda iyan. An makasadiring mga tawong arog kaiyan bakong tunay na maugma.

6. Ano an ibinubunga kan pagkamuot sa Diyos?

⁶ Sinasabi kan mga iskolar sa Bibliya na kaya ininot ni apostol Pablo an pagkamuot sa sadiri sa lista huling diyan subuot naggigikan an sunod niyang sinambit na iba pang maraot na ugali na magigin lakop sa huring mga aldaw. Sa kabaliktaran, an mga tawong namumuot sa Diyos nagpapahiling nin lain na marhay na klase nin bunga. An pagkamuot sa Diyos ikinokonektar kan Bibliya sa kagaya-gayahan, katuninungan, pakatios, kabuutan, karahayan, pagtubod, pagigin kalmado, asin pagpupugol sa sadiri. (Gal. 5:22, 23) ‘Maugma an banwaan na an Diyos iyo si Jehova!’ an sabi kan salmista. (Sal. 144:15) Si Jehova maugmang Diyos, asin arog man kaiyan an saiyang mga lingkod. Saka, bakong arog kan mga sobra an pagkamuot sa sadiri na gusto sanang pirming nag-aako, maugma an mga lingkod ni Jehova na magtao kun ano an igwa sinda para sa kapakanan kan iba.—Gibo 20:35.

7. Anong mga hapot an makakatabang sa sato na masiyasat an satong pagkamuot sa Diyos?

⁷ Paano niyato maaaraman kun an satuyang pagkamuot sa Diyos natatahuban na kan pagkamuot sa sadiri? Pag-isipan an sadol na yaon sa Filipos 2:3, 4: “Likayan nindo an paggibo nin ano man na bagay dahil sa hilig na makipagdaugan o dahil sa pagigin mapagpaimportante sa sadiri, kundi may kapakumbabaan nindong ibilang an iba na mas  urog kisa saindo, mantang tinatawan nindo nin atensiyon bako sana an sadiri nindong kapakanan, kundi an kapakanan man kan iba.” Puwede niyatong ihapot sa sadiri: ‘Inaaplikar ko daw iyan? Talaga daw na hinihinguwa kong gibuhon an kabutan nin Diyos? Hinihinguwa ko daw na tabangan an iba, sa kongregasyon man asin sa ministeryo?’ Bako pirming madali an pagtao kan satong panahon asin kusog. Nangangaipo iyan nin paghihinguwa asin pagsasakripisyo. Pero igwa pa daw nin mas makakapaugma sa sato kisa sa pakaaram na inuuyunan kita kan Soberano kan uniberso?

8. Ano an ginibo nin nagkapira huli sa pagkamuot ninda sa Diyos?

⁸ Napahiro kan pagkamuot sa Diyos an nagkapira na bayaan an saindang magayon na trabaho tanganing mas lubos na makapaglingkod ki Jehova. Si Ericka, na nakaistar sa Estados Unidos, sarong doktor. Pero imbes na mag-abot nin mas halangkaw na posisyon sa medisina, nagregular payunir siya asin naglingkod sa nagkapirang nasyon kaiba kan saiyang agom. Sinabi niya: “An dakul na eksperyensiyang natipon mi sa pagtabang sa teritoryo na iba an lengguwahe, pati an mga nagin amigo mi, talagang nakapaugma sa samo. Nagtatrabaho pa man giraray ako bilang doktor, pero an paggamit ko kan kadaklan sa panahon saka kusog ko sa pagtabang sa iba na maumayan sa espirituwal pati sa pag-asikaso kan mga pangangaipo kan kongregasyon nagtao sako nin udok sa pusong kaugmahan asin tunay na pagkakontento.”

9. Taano ta dai nagtatao nin kaugmahan an pagkamuot sa kuwarta?

⁹ Si Pablo nagsurat na an mga tawo magigin “mamumuton sa kuwarta.” Pirang taon na an nakaagi, sarong payunir sa Ireland an nakipag-ulay sa sarong lalaki dapit sa Diyos. Kinua kan lalaki an saiyang pitaka, nagkua nin pirang kuwartang papel, itinaas iyan, dangan may kahambugan na nagsabi, “Ini an diyos ko!” Dawa dai ninda admitiron, kadakul sa kinaban nin mga tawong namumuot sa kuwarta asin sa mga bagay na nababakal kaiyan. Alagad, nagpapatanid an Bibliya: ‘An namumuot sa kuwarta dai nanggad makokontento kaiyan. An namumuot sa kayamanan padagos na magpaparahanap kaiyan.’ (Par. 5:10, An Marahay na Bareta Biblia) An mga tawong arog kaiyan gusto pirming makakua nin mas dakul pang kuwarta, asin dahil sa paghihinguwa nindang iyan, dinadarahan ninda an saindang sadiri nin “gulping mga kakulugan.”—1 Tim. 6:9, 10.

10. Ano an sinasabi kan Bibliya dapit sa kayamanan asin pagigin pobre?

¹⁰ Siyempre, kaipuhan niyato gabos nin kuwarta. Maski paano proteksiyon iyan. (Par. 7:12) Pero posible daw kitang magin tunay na maugma kun igo sana para sa satong panginot na mga pangangaipo an yaon sato? Iyo! (Basahon an Parahulit 5:12.) Si Agur na aki ni Jaque nagsurat: ‘Dai mo ako pagtawan nin kadukhaan minsan mga kayamanan. [Tawan mo sana] ako kan tinapay na sakuyang kaipuhan.’ Makukua ta tulos kun taano ta habo niyang magin pobreng marhay. Uyon sa sunod na sinabi niya, habo niyang masugutan na maghabon huling makakaraot iyan sa reputasyon nin Diyos. Pero taano ta ipinamibi niyang dai siya magkaigwa nin mga kayamanan? Sinabi niya: ‘[Tanganing dai ako mabasog], asin sayumahan taka, asin magsabi, “Siisay si Jehova?”’ (Tal. 30:8, 9) Posibleng may bisto kang mga tawo na nagsasarig sa saindang kayamanan imbes na sa Diyos.

11. Anong sadol an itinao ni Jesus mapadapit sa kuwarta?

¹¹ An mga namumuot sa kuwarta dai mapapaugma an Diyos. Sinabi ni Jesus: “Dai nin siisay man na makakapaglingkod bilang uripon nin duwang kagurangnan; huli ta magsalang ikakaungis niya an saro asin mamumutan an saro, o magigin maimbod siya sa saro asin hahabuan an saro. Dai kamo makakapaglingkod bilang uripon nin Diyos asin nin Kayamanan.” Bago iyan, sinabi niya: “Dai na kamo magparatipon nin kayamanan para sa saindong sadiri digdi sa daga, kun sain rinaraot iyan nin mga insekto asin takla saka may mga parahabon na nanglalaog. Imbes, magtipon kamo para sa  saindong sadiri nin kayamanan sa langit, kun sain daing mga insekto o takla na nangraraot, asin daing mga parahabon na nanglalaog.”—Mat. 6:19, 20, 24.

12. Taano ta mas maugma na mamuhay nin simple? Magtao nin halimbawa.

¹² Napatunayan nin dakul na dai sana sinda nagin mas maugma sa pamumuhay nin simple kundi nagkaigwa man sinda nin mas dakul na panahon na makapaglingkod ki Jehova. Si Jack, na nakaistar sa Estados Unidos, ipinabakal an saiyang dakulang harong asin negosyo huling aram niyang paagi kaiyan makakapagpayunir sindang mag-agom. Nagirumduman niya: “Masakit bayaan an magayon ming harong saka an pagsadiri mi sa luwas kan siyudad. Pero, sa dakul na taon, nag-uuli akong disganado dahil sa mga problema sa trabaho mantang si agom, na regular payunir, pirming maugmahon. Sinasabi niya, ‘Mayo nang madaog sa boss ko!’ Ngunyan na payunir na man ako, pareho na kami nin boss, si Jehova.”

13. Paano niyato masisiyasat an pagmansay ta sa kuwarta?

¹³ Tanganing masiyasat an satong pagmansay sa kuwarta, kaipuhan niyato na onestong simbagon an mga hapot na ini: ‘Naniniwala daw talaga ako sa sinasabi kan Bibliya dapit sa kuwarta asin namumuhay uyon diyan? Panginot daw sa buhay ko an paghanap nin kuwarta? Mas pinapahalagahan ko daw an materyal na mga bagay kisa sa relasyon ko ki Jehova asin sa mga tawo? Nagtitiwala daw talaga ako na itatao ni Jehova an mga pangangaipo ko?’ Makakasigurado kita na nungkang masusudya an mga naglalaom sa saiya.—Mat. 6:33.

14. Ano an timbang na pagmansay kun dapit sa pag-ugma?

¹⁴ Siring kan ihinula, dakul na tawo ngunyan an “mas gusto pang magpasiram-siram.” Kun paanong mayo man nin maraot sa pagkaigwa nin tamang pagkamuot sa sadiri asin balanseng pagmansay sa kuwarta, mayo man nin maraot sa pagigin timbang kun dapit sa pag-ugma. Habo ni Jehova na sobra tang pangurihan an satong sadiri o na likayan an marahay asin nakakaugmang mga aktibidad. Dinadagka kan Bibliya an mga maimbod: ‘Lakaw, asin kakana an tinapay mo na may kaugmahan, asin inuma an saimong arak na may magaya-gayang puso.’—Par. 9:7.

15. Anong klase nin pamumuhay an sinambit sa 2 Timoteo 3:4?

¹⁵ Sinasambit sa 2 Timoteo 3:4 an sarong klase nin pamumuhay na nakasentro sa pagpasiram-siram imbes na sa Diyos. Risahon na dai sinasabi  kan bersikulo na mas mamumutan kan mga tawo an pagpasiram-siram kisa sa Diyos, na nagpaparisang may pagkamuot pa man giraray sinda sa Diyos. An sinabi diyan ‘imbes na sa Diyos.’ Sarong iskolar sa Bibliya an nagsurat: “Malinaw na [an bersikulong] ini dai nangangahulugan na namumutan pa man giraray ninda an Diyos maski paano. Imbes, dai talaga ninda namumutan an Diyos.” Nakakapaisip nanggad na patanid iyan para sa mga tawong nakasentro an buhay sa pagpasiram-siram! Angay an deskripsiyon sa sainda kan Bibliya bilang mga tawong “nairarayo an atensiyon dahil sa . . . mga kaugmahan sa buhay.”—Luc. 8:14.

16, 17. Anong halimbawa an ipinahiling ni Jesus kun dapit sa pag-ugma?

¹⁶ Ipinahiling ni Jesus an perpektong halimbawa nin pagigin balanse kun dapit sa pag-ugma. Nag-atender siya sa sarong “bangkete sa kasal” asin sa sarong “dakulang bangkete.” (Juan 2:1-10; Luc. 5:29) Sa kasal, kinulang nin arak kaya milagroso niyang ginibong arak an tubig. Dangan sa ibang pangyayari, kan kinikritika si Jesus kan mga tawo kan mahiling ninda siyang nagkakakan asin nag-iinom, malinaw niyang ipinahiling na bakong timbang an pagmansay ninda.—Luc. 7:33-36.

¹⁷ Pero, dai man nagpangana si Jesus sa pag-ugma. Ininot niya si Jehova asin ginibo an gabos na makakaya para sa kapakanan kan iba. Tanganing mailigtas an katawuhan, andam siyang magtios sagkod na magadan sa hariging pasakitan. Sinabi ni Jesus sa magigin mga parasunod niya: “Maugma kamo kun pigtutuya kamo nin mga tawo asin kun pinepersegir ninda kamo saka kun sinda putik na nagtataram laban sa saindo nin gabos na klase nin maraot na bagay nin huli sa sako. Mag-ugma kamo asin maggaya-gayang marhay ta dakula an saindong balos sa langit, huli ta arog man kaiyan an pagpersegir ninda sa mga propetang nainot sa saindo.”—Mat. 5:11, 12.

18. Anong mga hapot an makakatabang sa sato na maaraman kun baga timbang an satong pagmansay sa pag-ugma?

¹⁸ Paano ta maaaraman kun baga timbang an satong pagmansay sa pag-ugma? Puwede tang haputon an satong sadiri: ‘Para sako, an mga pagtiripon daw saka paghuhulit panduwa na sana sa paglilibang? Andam ko daw na isakripisyo an pirang bagay na ikinakaugma ko huling gusto kong maglingkod sa Diyos? Sa pagpili nin libangan, iniisip ko daw an magigin paghiling diyan ni Jehova?’ Kun talagang namumutan niyato an Diyos, hihinguwahon tang likayan bako sana an mga bagay na aram tang makakapamundo sa saiya kundi dawa an mga bagay na iniisip tang tibaad makapamundo sa saiya.—Basahon an Mateo 22:37, 38.

19. Siisay an nungkang magigin tunay na maugma?

¹⁹ Mga 6,000 na taon nang nagsasakit an katawuhan sa kinaban ni Satanas. Ngunyan na madali na an katapusan kaiyan, lakop sa kinaban an mga tawong sobra an pagkamuot sa sadiri, kuwarta, asin pag-ugma—mga tawong interesado sana sa kun ano an makukua ninda asin panginot sa buhay an saindang sadiring mga pagmawot. An mga tawong arog kaiyan nungkang magigin tunay na maugma. Sa kabaliktaran, isinurat kan salmista: ‘Maugma idtong an saiyang parasurog iyo an Diyos ni Jacob, na an saiyang paglaom yaon ki Jehova na saiyang Diyos.’—Sal. 146:5.

20. Paano nakapagtao sa saimo nin kaugmahan an pagkamuot sa Diyos?

²⁰ An pagkamuot kan mga lingkod ni Jehova para sa saiya lalong nagkukusog, asin padakul kita nin padakul kada taon. Patunay iyan na an Kahadian nin Diyos namamahala na asin madali nang magdara sa daga nin makangangalas na mga bendisyon. Kun ginigibo niyato an kabutan nin Diyos asin an mga bagay na nakakapaugma sa saiya, makakamtan ta an tunay asin nagdadanay na kaugmahan. Asin an mga namumuot ki Jehova magigin maugma sagkod lamang! Sa sunod na artikulo, tutukaron ta an pirang ugali na resulta nin makasadiring pagkamuot asin hihilingon ta an pagkakaiba kaiyan sa mga ugali na mahihiling sa mga lingkod ni Jehova.