1. Ano an namatian ni David para ki Jehova, asin pinahiro siya kaini na gibuhon an ano?

SI Hading David nagsurat: ‘Si Jehova dakula asin pinakamaninigo sa pag-umaw.’ (Sal. 145:3) Namutan niya si Jehova, asin pinahiro siya kan pagkamuot na iyan na umawon an Diyos ‘sa tahaw kan [kongregasyon].’ (Sal. 22:22; 40:5) Siguradong namumutan mo si Jehova asin uyon ka sa sinabi ni David: ‘Pag-umawon ka lugod, O Jehova, Diyos kan Israel na samuyang ama, sagkod nuarin pa man.’—1 Cron. 29:10-13.

2. (a) Paano niyato mauumaw si Jehova? (b) Anong problema an napapaatubang sa nagkapira, asin ano an pag-uulayan niyato?

² Ngunyan, an sarong paagi na inuumaw ta si Jehova iyo an pagkomento sa Kristiyanong mga pagtiripon. Alagad, an nagkapira sa satong mga tugang talagang napapaatubang sa sarong problema. Gusto nindang magkomento sa mga pagtiripon pero nauulang sinda nin takot. Ano an puwede nindang gibuhon para malabanan an takot na iyan? Asin anong praktikal na mga suhestiyon an makakatabang sa sato gabos na makatao nin nakakapakusog na mga komento? Bago niyato simbagon an mga hapot na iyan, pag-ulayan ta nguna an apat na mahalagang dahilan kun taano ta nagkokomento kita sa mga pagtiripon.

3-5. (a) Sigun sa Hebreo 13:15, taano ta nagkokomento kita sa mga pagtiripon? (b) Dapat daw na gabos kita magkakapareho an komento? Ipaliwanag.

³ Gabos kita tinawan ni Jehova nin pribilehiyo na umawon siya. (Sal. 119:108) An mga komento niyato sa mga pagtiripon kabtang kan satong “atang nin pag-umaw” asin kita sana, mayo nang iba, an makakatao kan atang na iyan para sa sato. (Basahon  an Hebreo 13:15.) Naghahagad daw si Jehova nin magkakaparehong klase nin atang, o komento, sa lambang saro sa sato? Dai nanggad!

⁴ Aram ni Jehova na magkakaiba an satong kakayahan saka sitwasyon, asin pinapahalagahan niyang marhay an mga atang na itinatao ta sa saiya sigun sa kaya ta. Pag-isipan an mga klase nin atang na inako niya hali sa mga Israelita. May mga Israelita na kayang mag-atang nin kordero o kanding. Pero kun an sarong Israelita tios, puwede siyang mag-atang nin ‘duwang agbaan o duwang ugbon nin salampati.’ Asin kun an sarong Israelita dai kayang magtao nin duwang gamgam, inaako ni Jehova an ‘ikasampulong [kabtang] kan sarong epa nin [pinong] harina.’ (Lev. 5:7, 11) An harina mas barato, alagad pinapahalagahan man giraray ni Jehova an atang na iyan basta iyan ‘pinong harina.’

⁵ Arog pa man giraray kaiyan ngunyan an pagmansay kan satong mabuot na Diyos. Pag kita nagkokomento, dai niya hinahagad na gabos kita magin arog katibay ni Apolos sa pagtaram o ni Pablo sa pangungumbinsir. (Gibo 18:24; 26:28) An inaasahan sana sato ni Jehova iyo na itatao ta an satong pinakamarahay na komento sa abot kan satong makakaya. Girumdumon an babaying balo na naghulog nin donasyon na duwang sadit na sinsilyo. Mahalagang marhay siya ki Jehova huling itinao niya an pinakamakakaya niya.—Luc. 21:1-4.

6. (a) Sigun sa Hebreo 10:24, 25, ano an puwedeng magin epekto sa sato kan nadadangog niyatong mga komento? (b) Paano mo maipapahiling na pinapahalagahan mo an mga komento na nakapakusog sa saimo?

⁶ Napapakusog ta an lambang saro paagi kan satong mga komento. (Basahon an Hebreo 10:24, 25.) Gabos kita nauugma pag nadadangog ta an manlain-lain na komento sa satong mga pagtiripon. Naaapresyar ta an simple asin sinserong simbag nin sarong aki. Napapakusog kitang marhay pag nadadangog ta an ganadong boses nin sarong nagkokomento mapadapit sa nanudan niya pa sanang katotoohan. Asin naghahanga man kita sa mga “nagtipon . . . nin kusog nin buot” para makatao nin komento, dawa ngani nasusupog sinda o nakakanuod pa sana kan satong lengguwahe. (1 Tes. 2:2) Paano ta maipapahiling na pinapahalagahan ta an saindang paghihinguwa? Puwede ta sindang pasalamatan sa saindang nakakapakusog na komento pagkatapos kan pagtiripon. An saro pang paagi iyo an pagkomento man niyato. Paagi kaiyan, bako sana kita an napapakusog sa mga pagtiripon kundi napapakusog ta man an iba.—Roma 1:11, 12.

7. Paano kita nakikinabang sa pagkomento?

 ⁷ Nakikinabang kita pag nagkokomento. (Isa. 48:17) Paano? Inot, kun kita nagpaplanong magkomento, mas namomotibar kitang mag-andam na marhay para sa pagtiripon. Pag nag-aandam kitang marhay, mas nagrararom an pakasabot niyato sa Tataramon nin Diyos. Mantang mas nagrararom an satong pakasabot, nagigin mas madali man sa sato na iaplikar an mga nanunudan ta. Ikaduwa, mas ikakaugma ta an mga pagtiripon huling nakikikabtang kita sa pagtukar. Ikatulo, huling kaipuhan nin paghihinguwa para makakomento, sa parati nagigirumduman niyato an mga puntong ikinomento ta sa pagtiripon maski haloy nang natapos iyan.

8, 9. (a) Arog kan mababasa ta sa Malaquias 3:16, ano sa hiling mo an namamatian ni Jehova pag nagkokomento kita? (b) Ano an tibaad problema pa man giraray kan iba?

⁸ Napapaugma ta si Jehova pag ipinapahayag ta an satong pagtubod. Makakasigurado kita na nagdadangog sa sato si Jehova asin inaapresyar niyang marhay an satong paghihinguwa na magkomento sa mga pagtiripon. (Basahon an Malaquias 3:16.) Ipinapahiling niya an saiyang pag-apresyar paagi sa pagtao nin bendisyon sa sato pag pinagmamaigutan tang marhay na paugmahon siya.—Mal. 3:10.

⁹ Malinaw na may marahay kitang mga dahilan na magkomento sa mga pagtiripon. Sa ibong kaiyan, tibaad may mga natatakot pa man giraray na magtaas nin kamot. Kun arog ka kaiyan, dai pangluyahan nin buot. Pag-ulayan niyato an pirang prinsipyo asin halimbawa sa Bibliya, saka an pirang praktikal na suhestiyon na makakatabang sa sato gabos na maghinguwang urog pang makapagkomento sa mga pagtiripon.

10. (a) Nakakamati nin anong takot an dakul sa sato? (b) Taano ta puwedeng marahay na indikasyon an pakamati nin takot na magkomento?

¹⁰ Ninenerbiyos ka na daw maski iniisip mo pa sanang magtaas nin kamot tanganing magkomento? Kun iyo, dai ka nagsosolo. An totoo, nakakamati nin takot an kadaklan sa sato pag nagkokomento. Para malabanan an takot na nakakaulang sa saimo na magkomento, kaipuhan mo ngunang aramon an dahilan kan takot mo. Natatakot ka daw na tibaad malingawan mo an  sasabihon mo o na sala an masabi mo? Nahahadit ka daw na tibaad dai magin arog kagayon kan sa iba an komento mo? An totoo, puwedeng marahay na indikasyon iyan. Ipinapahiling kaiyan na mapakumbaba ka asin ibinibilang mo an iba na mas urog kisa saimo. Gustong-gusto ni Jehova an kuwalidad na iyan. (Sal. 138:6; Fil. 2:3) Alagad gusto man ni Jehova na umawon mo siya asin pakusugon mo an saimong mga tugang sa mga pagtiripon. (1 Tes. 5:11) Namumutan ka niya asin tatawan ka niya kan kusog nin buot na kaipuhan mo.

11. Anong mga pagirumdom sa Kasuratan an makakatabang sa sato?

¹¹ Pag-isipan an pirang pagirumdom sa Kasuratan. Sinasabi kan Bibliya na gabos kita napapasala sa satong sinasabi asin sa paagi nin pagsabi niyato kaiyan. (Sant. 3:2) Dai hinahagad ni Jehova na magin perpekto kita, asin arog man kaiyan an satong mga tugang. (Sal. 103:12-14) Pamilya ta sinda sa espirituwal, asin namumutan ninda kita. (Mar. 10:29, 30; Juan 13:35) Nasasabutan ninda na kun minsan dai ta nasasabi an satong mga komento nin eksakto sa gusto ta.

12-13. Ano an manunudan ta sa mga halimbawa ni Nehemias asin Jonas?

¹² Pag-isipan an pirang halimbawa sa Bibliya na makakatabang sa saimo na labanan an saimong mga ikinakatakot. Girumdumon si Nehemias. Naglingkod siya sa palasyo kan sarong makapangyarihan na hadi. Namundo si Nehemias huling nabaretaan niya na garaba an mga lanob asin tata kan Jerusalem. (Neh. 1:1-4) Imahinaron na sana an grabeng nerbiyos na tibaad namatian niya kan haputon siya kan hadi kun taano ta mamunduon siya! Namibi tulos si Nehemias dangan nagsimbag. Huli kaiyan, nagtao nin dakulang tabang an hadi sa banwaan nin Diyos. (Neh. 2:1-8) Isipon man si Jonas. Kan isugo siya ni Jehova na paabutan nin mensahe an mga taga Nineve, natakot na marhay si Jonas kaya nagdulag siya pasiring sa ibong na direksiyon. (Jon. 1:1-3) Pero sa tabang ni Jehova, nagibo ni Jonas an asignasyon niya. Asin an saiyang mensahe nakatabang na marhay sa mga taga Nineve. (Jon. 3:5-10) Nanudan ta ki Nehemias an kahalagahan kan pagpamibi bago kita magsimbag. Asin nanudan ta man ki Jonas na tatabangan kita ni Jehova na paglingkudan siya ano man an satong ikinakatakot. Saka kun iisipon, may kongregasyon daw na makatakot arog sa Nineve?

¹³ Anong praktikal na mga suhestiyon an makakatabang sa saimo na makapagtao nin nakakapakusog na mga komento sa mga pagtiripon? Pag-ulayan ta an pirang suhestiyon.

14. Taano ta dapat kitang mag-andam na marhay para sa satong mga pagtiripon, asin nuarin kita puwedeng mag-andam?

¹⁴ Mag-andam para sa lambang pagtiripon. Kun patiinot kang maplano asin maandam na marhay, magigin mas makusog an buot mong magkomento. (Tal. 21:5) Siyempre, magkakaiba kita nin iskedyul sa pag-andam. Si Eloise, sarong balo na labi nang 80 anyos, nag-aandam sa Pag-adal sa Torrengbantayan sa kapinunan kan semana. Sinabi niya: “Mas maugma ako sa mga pagtiripon kun patiinot akong nag-adal.” Si Joy,  na nagtatrabaho nin full-time, nagtatagama nin panahon pag Sabado tanganing pag-adalan an saiyang Torrengbantayan. “Gusto kong presko sa isip ko an napag-adalan ko,” an sabi niya. Si Ike, na sarong elder na dakul an paninimbagan saka payunir man, nagsabi, “Narisa ko na pinakamarahay sa sako an haralipot na pag-adal sa laog kan semana imbes na sararuan sana.”

15. Paano ka makakapag-andam na marhay para sa pagtiripon?

¹⁵ Paano ka makakapag-andam na marhay para sa pagtiripon? Punan an lambang pag-adal paagi sa pagpamibi ki Jehova para sa tabang kan banal na espiritu. (Luc. 11:13; 1 Juan 5:14) Dangan pasadahan an artikulo. Analisaron an titulo, mga subtema, ritrato, asin mga kahon sa pagtutukdo. Mantang pinag-aadalan mo na an lambang parapo, basahon an sitadong mga teksto sagkod sa mapupuwede. Hurop-hurupon an impormasyon, na tinatawan nin urog na atensiyon an mga puntong gusto mong komentuhan. Kun mas nag-andam ka, mas makikinabang ka asin magigin mas madali na magkomento.—2 Cor. 9:6.

16. Anong mga kasangkapan an makakatabang sa saimo, asin paano mo iyan ginagamit?

¹⁶ Kun posible, gamiton an digital na mga kasangkapan na igwa sa lengguwaheng aram mo. Paagi sa saiyang organisasyon, tinatawan kita ni Jehova nin digital na mga kasangkapan tanganing tabangan kita sa pag-andam para sa mga pagtiripon. Paagi sa JW Library^® app, mada-download ta sa gadyet an pag-aadalan na mga publikasyon. Dangan puwede na kitang mag-adal—o maski paano magbasa o magdangog kan materyal—ano man na oras asin dawa sain. Ginagamit kan iba an app na ini tanganing mag-adal pag break sa udto sa trabaho o kaya sa eskuwelahan o pag nagbibiyahe. Paagi sa Watchtower Library asin Watchtower ONLINE LIBRARY^™, napapadaling marhay an pag-research nin mga punto sa leksiyon na gusto tang mas pag-adalan pa.

17. (a) Taano ta marahay na mag-andam nin nagkapirang komento? (b) Ano an nanudan mo sa video na Magin Katuod ni Jehova—Ihanda an Saimong Komento?

¹⁷ Mag-andam nin nagkapirang komento para sa lambang leksiyon kun posible. Taano? Huling dai mo man sigurado na pirmi kang maaapod pag nagtaas ka nin kamot. Posibleng marhay na may makakasarabay kang magtaas nin kamot, asin tibaad saro sa sainda an apudon kan konduktor. Tanganing masigurado na matapos sa oras an pagtiripon, tibaad kaipuhan kan konduktor na limitaran an bilang nin komento sa pirang parte kan leksiyon. Kaya dai magkulog an buot o madisganar kun dai ka niya apudon sa kapinunan kan pag-adal. Kun nag-andam ka nin nagkapirang komento, mas dakul an oportunidad mong makikabtang sa pagtukar. An pagbasa nin teksto an saro sa puwede mong iandam na komento. Pero kun kaya mo, mag-andam man nin komento gamit an sadiri mong tataramon. *

18. Taano ta dapat haralipot sana an komento?

¹⁸ Magtao nin haralipot na komento. Sa parati,  an halipot asin simpleng komento an pinakanakakapakusog. Kaya pagmaigutan na magkomento nin haralipot sana. Hinguwahon na magsimbag sa laog sana nin mga 30 segundo. (Tal. 10:19; 15:23) Kun nagkokomento ka na sa laog nin dakul na taon, may importante kang kabtang—magin marahay na halimbawa paagi sa pagkomento nin haralipot sana. Kun komplikado asin haralawig an komento mo, tibaad mag-alangan an iba na magkomento huling iniisip ninda na dai ninda mapapantayan an tibay mo sa pagkomento. Saka kun haralipot an komento, mas dakul an makakapartisipar sa pagtiripon. Lalo na kun ika an inot na inapod, magtao nin simple asin direkta sa puntong simbag. Dai isimbag an gabos na punto sa parapo. Pag natukar na an panginot na punto sa parapo, puwede ka nang magkomento sa iba pang mga punto.—Hilingon an kahon na “ Ano an Puwede Kong Ikomento?”

19. Paano makakatabang sa saimo an konduktor, pero ano an dapat mong gibuhon?

¹⁹ Patiinot na magsabi sa konduktor na gusto mong magkomento sa sarong espesipikong parapo. Kun gusto mong gibuhon ini, dapat mong dulukon an konduktor bago pa magpuon an pagtiripon. Pag kokomentuhan na an parapo, itaas tulos an kamot asin siguraduhon na mahihiling iyan kan konduktor.

20. Taano ta an pagtiripon kan kongregasyon garo pagkakan kaiba kan dayupot mong mga amigo?

²⁰ Isipon na an mga pagtiripon sa kongregasyon garo pagkakan kaiba kan dayupot mong mga amigo. Ipamugtak na nagplano an pirang amigo mo sa kongregasyon na mag-ihaw-ihaw asin pinakiulayan kang magpreparar nin simpleng mga kakanon. Ano an gigibuhon mo? Tibaad medyo mahadit ka, pero siguradong gigibuhon mo an saimong bilog na makakaya para makadara nin kakanon na magugustuhan kan gabos. Si Jehova, an satong Kag-imbitar, nag-andam nin lamesa na pano nin marahay na mga bagay para sa sato sa satong mga pagtiripon. (Sal. 23:5; Mat. 24:45) Asin nauugma siya pag nagdadara kita nin simpleng regalo, an pinakamarahay na maitatao ta. Kaya mag-andam na marhay asin magpartisipar nin lubos sagkod na posible. Paagi kaiyan, dai ka sana nagkakakan sa lamesa ni Jehova kundi nagdadara ka man nin regalo na maihihiras mo sa kongregasyon.