1-2. Anong mga sitwasyon an napapaatubang sa dakul na lingkod ni Jehova, asin ano an puwedeng magin epekto kaiyan sa sainda?

PAG-ISIPAN an minasunod na tulong senaryo: Sarong hoben na brother an na-diagnose na may malalang hilang na luway-luway na mapaluya sa saiya. Sarong mahigos na brother na labi nang 50 anyos an nasisante sa trabaho asin, sa ibong kan maigot na paghihinguwa niya, dai siya makahanap nin bago. Sarong maimbod na may edad nang sister an lalong nalilimitaran an kayang magibo sa paglilingkod ki Jehova.

² Kun an sitwasyon mo kaagid kan saro sa mga senaryong iyan, tibaad mamatian mong bako ka nang kapaki-pakinabang. An mga kamugtakan na iyan puwedeng makahali kan saimong kaugmahan, makawara kan paggalang mo sa sadiri, asin makaapektar sa relasyon mo sa saimong kapwa.

3. Ano an pagmansay ni Satanas asin kan mga nasa kontrol niya kun dapit sa buhay nin tawo?

³ Ipinapahiling kan kinaban na ini an pagmansay ni Satanas sa buhay nin tawo. Kaidto pa, tinatratar na ni Satanas an mga tawo na garo baga bako sindang mahalaga. Daing hirak na sinabi niya ki Eva na magigin talingkas ini kun susuwayon kaini an Diyos, dawa aram na aram niya na kagadanan an penalidad kan pagsuway sa Diyos. Kaidto pa, kontrolado na ni Satanas an sistema nin komersiyo, pulitika, asin relihiyon kan kinaban na ini. Kaya bakong makangangalas na dakul na negosyante, pulitiko, asin mga lider nin relihiyon an nagpapahiling nin kawaran nin paggalang sa buhay asin dignidad nin tawo.

4. Ano an tutukaron niyato sa artikulong ini?

⁴ Sa ibong na lado, gusto ni Jehova na magin marahay an paghiling  niyato sa satong sadiri, asin tinatabangan niya kita pag napapaatubang kita sa mga sitwasyon na puwedeng makapamati sato na dai kitang halaga. (Sal. 136:23; Roma 12:3) Tutukaron kan artikulong ini kun paano kita tinatabangan ni Jehova sa minasunod na mga sitwasyon: (1) Pag may hilang kita, (2) pag nakakaeksperyensiya kita nin masakit na pagbuhay, asin (3) pag namamatian tang bako na kitang kapaki-pakinabang na lingkod ni Jehova dahil gurang na kita. Alagad, hilingon nguna niyato kun taano ta makakapagtiwala kita na mahalaga ki Jehova an lambang saro sa sato.

5. Taano ta masasabi mong mahalagang marhay ki Jehova an mga tawo?

⁵ Dawa ginibo kita hali sa alpog, mas mahalagang marhay nanggad kita kisa sa sarong hakbot nin alpog. (Gen. 2:7) Pag-isipan an pira sana sa mga dahilan kaya aram tang mahalagang marhay kita ki Jehova. Linalang niya an mga tawo na may kakayahan na ipahiling an saiyang mga kuwalidad. (Gen. 1:27) Paagi kaiyan, ginibo niya kitang magin mas nakakalabi sa ano pa man na pisikal na mga linalang niya, asin tinawan kita nin awtoridad na mamahala sa daga asin sa mga hayop.—Sal. 8:4-8.

6. Ano an iba pang patunay kaya aram tang mahalaga ki Jehova an bakong perpektong mga tawo?

⁶ Dawa pagkatapos na magkasala si Adan, mahalaga pa man giraray ki Jehova an mga tawo. Pinapahalagahan niya kitang marhay kaya itinao niya an saiyang namumutan na Aki, si Jesus, bilang pantubos para sa satong mga kasalan. (1 Juan 4:9, 10) Paagi sa mga pakinabang kan pantubos, bubuhayon ni Jehova an mga nagadan huli sa kasalan ni Adan, “an mga matanos pati an mga bakong matanos.” (Gibo 24:15) Ipinapahiling kan saiyang Tataramon na mahalagang marhay kita sa saiya makusog man kita o may hilang, tios man kita o mayaman, o ano man an satong edad.—Gibo 10:34, 35.

7. Ano pa an dagdag na mga dahilan kaya nagtutubod an mga lingkod nin Diyos na pinapahalagahan sinda ni Jehova?

⁷ May dagdag pa kitang mga dahilan na magtubod na pinapahalagahan kita ni Jehova. Irinani niya kita sa saiya asin tinawan nin atensiyon an reaksiyon niyato sa maugmang bareta. (Juan 6:44) Kan nagpuon na kitang rumani ki Jehova, mas nagrani man siya sa sato. (Sant. 4:8) Nagtatao man si Jehova nin panahon sa paghihinguwang tukduan kita, patunay na mahalagang marhay kita sa saiya. Aram niya kun anong klaseng tawo kita sa presente asin kun paano ta maaabot an satong potensiyal. Asin dinidisiplina niya kita huling namumutan niya kita. (Tal. 3:11, 12) Makusog nanggad na patunay iyan na pinapahalagahan kita ni Jehova!

8. Ano an puwedeng magin epekto kan mga tataramon na nasa Salmo 18:27-29 sa pagmansay niyato sa satong mga problema?

⁸ May mga tawo kaidto na an paghiling ki Hading David daing halaga, pero aram niya na namumutan asin tinatabangan siya ni Jehova. Nakatabang iyan ki David na magkaigwa nin tamang sabuot sa saiyang sitwasyon. (2 Sam. 16:5-7) Pag grabe an kamunduan ta, o pag may mga problema kita, matatabangan kita ni Jehova na magin positibo asin makayanan an ano man na problema. (Basahon an Salmo 18:27-29.) Pag yaon sa sato an suporta ni Jehova, mayong makakapapundo sa sato na paglingkudan siya na may kaugmahan. (Roma 8:31) Pag-ulayan ta ngunyan an sinambit kasubago na tulong espesipikong sitwasyon na diyan lalo niyatong kaipuhan na girumdumon na namumutan asin pinapahalagahan kita ni Jehova.

9. Paano an hilang puwedeng makaapektar sa paghiling ta sa satong sadiri?

⁹ Pag may hilang kita, puwede kaiyan na maapektaran an satong emosyon, kaya tibaad isipon niyato na mayo na kitang pakinabang sa siisay man. Tibaad masupog kita pag nahihiling kan iba  an satong mga limitasyon o pag kaipuhan niyatong umasa sa iba para sa tabang. Dawa kun dai aram kan iba na may hilang kita, tibaad masupog pa man giraray kita huling limitado nang marhay an kaya tang gibuhon. Sa arog kaiyan na nakakapurisaw na mga panahon, pinapakusog kita ni Jehova. Paano?

10. Sigun sa Talinhaga 12:25, ano an makakatabang sa sato pag may hilang kita?

¹⁰ Pag may hilang kita, an “marahay na tataramon” makakapakusog sa sato. (Basahon an Talinhaga 12:25.) Sa Bibliya, naglaag si Jehova nin marahay na mga tataramon na nagpapagirumdom sa sato na mahalaga kita sa saiya dawa kun may hilang kita. (Sal. 31:19; 41:3) Kun babasahon ta asin dawa ngani pauruutro niyatong babasahon an ipinasabong na mga tataramon na iyan, tatabangan kita ni Jehova na makayanan an negatibong mga emosyon na dara kan satong hilang.

11. Paano naeksperyensiyahan nin sarong brother an tabang ni Jehova?

¹¹ Pag-isipan an eksperyensiya ni Jorge. An hoben pang si Jorge nagkaigwa nin nakakapaluyang hilang na marikas na naglala kaya namatian niyang mayo na siyang halaga. “Dai ako handa sa nagin epekto sa sako kan hilang ko o sa supog na namatian ko dahil sa nagin reaksiyon kan mga tawo,” an sabi ni Jorge. “Mantang naglalala an kondisyon ko, inisip ko kun paano kaiyan mababago an buhay ko. Grabe talaga an kamunduan ko, kaya nakimahirak ako ki Jehova na tabangan ako.” Paano siya tinabangan ni Jehova? “Dahil dipisil sako na magkonsentrar, nagbabasa ako nin haralipot sanang mga teksto sa Salmo na nagpapahayag kan pagmalasakit ni Jehova sa saiyang mga lingkod. Inuutro kong basahon an pirang tekstong iyan kada aldaw, asin naranga talaga ako kaiyan. Dai nahaloy, naririsa na kan mga tawo na mas parati na akong nagngingirit. Sinabi pa ngani ninda na napakusog sinda kan pagigin positibo ko. Nahiling ko na sinimbag talaga ni Jehova an mga pamibi ko! Tinabangan niya ako na  baguhon an paghiling ko sa sadiri ko. Iniisip ko na pirmi an sinasabi kan Bibliya manungod sa kun ano an paghiling niya sako dawa may hilang ako.”

12. Kun may pigmamati kang hilang, paano mo makukua an tabang ni Jehova?

¹² Kun may pigmamati kang hilang, makakasigurado ka na aram ni Jehova an inaagihan mo. Makimahirak sa saiya na tabangan kang magin positibo pa man giraray sa ibong kan kamugtakan mo. Dangan gamiton an Bibliya tanganing makua an marahay na mga tataramon na itinagama ni Jehova para sa saimo. Magpokus sa mga tekstong nagpapahiling kun gurano kahalaga ki Jehova an saiyang mga lingkod. Mantang ginigibo mo iyan, mahihiling mo na marahay si Jehova sa gabos na maimbod na naglilingkod sa saiya.—Sal. 84:11.

13. Ano an tibaad mamatian nin sarong payo nin pamilya kun mawaran siya nin trabaho?

¹³ Gusto kan lambang payo nin pamilya na maitao sa pamilya niya an panginot na mga pangangaipo sa buhay. Pero paano kun nasisante sa trabaho an sarong brother maski mayo man siyang ginigibong sala? Hininguwa niyang marhay na makahanap nin ibang trabaho pero mayo siyang makua. Huli kaiyan, tibaad mamatian niyang mayo siyang halaga. Paano makakatabang sa saiya an pagpokus sa mga panuga ni Jehova?

14. Ano an nagkapirang dahilan kaya inuutob ni Jehova an saiyang mga panuga?

¹⁴ Pirming inuutob ni Jehova an saiyang mga panuga. (Jos. 21:45; 23:14) Ginigibo niya iyan huli sa nagkapirang dahilan. Inot, nakataya diyan an saiyang pangaran, o reputasyon. Nanuga si Jehova na aatamanon niya an saiyang maimbod na mga lingkod, asin para sa saiya obligasyon niyang utubon an panugang iyan. (Sal. 31:1-3) Saro pa, aram ni Jehova na mamumundo asin madidisganar nanggad kita kun dai niya aatamanon an mga miyembro kan saiyang  pamilya. Nanunuga siya na itatao niya sa sato an satong materyal asin espirituwal na mga pangangaipo, asin mayo nanggad nin makakapugol sa saiya na utubon an panugang iyan!—Mat. 6:30-33; 24:45.

15. (a) Anong kadipisilan an napaatubang sa mga Kristiyano kan inot na siglo? (b) Anong asigurasyon an itinatao sa sato kan Salmo 37:18, 19?

¹⁵ Pag isinasaisip niyato kun taano ta inuutob ni Jehova an saiyang mga panuga, makakasigurado kita na tatabangan niya kita pag nagin masakit an pagbuhay niyato. Pag-isipan an halimbawa kan mga Kristiyano kan inot na siglo. Kan magkaigwa nin grabeng persekusyon laban sa kongregasyon sa Jerusalem, “gabos sinda, apuwera sa mga apostol, nagkasuruway-suway.” (Gibo 8:1) Isipa na sana an nagin epekto kaiyan. Nagtios sinda! Posibleng marhay na nawaran nin harong asin kabuhayan an mga Kristiyano. Dawa arog kaiyan, dai sinda pinabayaan ni Jehova; dai man nawara an saindang kaugmahan. (Gibo 8:4; Heb. 13:5, 6; Sant. 1:2, 3) Tinabangan ni Jehova an maimbod na mga Kristiyanong idto, kaya tatabangan niya man kita.—Basahon an Salmo 37:18, 19.

16. Anong sitwasyon an puwedeng makapaisip sa sato kun baga pinapahalagahan pa ni Jehova an satong pagsamba?

¹⁶ Mantang nagkakaedad kita, tibaad mamatian niyatong dikit na lang an naitatao ta ki Jehova. Posibleng nakamati man nin arog kaiyan si Hading David kan naggugurang na siya. (Sal. 71:9) Paano kita matatabangan ni Jehova?

17. Ano an manunudan niyato sa eksperyensiya kan sister na si Jheri?

¹⁷ Pag-isipan an eksperyensiya nin sarong sister na si Jheri. Inimbitaran siya na mag-atender sa sarong training sa Kingdom Hall para sa pagmentenar kan mga pasilidad na ginagamit sa paglilingkod ki Jehova, pero dai niya gustong magduman. Sinabi niya: “Gurang na ako, balo, saka  mayo ako maski sarong kasanayan na magagamit ni Jehova. Mayo akong serbi.” Kan banggi bago an training, sinabi niya ki Jehova sa pamibi an gabos na nasa puso niya. Kinaagahan pag-abot niya sa Kingdom Hall, nagpaparaisip pa man giraray siya kun baga dapat daw talagang mag-atender siya. Durante kan programa, idinuon kan saro sa mga ispiker na an pinakaimportanteng kasanayan ta iyo an pagigin andam niyatong tukduan ni Jehova. Nagigirumduman ni Jheri: “Naisip ko, ‘Igwa ako kan kasanayan na iyan!’ Napahibi ako ta aram kong simbag idto ni Jehova sa pamibi ko. Sinisigurado niya sa sako na may mahalagang bagay akong maitatao asin andam siyang tukduan ako!” Dangan sinabi pa ni Jheri: “Naglaog ako sa training na idto na ninenerbiyos, disganado, saka mamundo. Pero pagluwas ko, may kumpiyansa na ako, makusog an buot, saka namatian kong may halaga ako!”

18. Paano ipinapahiling kan Bibliya na padagos na pinapahalagahan ni Jehova an satong pagsamba mantang naggugurang kita?

¹⁸ Mantang nagkakaedad na kita, makakasigurado kita na igwa pa man giraray nin trabahong itinatagama para sa sato si Jehova. (Sal. 92:12-15) Itinukdo sa sato ni Jesus na dawa gurano man kalimitado an satong mga abilidad o dawa gurano man kasadit para sa sato kan mga nagigibo niyato, pinapahalagahan na marhay ni Jehova an ano man na kaya tang magibo sa paglilingkod sa saiya. (Luc. 21:2-4) Kaya magpokus sa kun ano an kaya mong gibuhon. Halimbawa, puwede mong ipakipag-ulay sa iba an dapit ki Jehova, ipamibi an saimong mga tugang, asin pakusugon an iba na magdanay na maimbod. Ibinibilang ka ni Jehova na saiyang kapwa trabahador bakong huli sa mga nagigibo mo, kundi huli sa pagigin andam mong magkuyog sa saiya.—1 Cor. 3:5-9.

19. Anong asigurasyon an itinatao sa sato kan Roma 8:38, 39?

¹⁹ Ipinagpapasalamat nanggad niyato na nagsasamba kita ki Jehova, na sarong Diyos na tunay na nagpapahalaga sa mga naglilingkod sa saiya! Linalang niya kita tanganing gibuhon an saiyang kabutan, asin an tunay na pagsamba an nagtatao nin tunay na kahulugan sa satong buhay. (Kap. 4:11) Dawa ibilang man kita kan kinaban na dai kitang halaga, bakong arog kaiyan an paghiling sa sato ni Jehova. (Heb. 11:16, 38) Pag nasasakitan kitang marhay huli sa hilang, masakit na pagbuhay, o paggurang, tandaan niyato na mayo nin makakapasuway sa sato sa pagkamuot kan satong Ama sa langit.—Basahon an Roma 8:38, 39.