SA Bibliya, dakul kitang mababasang udok sa pusong mga kapahayagan nin mga tawong “an mga pagmati kapareho niyato.” (Sant. 5:17) Halimbawa, masasabutan tulos niyato an sinserong pag-admitir ni Pablo na mababasa sa Roma 7:21-24: “Pag gusto kong gibuhon an tama, an maraot an yaon sa sako. . . . Hirak man sa sako!” Pag pinaglalabanan niyato an satong mga kaluyahan, nakakaranga nanggad sa sato na maaraman na namatian man iyan nin sarong maimbod na tawong arog ni Pablo.

May sinabi pang ibang sinserong kapahayagan si Pablo. Sa Galacia 2:20, ipinahayag niya an saiyang kumbiksiyon na si Jesus ‘namuot sa [saiya] asin nagtao kan sadiri niya para sa [saiya],’ sa saiya mismo! Iyan man daw an namamatian mo? Tibaad dai pirmi.

Kun pinaglalabanan pa man giraray niyato an hababang paghiling sa sadiri huli sa mga kasalan na nagibo niyato kaidto, tibaad masakitan kita kun minsan na magtubod na namumutan kita ni Jehova asin na pinatawad na niya kita, saka posibleng madipisilan kitang mansayon na personal na regalo sa sato an atang na pantubos. Gusto daw talaga ni Jesus na mansayon niyato bilang personal na regalo an pantubos? Kun iyo, ano an makakatabang sa sato na magin arog kaiyan an pagmansay? Siyasaton niyato an duwang hapot na iyan.

Iyo, gusto ni Jesus na mansayon niyatong personal na regalo an saiyang atang. Paano kita nakakasigurado diyan? Imahinara an eksena na mababasa sa Lucas 23:39-43. Harani ki Jesus, nakapako sa hariging pasakitan an sarong lalaki. Inadmitir niya na nakagibo siya nin maraot. Siguradong magabat an nagibo niyang krimen huling an mga kriminal sana na nakagibo nin grabe karaot na krimen an pinapatawan nin arog kaini karingis na padusa. Huling nahahadit na marhay sa saiyang kamugtakan, nakimahirak ki Jesus an lalaki: “Girumdumon mo ako pag yaon ka na sa saimong Kahadian.”

Ano an ginibo ni Jesus? Imahinara an kulog na namamatian ni Jesus mantang ikinikiling niya an saiyang payo tanganing hilingon an lalaki. Dawa grabeng kulog an namamatian, mabuot siyang nagngirit asin inasigurar an lalaki: “Sinisigurado ko sa saimo sa aldaw na ini, makakaibanan taka sa Paraiso.” Puwede kutanang ipinagirumdom na sana ni Jesus sa lalaki na “an Aki nin tawo nag-abot . . . [tanganing] itao an saiyang buhay bilang pantubos na karibay nin dakul.” (Mat. 20:28) Pero narisa mo daw kun paano mabuot na idinuon ni Jesus na para man sa lalaking idto an saiyang atang? Mainamigo siya asin ginamit an mga tataramon na “saimo” asin “taka.” Sinabi niya sa lalaki na mabubuhay ini sa paraisong daga.

Mayong duda, gusto ni Jesus na masabutan kan lalaking idto na an saiyang atang para man digdi. Kun iyan an namatian ni Jesus para sa sarong kriminal na dai pa lamang nagkaoportunidad na paglingkudan an Diyos, siguradong arog man kaiyan an namamatian niya para sa sarong bawtisadong Kristiyano na naglilingkod sa Diyos. Kun siring, ano an makakatabang sa sato na talagang magtubod na itinao sa sato personalmente an atang ni Cristo sa ibong kan nagibo niyatong mga kasalan?

Nakatabang ki Pablo an saiyang ministeryo na mansayon na para man sa saiya an atang ni Jesus. Paano man? Ipinaliwanag niya: “Nagpapasalamat ako ki Cristo Jesus na satuyang Kagurangnan, na nagtao sa sako nin kusog, huling ibinilang niya akong maimbod paagi sa pag-asignar sa sako nin sarong sagradong gibuhon, maski ngani dati akong paralanghad asin parapersegir saka aroganteng tawo.” (1 Tim. 1:12-14) Huli sa itinao sa saiyang asignasyon, kumbinsido si Pablo na pinapahilingan siya ni Jesus nin pagkahirak, pagkamuot, asin pagtitiwala. Ipinagkatiwala man sa sato ni Jesus an satong ministeryo. (Mat. 28:19, 20) Makakatabang man daw ini sa sato na masabutan na si Jesus nagadan man para sa sato?

Si Albert, na nagbalik ki Jehova dai pa sana nahahaloy pagkatapos na matiwalag sa laog nin haros 34 taon, nagsabi: “An sakong mga kasalan pirming nasa atubangan ko. Pero pag nasa ministeryo ako, arog ni apostol Pablo, namamatian kong personal ining asignasyon sa sako ni Jesus. Napapakusog ako kaiyan asin natatabangan na magin positibo dapit sa sakong sadiri, sa sakong buhay, asin sa sakong puturo.”—Sal. 51:3.

Si Allan, na nakagibo nin dakul na krimen asin bayolente bago niya nanudan an katotoohan, nagsabi: “Naiisip ko pa man giraray an gabos na maraot na ginibo ko kaidto sa mga tawo. Kun minsan nade-depress akong marhay huli kaiyan. Pero nagpapasalamat ako ki Jehova huling tinutugutan niya an makasalan na arog ko na ipaabot sa iba an maugmang bareta. Pag nahihiling ko an reaksiyon nin mga tawo sa maugmang bareta, naipapagirumdom kaiyan sa sako kun gurano karahay asin kamamumuton si Jehova. Namamatian kong ginagamit niya ako tanganing tabangan an iba na kapareho ko man kaidto.”

Tinatabangan kita kan satong ministeryo na magpokus sa positibong mga gibo asin kaisipan. Inaasigurar kaiyan sa sato an pagkahirak, pagkamuot, asin pagtitiwala sa sato ni Jesus.

Sagkod na dai pa linalaglag an maraot na sistema ni Satanas, puwede kitang padagos na kondenaron kan satong puso huli sa satong nakaaging mga pagkakasala. Ano an makakatabang sa sato na labanan an siring na mga pagmati?

“Nararanga ako kan katotoohan na ‘an Diyos mas urog kisa satuyang mga puso,’” an sabi ni Jean, na padagos na nakokonsensiya huli sa saiyang dobleng pamumuhay kan siya hoben pa. (1 Juan 3:19, 20) Mararanga man kita kan pakaaram na kumpara sa sato, mas nasasabutan ni Jehova asin ni Jesus an satong makasalan na kamugtakan. Tandaan, mamumuton nindang itinao an pantubos, bako para sa perpektong mga tawo, kundi para sa nagsusulsol na mga makasalan.—1 Tim. 1:15.

Naaasigurar niyato an satong puso na para sa sato personalmente an pantubos pag hinuhurop-hurop niyato na may pagpamibi an dapit sa pagtratar ni Jesus sa bakong perpektong mga tawo asin pag ginigibo niyato an satong pinakamakakaya tanganing utubon an ministeryo na inasignar niya sa sato. Sa paggibo kaiyan, arog ni Pablo, masasabi niyato: Si Jesus “namuot sa sakuya asin nagtao kan saiyang sadiri para sa sako.”