1. Ano an prangkang inadmitir ni apostol Pablo?

PRANGKANG inadmitir ni apostol Pablo na may mga pagkakataon na namatian niyang maluya siya. Inadmitir niya na “luway-luway na nangluluya” an hawak niya, na kaipuhan niyang makipaglaban diyan para gibuhon an tama, asin na dai pirming sinisimbag ni Jehova an mga pamibi niya sa paaging gusto niya. (2 Cor. 4:16; 12:7-9; Roma 7:21-23) Sinabi niya man na para sa mga nagkokontra saiya, maluya siya. * Pero dai niya tinugutan na dahil sa negatibong kaisipan kan iba o dahil sa mga kaluyahan niya, mamatian niya na mayo siyang halaga.—2 Cor. 10:10-12, 17, 18.

2. Uyon sa 2 Corinto 12:9, 10, anong mahalagang leksiyon an nanudan ni Pablo?

² Nanudan ni Pablo an sarong mahalagang leksiyon—an sarong tawo puwedeng magin makusog dawa pag namamatian niyang maluya siya. (Basahon an 2 Corinto 12:9, 10.) Sinabi ni Jehova ki Pablo na an saiyang kapangyarihan ‘mas lubos na nahihiling paagi sa kaluyahan,’ buot sabihon, itatao ni Jehova ki Pablo an kusog na kaipuhan niya. Inot, hilingon niyato kun taano ta dai kita dapat madisganar pag iniinsulto kita kan mga nagkokontra sa sato.

3. Taano ta puwede kitang mag-ugma sa mga pang-iinsulto?

³ Habo niyato gabos na insultuhon kita. Minsan siring, kun iniinsulto kita kan satong mga kaiwal tapos pigpaparaisip ta an mga  sinasabi ninda, puwede kitang madisganar. (Tal. 24:10) Kaya, paano niyato dapat mansayon an mga pang-iinsulto kan mga nagkokontra? Arog ni Pablo, puwede kitang ‘mag-ugma sa mga pang-iinsulto.’ (2 Cor. 12:10) Taano? Huli ta pag tinutuya-tuya kita asin kinokontra, tanda iyan na kita tunay na mga disipulo ni Jesus. (1 Ped. 4:14) Sinabi ni Jesus na pepersegiron an saiyang mga parasunod. (Juan 15:18-20) Nangyari iyan kan inot na siglo. Kan panahon na iyan, an mga naimpluwensiyahan kan kulturang Griego ibinibilang an mga Kristiyano na mga maluya asin bakong madunong. Asin sa mga Judio, an mga Kristiyano ibinibilang na “daing inadalan asin mga ordinaryong tawo,” arog ni apostol Pedro asin apostol Juan. (Gibo 4:13) Garo baga maluya an mga Kristiyano; mayo sindang impluwensiya sa pulitika, mayo sindang puwersa militar, asin dai sinda iginagalang kan sosyedad.

4. Ano an reaksiyon kan inot na mga Kristiyano sa negatibong pagmansay sa sainda kan mga nagkokontra?

⁴ Nagpundo daw sa paglilingkod an inot na mga Kristiyano dahil sa negatibong pagmansay sa sainda kan mga nagkokontra? Dai. Halimbawa, para ki apostol Pedro asin Juan, sarong onra na persegiron sinda huli sa pagsunod ki Jesus asin sa pagtukdo sa iba kan manungod saiya. (Gibo 4:18-21; 5:27-29, 40-42) Mayong dahilan an mga disipulo para ikasupog iyan. Sa paglihis nin panahon, mas dakula an nagibong karahayan sa iba kan mapakumbabang mga Kristiyanong idto kan inot na siglo kisa sa siisay man sa mga nagkontra sainda. Halimbawa, an ipinasabong na mga libro na isinurat kan nagkapira sa mga Kristiyanong idto padagos na nagtatabang asin nagtatao nin paglaom sa minilyon na tawo. Asin an Kahadian na ihinuhulit ninda namamahala na sa langit asin madali nang mamahala sa daga. (Mat. 24:14) Bilang pagkumparar, an dakulang pulitikal na kapangyarihan na nagpersegir sa mga Kristiyano buminagsak asin nagin parte na sana nin kasaysayan, mantang an maimbod na mga disipulong idto mga hadi na ngunyan sa langit. Pero an mga nagkontra sainda gadan na; asin kun buhayon man sinda liwat, magigin sakop sinda kan Kahadian na ihinulit kan mga Kristiyano na ikinaungis ninda.—Kap. 5:10.

5. Sigun sa Juan 15:19, taano ta minemenos an mga lingkod ni Jehova?

⁵ Ngunyan, bilang mga lingkod ni Jehova, minemenos kita kun minsan asin sinasabihan na mga maluya asin bakong madunong. Taano? Dahil dai kita uyon sa mga ugali kan mga nasa palibot ta. Pinagmamaigutan niyatong magin mapakumbaba, mahuyo, asin masinunod. Sa ibong na lado, hinahangaan kan mga tawo an mga mapalangkaw, arogante, asin rebelyoso. Dugang pa, dai kita nakikiambit sa pulitika, asin dai kita nagbabali sa puwersa militar nin ano man na nasyon. Napapalain kita sa mga tawo sa kinaban, kaya para sa sainda maluya kita.—Basahon an Juan 15:19; Roma 12:2.

6. Ano an isinasagibo ni Jehova paagi sa saiyang banwaan?

⁶ Sa ibong kan pagmansay sa sato kan kinaban, ginagamit kita ni Jehova para gumibo nin ekstraordinaryong mga bagay. Isinasagibo niya an pinakamahiwas na kampanya nin paghuhulit sa kasaysayan nin tawo. Pinoprodusir kan mga lingkod niya ngunyan an mga magasin na may pinakadakul na traduksiyon asin may pinakamahiwas na distribusyon sa bilog na daga asin ginagamit ninda an Bibliya para tabangan an milyon-milyon na tawo na magkaigwa nin mas marahay na buhay. Si Jehova an nagpangyaring magin posible ini. Ginagamit niya an sarong grupo nin mga tawo na ibinibilang kan iba na maluya para maisagibo an darakulang mga bagay na ini. Pero kumusta kita bilang indibidwal? Puwede daw kitang tabangan ni Jehova na magin makusog? Kun iyo, ano an dapat na gibuhon niyato para mag-ako kan tabang niya? Pag-ulayan ta ngunyan an pirang espesipikong bagay na manunudan ta sa halimbawa ni apostol Pablo.

7. Ano an sarong leksiyon na manunudan ta sa halimbawa ni Pablo?

⁷ An sarong leksiyon na manunudan ta sa halimbawa ni Pablo iyo ini: Dai manarig sa sadiri mong kusog o abilidad pag naglilingkod ki Jehova. Sa paghiling nin tawo, may dahilan si Pablo na magin mapalangkaw asin manarig sa sadiri. Nagdakula siya sa Tarso, an kabiserang siyudad nin sarong probinsiya sa Roma. Mauswag na lugar an Tarso asin igwa diyan nin sikat na unibersidad. Edukado si Pablo—tinukduan siya ni Gamaliel, na saro sa pinakarespetadong Judiong mga lider kan panahon niya. (Gibo 5:34; 22:3) Asin may panahon kaidto na nagin maimpluwensiya si Pablo sa mga kapwa niya Judio. Sinabi niya: “Nagin mas marikas an pagtalubo kan sakuyang debosyon sa Judaismo kisa sa dakul na mga kahimanwa ko na mga kaedad ko.” (Gal. 1:13, 14; Gibo 26:4) Pero dai nanarig si Pablo sa sadiri niya.

8. Uyon sa Filipos 3:8, ano an pagmansay ni Pablo sa mga bagay na binayaan niya, asin taano ta ‘ikinaugma niya an mga kaluyahan’?

⁸ Maugmang binayaan ni Pablo an mga bagay na nagpangyari sa saiya na magin makapangyarihan sa paghiling kan kinaban. Sa katunayan, narealisar niya na “tambak nin basura” an mga iyan. (Basahon an Filipos 3:8.) Nakaeksperyensiya si Pablo nin dakul na kadipisilan dahil nagin parasunod siya ni Jesus. Ikinaungis siya kan sadiri niyang nasyon. (Gibo 23:12-14) Asin hinampak siya saka iprineso kan saiyang mga kapwa siyudadano, an mga Romano. (Gibo 16:19-24, 37) Narealisar man ni Pablo an saiyang mga limitasyon asin nasakitan siyang marhay na gibuhon an tama. (Roma 7:21-25) Pero imbes na pumundo na dahil sa mga nagkokontra saiya asin dahil sa saiyang mga pagkukulang, ‘ikinaugma niya an mga kaluyahan.’ Taano? Huling kan siya maluya, diyan niya man nahiling an kapangyarihan nin Diyos sa saiyang buhay.—2 Cor. 4:7; 12:10.

9. Ano an dapat na magin pagmansay niyato kun mayo kita kan mga bagay na para sa kinaban mahalaga?

⁹ Para makua niyato an kusog na hali ki Jehova, dai ta dapat isipon na an pisikal na kusog, inadalan, kultura, o materyal na mga kayamanan an madeterminar kun gurano kita kahalaga. Bako diyan naghihiling si Jehova. Sa katunayan, pipira sana sa mga lingkod nin Diyos an “madunong kun sa pamantayan nin tawo, bako man  dakul an makapangyarihan, bako man dakul an gikan sa respetadong pamilya.” Imbes, pinili ni Jehova na gamiton “an mga maluyang bagay kan kinaban.” (1 Cor. 1:26, 27) Kaya kun mayo ka kan mga bagay na sinambit sa kapinunan kan parapo, dai pag-isipon na ulang iyan sa paglilingkod mo ki Jehova. Imbes, mansayon mo iyan na oportunidad na mahiling mo kun paano ka ni Jehova tinatawan nin kusog. Halimbawa, kun natatakot ka sa mga nagpupurbar na papagdudahon ka sa saimong mga tinutubod, mamibi ki Jehova na tawan ka nin kusog nin buot pag idinedepensa mo an saimong pagtubod. (Efe. 6:19, 20) Kun nasasakitan ka dahil sa nagdadanay na hilang, hagadon ki Jehova na tawan ka kan kusog na kaipuhan mo para magdanay na sibot sa paglilingkod saiya. Sa kada mahiling mong tinatabangan ka ni Jehova, nagkukusog an saimong pagtubod asin nagigin mas marigon ka.

10. Taano ta dapat niyatong pag-adalan an mga halimbawa kan maimbod na mga karakter sa Bibliya, arog kan mga sinambit sa Hebreo 11:32-34?

¹⁰ Maigot si Pablo sa pag-adal sa Kasuratan. Dakul siyang nanudan na katotoohan, pero nakanuod man siya sa mga halimbawa kan maimbod na mga lingkod ni Jehova na nakasurat sa Tataramon nin Diyos. Kan nagsusurat si Pablo sa mga Kristiyanong Hebreo, sinabi niya sa sainda na hurop-hurupon an mga halimbawa kan maimbod na mga lingkod ni Jehova. (Basahon an Hebreo 11:32-34.) Pag-isipan an saro sana sa mga lingkod na ini, si Hading David. Kinaipuhan niyang atubangon an pagkontra bako sanang kan mga kaiwal niya kundi pati kan mga tawong amigo niya kaidto. Mantang sinisiyasat niyato an halimbawa ni David, mahihiling ta kun paano napakusog si Pablo kan paghurop-hurop sa buhay ni David asin kun paano niyato maaarog si Pablo.

11. Taano ta garo baga maluya si David sa paghiling nin iba? (Hilingon an ritrato sa cover.)

¹¹ Ibinilang si David na maluya kan makusog na parapakilaban na si Goliat. Kan mahiling ni Goliat si David, “tinuya-tuya niya si David.” Si Goliat kaya mas dakula, mas armado, asin mas eksperyensiyado sa pakikilaban. Mantang si David saro sanang hoben na mayong eksperyensiya sa pakikilaban asin kun hihilingon haros mayong armas. Pero ibinilang ni David na kakusugan an garo baga kaluyahan sa paghiling nin iba. Nanarig siya ki Jehova, asin tinawan siya ni Jehova nin kusog para madaog si Goliat.—1 Sam. 17:41-45, 50, An Marahay na Bareta Biblia.

12. Ano pang kadipisilan an kinaipuhan na atubangon ni David?

¹² Kinaipuhan na atubangon ni David an saro pang kadipisilan na puwedeng magin dahilan na mamatian niyang maluya siya. Maimbod na naglingkod si David sa saro na ninombrahan ni Jehova na magin hadi kan Israel, si Saul. Kan inot, iginalang ni Hading Saul si David. Pero kan huri, dahil sa kapalangkawan nauri si Saul ki David. Nagin maraot an pagtratar ni Saul ki David asin pinurbaran niya pa nganing gadanon ini.—1 Sam. 18:6-9, 29; 19:9-11.

13. Ano an ginibo ni David kan trinatar siya nin bakong makatanusan ni Hading Saul?

¹³ Dawa bakong makatanusan an pagtratar saiya ni Hading Saul, padagos na iginalang ni David an hadi na ninombrahan ni Jehova. (1 Sam. 24:6) Dai binasol ni David si Jehova sa maraot na mga bagay na ginibo ni Saul saiya. Imbes, nanarig si David ki Jehova na tawan siya kan kusog na kaipuhan niya para matagalan an dipisil na pagbalong iyan.—Sal. 18:1.

14. Anong sitwasyon na kaagid kan ki David an napaatubang ki apostol Pablo?

¹⁴ Napaatubang si apostol Pablo sa sitwasyon na kaagid kan ki David. An mga kaiwal ni Pablo mas makapangyarihan na marhay kisa saiya. Ikinakaungis siya kan dakul na prominenteng lider kan panahon niya. Sa parati, ipinapahampak ninda siya asin ipinepreso. Arog ni David, maraot an nagin pagtratar saiya kan mga tawo na dapat kuta amigo niya. May mga nagkontra pa  ngani saiya sa laog kan Kristiyanong kongregasyon. (2 Cor. 12:11; Fil. 3:18) Pero nadaog ni Pablo an gabos na nagkokontra saiya. Paano? Padagos siyang naghulit dawa may mga pagkontra. Nagdanay siyang maimbod sa saiyang mga tugang dawa pag may ginigibo sinda saiya na nakakapadisganar. Urog sa gabos, maimbod siya sa Diyos sagkod sa saiyang kagadanan. (2 Tim. 4:8) Napangganahan niya an darakulang pagbalo, bako dahil sa sadiri niyang kusog, kundi dahil nanarig siya ki Jehova.

15. Ano an saimong pasuhan, asin paano mo iyan magigibo?

¹⁵ Iniinsulto ka daw o pinepersegir kan saimong mga kaklase, katrabaho, o mga kapamilyang bakong Saksi? May nagtratar na daw saimo nin maraot sa laog kan kongregasyon? Kun iyo, girumdumon an halimbawa ni David asin Pablo. Magigibo mong padagos na “daugon nin marahay an maraot.” (Roma 12:21) An pasuhan mo bako na patalbungan nin gapo an angog nin iba, arog kan ginibo ni David, kundi itadom an Tataramon nin Diyos sa puso asin isip kan mga andam na mag-ako kaiyan. Magigibo mo iyan paagi sa paggamit kan Bibliya sa pagsimbag sa mga hapot kan mga tawo, pagigin magalang asin mabuot sa mga nagtatratar saimo nin maraot, asin paagi sa paggibo nin marahay sa gabos, dawa sa saimong mga kaiwal.—Mat. 5:44; 1 Ped. 3:15-17.

16-17. Ano an nungkang nalingawan ni Pablo?

¹⁶ Bago nagin disipulo ni Cristo si apostol Pablo, saro siyang aroganteng hoben na nagpersegir sa mga parasunod ni Jesus. (Gibo 7:58; 1 Tim. 1:13) Si Jesus mismo an nagpapundo ki Pablo, na an pangaran kaidto Saulo, sa pagpersegir sa Kristiyanong kongregasyon. Hali sa langit, nakipag-ulay si Jesus ki Pablo asin binuta ini. Para makahiling giraray, kinaipuhan ni Pablo na maghagad nin tabang sa mga tawo na pinepersegir niya kaidto. Mapakumbaba niyang inako an tabang kan disipulong si Ananias na nagbalik kan saiyang paghiling.—Gibo 9:3-9, 17, 18.

¹⁷ Pag-abot nin panahon, nagin prominenteng miyembro kan Kristiyanong kongregasyon si Pablo, pero nungka niyang nalingawan an leksiyon na itinukdo sa saiya ni Jesus kan nasa dalan pa-Damasco. Nagdanay na mapakumbaba si Pablo, asin andam niyang inako an tabang kan mga tugang. Sinabi niya na sinda “tabang na  nagpapakusog” sa saiya.—Col. 4:10, 11, nota sa ibaba.

18. Taano ta tibaad mag-alangan kita na akuon an tabang kan iba?

¹⁸ Ano an manunudan ta ki Pablo? Kan nagpupuon pa sana kitang makiasosyar sa mga lingkod ni Jehova, tibaad gustong-gusto tang tinatabangan kita kan iba huling aram niyato na umboy pa kita sa espirituwal asin dakul pang kaipuhan na manudan. (1 Cor. 3:1, 2) Pero kumusta ngunyan? Kun dakul na taon na kitang naglilingkod ki Jehova asin dakul nang eksperyensiya, tibaad bako na kitang arog kaiyan kaandam na mag-ako nin tabang, lalo na kun an saro na nagtatao kaiyan bako pang arog sato kahaloy sa katotoohan. Pero parating ginagamit ni Jehova an satong mga tugang para pakusugon kita. (Roma 1:11, 12) Dapat niyatong akuon an katotoohan na iyan para makua niyato an kusog na itinatao ni Jehova.

19. Taano ta nagin mapanggana si Pablo?

¹⁹ Nakagibo si Pablo nin nagkapirang pambihirang bagay kan nagin Kristiyano siya. Taano? Huli ta nanudan niya na an pagigin mapanggana dai nakadepende sa pisikal na kusog nin saro, sa saiyang inadalan, kayamanan, o estado sa sosyedad, kundi sa saiyang kapakumbabaan asin pananarig ki Jehova. Lugod na arugon niyato gabos si Pablo (1) paagi sa pananarig ki Jehova, (2) paagi sa pag-arog sa marahay na mga halimbawa sa Bibliya, asin (3) paagi sa pag-ako kan tabang kan satong mga kapagtubod. Dangan, mamatian ta man na maluya kita, papakusugon nanggad kita ni Jehova!