1. Ano an ginibo ni Jehova dai nahaloy pagkatapos na magkasala si Adan asin Eva? (Genesis 3:15)

 DAI nahaloy pagkatapos na magkasala si Adan asin Eva, nagtao si Jehova nin paglaom sa saindang mga gikan paagi sa sarong pambihirang propesiya. An sinabi niyang propesiya nakarekord sa Genesis 3:15.—Basahon.

2. Ano an pambihira manungod sa propesiyang ini?

² An propesiya mababasa sa inot na libro kan Bibliya. Pero sa ano man na paagi, an gabos na iba pang libro kan Bibliya konektado diyan. Kun paanong an gulod na parte nin sarong libro pinagkokoronektar an gabos na pahina kaiyan, an mga tataramon sa Genesis 3:15 pinagkokoronektar man an laog kan gabos na libro kan Bibliya sa saro sanang mensahe—an pagsugo nin sarong Paraligtas para laglagon an Diyablo asin an gabos na parasunod niya. b Saro nanggad na bendisyon iyan para sa mga namumuot ki Jehova!

3. Ano an pag-uulayan ta sa artikulong ini?

³ Sa artikulong ini, sisimbagon ta an minasunod na mga hapot manungod sa propesiya sa Genesis 3:15: Sairisay an mga karakter na sinambit diyan? Paano nautob an propesiya? Asin paano kita nakikinabang diyan?

4. Siisay an “halas,” asin paano ta iyan naaraman?

⁴ An mga karakter na binanggit sa Genesis 3:14, 15 iyo an “halas,” an “gikan” kan halas, an “babayi,” asin an “gikan” kan babayi. Tinatabangan kita kan Bibliya na maaraman kun siisay an mga karakter na iyan. c Inuton ta an “halas.” Dai masasabutan nin sarong literal na halas an sinabi ni Jehova sa hardin nin Eden. Kaya an pinapanungdan digdi na huhukuman ni Jehova siguradong sarong intelihenteng linalang. Siisay? Lininaw kan Kapahayagan 12:9 kun siisay iyan. An “gurangan na halas” na sinambit diyan malinaw na nanunungod ki Satanas na Diyablo. Pero sairisay an mga minakompuwesto sa gikan kan halas?

5. Sairisay an mga minakompuwesto sa gikan kan halas?

⁵ Pag ginagamit kan Bibliya sa piguratibong paagi an tataramon na gikan, nanunungod iyan sa mga nag-iisip asin minagawi nin arog sa saindang simbolikong ama. Kaya an gikan kan halas kompuwesto kan espiritung mga linalang asin mga tawo, na arog ni Satanas, nagtutumang sa Diyos na Jehova asin nagkokontra sa Saiyang banwaan. Kaiba diyan an mga anghel na binayaan an saindang asignasyon sa langit kan panahon ni Noe saka an maraot na mga tawo na minagawi arog kan saindang amang Diyablo.—Gen. 6:1, 2; Juan 8:44; 1 Juan 5:19; Jud. 6.

6. Taano ta siguradong bako si Eva an “babayi”?

⁶ Sunod, aramon ta kun siisay an “babayi.” Siguradong bako siya si Eva. Taano? Pag-isipan an sarong dahilan. Sinasabi sa propesiya na “rurunuton” kan gikan kan babayi an payo kan halas. Arog kan pinag-ulayan ta pa sana, an halas iyo an espiritung linalang na si Satanas, asin mayo nin bakong perpektong tawo na gikan ni Eva an may kakayahan na runuton siya. Kaya  saro na nakakalabi sa bakong perpektong tawo an kaipuhan.

7. Arog kan ipinaparisa sa Kapahayagan 12:1, 2, 5, 10, siisay an babayi na sinambit sa Genesis 3:15?

⁷ Ihinayag sa huring libro kan Bibliya kun siisay an babayi na sinambit sa Genesis 3:15. (Basahon an Kapahayagan 12:1, 2, 5, 10.) Bako nanggad ining ordinaryong babayi! Igwa siya nin bulan na nasa irarom kan saiyang mga bitis asin nin koronang 12 bituon sa saiyang payo. Nangaki siya nin sarong pambihirang marhay na aki—an Kahadian nin Diyos. An Kahadian nasa langit, kaya an babayi dapat na nasa langit man. Nagrerepresentar siya sa langitnon na kabtang kan organisasyon ni Jehova na kompuwesto kan saiyang maimbod na mga espiritung linalang.—Gal. 4:26.

8. Siisay an nagin panginot na kabtang kan gikan kan babayi, asin kasuarin iyan nangyari? (Genesis 22:15-18)

⁸ Tinatabangan man kita kan Tataramon nin Diyos na maaraman kun siisay an panginot na gikan kan babayi. An gikan na ini dapat na gikan ni Abraham. (Basahon an Genesis 22:15-18.) Arog kan sinambit sa propesiya, si Jesus direktang naggikan sa maimbod na patriyarkang iyan. (Luc. 3:23, 34) Pero an gikan dapat na nakakalabi sa tawo huling biyo niyang rurunuton si Satanas na Diyablo. Kaya kan si Jesus mga 30 anyos, linahidan siya kan banal na espiritu. Asin kan si Jesus lahidan, siya an nagin panginot na kabtang kan gikan kan babayi. (Gal. 3:16) Pagkatapos na magadan asin buhayon liwat si Jesus, “kinoronahan” siya nin Diyos “nin kamurawayan asin onra” asin itinao sa saiya “an gabos na awtoridad sa langit asin sa daga,” kaiba na an awtoridad “tanganing rauton an mga gibo kan Diyablo.”—Heb. 2:7; Mat. 28:18; 1 Juan 3:8.

9-10. (a) Sairisay pa an kabtang kan gikan kan babayi, asin nuarin sinda nagigin kabtang kaiyan? (b) Ano an sunod tang pag-uulayan?

⁹ Pero magkakaigwa nin sekondaryong kabtang an gikan kan babayi. Ihinayag ni apostol Pablo kun siisay an kabtang na ini kan gikan kan sabihon niya sa linahidan na mga Kristiyanong Judio asin Hentil: “Kun ki Cristo kamo, talagang mga gikan kamo ni Abraham, mga tagapagmana uyon sa panuga.” (Gal. 3:28, 29) Pag an sarong Kristiyano lahidan ni Jehova nin banal na espiritu, an tawong iyan nagigin kabtang kan gikan kan babayi. Kaya an gikan kan babayi kompuwesto ni Jesu-Cristo asin kan saiyang 144,000 na kairibang tagapamahala. (Kap. 14:1) Gabos sinda nagmamaigot na mag-isip asin gumawi arog kan saindang Ama, an Diyos na Jehova.

¹⁰ Ngunyan na naaraman ta na kun sairisay an pinapanungdan kan mga karakter na sinambit sa Genesis 3:15, pag-ulayan ta nin halipot kun paano inuutob ni Jehova an propesiyang ini asin kun paano kita nakikinabang.

11. Sa paanong paagi linugad “sa buol” an gikan kan babayi?

¹¹ Sigun sa propesiya sa Genesis 3:15, lulugadon kan halas “sa buol” an gikan kan babayi. Nautob iyan kan sutsutan ni Satanas an mga Judio asin mga Romano na gadanon an Aki nin Diyos. (Luc. 23:13, 20-24) Kun paanong puwedeng temporaryong mapilay an saro huli kan literal na lugad sa buol, temporaryo man na mayong nagibo si Jesus kan siya magadan asin tulong aldaw na nasa lulubngan.—Mat. 16:21.

12. Paano asin nuarin rurunuton an payo kan halas?

¹² Kun mauutob an propesiya sa Genesis 3:15, dai puwedeng magdanay si Jesus sa lulubngan. Taano? Huling sigun sa propesiya, rurunuton kan gikan kan babayi an payo kan halas. Nangangahulugan ini na kaipuhan na maumayan an lugad ni Jesus sa buol. Asin iyo man nanggad! Kan ikatulong aldaw pagkagadan ni Jesus,  binuhay siya liwat bilang sarong imortal na espiritung linalang. Sa itinalaan na panahon nin Diyos, biyong rurunuton ni Jesus si Satanas. (Heb. 2:14) An gabos na magigin kairibang tagapamahala ni Cristo makikikabtang para laglagon an gabos na kaiwal nin Diyos—an gikan kan halas.—Kap. 17:14; 20:4, 10. d

13. Paano kita nakikinabang sa kautuban kan propesiyang ini?

¹³ Kun saro kang nagdusay na lingkod nin Diyos, nakikinabang ka sa kautuban kan propesiyang ini. Nagdigdi si Jesus sa daga bilang tawo. Perpekto niyang ipinahiling an personalidad kan saiyang Ama. (Juan 14:9) Kaya paagi sa saiya namidbid ta asin namutan ta an Diyos na Jehova. Nakikinabang man kita sa mga itinukdo ni Jesus asin sa saiyang paggiya mantang ginigiyahan niya an Kristiyanong kongregasyon ngunyan. Tinukduan niya kita kun paano mamuhay sa paaging makakatabang sato para kamtan an pag-uyon ni Jehova. Asin gabos kita nakikinabang sa kagadanan ni Jesus—an paglugad sa saiyang buol. Paano? Kan buhayon liwat si Jesus, itinao niya an halaga kan saiyang dugo bilang perpektong atang na ‘naglilinig sato sa gabos na kasalan.’—1 Juan 1:7.

14. Paano ta naaraman na dai tulos nautob an propesiya na itinao ni Jehova sa Eden? Ipaliwanag.

¹⁴ An mga tataramon na sinabi ni Jehova sa Eden nagpaparisa na malihis nguna an panahon bago an lubos na kautuban kan propesiya. Kaipuhan an panahon para maipangaki kan babayi an ipinanugang gikan, para tipunon kan Diyablo an saiyang mga parasunod, asin para mangyari an pag-iiwal (o, pagkaungis) sa pag-ultanan kan duwang grupo. Nakikinabang kita sa pakaaram manungod sa propesiya huling pinapatanidan kita kaiyan na an kinaban na kontrolado ni Satanas mauungis sa mga parasamba ni Jehova. Kan huri, nagtao si Jesus nin kaparehong patanid sa saiyang mga disipulo. (Mar. 13:13; Juan 17:14) Siguradong nahiling ta an kautuban kan kabtang na iyan kan propesiya, lalong-lalo na sa nag-aging 100 na taon. Paano?

15. Taano ta mas lalong nag-uurog an pagkaungis kan kinaban, pero taano ta mayo kita nin dahilan para katakutan si Satanas?

¹⁵ Pagkatapos tulos na patukawon si Jesus bilang Mesiyanikong Hadi kan 1914, pinalayas si Satanas sa langit. Ihinulog na siya digdi sa daga, asin naghahalat kan saiyang kalaglagan. (Kap. 12:9, 12) Pero dai sana siya naghahalat na mayong ginigibo. Desperado asin grabe an kaanggutan ni Satanas, na ibinabaling an saiyang kaanggutan sa banwaan nin Diyos. (Kap. 12:13, 17) Huli kaiyan, an pagkaungis kan kinaban sa banwaan nin Diyos lalong nag-uurog. Pero, mayo kita nin dahilan para katakutan si Satanas asin an saiyang mga parasunod. Imbes, puwede kitang magkaigwa nin pagtitiwala na arog ki apostol Pablo, na nagsurat: “Kun an Diyos nasa kampi niyato, siisay an makakalaban sa sato?” (Roma 8:31) Puwede kitang magkaigwa nin lubos na kumpiyansa ki Jehova huling, arog kan naaraman ta, haros gabos na kabtang kan propesiya sa Genesis 3:15 nagkakaurutob na.

16-18. Paano nakinabang si Curtis, Ursula, asin Jessica sa pakasabot ninda sa Genesis 3:15?

¹⁶ An panuga ni Jehova sa Genesis 3:15 makakatabang sa sato para mapangganahan an ano man na pagbalo na mag-abot sa sato. Si Curtis, na naglilingkod bilang misyonero sa Guam, nagsabi: “May mga panahon na nag-agi ako nin mga kasakitan asin pagkadisganar na nakabalo kan sakuyang kaimbudan ki Jehova.  Pero an paghurop-hurop ko sa propesiya na nasa Genesis 3:15 nakatabang sako para magdanay an sakuyang pagtitiwala sa sakuyang Ama sa langit.” Hinahalat-halat ni Curtis na mag-abot an aldaw na tatapuson na ni Jehova an gabos tang pagsakit.

¹⁷ An sister na si Ursula na taga Bavaria, nagsabi na an pagkaigwa nin pakasabot sa Genesis 3:15 nakatabang sa saiya na magin kumbinsido na an Bibliya ipinasabong nin Diyos. Nahiling niya kun paano an gabos na iba pang propesiya konektado sa propesiyang ini, asin dakulaon an nagin epekto kaiyan sa saiya. Sinabi niya man: “Napahiro an puso ko kan maaraman ko na guminibo tulos si Jehova nin aksiyon tanganing magkaigwa nin paglaom an mga tawo.”

¹⁸ Si Jessica, na taga Micronesia, nagsabi: “Nagigirumduman ko pa kun ano an namati ko kan inot kong marealisar na nanumpungan ko na an katotoohan! An propesiya sa Genesis 3:15 nauutob. Nakatabang iyan sa sako na girumdumon na an mga naeeksperyensiyahan ta ngunyan bako talaga an tunay na buhay. Napakusog man kan propesiyang ini an sakong pagtubod na an paglilingkod ki Jehova nagreresulta sa pinakamarahay na buhay na puwede kong kamtan ngunyan asin mas marahay pa nganing buhay sa maabot na panahon.”

19. Taano ta makakapagtiwala kita na an huring kabtang kan propesiya mauutob?

¹⁹ Arog kan naaraman ta, nangyayari ngunyan an kautuban kan Genesis 3:15. Malinaw ta nang naaraman kun siisay an gikan kan babayi asin an gikan kan halas. Si Jesus, an panginot na kabtang kan gikan kan babayi, naumayan an lugad sa saiyang buol asin sa ngunyan saro na siyang mamuraway asin imortal na Hadi. An pagpili kan mga makompuwesto sa sekondaryong kabtang kan gikan kan babayi madali nang matapos. Huling an inot na kabtang kan propesiya nautob na, makakapagtiwala nanggad kita na an huring kabtang kan propesiya, an pagrunot sa payo kan halas, magkakatotoo man. Dakulang kaginhawahan nanggad sa maimbod na mga tawo pag nalaglag na si Satanas! Sagkod na dai pa iyan nangyayari, dai kita magsuko. Mapagtitiwalaan an satuyang Diyos. Paagi sa gikan kan babayi, ipapaabot niya an dakulon na bendisyon sa “gabos na nasyon sa daga.”—Gen. 22:18.