1, 2. (a) Ano an pinakamahalagang isyu na napapaatubang sa gabos na tawo? (b) Taano ta importanteng masabutan niyato an kahalagahan kan isyung iyan?

PARA sa dakul na tawo ngunyan, kuwarta an pinakamahalagang isyu. Nakapokus sinda sa pagtipon nin kayamanan o sa pagpadanay kaiyan. Para man sa iba, an pinakamahalagang isyu iyo an saindang pamilya, salud, o mga naabot sa buhay.

² Pero, an sarong mahalagang marhay na isyu na napapaatubang sa sato gabos iyo an pagbindikar kan soberaniya ni Jehova. Kaipuhan niyatong mag-ingat na dai mawara an satong pokus sa mahalagang marhay na isyung ini. Paano iyan puwedeng mangyari? Tibaad magin sibot-sibot kita sa pang-aroaldaw na mga bagay sa buhay asin nalilingawan ta na kun gurano talaga kaimportante na mabindikar an soberaniya nin Diyos. O tibaad nagpaparahadit kita dapit sa satong personal na mga problema asin natatahuban na an importanteng isyung iyan. Pero, mantang mas nasasabutan niyato an kahalagahan kan pagbindikar kan soberaniya ni Jehova, mas magigin andam kitang atubangon an mga problema sa satong pang-aroaldaw na buhay asin mas mapaparani kita ki Jehova.

3. Ano an mga pinaluwas ni Satanas may koneksiyon sa pamamahala nin Diyos?

³ Kinuwestiyon ni Satanas na Diyablo an soberaniya o deretso ni Jehova  na mamahala. Inakusaran niya an Diyos na Jehova bilang maraot na Tagapamahala asin na habo Niyang itao an pinakamarahay para sa sato. Pinaluwas kan Diyablo na mas magigin maugma nanggad asin mas mapapakarhay an mga tawo kun sinda an mamamahala sa sadiri ninda. (Gen. 3:1-5) Pinaluwas man ni Satanas na mayo nin tawong magigin maimbod talaga sa Diyos—na pag an tawo nasa grabe nang kasakitan, isisikwal na niya an pamamahala ni Jehova. (Job 2:4, 5) Kaya, nagtatao si Jehova nin panahon para mahiling kan mga tawo na miserable an buhay kun mayo an matanos na pamamahala nin Diyos.

4. Taano ta dapat masimbag an isyu dapit sa soberaniya?

⁴ Siyempre, aram ni Jehova na sala an mga akusasyon kan Diyablo. Kaya taano ta tinawan pa niya nin panahon si Satanas na patunayan an mga sahot niya? Huling kalabot sa pagsimbag sa isyu an gabos na anghel asin tawo. (Basahon an Salmo 83:18.) Totoo na isinikwal kan inot na mag-agom na tawo an pamamahala ni Jehova asin kan dakul na iba pa puon kaidto. Huli kaini, puwedeng isipon kan iba na tibaad totoo man an akusasyon kan Diyablo. Sagkod na bako pang malinaw sa isip kan mga tawo asin mga anghel an simbag sa akusasyon ni Satanas, dai pa man giraray magkakaigwa nin tunay na katuninungan asin katiwasayan sa tahaw kan mga nasyon, rasa, tribo, pamilya, asin mga indibidwal. Pero pag nabindikar na an soberaniya ni Jehova, an gabos mapasakop na sa saiyang matanos na pamamahala sagkod lamang. Maibabalik na an katuninungan sa bilog na uniberso.—Efe. 1:9, 10.

5. Ano an papel ta sa pagbindikar kan soberaniya ni Jehova?

⁵ Talagang mabibindikar an deretso nin Diyos na mamahala saka siguradong mabagsak asin hahalion an pamamahala ni Satanas pati kan mga tawo. Magigin mapanggana an pamamahala nin Diyos paagi sa saiyang Mesiyanikong Kahadian, asin mapapatunayan kan mga napagdanay an saindang kaimbudan na kaya kan mga tawo na manindugan para sa pamamahala nin Diyos. (Isa. 45:23, 24) Gusto mo daw mapabilang sa maimbod na mga tawong nagsusuportar sa soberaniya ni Jehova? Siguradong iyo. Kaya tanganing mapabilang diyan, kaipuhan tang ipokus an satong mata sa mahalagang marhay na isyung ini asin kaipuhan niyatong masabutan kun gurano kahalaga iyan.

6. Gurano kaimportante an pagbindikar kan soberaniya ni Jehova?

⁶ Arog kan nasambit na, an pagbindikar kan soberaniya ni Jehova sarong mahalagang marhay na isyu na kalabot an katawuhan. Mas mahalaga iyan kisa sa personal na kaugmahan nin siisay man na tawo. Pero dai nanggad iyan nangangahulugan na bako nang importante an satong kaligtasan o dai talaga nagmamakulog sa sato si Jehova. Taano man?

7, 8. Taano ta kaiba sa pagbindikar kan soberaniya nin Diyos an pag-utob niya sa saiyang mga panuga?

⁷ Padangat na marhay ni Jehova an mga tawo. Mahalagang marhay kita sa saiya mala ngani ta itinao na niya an saiyang Aki tanganing magin posible para sa sato na maligtas asin mabuhay nin daing katapusan. (Juan 3:16; 1 Juan 4:9) Kun dai inuutob ni Jehova an saiyang mga ipinanuga, igwa kuta nin dahilan an Diyablo na apudon an Diyos na sarong putikon asin habong itao an marahay para sa mga tawo, asin na bakong makatanusan an pamamahala niya. Magigin garo tama man an mga nagtutuya-tuya na nagsasabi: “Hain man ining ipinanugang presensiya niya? Nagturog na lamang sa kagadanan an satuyang mga apuon pero sagkod ngunyan an gabos na bagay iyong-iyo pa man giraray puon kan lalangon an kinaban.” (2 Ped. 3:3, 4) Kaya sisiguraduhon ni Jehova na kaiba sa pagbindikar kan saiyang soberaniya an pagligtas sa makinuyog na mga tawo! (Basahon an Isaias 55:10, 11.) Saro pa, nakabasar sa pagkamuot an soberaniya ni Jehova. Kaya makakaasa kita na pirmi niyang papadangaton, papahalagahan, asin aapresyaron an saiyang maimbod na mga lingkod.—Ex. 34:6.

 ⁸ Pag sinasabi niyato na mahalagang marhay an soberaniya ni Jehova, dai buot sabihon kaiyan na bako nang importante sa sato an kaligtasan niyato o na ibinibilang ta an satong sadiri na bakong mahalaga sa paghiling nin Diyos. Ibinubugtak sana niyato an soberaniya ni Jehova asin an satong kaligtasan sa tamang lugar kaiyan. Mahalaga an tamang pagmansay na iyan tanganing mapagdanay niyatong nakapokus an satong mata sa mahalagang marhay na isyung ini asin makapanindugan para sa matanos na pamamahala ni Jehova.

9. Ano an akusasyon ni Satanas may koneksiyon ki Job? (Hilingon an ritrato sa kapinunan kan artikulo.)

⁹ Kaipuhan niyatong magkaigwa nin tamang pagmansay dapit sa soberaniya ni Jehova. Malinaw iyan na ipinahiling sa libro nin Job, na saro sa inot na mga isinurat na libro sa Bibliya. Maaaraman niyato diyan an dapit sa akusasyon ni Satanas na kun makaeksperyensiya si Job nin grabeng pagsakit, isisikwal na kaini an Diyos. Sinabi pa ngani ni Satanas sa Diyos na pasakitan kaini si Job. Dai iyan magigibo ni Jehova, pero tinugutan niya si Satanas na baluon si Job. Sinabi nin Diyos: “An gabos na sadiri niya yaon sa saimong kamot.” (Basahon an Job 1:7-12.) Sa halipot sanang panahon, nawaran si Job nin mga uripon, kabuhayan, asin nagadan an sampulo niyang padangat na mga aki. Ginibo iyan ni Satanas sa paaging garo baga sa Diyos mismo hali an mga kasakitan ni Job. (Job 1:13-19) Dangan, pinangyari ni Satanas na magkaigwa si Job nin makulugon asin makarima-rimang hilang. (Job 2:7) Mas nakapaluya pa sa buot niya an nakakapadisganar asin makulog na mga sinabi kan agom niya asin kan tulong sagin na amigo niya.—Job 2:9; 3:11; 16:2.

10. (a) Paano ipinahiling ni Job na maimbod siya sa Diyos? (b) Sa ano siya nasala?

¹⁰ Ano an resulta? Biyong napatunayan na sala an mga akusasyon ni Satanas. Dai tinalikdan ni Job an Diyos. (Job 27:5) Pero, temporaryong nagin sala an pagmansay ni Job sa nangyari. Mas nagpokus siya sa pagdepensa sa sadiri niya asin pagmati niya dapat sana niyang maaraman kun taano ta nagsasakit siya. (Job 7:20; 13:24) Huli sa mga inagihan niya, tibaad isipon niyato na garo baga tama sana na iyan an magin pagmansay niya. Pero itinanos nin Diyos an kaisipan ni Job. Ano an sinabi sa saiya ni Jehova?

11, 12. Tinabangan ni Jehova si Job na masabutan an ano? Ano an epekto kaiyan ki Job?

¹¹ An simbag nin Diyos ki Job inabot nin apat na kapitulo—puon Job kapitulo 38 sagkod 41. Mayo kitang mababasa diyan na sinabi nin Diyos ki Job an dahilan kan saiyang pagsakit. Bako an pagpaliwanag sa dahilan kan pagsakit ni Job an panginot na idinuon diyan ni Jehova, na garo baga kaipuhan niyang magpaliwanag tanganing ipangatanusan an saiyang sadiri. Imbes, gusto ni Jehova na tabangan si Job na marealisar kun gurano siya kasadit kun ikukumparar sa kadakulaan nin Diyos.  Asin tinabangan niya si Job na mahiling na may mas mahalagang mga isyu na mas kaipuhan tawan nin atensiyon. (Basahon an Job 38:18-21.) Nakatabang ini ki Job na maitanos an saiyang pagmansay.

¹² Nagin daing hirak daw si Jehova huli sa prangkang sadol na ini ki Job pagkatapos kan grabeng kasakitan na inagihan kaini? Dai, asin dai man iyan naisip ni Job. Sa ibong kan inaagihan niyang pagsakit, nasabutan man giraray ni Job asin pinahalagahan niya an sadol sa saiya ni Jehova. Sinabi pa ngani niya: “Binabawi ko an mga sinabi ko, asin nagbabakli ako sa alpog asin abo.” Iyan an reaksiyon ni Job sa prangka pero nakakaginhawang sadol ni Jehova. (Job 42:1-6, An Banal na Biblia) Bago kaiyan, nag-ako man siya nin pagtatanos hali sa hoben na si Elihu. (Job 32:5-10) Inako ni Job an pagtatanos nin Diyos asin binago an saiyang pagmansay. Pagkatapos kaiyan, ipinahayag ni Jehova sa iba na naugma siya ki Job huling nagdanay ining maimbod sa ibong nin pagbalo.—Job 42:7, 8.

13. Paano nakatabang ki Job an sadol ni Jehova dawa kaidtong haluyon nang natapos an saiyang kasakitan?

¹³ Nakatabang ki Job an sadol ni Jehova dawa pagkatapos kan inagihan niyang kasakitan. Paano? Totoo na ‘binendisyunan ni Jehova an huring kabtang kan buhay ni Job nin urog pa ki sa nainot,’ pero siguradong kinaipuhan nin panahon tanganing makabalik sa normal an mga bagay-bagay. ‘Nagkaigwa pa siya nin pitong aking lalaki asin tulong aking babayi.’ (Job 42:12-14, An Marahay na Bareta Biblia) Siguradong napungaw si Job sa mga aki niyang nagadan. Asin posibleng may panahon na nagigirumduman niya an mga inagihan niyang kasakitan. Dawa kun kan huri mas nasabutan na niya an dahilan kan mga pagsakit niya, tibaad minsan naiisip niya kun taano ta kinaipuhan pa niyang magsakit nin arog kaidto kagrabe. Ano man an nasa isip niya, puwede niyang hurop-hurupon an mga sinabi sa saiya nin Diyos. Makakatabang iyan sa saiya na mapagdanay an tamang pagmansay asin sa siring maranga siya.—Sal. 94:19.

14. Ano an manunudan niyato sa mga nangyari ki Job?

¹⁴ Makakatabang sa sato an libro nin Job tanganing magkaigwa man kita nin tamang pagmansay asin para maranga kita. Iningatan ni Jehova an librong ini “para sa pagtukdo sa sato, tanganing paagi sa satuyang pakatagal asin paagi sa karangahan hali sa Kasuratan magkaigwa kita nin paglaom.” (Roma 15:4) Ano an itinutukdo kaini sa sato? Sa panginot iyo ini: Dai niyato pagparaisipon na marhay an satong mga problema, na huli kaiyan nawawara na an pokus ta sa mahalagang marhay na isyung ini—an pagbindikar kan soberaniya ni Jehova. Arog ni Job, dapat na malinaw sa sato na magigibo ta an satong papel sa mahalagang marhay na isyung ini kun magdadanay kitang maimbod sa ibong nin grabeng pagsakit.

15. Ano an magigin resulta kun magdadanay kitang maimbod sa ibong nin mga pagbalo?

¹⁵ Nakakaranga sa sato an eksperyensiya ni Job  huling ipinapahiling kaiyan na pag nag-aagi kita nin pagbalo dai iyan nangangahulugan na anggot sa sato si Jehova. Imbes, an mga pagbalo nagtatao nin oportunidad na maipahiling niyato na sinusuportaran ta an soberaniya nin Diyos. (Tal. 27:11) Kun kita maimbod na magtatagal, makakamtan niyato an “pag-uyon nin Diyos” asin mas mákusog an satong paglaom. (Basahon an Roma 5:3-5.) Pinapatunayan kan eksperyensiya ni Job na “si Jehova mamumuton nanggad asin mahihirakon.” (Sant. 5:11) Kaya makakasigurado kita na kun susuportaran ta an saiyang soberaniya, babalusan niya kita. Makakatabang ini tanganing “matagalan [niyato] an gabos na bagay na may pakatios asin kaugmahan.”—Col. 1:11.

16. Taano ta kaipuhan niyatong girumdumon kun gurano kahalaga na mabindikar an soberaniya ni Jehova?

¹⁶ Totoo na puwedeng magin dipisil na papagdanayon an satong mata na nakapokus sa pagbindikar kan soberaniya ni Jehova. May mga problema kaya na garo dai na niyato kaya kun minsan. Dawa ngani an saradit na problema puwedeng magin garo dakulaon kun pagpaparaisipon ta iyan na marhay. Kaya kaipuhan na pirmi niyatong girumdumon kun gurano kahalaga na suportaran ta an soberaniya nin Diyos ano man na kadipisilan an inaagihan niyato.

17. Paano an pagigin sibot sa gibuhon ni Jehova makakatabang sa sato na magdanay na nakapokus sa pinakamahalagang isyu?

¹⁷ Kun magdadanay kitang sibot sa gibuhon ni Jehova, makakatabang iyan na magdanay kitang nakapokus sa pinakamahalagang isyu. Halimbawa, naistrok an sarong sister na si Renee. Asin pirming makulog an hawak niya saka may kanser pa siya. Pag nasa ospital siya para magpabulong, hinuhulitan niya an mga empleyado, mga pasyente, saka an mga nagbibisita. May panahon na 80 oras an nagamit niya sa paghuhulit sa ospital sa laog sana nin duwa may kabangang semana. Dawa kaidtong madali nang magadan si Renee, nungkang nawara an pokus niya sa soberaniya ni Jehova. Asin nakatabang iyan na mabawasan an namamatian niyang kasakitan.

18. Basado sa eksperyensiya nin sarong sister, ano an mga pakinabang kan pagsuportar sa soberaniya ni Jehova?

¹⁸ Siyempre, gusto niyatong magdanay na nakapokus sa soberaniya ni Jehova dawa sa saradit na problemang inaatubang niyato sa aroaldaw. Tulong aldaw na naghalat sa airport si Jennifer para makapuli. Sunod-sunod na na-cancel an flight niya. Huling pagal-pagal asin pagmati niya mayo siyang mahahagadan nin tabang, puwede kutang nauyam na siya sa nangyari. Pero, namibi siya kun paano niya matatabangan sa espirituwal na paagi an iba na naghaharalat man. Ano an resulta? Dakul siyang nahulitan, asin dakul siyang naipasakamot na publikasyon. An sabi niya, “Namati ko na binendisyunan ako ni Jehova sa ibong kan bakong magayon na nangyari asin tinawan niya ako nin kusog na kaipuhan ko para madara ko an saiyang pangaran sa kapaki-pakinabang na paagi.” Iyo, nagdanay siyang nakapokus sa katuyuhan ni Jehova.

19. Ano an paninindugan kan mga lingkod ni Jehova kun dapit sa saiyang soberaniya?

¹⁹ An mga lingkod sana ni Jehova an talagang nakakasabot kun gurano kahalaga kan soberaniya ni Jehova. Saro ini sa pagkakalain ninda sa palsong relihiyon. Haloy na nindang sinusuportaran an saiyang soberaniya. Bilang mga miyembro kan tunay na relihiyon, dapat na hinguwahon kan lambang saro sa sato na padagos na suportaran an soberaniya ni Jehova.

20. Ano an namamatian ni Jehova sa mga paghihinguwa mong suportaran an saiyang soberaniya?

²⁰ Makakasigurado ka na pinapahalagahan na marhay ni Jehova an mga paghihinguwa mo na suportaran an saiyang soberaniya paagi kan saimong maigot na paglilingkod asin pagtagal sa mga pagbalo. (Sal. 18:25) Ipapaliwanag pa sa masunod na artikulo kun taano ta maninigo mong itao an bilog na puso mong suporta sa soberaniya ni Jehova asin kun paano mo iyan masusuportaran.