An ama ni Rehoboam, na si Solomon, namahala sa Israel sa laog nin 40 taon. (1 Ha. 11:42) Nagadan si Solomon kan 997 B.C.E. Dangan nagpasiring si Rehoboam sa Sekem sa norte kan Jerusalem tanganing lahidan bilang hadi. (2 Cron. 10:1) Naiimahinar mo daw siya na haditon huling inaasahan sa saiya na masunod siya sa lakad ni Solomon, na midbid sa ekstraordinaryong kadunungan? Dai niya aram na madali nang mapurbaran an saiya mismong kakayahan sa pagresolber sa komplikadong mga problema.

Siguradong namatian ni Rehoboam na pano nin tensiyon an saiyang papamahalaan. Paghaloy-haloy, nagduruman sa saiya an mga representante kan mga nasasakupan niya tanganing direktang ipaabot sa saiya an kahagadan ninda: ‘Binugtakan kami nin magabat na mga pasan kan saimong ama. Pero kun papagianon mo an [masakit na patrabaho sa samo] kan saimong ama saka an magabat na pasan na ibinugtak niya samuya, paglilingkudan mi ika.’—2 Cron. 10:3, 4, BPV. *

Posible nanggad na namatian ni Rehoboam na nasa alanganon siyang sitwasyon! Kun itatao niya an kahagadan kan mga tawo, kaipuhan niya saka kan saiyang pamilya, asin kan mga nasa palasyo na bawasan an mga luho ninda asin an hinahagad ninda sa banwaan. Pero kun sasayumahan niya man sinda, tibaad magrebelde an mga tawo. Ano an gigibuhon niya? An bagong hadi nagkonsulta nguna sa mga gurang na mga lalaki na dating mga parakonseho ni Solomon. Pero pagkatapos kaiyan, naghagad man siya nin suhestiyon sa mga mas hoben na lalaki na mga kaedad niya. Sinunod ni Rehoboam an suhestiyon ninda kaya nagdesisyon siyang pasakitan an banwaan. Sinabi ni Rehoboam: ‘Binugtakan kamo kan sakuyang ama nin magabat na pasan, asin urog ko ining papagabaton. Naggamit siya saindo nin [latigo]; gagamitan ko kamo nin [latigong may tarom sa puro]!’—2 Cron. 10:6-14, BPV.

Ano an manunudan ta digdi? Malinaw na sa parati, mas madunong na magdangog sa mga mas may edad asin maygurang sa espirituwal. Dakul na sindang eksperyensiya, kaya tibaad aram na ninda an posibleng kaluluwasan nin sarong desisyon asin sa  siring makakatao nin marahay na suhestiyon sa satuya.—Job 12:12.

Tanganing maatubang an rebelyon, tinipon ni Rehoboam an saiyang hukbo. Pero nag-interbenir si Jehova paagi ki propeta Semaias. Sinabi ni Jehova: ‘Dai kamo magdagos, dai man kamo makipag-iwal tumang sa saindong mga tugang na lalaki na mga aki ni Israel. Magbaralik kamo an balang saro sa saiyang [harong] huli ta ako an naggibo kan bagay na ini.’—1 Ha. 12:21-24. *

Dai makilaban? Isip-isipa na sana kun gurano iyan nakapurisaw ki Rehoboam! Ano na sana an iisipon kan mga tawo sa hadi na naghumang papadusahan an saiyang mga nasasakupan paagi sa latigong may tarom sa puro tapos dai nahaloy mayo man sanang ginibo sa hayagan na rebelyon na ini? (Ikumparar an 2 Cronica 13:7.) Sa ibong kaiyan, an hadi asin an saiyang hukbo ‘nagdangog sa tataramon ni Jehova asin nagbaralik sinda [sa saindang harong] siring sa tataramon ni Jehova.’

Ano an manunudan ta digdi? Madunong na magsunod sa Diyos dawa kun magin dahilan iyan na tuyaon kita kan iba. Kun magigin makinuyog kita sa Diyos, uuyunan asin bebendisyunan niya kita.—Deut. 28:2.

Ano an nagin resulta kaiyan para ki Rehoboam? Pagkatapos niyang talikdan an plano niyang makipaglaban sa bagong maestablisar na nasyon, nagpokus siya sa pagbilog nin mga siyudad sa mga teritoryo kan tribo nin Juda asin Benjamin na nasa irarom pa kan pamamahala niya. Pinakusog niya “nin labi-labi” an nagkapirang siyudad. (2 Cron. 11:5-12) An mas mahalaga, may panahon na nagsunod siya sa mga katugunan ni Jehova. Mantang nag-uurog an idolatriya sa sampulong tribong kahadian nin Israel sa pamamahala ni Jeroboam, dakul sa mga tawo diyan an nagsuportar ki Rehoboam paagi sa pagpasiring sa Jerusalem tanganing manindugan para sa tunay na pagsamba. (2 Cron. 11:16, 17) Kaya, naparigon kan pagkuyog ni Rehoboam an saiyang pamamahala bilang hadi.

Alagad kan marigon na an pamamahala niya bilang hadi, may ginibong dai inaasahan si Rehoboam. Dai na siya nagsunod sa katugunan ni Jehova dangan nagsamba sa paganong mga diyos! Taano ta ginibo niya iyan? Diniktahan daw siya kan saiyang ina na sarong Amonita? (1 Ha. 14:21) Ano man an dahilan niya, nagsunod sa saiya an bilog na nasyon. Kaya tinugutan ni Jehova na mabihag ni Hading Sisac kan Ehipto an dakul na siyudad kan Juda, dawa pinakusog ni Rehoboam an mga iyan!—1 Ha. 14:22-24; 2 Cron. 12:1-4.

Mas naggrabe pa an sitwasyon kan makaabot na si Sisac sa Jerusalem, kun sain namamahala si Rehoboam. Sa puntong ini, ipinaabot ni propeta Semaias an mensahe nin Diyos ki Rehoboam asin sa saiyang mga prinsipe: ‘Binayaan nindo ako, kaya babayaan ko man kamo sa kamot ni Sisac.’ Ano an nagin reaksiyon ni Rehoboam sa disiplinang iyan? Kaumaw-umaw! An Bibliya nagsabi: ‘An mga prinsipe sa Israel asin an hadi nagpakumbaba asin nagsarabi: “[Matanos] si Jehova.”’ Kaya, ilinigtas ni Jehova sa pagkalaglag si Rehoboam asin an Jerusalem.—2 Cron. 12:5-7, 12.

Pagkatapos kaiyan, padagos na naghadi si Rehoboam sa kahadian sa timog. Bago siya nagadan, nanao siya nin kadakul na regalo sa dakul niyang aking lalaki, malinaw na tanganing masigurado niya na dai sinda marebelde sa tugang nindang si Abias, na iyo an masalida sa saiya. (2 Cron. 11:21-23) Sa paggibo kaini, ipinahiling ni Rehoboam na may pakasabot na siya ngunyan kisa kan siya hoben pa.

May marahay man na mga nagibo si Rehoboam, pero sa ibong kaiyan dai niya nakua an pag-uyon nin Diyos. Sinumaryo kan Bibliya an pamamahala niya: ‘Ginibo niya kun ano an maraot.’ Taano? Huling ‘dai siya [nagin determinado] sa saiyang puso na hanapon si Jehova.’—2 Cron. 12:14.

Pag-isipan ini: Nagkuyog man sa Diyos paminsan-minsan si Rehoboam. Asin may mga nagibo man siyang marahay para sa nasyon ni Jehova. Pero dai siya naghinguwang magkaigwa nin haraning relasyon ki Jehova o nin determinasyon na mapaugma siya. Kaya nakagibo siya nin maraot asin nagsamba sa paganong mga diyos. Tibaad iniisip mo: ‘Kan itanos nin Diyos si Rehoboam, nagkuyog daw siya dahil sa udok sa pusong pagsulsol asin pagmawot na mapaugma an Diyos o dahil sana iyan sa impluwensiya kan iba?’ (2 Cron. 11:3, 4; 12:6) Sa huring kabtang kan saiyang buhay, nagbalik siya sa paggibo nin maraot. Ibang marhay nanggad siya sa lolo niyang si Hading David!  Totoo na nakagibo nin mga sala si David, pero sa kabilugan, hiling-hiling sa saiyang buhay na namumutan niya si Jehova, na bilog an debosyon niya sa tunay na pagsamba, asin na tunay siyang nagsulsol sa mga kasalan niya.—1 Ha. 14:8; Sal. 51:1, 17; 63:1.

Siguradong nakanuod nanggad kita ki Rehoboam. Kaumaw-umaw pag sinusustentuhan nin saro an saiyang pamilya asin hinihinguwang gumibo nin kapaki-pakinabang na bagay. Pero tanganing makua an pag-uyon nin Diyos, an pinakaimportanteng dapat niyatong gibuhon iyo na suportaran an tunay na pagsamba asin magdanay diyan.

Posibleng marhay na magigibo ta iyan kun hihinguwahon niyatong pagdanayon na makusog an satong pagkamuot ki Jehova. Kun paanong padagos niyatong ginagatungan an kalayo tanganing magdanay iyan na naglalaad, kaipuhan ta man na regular na pag-adalan an Tataramon nin Diyos, hurop-hurupon iyan, asin padagos na mamibi tanganing mapagdanay tang naglalaad, sabi ngani, an satong pagkamuot sa Diyos. (Sal. 1:2; Roma 12:12) Kun gigibuhon niyato iyan, mapapakusog kaiyan an satong pagmawot na mapaugma siya sa gabos niyatong ginigibo. Mapapahiro man kita kaiyan na magpahiling nin tunay na pagsulsol kun makagibo kita nin sala. Bakong arog ni Rehoboam, magdadanay kitang maimbod sa tunay na pagsamba.—Jud. 20, 21.