Siyam na Kristiyanong kuwalidad an sinasambit sa mga bersikulong iyan: “An bunga kan espiritu iyo an pagkamuot, kagaya-gayahan, katuninungan, pakatios, kabuutan, karahayan, pagtubod, pagigin kalmado, pagpupugol sa sadiri.” Pero bako lang iyan an marahayon na mga kuwalidad na mapapatalubo ta huli sa tabang kan espiritu nin Diyos.

Risahon an isinurat ni apostol Pablo bago niya sinambit an bunga kan espiritu: “An mga gibo kan laman . . . iyo an seksuwal na imoralidad, karigsukan, daing pakundangan na paggawi, idolatriya, espiritismo, pagkaungis, iriwal, pagsuspetsa, daing kontrol na pagkaanggot, dai pagkauruyon, pagkabaranga, mga sekta, pagkauri, pagburat, mariribok na kaurugmahan, asin mga bagay na arog kaini.” (Gal. 5:19-21) Kaya buot sabihon, may puwede pa kutang idagdag si Pablo na kaiba sa “mga gibo kan laman,” arog kan mga sinambit sa Colosas 3:5. Kaagid kaiyan, pagkatapos na sambiton an siyam na marahay na mga kuwalidad, sinabi niya na dai nin pagbuot kontra sa arog kaiyan na mga bagay. Kaya dai man sinambit ni Pablo an gabos na marahayon na kuwalidad na mapapatalubo niyato sa tabang kan banal na espiritu.

Malinaw na mahihiling iyan pag ikinumparar ta an bunga kan espiritu sa bunga nin liwanag na isinurat ni Pablo para sa kongregasyon sa Efeso: “An bunga nin liwanag iyo an gabos na klase nin karahayan asin katanusan saka katotoohan.” (Efe. 5:8, 9) Iyo, an “karahayan,” kaiba kan katanusan saka katotoohan, kabtang kan “bunga nin liwanag,” pero aspekto man iyan kan “bunga kan espiritu.”

Kaagid kaiyan, dinagka ni Pablo si Timoteo na ‘magmaigot na ipahiling an pagigin matanos, an debosyon sa Diyos, an pagtubod, an pagkamuot, an pakatagal, asin an kahuyuan’—anom na marahayon na kuwalidad. (1 Tim. 6:11) Tulo sana diyan (pagtubod, pagkamuot, asin kahuyuan o pagigin kalmado) an sinambit bilang aspekto kan “bunga kan espiritu.” Pero, kaipuhan man ni Timoteo an tabang kan espiritu tanganing maipahiling an iba pang sinambit na mga kuwalidad: pagigin matanos, debosyon sa Diyos, asin pakatagal.—Ikumparar an Colosas 3:12; 2 Pedro 1:5-7.

Kaya dai nakalista sa Galacia 5:22, 23 an gabos na kuwalidad nin Kristiyano. Matatabangan kita kan espiritu nin Diyos na magkaigwa kan siyam na aspekto na inaapod na “bunga kan espiritu.” Pero may dakul pang kuwalidad na kaipuhan niyatong patalubuon mantang nag-uuswag kita bilang maygurang na Kristiyano asin “[isinusulot] an bagong personalidad na linalang sigun sa kabutan nin Diyos, kauyon kan tunay na katanusan asin kaimbudan.”—Efe. 4:24.