ARTIKULONG PAG-AADALAN 23
“Pakangbanalon an Ngaran Mo”
“O Jehova, an saimong pangaran nagdadanay sagkod lamang.”—SAL. 135:13, NWT.
KANTA 10 Umawon an Diyos Niyatong si Jehova!
SUMARYO KAN PAG-AADALAN *
1-2. Anong mga tema an interesanteng marhay para sa mga Saksi ni Jehova?
NAPAPAATUBANG kita ngunyan sa mahalagang marhay na mga isyu—soberaniya asin pagbindikar. Bilang mga Saksi ni Jehova, gustong-gusto tang pinag-uulayan an interesanteng mga temang iyan. Pero magkalain daw na isyu an soberaniya nin Diyos asin an pagpakangbanal sa saiyang pangaran? Bako.
2 Malinaw sa sato gabos na dapat na halian nin katuyawan an pangaran nin Diyos. Naaraman ta man na dapat na mapatunayan na an soberaniya ni Jehova, o an paagi niya nin pamamahala, iyo an pinakamarahay. Kaya an duwang isyung ini parehong mahalagang marhay.
3. Ano an kalabot sa pangaran na Jehova?
3 An totoo, kalabot sa pangaran na Jehova an gabos na bagay manungod sa satong Diyos, kaiba na an paagi niya nin pamamahala. Kaya kun sinasabi ta na an pinakamahalagang isyu iyo an paghali sa gabos na katuyawan sa pangaran ni Jehova, buot man niyatong sabihon dapat na mapatunayan na an paagi nin pamamahala ni Jehova iyo an pinakamarahay. An pangaran ni Jehova konektadong marhay sa paagi niya nin pamamahala bilang an Soberanong makakamhan sa gabos.—Hilingon an kahon na “ Mga Aspekto nin Sarong Dakulang Isyu.”
4. Paano ilinaladawan kan Salmo 135:13 an pangaran nin Diyos, asin anong mga hapot an sisimbagon ta sa artikulong ini?
4 Espesyal na marhay an pangaran na Jehova. (Basahon an Salmo 135:13.) * Taano ta mahalagang marhay an pangaran nin Diyos? Paano iyan inot na pinakaraot? Paano iyan pinapakangbanal nin Diyos? Asin paano kita makakatabang sa pagdepensa sa saiyang pangaran? Sisimbagon ta an mga hapot na iyan.
AN KAHALAGAHAN NIN PANGARAN
5. Ano an tibaad maihapot niyato pag pinag-uulayan an manungod sa pagpakangbanal kan pangaran nin Diyos?
5 “Pakangbanalon an ngaran mo.” (Mat. 6:9) Sinabi ni Jesus na dapat na priyoridad ta iyan pag namimibi. Pero ano an buot sabihon kan mga tataramon ni Jesus? An pagpakangbanal sa sarong bagay nangangahulugan na gibuhon iyan na banal, malinig, o dalisay. Pero tibaad ihapot nin iba, ‘Bakong dati na man na banal, malinig, saka dalisay an pangaran ni Jehova?’ Para masimbag iyan, kaipuhan tang aramon an kalabot sa sarong pangaran.
6. An pangaran mahalagang marhay huli sa ano?
6 An pangaran bako lang basta grupo nin mga letra na isinusurat, o itinataram. Mangnuhon an sinasabi kan Bibliya: “An marahay na ngaran iyo an dapat pilion kisa sa dakulang kayamanan.” (Tal. 22:1, NWT; Par. 7:1) Taano ta arog kaiyan kahalaga an pangaran? Huling kalabot diyan an reputasyon—kun ano an naiisip kan iba manungod sa saro na igwa kan pangaran na iyan. Kaya an pagkasurat kan pangaran o dawa an pagpronunsiyar kaiyan bako an pinakamahalaga, kundi kun siisay an kagsadiri kan pangaran asin kun ano an naiisip kan mga tawo pag nahihiling o nadadangog an pangaran na iyan.
7. Ano an ginigibo nin mga tawo para atakihon an pangaran nin Diyos?
7 Pag nagpapalakop nin kaputikan an mga tawo manungod ki Jehova, inaatake ninda an saiyang reputasyon. Pag inaatake ninda an saiyang reputasyon, pinupurbaran nindang rauton an pangaran niya. An inot na pag-atake sa saiyang pangaran asin reputasyon nangyari sa kapinunan kan kasaysayan nin tawo. Pag-isipan kun ano an nanudan ta sa pag-atakeng ini.
AN INOT NA PAGPAKARAOT SA PANGARAN NIN DIYOS
8. Ano an aram ni Adan asin Eva, saka ano an mga puwede niyatong maihapot?
8 Aram ni Adan asin Eva an pangaran ni Jehova, pati man an mahalagang marhay na mga katotoohan manungod sa Saro na igwa kan pangaran na iyan. Midbid ninda siya bilang an Kaglalang, an Saro na nagtao sainda nin buhay, kan magayon na Paraisong istaran, asin nin perpektong agom. (Gen. 1:26-28; 2:18) Sa ibong kaiyan, padagos daw nindang gagamiton an saindang perpektong isip tanganing hurop-hurupon an gabos na ginibo ni Jehova para sa sainda? Padagos daw nindang papakusugon an saindang pagkamuot asin pagpapahalaga sa Personang irinerepresentar kan pangaran na iyan? Nagin malinaw an simbag kan baluon sinda kan kaiwal nin Diyos.
9. Sigun sa Genesis 2:16, 17 asin 3:1-5, ano an sinabi ni Jehova sa inot na mag-agom, asin paano biniribid ni Satanas an katotoohan?
9 Basahon an Genesis 2:16, 17 * asin 3:1-5. * Paagi sa sarong halas, ihinapot ni Satanas ki Eva: “Talagang sinabi nin Diyos na dai kamo dapat magkakan kan bunga kan gabos na kahoy sa hardin?” Dai gayong risa na may nakakahilong kaputikan sa hapot na iyan. An talagang sinabi nin Diyos iyo na puwede nindang kakanon an bunga kan gabos na kahoy, apuwera sa saro. Siguradong kadakul kan mapagpipilian ni Adan asin Eva. (Gen. 2:9) Iyo, talagang matinao si Jehova. Minsan siring, ipinagbawal nin Diyos ki Adan asin Eva na kakanon an bunga kan sarong kahoy na pinili Niya. Kaya biniribid kan hapot ni Satanas an katotoohan. Pinaluwas ni Satanas na bakong matinao an Diyos. Tibaad naisip ni Eva, ‘May ipinapanguri daw sako an Diyos?’
10. Paano direktang pinakaraot ni Satanas an pangaran nin Diyos, asin ano an nagin epekto kaiyan?
10 Sa puntong iyan, minimidbid pa man giraray ni Eva si Jehova bilang saiyang Tagapamahala. Sinabi niya ki Satanas an malinaw na instruksiyon nin Diyos. Sinabi pa niya na dai ninda dapat gibuhon maski an pagduta sa kahoy. Aram ni Eva an patanid nin Diyos na an pagsuway maresulta sa kagadanan. Pero nagsimbag si Satanas: “Siguradong dai kamo magagadan.” (Gen. 3:2-4, NWT) Dai na itinago ni Satanas an intensiyon niya. Direkta na niyang pinakaraot an pangaran nin Diyos, na garo man sana sinasabi ki Eva na putikon si Jehova. Sa siring, si Satanas nagin diyablo, o parapakaraot. Biyong nadaya si Eva; naniwala siya ki Satanas. (1 Tim. 2:14) Mas nagtiwala siya ki Satanas kisa ki Jehova. Kaya madali na lang na nagibo ni Eva an pinakasalang desisyon. Nagdesisyon siyang suwayon si Jehova. Nagkakan siya kan bunga na ipinagbawal ni Jehova. Dangan tinawan niya man kaiyan si Adan.—Gen. 3:6.
11. Ano kuta an dapat na ginibo kan satong inot na mga magurang, asin ano an dai ninda nagibo?
11 Ano daw kuta an dapat na sinabi ni Eva ki Satanas? Imahinara kun arog kaini an sinabi niya: “Dai taka man midbid, pero si Jehova na sakong Ama midbid ko, saka namumutan asin nagtitiwala ako saiya. An gabos na igwa kami ni Adan hali saiya. Paano mo nasasabi an maraot na bagay na ini? Humali ka!” Siguradong mauugmang marhay si Jehova kun arog kaiyan an sinabi ni Eva! (Tal. 27:11) Pero si Eva, pati man si Adan, mayo nin maimbod na pagkamuot sa saindang Amang si Jehova. Huli kaiyan, dai naidepensa ni Adan asin Eva sa pagpakaraot an Saiyang pangaran.
12. Paano ni Satanas tinanuman nin mga pagduda an isip ni Eva, asin ano an dai nagibo ni Adan asin Eva?
12 Arog kan nahiling ta, nagpuon si Satanas paagi sa pagtanom nin mga pagduda sa isip ni Eva. Ginibo niya iyan paagi sa pag-impluwensiya ki Eva na kuwestiyunon kun baga talagang marahay na Ama si Jehova. Dangan dai naidepensa ni Adan asin Eva an pangaran asin reputasyon ni Jehova. Tinugutan nindang maimpluwensiyahan sinda ni Satanas na magrebelde sa saindang Ama. Ginagamit ni Satanas an kaagid na mga taktika ngunyan. Inaatake niya an pangaran ni Jehova paagi sa pagpakaraot diyan. An mga tawong naniniwala sa mga kaputikan ni Satanas madali sanang naiimpluwensiyahan na isikwal an matanos na pamamahala ni Jehova.
PINAPAKANGBANAL NI JEHOVA AN SAIYANG PANGARAN
13. Pano itinatampok kan Ezequiel 36:23 an pinakamensahe kan Bibliya?
13 Pinapabayaan na sana daw ni Jehova na dai idepensa an saiyang sadiri sa siring na pagpakaraot? Dai nanggad! An bilog na Bibliya nakapokus sa mga ginibo ni Jehova tanganing halion an katuyawan sa saiyang pangaran na resulta kan nangyari kaidto sa Eden. (Gen. 3:15) Sa katunayan, puwede tang sumaryuhon an pinakamensahe kan Bibliya sa arog kaining paagi: Pinapakangbanal ni Jehova an saiyang pangaran paagi kan Kahadian na pinamamahalaan kan saiyang Aki asin ibinabalik an katanusan asin katuninungan sa daga. An Bibliya igwa nin impormasyon na makakatabang sa sato na masabutan kun paano pinapakangbanal ni Jehova an saiyang pangaran.—Basahon an Ezequiel 36:23.
14. Paano napakangbanal an pangaran ni Jehova paagi kan ginibo niya pagkatapos kan rebelyon sa Eden?
14 Ginibo ni Satanas an gabos para ulangon an katuyuhan ni Jehova. Pero dai lamang siya nagin mapanggana. Ipinapahiling sa rekord kan Bibliya kun paano naghiro si Jehova, asin pinapatunayan kaiyan na mayong kapareho an Diyos na Jehova. Iyo, an pagrebelde ni Satanas asin kan gabos na minakampi sa saiya nagdadara nin grabeng kakulugan ki Jehova. (Sal. 78:40) Pero inatubang ni Jehova an pag-atakeng ini na may kadunungan, pasensiya, asin hustisya. Ipinahiling niya man sa kadakul na paagi an saiyang daing kapantay na kapangyarihan. Urog sa gabos, hiling-hiling an saiyang pagkamuot sa gabos niyang ginigibo. (1 Juan 4:8) Padagos na pinapakangbanal ni Jehova an saiyang pangaran.
Sinabihan ni Satanas si Eva nin mga kaputikan manungod ki Jehova, asin sa laog nin dakul na taon, an Diyablo padagos na pinapakaraot an Diyos (Hilingon an parapo 9-10, 15) *
15. Paano pinapakaraot ni Satanas an pangaran nin Diyos ngunyan, asin ano an epekto kaiyan?
15 Pinapakaraot pa man giraray ngunyan ni Satanas an pangaran nin Diyos. Dinadaya niya an mga tawo tanganing magduda sinda sa kapangyarihan, hustisya, kadunungan, asin pagkamuot nin Diyos. Halimbawa, hinihinguwa ni Satanas na kumbinsiron an mga tawo na bako si Jehova an Kaglalang. Asin kun naniniwala an mga tawo na igwa nin Diyos, pinapaniwala sinda ni Satanas na istriktuhon saka bakong makatanusan an Diyos asin an Saiyang mga pamantayan. Itinutukdo pa ngani niya sa mga tawo na si Jehova daing hirak asin maringis na Diyos na pinapasakitan an mga tawo sa nagkakalayong impiyerno. Pag naniniwala sinda diyan, posibleng marhay na isikwal na man ninda an matanos na pamamahala ni Jehova. Sagkod na dai pa lubos na nadadaog si Satanas, ipagpapadagos niya an saiyang pagpakaraot, asin pupuntiryahon ka man niya. Magigin mapanggana daw siya?
AN PAPEL MO SA DAKULANG ISYU
16. Ano an puwede mong magibo na dai nagibo ni Adan asin Eva?
16 Tinutugutan ni Jehova an bakong perpektong mga tawo na magkaigwa nin papel sa pagpakangbanal sa saiyang pangaran. Kaya puwede mong magibo an dai nagibo ni Adan asin Eva. Dawa nabubuhay sa kinaban na kadakul nin tawong pinapakaraot asin linalanghadan an pangaran ni Jehova, may oportunidad kang manindugan asin isabi an katotoohan—na si Jehova banal, matanos, marahay, asin mamumuton. (Isa. 29:23) Puwede mong suportaran an saiyang pamamahala. Puwede mong tabangan an mga tawo na masabutan na iyan sana an pamamahalang tunay na matanos asin magdadara nin katuninungan saka kaugmahan sa gabos na linalang.—Sal. 37:9, 37; 146:5, 6, 10.
17. Paano ipinamidbid ni Jesus an pangaran kan saiyang Ama?
17 Pag idinedepensa ta an pangaran ni Jehova, inaarog ta an halimbawa ni Jesu-Cristo. (Juan 17:26) Ipinamidbid ni Jesus an pangaran kan saiyang Ama bako lang paagi sa paggamit kaiyan kundi paagi man sa pagdepensa sa reputasyon ni Jehova. Halimbawa, kinontra niya an mga Fariseo huling pinapaluwas kan mga ini sa manlain-lain na paagi na si Jehova maringis, masakit pauyunan, harayo, asin daing hirak. Tinabangan ni Jesus an mga tawo na mahiling na an saiyang Ama rasonable, mapasensiya, mamumuton, asin mapagpatawad. Tinabangan niya man sinda na mamidbid si Jehova paagi sa perpektong pagpahiling kan mga kuwalidad kan saiyang Ama sa saiyang pang-aroaldaw na buhay.—Juan 14:9.
18. Paano ta mapapatunayan na sala an mga kaputikan asin pakaraot manungod ki Jehova?
18 Arog ni Jesus, puwede niyatong ihiras sa iba an naaaraman ta manungod ki Jehova, na tinutukduan sinda kun gurano Siya kamamumuton asin kabuot na Diyos. Mantang ginigibo niyato iyan, pinapatunayan niyatong sala an mga kaputikan asin pakaraot manungod ki Jehova. Pinapakangbanal niyato an pangaran ni Jehova, na pinapabanal iyan sa isip asin puso kan mga tawo. Maaarog ta man si Jehova. Posible iyan dawa ngani bako kitang perpekto. (Efe. 5:1, 2) Pag ipinapahiling ta sa mga tawo paagi kan satong mga sinasabi asin ginigibo kun anong klaseng Diyos si Jehova, nakakatabang kita sa pagpakangbanal sa saiyang pangaran. Binibindikar ta an pangaran na iyan paagi sa pagtabang sa mga tawo na maitanos an ano man na salang ideya ninda manungod diyan. * Mapapatunayan ta man na kaya kan bakong perpektong mga tawo na mapagdanay an saindang integridad.—Job 27:5.
Gusto niyatong tabangan an satong mga tinutukduan sa Bibliya na maapresyar an pagigin mabuot asin mamumuton ni Jehova (Hilingon an parapo 18-19) *
19. Paano kita tinatabangan kan Isaias 63:7 na mahiling kun ano an dapat na magin panginot na pasuhan kan pagtutukdo niyato?
19 Estudyaran an saro pang mahalagang leksiyon na puwede tang iaplikar. Pag itinutukdo ta sa iba an manungod sa mga katotoohan na nasa Bibliya, idinuduon ta sa parati an manungod sa soberaniya nin Diyos, na igwa nin deretso si Jehova na pamahalaan an uniberso, asin totoo nanggad ini. Pero dawa ngani mahalaga na itukdo sainda an mga pagbuot nin Diyos, an panginot na pasuhan niyato iyo na tabangan an iba na mamutan si Jehova na satong Ama, asin na magin maimbod sa saiya. Kaya kaipuhan niyatong itukdo sa sainda an magagayon na kuwalidad ni Jehova, na idinuduon kun anong klase nin Persona an irinerepresentar kan pangaran na Jehova. (Basahon an Isaias 63:7.) Mantang nagtutukdo kita sa arog kaiyan na paagi, matatabangan niyato an iba na mamutan asin sundon si Jehova huling gusto nindang magin maimbod sa saiya.
20. Ano an pag-uulayan niyato sa sunod na artikulo?
20 Pero paano niyato masisigurado na an satong paggawi asin pagtutukdo magayon an magigin epekto sa pangaran ni Jehova asin makakatabang na rumani sa saiya an iba? Sisimbagon sa sunod na artikulo an hapot na iyan.
KANTA 2 Jehova an Ngaran Mo
^ par. 5 Anong mahalagang isyu an napapaatubang sa gabos na tawo asin anghel? Taano ta mahalagang marhay an isyung iyan, asin ano an papel ta sa pagresolber kaiyan? An simbag sa mga hapot na iyan asin sa iba pang hapot na kalabot diyan makakatabang sa sato na mapakusog an relasyon ta ki Jehova.
^ par. 4 Salmo 135:13, NWT: “O Jehova, an saimong pangaran nagdadanay sagkod lamang. O Jehova, nagdadanay sa gabos na henerasyon an saimong kabantugan.”
^ par. 9 Genesis 2:16, 17, NWT: “Itinao man kan Diyos na Jehova sa tawo an pagbuot na ini: ‘Puwede mong kakanon an bunga kan lambang kahoy sa hardin sagkod sa mabasog ka. Pero kun manungod sa kahoy nin pakaaram kan marahay asin maraot, dai ka magkakan kan bunga kaiyan, huling sa aldaw na magkakan ka kan bunga kaiyan siguradong magagadan ka.’”
^ par. 9 Genesis 3:1-5, NWT: “Sa gabos na layas na hayop sa daga na ginibo kan Diyos na Jehova, an halas an pinakamaingat. Asin sinabi kaiyan sa babayi: ‘Talagang sinabi nin Diyos na dai kamo dapat magkakan kan bunga kan gabos na kahoy sa hardin?’ Nagsimbag an babayi sa halas: ‘Puwede ming kakanon an bunga kan mga kahoy sa hardin. Pero kun manungod sa bunga kan kahoy na nasa tahaw kan hardin, sinabi nin Diyos: “Dai kamo magkakan kan bunga kaiyan, asin dai nindo pagdutan iyan; ta kun gigibuhon nindo iyan, magagadan kamo.”’ Sinabi kan halas sa babayi: ‘Siguradong dai kamo magagadan. Aram kaya nin Diyos na sa mismong aldaw na magkakan kamo kan bunga kaiyan, mabubuksan an saindong mga mata asin magigin arog kamo nin Diyos na nakakaaram kan marahay saka kan maraot.’”
^ par. 18 May beses na itinukdo kaidto sa satong mga publikasyon na dai kaipuhan na ibindikar an pangaran ni Jehova huling mayo nin siisay man na nagkuwestiyon sa saiyang deretsong magkaigwa kan pangaran na iyan. Pero kan taunan na miting kan 2017, nagkaigwa nin paglilinaw sa pakasabot. Sinabi kan tsirman: “Sa simpleng pagtaram, bakong sala na ipamibi niyato na mabindikar an pangaran ni Jehova huling kaipuhan nanggad na mapatunayan na malinig an saiyang reputasyon.”—Hilingon an programa para sa Enero 2018 sa jw.org®. Hanapon sa LIBRARY > JW BROADCASTING®.
^ par. 65 DESKRIPSIYON KAN RITRATO: An Diyablo na pinapakaraot an Diyos. Sinasabi niya ki Eva na putikon an Diyos. Sa laog nin dakul na taon, nagpapalakop si Satanas nin palsong mga ideya, arog kan katukduan na maringis an Diyos asin na bakong totoo na linalang Niya an mga tawo.
^ par. 67 DESKRIPSIYON KAN RITRATO: Mantang nagkokondukta nin pag-adal sa Bibliya, itinutukdo nin sarong brother an personalidad nin Diyos.
