1. Taano ta dakulang tabang an mga hoben na brother?

MGA hoben na brother, puwede kamong magin dakulang tabang sa kongregasyon. Dakul saindo an makusog. (Tal. 20:29) Dakul kamong ginigibo na nakakatabang sa mga tugang. Asin tibaad gusto nindong manombrahan bilang ministeryal na lingkod. Pero tibaad namamatian nindo na an paghiling saindo kan iba hobenon pa o dai pa puwedeng pagkatiwalaan nin mahalagang gibuhon. Dawa ngani hoben pa kamo, may magigibo na kamo ngunyan para makua an tiwala asin respeto kan mga nasa kongregasyon.

2. Ano an pag-uulayan ta sa artikulong ini?

² Sa artikulong ini, pag-uulayan ta an buhay ni Hading David. Pag-uulayan ta man an pirang pangyayari sa buhay kan duwang hadi kan Juda na si Asa asin Jehosafat. Aaramon ta an mga kadipisilan na napaatubang sa tulong lalaking ini, kun ano an ginibo ninda, asin kun ano an manunudan sainda kan mga hoben na brother.

3. Ano an sarong paagi na matatabangan kan mga hoben an mga may edad na sa kongregasyon?

³ Kan hoben pa si David, nakanuod siya nin mga kasanayan na nakatabang sa iba. Malinaw na tawong espirituwal siya, asin nagmaigot siya na magin mahusay na musikero. Ginamit niya iyan para tabangan si Saul, an hading ninombrahan nin Diyos. (1 Sam. 16:16, 23) Mga hoben na lalaki, may kasanayan daw  kamo na makakatabang sa iba sa laog kan kongregasyon? Dakul saindo an igwa. Halimbawa, tibaad narisa nindo na naaapresyar kan mga may edad na pag tinatabangan sinda kun paano gamiton an tablet ninda saka an iba pang electronic device para sa personal na pag-adal asin para sa mga pagtiripon. Dahil tatao kang maggamit kaiyan, dakula an maitatabang mo sainda.

4. Arog ni David, anong mga kuwalidad an kaipuhan na pauswagon kan mga hoben na brother? (Hilingon an ritrato sa cover.)

⁴ Sa pang-aroaldaw na buhay ni David, pinatunayan niyang responsable saka maaasahan siya. Halimbawa, kan solterito pa siya, maigot niyang inataman an mga karnero kan saiyang ama. Peligrosong trabaho iyan. Pag-abot nin panahon, sinabi ni David ki Hading Saul: “Kan an saimong lingkod nagpapastor sa mga karnero kan saiyang ama, may nag-abot na sarong leon, saka sarong oso, asin pareho ining nakatabag nin sarong karnero hali sa aripumpon. Linapag ko iyan saka pinatumba ko asin nailigtas ko sa nguso kaiyan an karnero.” (1 Sam. 17:34, 35, NWT) Para ki David, paninimbagan niya an mga karnero, kaya kusog-buot siyang nakilaban para sa mga ini. Maaarog kan mga hoben na brother si David paagi sa maigot na pagsagibo kan ano man na asignasyon na itinatao sainda.

5. Sigun sa Salmo 25:14, ano an pinakamahalagang bagay na puwedeng gibuhon kan mga hoben na brother?

⁵ Nagkaigwa an hoben na si David nin harani asin personal na relasyon ki Jehova. An relasyon na iyan mas mahalaga kisa sa kusog nin buot ni David o sa pagigin matibay niya sa pagtugtog nin instrumentong de-kuwerdas. Si Jehova bako sanang Diyos ni David kundi Amigo man niya—best Friend niya. (Basahon an Salmo 25:14, NWT.) Mga hoben na brother, an pinakamahalagang bagay na puwede nindong gibuhon iyo na pakusugon an relasyon nindo sa saindong Ama sa langit, asin puwede iyan na magresulta sa pagkaigwa nindo nin dagdag na pribilehiyo.

6. Ano an paghiling ki David kan iba?

⁶ An sarong problema na inatubang ni David iyo an negatibong paghiling saiya kan iba. Halimbawa, kan magpresentar si David na makipaglaban ki Goliat, pigdisganar siya ni Hading Saul na sinasabi: “Aki ka pa.” (1 Sam. 17:31-33, NWT) Bago kaiyan, sinahutan si David kan mismong tugang niya na iresponsable siya. (1 Sam. 17:26-30) Dawa arog kaiyan, para ki Jehova bakong isip-aki o iresponsable si  David. Bisto siyang marhay ni Jehova. Asin dahil nanarig si David sa Amigo niyang si Jehova para sa kusog, nadaog niya si Goliat.—1 Sam. 17:45, 48-51.

7. Ano an manunudan mo sa sarong istorya manungod ki David?

⁷ Ano an manunudan mo ki David? Kaipuhan mong magin mapasensiya. Tibaad mangaipo nin haloy na panahon bago marealisar kan mga nakakabisto saimo puon kan aki ka pa na madali ka nang magin adulto. Pero makakasigurado ka na bako sa pangluwas na itsura mo naghihiling si Jehova. Aram niya kun siisay ka asin kun ano an kaya mong gibuhon. (1 Sam. 16:7) Pakusugon an relasyon mo sa Diyos. Ginibo iyan ni David paagi sa pagmasid sa mga linalang ni Jehova. Inisip-isip ni David kun ano an manunudan niya diyan manungod sa Kaglalang. (Sal. 8:3, 4; 139:14; Roma 1:20) An saro pang puwede mong gibuhon iyo na maghagad nin kusog ki Jehova. Halimbawa, kinakantiyawan ka daw kan mga kaeskuwela mo dahil Saksi ka? Kun iyo, mamibi ki Jehova na makayanan mo iyan. Asin gibuhon an praktikal na mga sadol na mahihiling mo sa Tataramon niya saka sa mga publikasyon asin video na basado sa Bibliya. Sa kada nahihiling mong tinatabangan ka ni Jehova, magkukusog man an pagtitiwala mo saiya. Apuwera kaiyan, mantang nahihiling kan iba na nananarig ka ki Jehova, makukua mo an tiwala ninda.

8-9. Ano an nakatabang ki David na mapasensiyang maghalat sagkod na magin hadi siya, asin ano an manunudan saiya kan mga hoben na brother?

⁸ Pag-isipan an saro pang problema na napaatubang ki David. Pagkatapos siyang lahidan bilang hadi, naghalat siya nin dakul na taon bago siya opisyal na patukawon bilang hadi kan Juda. (1 Sam. 16:13; 2 Sam. 2:3, 4) Ano an nakatabang saiya na mapasensiyang maghalat? Imbes na mayo nang gibuhon dahil sa pagkadisganar, nagpokus si David sa kun ano an magigibo niya. Halimbawa, kan panahon na namumuhay siya bilang dulag sa teritoryo kan mga Filisteo, ginamit ni David an oportunidad na iyan para makipaglaban sa mga kaiwal kan Israel. Dahil kaiyan, naprotektaran niya an mga sagkudan kan teritoryo kan Juda.—1 Sam. 27:1-12.

⁹ Ano an manunudan kan mga hoben na brother ki David? Gamiton an mga oportunidad na bukas saindo para makapaglingkod ki Jehova asin sa mga tugang. Pag-isipan an eksperyensiya kan brother na si Ricardo. * Kan solterito pa siya, pangarap niyang magregular payunir. Pero dai pa siya andam. Imbes na madisganar o kumulog an buot, mas nagmaigot si Ricardo sa ministeryo. Sinabi niya: “Pag iniisip-isip ko an sadiri ko kaidto, marahay talaga na ginibo ko an kinakaipuhan na mga pagbabago. Sinisigurado kong mabalikan an siisay man na nagpahiling nin interes saka nag-aandam ako sa kada pagdalaw liwat. Nakapagkondukta pa ngani ako kan inot kong Bible study. Mantang mas nagkakaeksperyensiya ako, nagkukusog man an kumpiyansa ko.” Sarong mahusay na regular payunir na ngunyan si Ricardo asin saro na man na ministeryal na lingkod.

10. Sa sarong pangyayari, ano an ginibo ni David bago gumibo nin mahalagang desisyon?

¹⁰ Pag-isipan an saro pang pangyayari sa buhay ni David. Kan siya asin an mga tawuhan niya namumuhay bilang dulag, may pagkakataon kaidto na binayaan ninda an pamilya ninda para sa sarong misyon. Dangan sinalisihan sinda kan kalaban, sinakyada an mga harong ninda asin kinuang bihag an mga pamilya ninda. Dahil batikanong parapakilaban si David, puwede kutang inisip niya na siguradong makakagibo siya nin epektibong estratehiya para mailigtas an mga bihag. Imbes, naghagad siya nin paggiya ki Jehova. Sa tabang kan saserdoteng  si Abiatar, naghapot si David ki Jehova: “Dapat ko daw na lapagon an tropang idto nin mga parasamsam?” Nag-uyon diyan si Jehova asin sinigurado ki David na magigin mapanggana siya. (1 Sam. 30:7-10, NWT) Ano an manunudan mo digdi?

11. Ano an puwede mong gibuhon bago magdesisyon?

¹¹ Bago magdesisyon, maghagad nguna nin sadol. Maghapot sa mga magurang mo. Makakakua ka man nin marahay na sadol kun makonsulta ka sa eksperyensiyadong mga elder. Pinagtitiwalaan ni Jehova an ninombrahan na mga lalaking ini, asin puwede mo man sindang pagtiwalaan. Para ki Jehova, mga “balaog” sinda sa kongregasyon. (Efe. 4:8) Makikinabang ka paagi sa pag-arog sa pagtubod ninda asin sa pagdangog sa madunong na mga suhestiyon ninda. Pag-ulayan ta ngunyan an manunudan ta ki Hading Asa.

12. Igwa nin anong mga kuwalidad si Hading Asa kan magpuon siyang mamahala?

¹² Kan hoben pa si Hading Asa, mapakumbaba siya saka makusog an buot. Halimbawa, kan siya na an hadi kasalida kan saiyang amang si Abias, pinunan niya an kampanya laban sa idolatriya. “Sinabihan man niya an Juda na hanapon si Jehova na Diyos kan saindang mga apuon asin na sunudon an Katugunan asin an mga pagbuot.” (2 Cron. 14:1-7, NWT) Tapos kan sakyadahon kan Etiopeng si Zera an Juda kaiba an saiyang 1,000,000 na suldados, madunong na naghagad nin tabang si Asa ki Jehova, na sinasabi: “O Jehova, bakong problema saimo kun baga dakul o mayong kusog an mga tinatabangan mo. Tabangi kami, O Jehova na samuyang Diyos, huli ta sa saimo kami nananarig.” An magayon na mga tataramon na iyan nagpapahiling na nagtitiwalang marhay si Asa sa kakayahan ni Jehova na iligtas siya asin an saiyang banwaan. Nagtiwala si Asa sa saiyang Ama sa langit, asin “dinaog ni Jehova an mga Etiope.”—2 Cron. 14:8-12, NWT.

13. Ano an nangyari ki Asa pag-abot nin panahon, asin taano?

¹³ Siguradong mauyon ka na talagang makatakot makipaglaban sa 1,000,000 na suldados, pero nagin mapanggana si Asa. Alagad nakakamundo ta kan magkaigwa si Asa nin bakong arog kaiyan kadipisil na problema, dai siya nagkonsulta ki Jehova. Kan pigpapatakot siya kan maraot na hading si Baasa kan Israel, naghagad siya nin tabang sa hadi kan Siria. Maraot nanggad an nagin resulta kaiyan! Paagi sa propetang si Hanani, sinabi ni Jehova ki  Asa: “Huling nagsarig ka sa hadi kan Siria asin dai ka nagsarig ki Jehova na saimong Diyos, nakadulag lugod sa kamot mo an hukbo kan hadi kan Siria.” Sa katunayan, puon kaidto, parati na lang nasa giyera si Asa. (2 Cron. 16:7, 9, NWT; 1 Ha. 15:32) Ano an leksiyon?

14. Paano mo maipapahiling na nagsasarig ka ki Jehova, asin uyon sa 1 Timoteo 4:12, ano an magigin resulta kaiyan?

¹⁴ Magdanay na mapakumbaba asin padagos na magsarig ki Jehova. Kan bawtismuhan ka, makusog an pagtubod saka an pagtitiwala mo ki Jehova. Asin maugmang itinao saimo ni Jehova an pribilehiyong magin parte kan pamilya niya. An kaipuhan mong gibuhon ngunyan iyo na padagos na magsarig ki Jehova. Pag naggigibo nin mahahalagang desisyon sa buhay, tibaad garo baga madalion na magsarig ki Jehova, pero kumusta sa ibang mga pagkakataon? Mahalaga nanggad na magtiwala ki Jehova pag naggigibo nin mga desisyon, kaiba diyan an manungod sa libangan, trabaho, saka mga pasuhan sa buhay! Dai manarig sa sadiri mong kadunungan. Imbes, maghanap nin mga prinsipyo sa Bibliya na makakatabang sa pagdesisyon mo, tapos iaplikar iyan. (Tal. 3:5, 6) Kun gigibuhon mo iyan, mapapaugma mo si Jehova asin makukua mo an respeto kan mga nasa kongregasyon.—Basahon an 1 Timoteo 4:12.   

15. Sa 2 Cronica 18:1-3; 19:2, anong mga sala an nagibo ni Hading Jehosafat?

¹⁵ Siyempre, bako kang perpekto, kaya makakagibo ka nin mga sala. Dawa arog kaiyan, dai iyan dapat makaulang saimo na gibuhon an gabos mong makakaya sa paglilingkod ki Jehova. Pag-isipan an halimbawa ni Hading Jehosafat. Dakul siyang marahayon na kuwalidad. Kan hoben pa siya, “hinanap niya an Diyos kan saiyang ama asin sinunod niya an saiyang pagbuot.” Apuwera kaiyan, nagsugo siya nin mga opisyal para magduman sa mga siyudad kan Juda tanganing tukduan an mga tawo manungod ki Jehova. (2 Cron. 17:4, 7, NWT) Sa ibong kaiyan, nakakagibo siya kun minsan nin bakong marahay na mga desisyon. Sa saro diyan, sinagwi si Jehosafat kan saro sa mga representante ni Jehova. (Basahon an 2 Cronica 18:1-3; 19:2, NWT.) Ano an manunudan mo diyan?

16. Ano an manunudan mo sa eksperyensiya ni Rajeev?

¹⁶ Akuon asin iaplikar an sadol na itinatao saimo. Arog sa dakul na hoben na lalaki, tibaad nasasakitan kang magkaigwa nin tamang mga priyoridad. Dai madisganar. Mangnuhon  an eksperyensiya kan hoben na brother na si Rajeev. Manungod kan panahon na tin-edyer pa siya, sinabi niya: “May mga pagkakataon kaidto na dai ko aram an gigibuhon ko. Arog sa dakul na ibang hoben, mas interesado ako sa sports saka sa paglilibang kisa sa pag-atender sa mga pagtiripon o pagluwas sa ministeryo.” Ano an nakatabang ki Rajeev? Tinawan siya nin sadol nin sarong elder. Sinabi ni Rajeev: “Tinabangan niya ako na masabutan an prinsipyo na nasa 1 Timoteo 4:8.” Mapakumbabang sinunod ni Rajeev an sadol asin pinag-isipan giraray an mga priyoridad niya sa buhay. Sinabi niya: “Nagdesisyon ako na gibuhon na priyoridad an espirituwal na mga pasuhan.” Bilang resulta, sinabi ni Rajeev: “Pakalihis nin pirang taon pagkatapos na itao sako an sadol na iyan, nakuwalipikar ako bilang ministeryal na lingkod.”

17. Ano an namamatian kan mga may edad na sa mga hoben na lalaki na naglilingkod ki Jehova?

¹⁷ Pinapahalagahan na marhay kan mga tugang sa kongregasyon an mga hoben na lalaki na naglilingkod ki Jehova ‘kasaro’ ninda! (Sof. 3:9) Gustong-gusto ninda an saindong kaigutan saka an saindong pagigin ganado asin entusiyastiko sa mga gibuhon na itinatao saindo. Nauugma sinda saindo.—1 Juan 2:14.

18. Arog kan ipinapahiling kan Talinhaga 27:11, ano an namamatian ni Jehova sa mga hoben na lalaki na naglilingkod sa saiya?

¹⁸ Mga hoben na brother, nungkang paglingawan na namumutan asin nagtitiwala sa saindo si Jehova. Ihinula niya na sa huring mga aldaw, magkakaigwa nin sarong hukbo nin mga hoben na lalaki na gikan sa buot na ipepresentar an saindang sadiri. (Sal. 110:1-3) Aram niya na namumutan mo siya asin na gusto mong paglingkudan siya sa bilog mong makakaya. Kaya magin mapasensiya sa iba asin sa saimong sadiri. Pag nakagibo ka nin sala, akuon an pagsasanay saka an disiplina na itinatao saimo, na ibinibilang iyan na hali ki Jehova. (Heb. 12:6) Maigot na gibuhon an ano man na asignasyon na itinatao saimo. Asin an pinakamahalaga, hinguwahon na paugmahon an saimong Ama sa langit sa gabos mong ginigibo.—Basahon an Talinhaga 27:11, NWT.