1-2. Paano ta masisigurado na aakuon ni Jehova an satong pagsamba?

 ANO an naiisip mo pag nadadangog mo an tataramon na “pagsamba”? Tibaad naiimahinar mo an sarong mapakumbabang brother na nakaluhod sa may kataid kan saiyang higdaan mantang udok na namimibi asin sinasabi an laog kan puso niya. O tibaad naiisip mo an sarong pamilya na maugmang nag-aadal nin Bibliya.

² Sa duwang sitwasyon na iyan, gabos sinda naggigibo nin mga akto nin pagsamba. Aakuon daw ni Jehova an saindang pagsamba? Iyo, kun kauyon iyan kan saiyang katuyuhan asin ginigibo iyan nin may pagkamuot asin paggalang. Namumutan tang marhay si Jehova. Aram niyato na maninigo nanggad siyang sambahon, asin gusto ta na an pagsambang itinatao ta sa saiya iyo an pinakamarahay.

3. Ano an pag-uulayan ta sa artikulong ini?

³ Sa artikulong ini, pag-uulayan ta an klase nin pagsamba na inako ni Jehova kan mga panahon kan Bibliya, asin pag-uulayan ta man an walong aspekto nin pagsamba na inaako niya sa ngunyan. Mantang pinag-uulayan ta iyan, puwede tang pag-isipan kun paano ta mismo mapapauswag an kalidad kan satong pagsamba. Rerepasuhon ta man an mga dahilan kun taano ta nakakapaugma sa sato an tunay na pagsamba.

4. Paano ipinahiling kan mga parasamba ni Jehova kan mga panahon bago kan mga Kristiyano an saindang paggalang saka pagkamuot ki Jehova?

⁴ Kan mga panahon bago kan mga Kristiyano, ipinahiling kan maimbod na mga lalaking arog ni Abel, Noe, Abraham, saka Job an saindang  paggalang saka pagkamuot ki Jehova. Paano? Paagi sa saindang pagkamasinunod, pagtubod, saka mga pagsasakripisyo. Dai sinasabi kan Bibliya an gabos na detalye manungod sa kun ano kutana an dapat na ginibo ninda sa pagsamba ki Jehova. Pero malinaw na ginibo ninda an saindang pinakamakakaya para tawan nin onra si Jehova, asin inako niya an saindang pagsamba. Dangan itinao ni Jehova sa mga gikan ni Abraham an Katugunan ni Moises. Kaiba sa Katugunan an espesipikong mga instruksiyon kun paano sasambahon si Jehova sa paaging inuuyunan niya.

5. Ano an nagin pagbabago sa tunay na pagsamba pagkatapos na magadan asin buhayon liwat si Jesus?

⁵ Pagkatapos na magadan asin buhayon liwat si Jesus, dai na hinahagad ni Jehova sa mga tawo na sunudon an Katugunan ni Moises. (Roma 10:4) Sarong bagong katugunan an kaipuhan nang sunudon kan mga Kristiyano, “an katugunan kan Cristo.” (Gal. 6:2) Masusunod ninda an “katugunan” na ini, bako paagi sa pagtuom kaiyan asin pagsunod sa halabang listahan nin mga dapat asin dai dapat gibuhon, kundi paagi sa pag-arog sa halimbawa ni Jesus asin pagsunod sa saiyang mga katukduan. Sa ngunyan man, ginigibo kan mga Kristiyano an saindang pinakamakakaya na sunudon an Cristo para mapaugma si Jehova asin tanganing ‘maginhawahan’ sinda.—Mat. 11:29.

6. Paano kita makikinabang sa artikulong ini?

⁶ Mantang pinag-uulayan ta an lambang aspekto kan satong pagsamba, haputon an saimong sadiri, ‘Anong pag-uswag an nagibo ko na sa bagay na ini?’ O puwede mo man ihapot, ‘Mapapauswag ko pa daw an kalidad kan sakong pagsamba?’ Puwede mo nanggad na ikaugma an mga pag-uswag na nagibo mo, pero kaipuhan mo man na may pagpamibing pag-isipan kun igwa ka nin ano man na kaipuhan pang pauswagon.

7. Paano minamansay ni Jehova an satong udok sa pusong mga pamibi?

⁷ Sinasamba ta si Jehova pag namimibi kita sa saiya. Ikinumparar kan Kasuratan an satong mga pamibi sa inandam na marhay na insenso na idinudulot kaidto sa tabernakulo asin kan huri sa templo. (Sal. 141:2) An insensong iyan nagtatao nin mahamot na parong na nakakapaugma sa Diyos. Sa kaagid na paagi, an satong udok sa pusong mga pamibi “nakakapaugma” sa saiya, dawa pa kun iyan simple sanang mga tataramon. (Tal. 15:8; Deu. 33:10) May marahay na dahilan kita para magtubod na nauugma si Jehova na madangog kita na sinasabi sa saiya na namumutan ta siya saka na nagpapasalamat kita saiya. Gusto niya na sabihon ta sa saiya an satong mga ikinakahadit, mga linalauman, saka an satong mga minamawot. Kaya bago magdulok ki Jehova sa pamibi, magayon kun pag-iisipan mo ngunang marhay an mga sasabihon mo sa saiya. Sa paggibo kaiyan, makakapagdulot ka nin pinakamarahay na “insenso” sa saimong Ama sa langit.

8. Anong marahayon na oportunidad an igwa kita para umawon an Diyos?

⁸ Sinasamba ta si Jehova pag inuumaw ta siya. (Sal. 34:1) Inuumaw ta si Jehova paagi sa pagsabi sa iba kun gurano ta namumutan asin hinahangaan an mga kuwalidad saka mga gibo niya. An pag-umaw minagikan sa mapagpasalamat na puso. Kaya kun matao kita nin panahon para hurop-hurupon an karahayan ni Jehova—an gabos na ginibo niya para sa sato—dai kita mauubusan nin dahilan para umawon siya. An gibuhon na paghuhulit nagtatao sato nin marahayon na oportunidad na “magdulot sa Diyos nin atang nin pag-umaw, an buot sabihon, an bunga kan satuyang mga ngabil.” (Heb. 13:15) Kun paanong dapat tang pag-isipan na marhay an mga sasabihon ta bago magdulok ki Jehova sa pamibi, magayon na pag-isipan ta man na marhay an mga sasabihon ta sa mga makakaulay niyato sa ministeryo. Gusto niyato na an pinakamarahay na “atang nin pag-umaw” an maitao ta. Kaya entusiyastiko kita pag ipinapakipag-ulay ta sa iba an katotoohan.

9. Arog kan suanoy na mga Israelita, paano kita nakikinabang sa pag-atender sa mga pagtiripon? Magtao nin halimbawa kun paano ka nakinabang sa mga pagtiripon.

 ⁹ Sinasamba ta si Jehova pag nag-aatender kita sa mga pagtiripon. Pinagbutan an suanoy na mga Israelita: “Tulong beses kada taon, an gabos na lalaki sa saindo dapat na umatubang ki Jehova na saimong Diyos sa lugar na pipilion niya.” (Deu. 16:16) Huli kaiyan, kaipuhan nindang bayaan an saindang harong saka mga pananom na warang bantay. Pero nanuga sainda si Jehova: “Mayo nin siisay man an mapurbar na sakupon an saimong daga mantang nagtutukad ka tanganing umatubang ki Jehova na saimong Diyos.” (Exo. 34:24) Huling lubos na nagtiwala ki Jehova an may takot sa Diyos na mga Israelitang idto, regular sindang nag-atender sa taunan na mga kapiyestahan. Kaya nag-ako sinda nin dakul na bendisyon; napahiwas ninda an saindang pakasabot sa Katugunan nin Diyos, nakapaghurop-hurop sa saiyang karahayan, asin nagkaigwa nin maugmang pakikiasosyar sa mga kapagtubod ninda. (Deu. 16:15) Nag-aako man kita nin arog kaiyan na mga bendisyon pag naggigibo kita nin mga pagsasakripisyo para makaatender sa Kristiyanong mga pagtiripon. Asin isipa kun gurano kaugma si Jehova pag sa pag-atender ta may inandam kitang halipot asin makahulugan na mga komento.

10. Taano ta an pagkanta mahalagang kabtang kan satong pagsamba?

¹⁰ Sinasamba ta si Jehova pag nagkakanta kita kaiba kan mga tugang. (Sal. 28:7) Para sa mga Israelita, an pagkanta mahalagang kabtang kan saindang pagsamba. Nag-asignar kaidto si Hading David nin 288 Levita para magin mga parakanta sa templo. (1 Cron. 25:1, 6-8) Sa ngunyan, maipapahayag ta man an satong pagkamuot sa Diyos pag nagkakanta kita nin mga kanta nin pag-umaw. Dai man kaipuhan na magin mahusay kitang mga parakanta para magibo iyan. Pag-isipan ini: Pag nagtataram kita, “gabos . . . kita napapasala nin dakul na beses,” pero dai iyan nakakapugol sa sato na magtaram sa kongregasyon saka sa ministeryo. (Sant. 3:2) Sa kaagid na paagi, dai ta dapat pagtugutan na makapugol sa sato na magkanta nin mga pag-umaw ki Jehova an pakamati ta na bakong magayon an boses ta.

11. Arog kan sinasabi sa Salmo 48:13, taano ta dapat kitang magkaigwa nin iskedyul sa pag-adal nin Bibliya bilang pamilya?

¹¹ Sinasamba ta si Jehova pag pinag-aadalan ta an saiyang Tataramon asin tinutukduan an satong mga aki manungod saiya. An Sabbath nagtao sa mga Israelita nin oportunidad na magpahingalo nguna sa saindang pang-aroaldaw na mga gibuhon tanganing gamiton an aldaw na iyan sa pagpapakusog kan saindang relasyon ki Jehova. (Exo. 31:16, 17) Tinukduan kan maimbod na mga Israelita an saindang mga aki manungod ki Jehova asin sa saiyang karahayan. Sa ngunyan, kaipuhan ta man na magkaigwa nin iskedyul sa pagbasa asin pag-adal kan Tataramon nin Diyos. Kabtang ini kan satong pagsamba ki Jehova, asin nakakatabang iyan sato na mas maparani sa saiya. (Sal. 73:28) Asin pag iriba kitang nag-aadal bilang sarong pamilya, puwede tang matabangan an bagong henerasyon—an satong mga aki—na magkaigwa nin dayupot na relasyon sa satong mamumuton na Ama sa langit.—Basahon an Salmo 48:13.

12. Ano an manunudan ta sa kun paano minansay ni Jehova an trabaho kan mga naggibo nin mga kasangkapan sa tabernakulo?

¹² Sinasamba ta si Jehova mantang nagtatabang kita sa pagtugdok asin pagmentenar kan mga lugar nin pagsamba. Sinasabi kan Bibliya na an paggibo nin tabernakulo asin kan mga kasangkapan kaiyan sarong “banal na gibuhon.” (Exo. 36:1, 4) Sa ngunyan, ibinibilang man ni Jehova na sagradong paglilingkod an pagtugdok nin mga Kingdom Hall asin iba pang teokratikong mga pasilidad. May mga brother asin sister na naggagamit nin dakul na panahon para magtabang sa mga gibuhon na iyan. Bako daw na pinapahalagahan tang marhay an saindang  mahalagang kontribusyon sa gibuhon na pang-Kahadian? Asin siyempre, naghuhulit man sinda. Tibaad an nagkapira sainda gusto pa nganing magpayunir. Maipapahiling kan mga elder an saindang suporta sa mga gibuhon na pagtugdok kun dai sinda mag-aalangan na aprubaran an mahihigos na mga tugang na ini bilang payunir kun kuwalipikado sinda. May kakayahan man kita sa pagtugdok o mayo, gabos kita puwedeng makatabang sa pagpapadanay kan mga pasilidad na malinig asin nasa marahay na kondisyon.

13. Ano an dapat na magin pagmansay niyato sa mga donasyon na itinatao ta para suportaran an gibuhon na pang-Kahadian?

¹³ Sinasamba ta si Jehova pag sinusuportaran ta an gibuhon na pang-Kahadian paagi kan satong mga donasyon. An mga Israelita dai minaatubang ki Jehova na mayo lamang nin dara. (Deu. 16:16) Dapat sindang magdara nin materyal na regalo sigun sa saindang kamugtakan. Paagi kaini, ipinapahiling ninda an saindang pagpapahalaga sa gabos na ginibo ni Jehova para makinabang sinda sa espirituwal. Paano ta man maipapahiling an satong pagkamuot ki Jehova saka an satong pagpapahalaga sa espirituwal na mga probisyon na naaako ta? An sarong paagi iyo an pagtao nin pinansiyal na suporta sa satong kongregasyon asin sa pambilog na kinaban na gibuhon sigun sa itinutugot kan satong kamugtakan. Arog kaini an pagkasabi ni apostol Pablo manungod diyan: “Kun an pagigin andam yaon na, mas lalo nang kawili-wili an pagtao sigun sa kun ano an igwa an sarong tawo, bakong sigun sa kun ano an mayo an sarong tawo.” (2 Cor. 8:4, 12) Pinapahalagahan ni Jehova an satong gikan sa buot na mga donasyon, ano man iyan asin gurano man iyan kasadit.—Mar. 12:42-44; 2 Cor. 9:7.

14. Uyon sa Talinhaga 19:17, paano ni Jehova minamansay an tabang na itinatao ta sa satong mga tugang na nangangaipo?

¹⁴ Sinasamba ta si Jehova pag tinatabangan ta an satong mga kapwa Kristiyano na nangangaipo. Nanuga si Jehova na babalusan niya an mga Israelita na bukas-palad sa mga pobre. (Deu. 15:7, 10) Iyo, sa kada pagtabang niyato sa satong mga kapwa parasamba na nangangaipo, minamansay iyan ni Jehova na regalo ta sa Saiya. (Basahon an Talinhaga 19:17.) Halimbawa, kan an mga Kristiyano sa Filipos nagpadara nin regalo sa nakapresong si Pablo, inapod niya iyan na “akseptableng atang na nakakapaugma sa Diyos.” (Fil. 4:18) Isipon an mga kakongregasyon mo asin haputon an saimong sadiri, ‘Siisay daw an puwede kong tabangan?’ Nauugma si Jehova pag nahihiling niya na ginagamit ta an satong panahon, kusog, kakayahan, saka materyal na mga bagay para tabangan an mga nangangaipo. Ibinibilang niya iyan na kabtang kan satong pagsamba.—Sant. 1:27.

15. Dawa ngani nangangaipo nin panahon saka paghihinguwa an tunay na pagsamba, taano ta bako iyan pagabat?

¹⁵ An tunay na pagsamba nangangaipo nin panahon asin paghihinguwa. Pero bako iyan pagabat. (1 Juan 5:3) Taano? Sinasamba ta kaya si Jehova huling namumutan ta siya. Imahinaron an sarong sadit na aki na may gustong itao sa saiyang ama. Nagdrowing siya asin tibaad haloy na oras niyang ginibo iyan. Dai nanghinayang an aki sa oras na ginamit niya para diyan. Namumutan niya an saiyang ama, asin maugma siyang iregalo an pigdrowing niya. Sa kaagid na paagi, huling namumutan ta si Jehova, maugma kita na itao an satong panahon saka kusog tanganing sambahon siya.

16. Uyon sa Hebreo 6:10, paano minamansay ni Jehova an paghihinguwa kan kada saro sa sato na paugmahon siya?

¹⁶ An mamumuton na mga magurang dai nag-aasa na parareho an maitataong regalo kan kada saro sa mga aki ninda. Aram ninda na magkakalain an lambang aki saka an saindang kakayahan. Sa kaagid na paagi, nasasabutan kan satong Ama sa langit kun ano an makakaya kan kada saro sa  sato. Tibaad mas dakul kang nagigibo kumpara sa mga kabisto mo saka sa saimong mga namumutan. O tibaad dai mo nagigibo an arog kan nagigibo kan iba, posibleng huli sa saimong edad, salud, o mga responsabilidad sa pamilya. Dai madisganar. (Gal. 6:4) Dai lilingawan ni Jehova an saimong mga ginibo. Kun ginigibo mo an saimong pinakamakakaya na may tamang motibo, ikakaugma niya iyan. (Basahon an Hebreo 6:10.) Nahihiling ni Jehova dawa an mga intensiyon kan saimong puso. Gusto niya na magin maugma ka asin kontento sa pagsamba mo sa saiya.

17. (a) Pag nasasakitan kita sa nagkapira sa mga aspekto kan satong pagsamba, ano an mga puwede tang gibuhon? (b) Paano nakatabang saimo an saro sa mga aspekto nin pagsamba na mahihiling sa kahon na “ Magin Mas Maugma”?

¹⁷ Paano kun nasasakitan kita sa nagkapira sa mga aspekto kan satong pagsamba, arog kan personal na pag-adal o paghuhulit? Posibleng marhay na mahiling ta na mantang mas parati tang ginigibo an mga aktibidad na iyan, mas ikakaugma ta man iyan saka mas makikinabang kita diyan. Puwede tang ikumparar an satong pagsamba sa sarong aktibidad, arog baga kan pag-ehersisyo o sa pagpraktis sa pagtugtog nin sarong instrumento sa musika. Kun bihira ta iyan na gigibuhon, puwedeng dai kita mag-uswag na marhay. Pero paano pag iiniba ta na iyan sa satong pang-aroaldaw na rutina? Tibaad sa primero halipot na oras lang, sagkod na padiit-diit mas huruhalawig na. Pag nahihiling ta an magayon na mga resulta kan satong mga paghihinguwa, posibleng marhay na hahanap-hanapon ta na iyan saka talagang ikakaugma ta iyan. Nahihiling mo daw kun paano ta puwedeng iaplikar ini sa satong pagsamba?

18. Paano ta mauutob an katuyuhan kan satong buhay, asin ano an mga resulta kaiyan?

¹⁸ Inuutob ta an mismong katuyuhan kan satong buhay pag sinasamba ta si Jehova nin bilog na puso. Dahil diyan, nagkakaigwa kita nin maugma saka nakakakontentong buhay asin nin paglaom na sambahon si Jehova nin daing katapusan. (Tal. 10:22) Igwa kita nin katuninungan nin isip huling aram ta na tinatabangan ni Jehova an saiyang mga parasamba pag nag-aagi sinda nin mga problema. (Isa. 41:9, 10) May marahayon nanggad kitang mga dahilan na magin maugma mantang sinasamba ta an satong mamumuton na Ama, na maninigo nanggad “na mag-ako kan kamurawayan asin kan onra” hali sa gabos na linalang niya!—Kap. 4:11.