1-2. Sigun sa 1 Pedro 4:7, 8, ano an makakatabang sa sato na makayanan an grabeng mga kadipisilan?

MANTANG lalo kitang nagrarani sa katapusan kan “huring mga aldaw,” tibaad makaeksperyensiya kita nin grabeng mga kadipisilan. (2 Tim. 3:1) Halimbawa pagkatapos kan eleksiyon sa sarong nasyon sa sulnupan na Aprika, nagkaigwa nin kariribukan sa sosyedad asin mga rayot. Sa laog nin labing anom na bulan, nagin peligroso para sa mga tugang an sitwasyon huling nasa lugar sinda kan kariribukan. Ano an nakatabang sa sainda na makayanan an mga kadipisilan na iyan? An pira sa sainda nakidagos nguna sa harong nin mga tugang na nakaistar sa mas ligtas na lugar. Sinabi nin sarong brother: “Sa arog kaiyan na sitwasyon, nagpapasalamat ako na kaibanan ko an mga amigo ko. Napakusog mi an lambang saro.”

² Pag nagpuon na an “grabeng kasakitan,” magpapasalamat kita na igwa kita nin marahay na mga amigo na namumutan kita. (Kap. 7:14) Kaya mahalagang pakusugon na niyato ngunyan an pakikiamigo sa mga tugang. (Basahon an 1 Pedro 4:7, 8.) Dakul kitang manunudan sa eksperyensiya ni Jeremias. Tinabangan siya kan dayupot niyang mga amigo na makatagal kan panahon na madali nang laglagon an Jerusalem. * Paano niyato maaarog si Jeremias?

3. (a) Ano kuta an puwedeng magin dahilan para mamuhay nin solo si Jeremias? (b) Ano an ipinahayag ni Jeremias sa saiyang sekretaryong si Baruc, asin ano an resulta?

³ Sa laog nin 40 taon o labi pa, bakong maimbod na mga tawo an nakapalibot ki Jeremias, kaiba diyan an mga pagtaraid niya asin  posibleng pirang kapamilya sa ginikanan niyang banwaan na Anatot. (Jer. 11:21; 12:6) Dawa arog kaiyan, dai man siya namuhay nin solo. Sa katunayan, ipinahayag niya sa saiyang maimbod na sekretaryong si Baruc an mga namamatian niya asin naaraman ta man iyan. (Jer. 8:21; 9:1; 20:14-18; 45:1) Maiimahinar ta nanggad na mantang isinusurat ni Baruc an mga pangyayari sa buhay ni Jeremias, mas nagkusog an pagkamuot asin respeto ninda sa lambang saro.—Jer. 20:1, 2; 26:7-11.

4. Ano an ipinagibo ni Jehova ki Jeremias, asin paano ini nakapakusog sa pagigin mag-amigo ninda ni Baruc?

⁴ Sa laog nin dakul na taon, kusog-buot na pinatanidan ni Jeremias an mga Israelita manungod sa mangyayari sa Jerusalem. (Jer. 25:3) Tanganing enkaminaron giraray an banwaan na magsulsol, ipinasurat ni Jehova ki Jeremias an Saiyang mga patanid sa sarong rolyo. (Jer. 36:1-4) Mantang magkaibanan na ginigibo ni Jeremias asin Baruc an asignasyon na ini hali sa Diyos, na posibleng nagpadagos nin nagkapirang bulan, siguradong nagkaigwa sinda nin nakakapakusog sa pagtubod na mga pag-uulay.

5. Paano pinatunayan ni Baruc na marahay siyang amigo ni Jeremias?

⁵ Kan panahon na para ihayag an laog kan rolyo, kinaipuhan ni Jeremias na ipagkatiwala sa amigo niyang si Baruc an pagpaabot kan mensahe. (Jer. 36:5, 6) Kusog-buot na inutob ni Baruc an peligrosong asignasyon niya. Siguradong naugmang marhay si Jeremias kan nagduman si Baruc sa patyo kan templo asin ginibo an ipinapagibo sa saiya! (Jer. 36:8-10) Nabaretaan kan mga pamayo kan Juda an ginibo ni Baruc, asin ipinagbuot ninda sa saiya na basahon nin makusog sa sainda an rolyo! (Jer. 36:14, 15) Nagdesisyon an mga pamayo na sabihon ki Hading Jehoiakim an sinabi ni Jeremias. Mapagmalasakit nindang sinabi ki Baruc: ‘Magtago kamo ni Jeremias. Dai nindo ipagpaisi maski kiisay kun hain kamo.’ (Jer. 36:16-19, An Marahay na Bareta Biblia) Marahay na sadol nanggad iyan!

6. Ano an nagin reaksiyon ni Jeremias asin Baruc sa pagkontra?

 ⁶ Angguton si Hading Jehoiakim kan madangog niya an mga tataramon na isinurat ni Jeremias kaya sinulo niya an rolyo asin ipinagbuot na arestaron si Jeremias saka si Baruc. Pero dai natakot si Jeremias. Nagkua siya nin saro pang rolyo, itinao iyan ki Baruc, asin mantang idinidikta ni Jeremias an mensahe ni Jehova, isinurat ni Baruc an ‘gabos na tataramon na nasa inot na rolyo na sinulo ni Hading Jehoiakim kan Juda.’—Jer. 36:26-28, 32, An Banal na Biblia.

7. Ano an posibleng marhay na nangyari mantang magkaibanan na nagtatrabaho si Jeremias asin Baruc?

⁷ Sa parati, nagigin mas dayupot an mga tawong magkaibanan na nagtatagal nin kadipisilan. Kaya posibleng marhay na mantang magkaibanan na nagtatrabaho si Jeremias asin Baruc para ribayan an rolyong sinulo kan maraot na hading si Jehoiakim, mas namidbid ninda an lambang saro asin nagin mas dayupot na mag-amigo. Ano an mga manunudan niyato sa halimbawa kan duwang maimbod na lalaking ini?

8. Ano an tibaad makaulang sa sato para magkaigwa nin dayupot na mga amigo, asin taano ta dai kita dapat magsuko?

⁸ Puwede kitang madipisilan na sabihon sa iba an namamatian niyato kun nakulgan na kita kaidto. (Tal. 18:19, 24) O tibaad iniisip niyato na mayo kitang panahon asin kusog para patalubuon an haraning relasyon sa iba. Pero dai kita dapat magsuko. Kun gusto niyatong tabangan kita kan satong mga tugang pag may mag-abot na mga kadipisilan, dapat na pagtiwalaan na niyato sinda ngunyan kan satong mga iniisip saka namamatian. Mahalagang lakdang iyan para magin tunay kamong mag-amigo.—1 Ped. 1:22.

9. (a) Paano ipinahiling ni Jesus na nagtitiwala siya sa saiyang mga amigo? (b) Taano ta an pagsabi sa iba kan iniisip asin namamatian mo nakakatabang na magkaigwa ka nin dayupot na mga amigo? Magtao nin halimbawa.

⁹ Ipinahiling ni Jesus na nagtitiwala siya sa saiyang mga amigo paagi sa pagigin onesto pag nakikipag-ulay sa sainda. (Juan 15:15) Maaarog niyato siya paagi sa pagsabi sa satong mga amigo kan mga bagay na ikinakaugma, ikinakahadit, o ikinakadisganar ta. Maghinanyog na marhay sa nakikipag-ulay sa saimo, asin tibaad maaraman mo na dakul palan kamong pagkakapareho sa saindong mga iniisip, namamatian, saka mga plano sa buhay. Pag-isipan an halimbawa kan 29 anyos na sister na si Cindy. Nakipag-amiga siya sa 67 anyos na payunir na si Marie-Louise. Kada Huwebes nin aga, magkaibanan si Cindy asin Marie-Louise sa ministeryo, asin dai sinda nag-aalangan sa lambang saro na pag-ulayan an dapit sa manlain-lain na bagay. Sinabi ni Cindy, “Nauugma ako pag nakikipag-ulay ako sa mga amigo ko manungod sa mahalagang mga bagay dahil nakakatabang ini sa sako na mas mabisto saka mas masabutan sinda.” Nagkukusog an relasyon nin mag-amigo kun sinasabi  ninda sa kada saro an iniisip asin namamatian ninda. Arog ni Cindy, kun ika an nag-iinot na makipag-ulay sa iba sa mainamigo asin sinserong paagi, posibleng marhay na magkukusog an saindong pagigin mag-amigo.—Tal. 27:9.

10. Sigun sa Talinhaga 27:17, ano an puwedeng magin resulta pag kaibanan tang naglilingkod an satong mga tugang?

¹⁰ Arog kan halimbawa ni Jeremias asin Baruc, pag kaibanan tang naglilingkod an satong mga tugang asin nahihiling ta mismo an magagayon nindang kuwalidad, nakakanuod kita sa sainda asin nagigin mas dayupot kita sa sainda. (Basahon an Talinhaga 27:17.) Halimbawa, ano an mamamatian mo pag nasa ministeryo ka tapos an amigo mo kusog-buot na ipinapaliwanag an saiyang pagtubod o nagtataram na may kumbiksiyon manungod ki Jehova asin sa saiyang katuyuhan? Posibleng marhay na mas mapaparani ka saiya.

11-12. Magtao nin halimbawa kun paanong an paghuhulit kaiba an mga tugang nakakatabang na kumusog an satong pakikiamigo sa sainda.

¹¹ Pag-isipan an duwang halimbawa na nagpapahiling kun paano kita nagigin dayupot sa satong mga tugang pag nakakaibanan ta sinda sa ministeryo. Inagda ni Adeline, sarong 23 anyos na sister, an saro sa saiyang amigo na si Candice, na ibanan siyang maghulit sa teritoryong bihirang magibo. “Gusto ming magin mas maigot saka mas ikaugma an paghuhulit,” an sabi niya. “Kaipuhan mi pareho nin makakapakusog samo.” Paano sinda nakinabang sa paglilingkod na magkaibanan? “Sa katapusan kan kada aldaw,” an sabi ni Adeline, “pinag-uulayan mi an namamatian mi, kun ano an nakapakusog samo sa mga pakikipag-ulay mi sa mga tawo, saka kun paano mi namatian an paggiya ni Jehova sa samong ministeryo. Ikinaugma mi an makahulugan na mga pag-uulay na ini asin mas lalo mi pang namidbid an kada saro.”

¹² Si Laïla asin Marianne, duwang daragang sister na taga France, naghulit sa laog nin limang semana sa Bangui, an matawong kabisera kan Central African Republic. Sinabi ni Laïla: “Nakaeksperyensiya kami ni Marianne nin mga kadipisilan, pero dahil sa marahay na komunikasyon saka tunay na pagkamuot sa lambang saro, nagin mas dayupot kaming mag-amiga. Mantang nahihiling ko an pagigin madaling makibagay ni Marianne, an pagkamuot niya sa mga tawo duman, saka an saiyang kaigutan sa ministeryo, mas lalo ko siyang hinangaan.” Dai mo man kaipuhan na magduman  sa ibang nasyon para maeksperyensiyahan an mga pakinabang na ini. Sa kada paghulit mo sa saindong teritoryo kapartner an sarong tugang, oportunidad iyan na mas mamidbid mo siya asin pakusugon an saindong pagigin mag-amigo.

13. Ano kun minsan an naririsa ta pag kaibanan tang nagtatrabaho an satong mga amigo?

¹³ Kun minsan, pag kaibanan tang nagtatrabaho an satong mga amigo, naririsa ta bako sana an marahay na mga kuwalidad ninda kundi pati man an mga kaluyahan ninda. Ano an makakatabang sato na magdanay na dayupot sa satong mga amigo sa ibong kan mga pagkukulang ninda? Pag-isipan giraray niyato an halimbawa ni Jeremias. Ano an nakatabang saiya na hilingon an marahay na mga kuwalidad kan iba asin palampason an saindang mga pagkukulang?

14. Ano an nanudan ni Jeremias ki Jehova, asin paano ini nakatabang sa saiya?

¹⁴ Si Jeremias an nagsurat kan libro na inginaran sa saiya, asin posibleng marhay na siya man an nagsurat kan mga libro sa Bibliya na 1 asin 2 Hadi. Siguradong nakatabang sa saiya an asignasyon na iyan na mas mahiling kun gurano kamahihirakon si Jehova sa bakong perpektong mga tawo. Halimbawa, aram niya na kan magsulsol si Hading Ahab sa maraot na mga ginibo kaini, sinabi ni Jehova na dai Niya ipapaabot an kapahamakan sa bilog na pamilya kan hadi mantang nabubuhay pa ini. (1 Ha. 21:27-29) Sa kaagid na paagi, aram ni Jeremias na kumpara ki Ahab, mas grabe pa an pagkakasala ni Manases ki Jehova. Dawa arog kaiyan, pinatawad ni Jehova si Manases huling nagsulsol ini. (2 Ha. 21:16, 17; 2 Cron. 33:10-13) Siguradong nakatabang ki Jeremias an mga istoryang iyan na maarog an pagpapasensiya asin pagkahirak nin Diyos sa saiya mismong pagtrato sa dayupot niyang mga amigo.—Sal. 103:8, 9.

15. Paano inarog ni Jeremias an pagpapasensiya ni Jehova kan mawara an pokus ni Baruc?

¹⁵ Pag-isipan kun paano trinato ni Jeremias si Baruc kan temporaryong mawara an pokus kaini sa saiyang asignasyon. Imbes na isipon tulos na dai na mabago an saiyang amigo, tinabangan ni Jeremias si Baruc paagi sa pagsabi digdi kan mabuot pero prangkang mensahe nin Diyos. (Jer. 45:1-5) Ano an mga manunudan ta sa istoryang ini?

16. Sigun sa Talinhaga 17:9, ano an kaipuhan niyatong gibuhon tanganing pirmi kitang magin dayupot sa satong mga amigo?

¹⁶ An totoo, dai kita makakaasa nin pagkaperpekto sa satong mga tugang. Kaya pag nagkaigwa na kita nin dayupot na mga amigo, kaipuhan niyatong pagmaigutan na mapagdanay an relasyon niyato sa sainda. Kun makagibo nin sala an satong mga amigo, tibaad kaipuhan ta sindang tawan nin mabuot pero prangkang konseho na basado sa Tataramon nin Diyos. (Sal. 141:5) Asin kun makulgan ninda kita, kaipuhan na patawadon ta sinda. Pag pinatawad ta na sinda, dapat na likayan niyatong ungkaton iyan. (Basahon an Talinhaga 17:9.) Mahalagang marhay nanggad lalo na sa delikadong mga panahon na ini na magpokus kita sa marahay na mga kuwalidad kan satong mga tugang imbes na sa mga kaluyahan ninda! Nakakapakusog iyan sa relasyon niyato sa sainda, asin kakaipuhanon niyato an dayupot na mga amigo sa panahon kan grabeng kasakitan.

17. Paano pinatunayan ni Jeremias na saro siyang tunay na amigo sa masakit na mga panahon?

¹⁷ Pinatunayan ni propeta Jeremias na siya sarong tunay na amigo sa masakit na mga panahon. Halimbawa, pagkatapos na iligtas si Jeremias kan opisyal nin palasyo na si Ebed-melec sa siyertong kagadanan sa sarong malaboy na bubon, natakot si Ebed-melec na tibaad kulgan siya kan mga pamayo kan Juda. Kan maaraman iyan ni Jeremias, dai siya nagdanay na silensiyo, na iniisip na makakaya man iyan na atubangon kan saiyang amigo. Dawa nakapreso si Jeremias, ginibo niya an magigibo niya paagi sa pagsabi sa amigo niyang si Ebed-melec kan dapit sa nakakarangang panuga ni Jehova.—Jer. 38:7-13; 39:15-18.

18. Sigun sa Talinhaga 17:17, ano an dapat tang gibuhon pag nag-aagi nin kasakitan an satong amigo?

 ¹⁸ Ngunyan, manlain-lain na kasakitan an naeeksperyensiyahan kan satong mga tugang. Halimbawa, dakul an nagsasakit huli sa mga kalamidad, arog nin mga linog o giyera. Pag may mangyaring arog kaiyan, tibaad an nagkapira sa sato puwedeng padaguson sa satong harong an mga amigong ini. An iba tibaad puwedeng tumabang sa pinansiyal. Pero gabos kita puwedeng mamibi ki Jehova na tabangan niya an satong mga tugang. Kun maaraman niyatong pinangluluyahan nin buot an sarong tugang, tibaad dai ta aram kun ano an sasabihon o gigibuhon. Pero gabos kita puwedeng makatabang. Halimbawa, puwede kitang magtao nin panahon para makaibanan siya. Puwede ta siyang dangugon na may pakikidamay pag may sinasabi siya sa sato. Asin puwede man niyatong sabihon sa saiya an sarong nakakarangang teksto na paborito niyato. (Isa. 50:4) An pinakamahalaga iyo na yaon ka para sa mga amigo mo pag kaipuhan ka ninda.—Basahon an Talinhaga 17:17. *

19. Paanong an pagpakusog niyato ngunyan sa relasyon niyato bilang mag-aramigo makakatabang sa sato sa maabot na panahon?

¹⁹ Dapat na magin determinado kita ngunyan na pakusugon asin pagdanayon an satong dayupot na relasyon sa mga tugang. Taano? Huling pupurbaran kan satong mga kaiwal na magkabaranga kita paagi sa mga kaputikan. Hihinguwahon ninda na pag-iriwalon kita. Pero dai ninda iyan magigibo. Dai ninda kayang putulon an satong bugkos nin pagkamuot. Dai ninda mararaot an pagigin mag-aramigo niyato. Sa katunayan, an pagigin mag-aramigo niyato magdadanay bako sanang sagkod sa katapusan kan sistemang ini kundi sagkod lamang!