1-2. Paano ta masusunod an sadol na nasa Talinhaga 4:25? Magtao nin halimbawa.

IMAHINARA an minasunod na senaryo. Sarong may edad nang sister an iniisip-isip an maugmang mga nakaagi niya. Dawa ngani mas dipisil an saiyang buhay ngunyan, padagos niyang ginigibo an bilog niyang makakaya para ki Jehova. (1 Cor. 15:58) Kada aldaw iniimahinar niya an saiyang sadiri na kaibanan an saiyang mga mahal sa buhay sa ipinanugang bagong kinaban. Nagigirumduman nin sarong sister kun paano siya nakulgan nin sarong kapagtubod, pero nagdesisyon siya na dai na maghinanakit. (Col. 3:13) Nagigirumduman nin sarong brother an nagibo niyang mga sala kaidto pero nagpopokus siya sa kun paano siya magdadanay na maimbod ki Jehova ngunyan.—Sal. 51:10.

² Ano an pagkakapareho kan tulong Kristiyanong iyan? Gabos sinda nagigirumduman an saindang nakaagi, pero bako sinda diyan nagpopokus. Imbes, ‘nakahiling sinda nin diretso’ sa puturo.—Basahon an Talinhaga 4:25. *

3. Taano ta kaipuhan tang “maghiling nin diretso” sa puturo?

³ Taano ta mahalaga na “maghiling nin diretso” sa puturo? Kun paanong dai makakalakaw nin diretso an sarong tawong nagpaparasalingoy sa likudan, dai man kita makakapagpadagos sa paglilingkod ki Jehova kun nagpaparapokus kita sa nakaagi.—Luc. 9:62.

4. Ano an pag-uulayan ta sa artikulong ini?

⁴ Sa artikulong ini, pag-uulayan ta an tulong siod na puwedeng magin dahilan na magparapokus kita sa nakaagi. * Iyan an:  (1) paghidaw, (2) paghinanakit, asin (3) sobrang pagkakonsiyensiya. Sa kada saro kaiyan, mahihiling ta kun paano makakatabang sato an mga prinsipyo sa Bibliya na dai magparapokus sa “mga bagay sa likudan,” kundi magpokus sa “mga bagay sa inutan.”—Fil. 3:13.

5. Sa anong siod kita pinapatanidan kan Parahulit 7:10?

⁵ Basahon an Parahulit 7:10. * Risaha na dai man sinasabi kan bersikulong ini na salang ihapot: “Taano ta marahay an nakaaging mga aldaw?” Dahil an magagayon na eksperyensiyang nagigirumduman ta regalo hali ki Jehova. Imbes, mababasa ta sa bersikulo: “Dai ka magsabi, ‘Taano ta an nakaaging mga aldaw mas marahay kisa sa mga ini?’” An buot sabihon, an siod iyo an pagkumparar kan buhay ta kaidto sa buhay ta ngunyan asin an pag-isip na mas maraot an kamugtakan ta ngunyan. Ini an pagkatradusir sa bersikulong ini kan sarong bersiyon nin Bibliya: ‘Hare pagsabi: “Tadaw ta mas marahay kaidtong panahon kisa ngunyan?” Ta bakong madunong an hapot na iyan.’

6. Taano ta bakong madunong na pagparaisipon na mas marahay an buhay ta kaidto? Magtao nin halimbawa.

⁶ Taano ta bakong madunong na pagparaisipon na mas marahay an buhay ta kaidto? Huli sa paghidaw, tibaad su marahay na mga bagay na sana an magirumduman ta asin malingawan ta na an mga kasakitan na inagihan ta. Halimbawa, isipa an suanoy na mga Israelita. Pagkahali sa Ehipto, nalingawan tulos ninda kun gurano kasakit kan nagin buhay ninda duman. Imbes, nagpokus sinda sa masisiram na kakanon ninda duman. Sinabi ninda: ‘Nagigirumduman mi an sira na kinakakan niyamo duman sa Ehipto na dai nin bayad, an mga pipino, an mga melon, an mga puwero, an mga sibuyas, asin mga bawang!’ (Bil. 11:5) Pero talaga daw na “dai nin bayad” an mga kakanon na iyan? Igwa. Dakulang halaga an ibinayad kan mga Israelita huling kan panahon na idto, grabe an pang-aapi sainda bilang mga uripon sa Ehipto. (Ex. 1:13, 14; 3:6-9) Alagad, nalingawan ninda an mga kasakitan na idto asin hinidaw an buhay ninda sa Ehipto. Pinili nindang magpokus sa  sinasabi nindang marahay na buhay kaidto imbes na magpokus sa marahay na mga bagay na ginibo ni Jehova para sainda. Dai naugma si Jehova sa sabuot nindang iyan.—Bil. 11:10.

7. Ano an nakatabang sa sarong sister na malikayan an siod nin paghidaw?

⁷ Paano ta malilikayan an siod nin paghidaw? Pag-isipan an halimbawa nin sarong sister na naglingkod sa Brooklyn Bethel puon kan 1945. Pagkalihis nin pirang taon, nagpakasal siya sa sarong kapwa Bethelite asin magkaibanan sindang naglingkod nin dakul na taon. Alagad kan 1976, nagkahilang an saiyang agom. Sinabi niya na kan marealisar kan agom niya na madali na ining magadan, tinawan siya kaini nin marahay na mga sadol na makakatabang sa saiya pag solo na lang siya. Sinabi kaini sa saiya: “Nagin maugma an satong pag-ibanan. Dakul na tawo an dai nuarin man nakaeksperyensiya kaiyan.” Sinabi pa kaini saiya: “Dai mo pagparaisipon an nakaagi—minsan ngani dai mawawara sa memorya mo an pag-ibanan ta. Makakatabang an paglihis nin panahon na mabawasan an kulog. Dai ka pangluyahan na marhay asin magmundo nin grabe sa nangyari saimo. Magin maugma ka sa magayon na mga panahon na magkaibanan kitang naglilingkod ki Jehova. . . . An magagayon na eksperyensiyang nagigirumduman ta regalo hali sa Diyos.” Bako daw na magayon na sadol ini?

8. Paano nakinabang an sister sa dai pagparapokus sa nakaagi?

⁸ Sinunod kan sister an sadol kan saiyang agom. Maimbod siyang naglingkod ki Jehova sagkod kan saiyang kagadanan sa edad na 92. Mga pirang taon bago kaiyan, sinabi niya: “Sa paggirumdom kan nakaaging labing 63 na taon sa bilog na panahon na paglilingkod ki Jehova, masasabi ko na talagang nagin nakakaugma an buhay ko.” Taano? Ipinaliwanag niya: “An nagpapangyari talaga na magin nakakaugma an buhay iyo an satong marahayon na kasararuan nin magturugang asin an paglaom na mabuhay kaiba an satong mga tugang sa sarong paraisong daga, na naglilingkod sa satong Kahuruhalangkawing Kaglalang, an iyo sanang tunay na Diyos, si Jehova, sagkod lamang.” * Marahayon nanggad na halimbawa  nin saro na naghiling nin diretso sa puturo!

9. Arog kan ipinaparisa kan Levitico 19:18, nuarin tibaad magin lalo nang dipisil na patawadon an nakakulog sa sato?

⁹ Basahon an Levitico 19:18. Sa parati, dipisil na halion an paghinanakit kun an nakakulog sa sato sarong kapagtubod, dayupot na amigo, o kaparyente. Halimbawa, sarong sister an sinahutan nin saro pang sister na hinabon niya daa an kuwarta kaini. Dangan, naghagad nin dispensa an sister na nagsahot, pero makulugon an buot kan sinahutan na sister asin parati niya iyan nagigirumduman. Namatian mo na man daw iyan? Dawa kun dai pa kita napaatubang sa arog kaiyan na sitwasyon, posibleng marhay na kadaklan sa sato nakamati na nin paghinanakit asin pagmati ta dai ta mapapatawad an nakakulog sa sato.

10. Ano an makakatabang sa sato pag nakakamati kita nin paghinanakit?

¹⁰ Ano an makakatabang sa sato pag nakakamati kita nin paghinanakit? An saro, girumdumon na nahihiling ni Jehova an gabos. Aram niya an gabos na inaagihan ta, pati na an ano man na inhustisya na naeeksperyensiyahan ta. (Heb. 4:13) Namumundo siya pag nagsasakit kita. (Isa. 63:9) Asin nanunuga siya na pag-abot nin panahon, hahalion niya an ano man na danyos na resulta kan mga inhustisyang inagihan ta.—Kap. 21:3, 4.

11. Ano an mga pakinabang pag hinali niyato an paghinanakit?

¹¹ Marahay man na girumdumon na pag hinali niyato an paghinanakit, nakikinabang kita. Iyan an narealisar kan sinahutan na sister. Pag-abot nin panahon, nahali niya an saiyang paghinanakit. Narealisar niya na pag pinapatawad ta an iba, papatawadon man kita ni Jehova. (Mat. 6:14) Aram niya na sala an ginibo saiya kan sister, pero pinili niyang halion an saiyang paghinanakit. Bilang resulta, nagin mas maugma an sister asin mas nakapagpokus siya sa saiyang paglilingkod ki Jehova.

12. Ano an manunudan ta sa 1 Juan 3:19, 20?

¹² Basahon an 1 Juan 3:19, 20. Gabos kita nakakamati nin pagkakonsiyensiya. Halimbawa, nakokonsiyensiya an iba sa mga ginibo ninda bago ninda naaraman an katotoohan. An iba man nakokonsiyensiya sa mga nagibo nindang sala kan bawtisado na sinda. Normal an arog kaiyan na pagmati. (Roma 3:23) Siyempre, gusto tang gibuhon an tama. Pero “gabos . . . kita napapasala nin dakul na beses.” (Sant. 3:2; Roma 7:21-23) Dawa ngani bakong marahay sa pagmati an pagkakonsiyensiya, may mga pakinabang iyan sa sato. Taano? Huling an pakamati nin pagkakonsiyensiya nakakapahiro sa sato na itanos an satong direksiyon asin magin determinadong dai na utruhon an mga sala tang nagibo.—Heb. 12:12, 13.

13. Taano ta kaipuhan niyatong mag-ingat sa siod nin sobrang pagkakonsiyensiya?

¹³ Alagad, posibleng makamati kita nin sobrang pagkakonsiyensiya—buot sabihon, padagos kitang nakokonsiyensiya dawa nagsulsol na kita asin ipinahiling na sa sato ni Jehova na pinatawad na niya kita. Nakakadanyar an arog kaiyan na pagkakonsiyensiya. (Sal. 31:10; 38:3, 4) Taano? Pag-isipan an halimbawa nin sarong sister na padagos na nakokonsiyensiya huli sa mga nagibo niyang sala kaidto. Sinabi niya: “Namatian ko na mas marahay pa na dai na lang ako magmaigot sa paglilingkod ki Jehova ta ‘baad huri na man an gabos.” Dakul sa sato an tibaad namatian na man iyan. Mahalagang marhay na mag-ingat kita sa siod nin sobrang pagkakonsiyensiya. Ta kun dai, isipa na sana kun gurano kaugma si Satanas kun mapundo na kita sa paglilingkod ki Jehova, dawa ngani namumutan pa man giraray kita ni Jehova!—Ikumparar an 2 Corinto 2:5-7, 11.

14. Paano kita makakasigurado na namumutan pa man giraray kita ni Jehova?

¹⁴ Pero, tibaad maihapot pa man giraray niyato, ‘Paano ako makakasigurado na namumutan pa man giraray ako ni Jehova?’ Kun ihinahapot niyato iyan, an buot sabihon, mapapatawad pa  kita ni Jehova. Dakul na taon na an nakaagi, sinabi kan An Torrengbantayan: “Tibaad masingkog asin matumba kita nin dakul na beses huli sa maraot na gibo-gibo na nakagamot nang marhay palan sa sato huli sa dating pamumuhay ta. . . . Dai mawaran nin paglaom. Dai pag-isipon na dai ka na mapapatawad sa nagibo mong sala. Iyan an gusto ni Satanas na isipon mo. Sa katunayan, an kamunduan saka pagkadisganar mo sa sadiri patunay na dai pa huri an gabos. Magdanay na mapakumbaba asin padagos na mamibi sa Diyos para sa kapatawadan, hagadon na tabangan kang magkaigwa giraray nin malinig na konsiyensiya, na dai na mautro an mga salang nagibo mo. Magdulok sa saiya kun paanong nagdudulok an sarong aki sa saiyang ama pag may problema, gurano man kaparati sa iyo man sanang kaluyahan, asin mabuot kang tatabangan ni Jehova huli sa saiyang daing kapantay na kabuutan.” *

15-16. Ano an namatian kan nagkapira kan marealisar ninda na namumutan pa man giraray sinda ni Jehova?

¹⁵ Dakul na lingkod ni Jehova an nararanga sa pakaaram na namumutan pa man giraray sinda ni Jehova. Halimbawa, pirang taon na an nakaagi, sarong brother an napakusog an buot huli sa sarong eksperyensiya sa seryeng “Binago kan Bibliya an Saindang Buhay.” Sa artikulo, sinabi nin sarong sister na huli sa saiyang nakaagi, nadipisilan siyang magtubod na puwede siyang mamutan ni Jehova. Dawa pirang taon na siyang bawtisado, pinaglalabanan niya pa man giraray an pagmating iyan. Alagad, mantang hinuhurop-hurop niya an pantubos, nabago an saiyang pagmansay. *

¹⁶ Paano nakatabang sa brother an eksperyensiyang iyan? Nagsurat siya: “Kan hoben pa ako, naadik ako sa pornograpiya. Dai pa sana nahahaloy, nagibo ko na naman iyan. Naghagad ako nin tabang sa mga elder, asin nakatabang iyan sa sako na maggibo nin mga lakdang na mapangganahan an problema ko. Inasigurar sa sako kan mga elder na mamumuton asin mahihirakon si Jehova. Pero may beses na namamatian ko pa man giraray na mayo akong halaga, na garo imposibleng mamutan ako ni Jehova. Nakatabang talaga sako an eksperyensiyang ini kan sister. Narealisar ko ngunyan na pag iniisip ko palan na dai ako mapapatawad nin Diyos, garo man sana sinasabi ko na kulang pa an atang kan saiyang Aki para matahuban an sakong mga kasalan. Ginunting ko an artikulong ini tanganing mabasa asin  mahurop-hurop ko iyan kada namamatian kong mayo akong halaga.”

17. Paano nalikayan ni apostol Pablo an siod nin sobrang pagkakonsiyensiya?

¹⁷ Nagigirumduman ta si apostol Pablo sa mga eksperyensiyang arog kaiyan. Bago siya nagin Kristiyano, dakul siyang nagibong magabat na kasalan. Nagigirumduman ni Pablo an mga ginibo niya, pero dai siya nagparapokus diyan. (1 Tim. 1:12-15) Minansay niya an pantubos bilang personal na regalo sa saiya. (Gal. 2:20) Kaya nalikayan ni Pablo an siod nin sobrang pagkakonsiyensiya asin nakapagpokus sa pagtao ki Jehova kan pinakamakakaya niya.

18. Ano an nanudan ta sa artikulong ini?

¹⁸ Ano an nanudan ta sa mga siod na tinukar sa artikulong ini? (1) An magagayon na eksperyensiyang nagigirumduman ta bendisyon hali ki Jehova; pero gurano man karahay kan buhay ta kaidto, magigin mas marahay nanggad an satong puturo sa bagong kinaban. (2) Tibaad makulgan kita kan iba, pero kun magdedesisyon kitang magpatawad, makakapagpokus kita sa paglilingkod ki Jehova. (3) An sobrang pagkakonsiyensiya makakaulang sa sato na makapaglingkod ki Jehova nin may kaugmahan. Kaya arog ni apostol Pablo, kaipuhan niyatong magtubod na pinatawad na kita ni Jehova.

19. Paano ta naaraman na sa bagong kinaban dai ta na pagpaparaisipon an nakaaging mga bagay na pinanghihinayangan o pinagbabasulan ta?

¹⁹ May paglaom kitang mabuhay nin daing sagkod. Asin sa bagong kinaban nin Diyos, dai ta na pagpaparaisipon an nakaaging mga bagay na pinanghihinayangan o pinagbabasulan ta. Manungod sa panahon na iyan, sinasabi kan Bibliya: ‘An mga pangyayari kan nakaaging panahon dai na gigirumdumon.’ (Isa. 65:17, An Marahay na Bareta Biblia) Isipa na sana: An nagkapira sa sato naggurang na sa paglilingkod ki Jehova, pero sa bagong kinaban, magigin hoben giraray kita. (Job 33:25) Kun siring, lugod na magin determinado kitang dai magparapokus sa nakaagi. Imbes, gusto niyatong magpokus sa bagong kinaban asin gibuhon an gabos na magigibo ta ngunyan tanganing masiguradong yaon kita duman!