ARTIKULONG PAG-AADALAN 41
Magdanay na Maimbod sa Panahon kan “Grabeng Kasakitan”
“Kamutan nindo si Jehova, kamo gabos na maimbod sa saiya! An mga maimbod pinoprotektaran ni Jehova.”—SAL. 31:23, NW.
KANTA 129 Padagos Kitang Magtagal
SUMARYO KAN PAG-AADALAN *
1-2. (a) Ano an madali nang iproklamar kan mga nasyon? (b) Anong mga hapot an kaipuhan na masimbag?
IMAHINARA na katatapos pa lang na gibuhon kan mga nasyon an haloy na nindang hinahalat na proklamasyon nin “katuninungan asin katiwasayan.” Tibaad ipag-orgulyo ninda na ngunyan lang nagin arog kaini katiwasay an kinaban. Hihinguwahon kan mga nasyon na isipon niyato na kontrolado ninda an sitwasyon sa bilog na kinaban. Alagad dai nanggad ninda kontrolado an sunod na mangyayari! Taano? Uyon sa propesiya sa Bibliya, “tulos-tulos na maabot sa sainda an biglang pagkalaglag, . . . asin dai nanggad sinda makakadulag.”—1 Tes. 5:3.
2 May mahalagang mga hapot na kaipuhan na masimbag: Ano an mangyayari sa panahon kan “grabeng kasakitan”? Ano an inaasahan sa sato ni Jehova na gigibuhon niyato sa panahon na iyan? Asin paano niyato iaandam ngunyan an satong sadiri para magdanay kitang maimbod sa panahon kan grabeng kasakitan?—Mat. 24:21.
ANO AN MANGYAYARI SA PANAHON KAN “GRABENG KASAKITAN”?
3. Uyon sa Kapahayagan 17:5, 15-18, paano lalaglagon nin Diyos an “Dakulang Babilonya”?
3 Basahon an Kapahayagan 17:5, 15-18. An “Dakulang Babilonya” lalaglagon! Arog kan sinambit kasubago, dai kontrolado kan mga nasyon an mangyayari sa puntong ini. Taano? Huling “papasabngan nin Diyos an saindang mga puso na isagibo an saiyang kaisipan.” Ano an kaisipan na iyan? An laglagon an pambilog na kinaban na imperyo nin palsong relihiyon, kaiba na an Kakristiyanuhan. * Papasabngan nin Diyos an puso kan “sampulong sungay” asin kan “mabangis na hayop na mapulahon an kulor” na isagibo an saiyang kaisipan. An sampulong sungay nagrerepresentar sa gabos na pulitikal na kapangyarihan na nagsusuportar sa “mabangis na hayop”—an United Nations. (Kap. 17:3, 11-13; 18:8) Pag binirikan na kan pulitikal na mga kapangyarihan na iyan an palsong relihiyon, iyan na an magigin tanda kan pagpuon kan grabeng kasakitan. Magigin kapaha-pahamak nanggad na pangyayari iyan sa bilog na kinaban.
4. (a) Ano an posibleng sabihon kan mga nasyon tanganing ipangatanusan an pag-atake ninda sa palsong relihiyon? (b) Ano an posibleng marhay na gibuhon kan mga dating miyembro kan mga relihiyon na iyan?
4 Dai niyato aram an posibleng mga idahilan kan mga nasyon para ipangatanusan an pag-atake ninda sa Dakulang Babilonya. Tibaad sabihon ninda na ulang sa katuninungan an mga relihiyon sa kinaban asin na pirmi ining nakikiaram sa pulitika. O tibaad sabihon ninda na an mga relihiyosong organisasyon nagparatipon nin sobra-sobrang kayamanan asin pagsadiri. (Kap. 18:3, 7) Rasonable man na isipon na an pag-atakeng ini posibleng dai man mangangahulugan na paparaon an gabos na miyembro kan mga relihiyon na iyan. Imbes, an posibleng hahalion kan mga nasyon iyo an relihiyosong mga organisasyon. Pag mayo na an mga organisasyon na iyan, marerealisar kan dating mga miyembro kaiyan na dai kayang utubon kan mga lider kan saindang relihiyon an mga pangako kaini asin posibleng marhay na ididistansiya ninda an saindang sadiri sa mga relihiyon na iyan.
5. Ano an ipinanuga ni Jehova kun dapit sa grabeng kasakitan, asin taano?
5 Mayong sinasabi an Bibliya kun gurano kalawig an paglaglag sa Dakulang Babilonya, pero aram niyato na dai man iyan magigin haluyon. (Kap. 18:10, 21) Nanuga si Jehova na ‘papahaliputon niya an mga aldaw’ kan kasakitan tanganing makaligtas an saiyang “mga pinili” asin an tunay na relihiyon. (Mar. 13:19, 20) Pero ano an inaasahan sa sato ni Jehova na gigibuhon niyato sa panahon kan grabeng kasakitan sagkod sa panahon bago magpuon an giyera nin Armagedon?
PADAGOS NA SUPORTARAN AN TUNAY NA PAGSAMBA KI JEHOVA
6. Apuwera sa pagsiblag sa palsong relihiyon, ano pa an dapat tang gibuhon?
6 Arog kan tinukar sa sinusundan na artikulo, inaasahan ni Jehova na isisiblag kan saiyang mga parasamba an saindang sadiri sa Dakulang Babilonya. Pero bako lang iyan an kaipuhan tang gibuhon. Dapat na determinado niyatong suportaran an tunay na relihiyon—an dalisay na pagsamba ki Jehova. Pag-isipan an duwang paagi na magigibo niyato iyan.
Lugod na dai nanggad niyato pagpabayaan an satong pagtiripon, dawa sa masakit na mga panahon (Hilingon an parapo 7) *
7. (a) Paano kita magdadanay na determinadong mamuhay kauyon kan matanos na mga pamantayan ni Jehova sa moral? (b) Paano idinuduon kan Hebreo 10:24, 25 an kahalagahan kan satong pagtiripon, lalo na ngunyan?
7 Inot, kaipuhan tang magdanay na determinadong mamuhay kauyon kan matanos na mga pamantayan ni Jehova sa moral. Dai niyato dapat akuon an mga prinsipyo asin pamantayan kan kinaban. Halimbawa, dai kita uyon sa ano man na klase nin seksuwal na imoralidad, kaiba na an pag-aguman nin magkasekso asin iba pang homoseksuwal na istilo nin pamumuhay. (Mat. 19:4, 5; Roma 1:26, 27) Ikaduwa, dapat na padagos kitang magsamba kaiba kan satong mga kapwa Kristiyano. Ginigibo ta iyan sain man puwede, iyan man sa satong mga Kingdom Hall o, pag kaipuhan, sa harong nin tugang o maski pa ngani patago. Ano man an mangyari, dai nanggad niyato ipupundo an satong rutina nin pagtiripon para magsamba. Sa katunayan, kaipuhan niyatong magtiripon “lalo na ta nahihiling [niyato] na an aldaw harani na.”—Basahon an Hebreo 10:24, 25.
8. Paano an satong mensaheng ihinuhulit posibleng marhay na magbago pag-abot nin panahon?
8 Sa panahon kan grabeng kasakitan, posibleng marhay na magbago an mensahe na ibinabalangibog niyato. Sa ngunyan, an maugmang bareta kan Kahadian an ihinuhulit niyato asin hinihinguwa tang gumibo nin mga disipulo. Pero sa panahon na iyan, posibleng marhay na an ipapaabot niyato sarong prangka nanggad na mensahe na ikinumparar kan Bibliya sa makusog na pag-uran nin yelo. (Kap. 16:21) Posibleng ibalangibog niyato an nagdadangadang na kalaglagan kan kinaban ni Satanas. Pag-abot nin panahon, maaaraman niyato nin eksakto kun ano an mensaheng iyan asin kun paano ta iyan ipapaabot. Gagamiton ta daw an parehong mga pamamaagi na ginamit ta sa laog nin labing sanggatos na taon para maisagibo an satong ministeryo? O magamit daw kita nin iba pang mga pamamaagi? Dai ta aram. Ano man iyan, posibleng marhay na magkakaigwa kita kan pribilehiyo na pusuan na ibalangibog an mensahe nin paghukom ni Jehova!—Ezeq. 2:3-5.
9. Ano an posibleng magin reaksiyon kan mga nasyon sa satong mensahe, alagad sa ano kita makakasigurado?
9 Posibleng marhay na maaanggot sa mensahe ta an mga nasyon kaya pupurbaran ninda na permanente nang papunduhon kita. Kun paanong nag-aasa kita ngunyan sa suporta ni Jehova sa satong paghuhulit, kakaipuhanon man niyato an saiyang tabang sa panahon na iyan. Makakasigurado kita na an satong Diyos papanuon kita nin puwersa para maisagibo ta an saiyang kabutan.—Miq. 3:8.
MAGIN ANDAM PARA SA MAABOT NA PAG-ATAKE SA BANWAAN NIN DIYOS
10. Arog kan ihinula sa Lucas 21:25-28, ano an magigin reaksiyon kan kadaklan na tawo sa mga mangyayari sa panahon kan grabeng kasakitan?
10 Basahon an Lucas 21:25-28. Sa panahon kan grabeng kasakitan, mabibigla an mga tawo mantang nahihiling nindang napapara an gabos na bagay na hinuna ninda kaidtong magdadanay sagkod lamang sa kinaban. Huling natatakot para sa mismong buhay ninda, sinda ‘mananangis’ mantang naeeksperyensiyahan an pinakamadiklom na peryodo nin panahon sa kasaysayan nin tawo. (Sof. 1:14, 15, NW) Sa panahon na iyan, posibleng marhay na urog pang magigin dipisil an buhay dawa kan mga lingkod ni Jehova. Huling nagdadanay kitang bakong kabtang kan kinaban, posibleng makaeksperyensiya kita nin mga kadipisilan. Tibaad dai pa ngani kita magkaigwa kan pirang panginot na pangangaipo niyato.
11. (a) Taano ta magigin sentro nin atensiyon an mga Saksi ni Jehova? (b) Taano ta dai niyato kaipuhan na matakot kun dapit sa pag-abot kan grabeng kasakitan?
11 Maabot an punto na su mga tawong an relihiyon pinara na tibaad mauyam na marhay huling nagpapadagos pa an pagsamba kan mga Saksi ni Jehova. Imahinara na sana an iskandalo na puwedeng magin resulta kaiyan, pati na sa social media. An mga nasyon asin an saindang tagapamahala, si Satanas, ikakaungis kita dahil an relihiyon ta na sana an natatada. Nangangahulugan iyan na dai pa ninda nagibo an pasuhan ninda na puhuon an gabos na relihiyon sa daga. Kaya magigin sentro kita kan saindang atensiyon. Sa puntong ini, an mga nasyon magigi nang an Gog nin Magog. * Masururog sinda tanganing may kabangisan na atakihon an banwaan ni Jehova sagkod sa pinakamakakaya ninda. (Ezeq. 38:2, 14-16) Medyo nakakapurisaw man nanggad na isipon an mga posibilidad na iyan lalo na ta dai pa niyato aram an eksaktong mga detalye. Minsan siring, ini an sigurado ta: Dai ta kaipuhan na matakot kun dapit sa pag-abot kan grabeng kasakitan. Tatawan kita ni Jehova nin nagliligtas-buhay na mga instruksiyon. (Sal. 34:19) Magigibo niyatong “tumindog . . . nin tanos asin iitaas an [satong] mga payo” huling maaaraman niyato na “naghaharani na an pagliligtas sa [sato].” *
12. Paano kita inaandam kan “maimbod asin mapagmansay na uripon” para sa mga mangyayari sa maabot na panahon?
12 An “maimbod asin mapagmansay na uripon” inaandam kita tanganing magdanay kitang maimbod sa panahon kan grabeng kasakitan. (Mat. 24:45) Ginigibo ninda ini sa dakul na paagi. Pag-isipan an sarong halimbawa: an satong napapanahon na mga programa kan mga kumbensiyon kan taon 2016-2018. Sa mga programang iyan, inenkaminar kita na pauswagon an mga kuwalidad na kakaipuhanon ta mantang paparani na an aldaw ni Jehova. Pag-ulayan niyato sa halipot an mga kuwalidad na iyan.
PADAGOS NA MAGPAHILING NIN UROG PANG KAIMBUDAN, PAKATAGAL, ASIN KUSOG NIN BUOT
Mag-andam na ngunyan tanganing maligtas sa “grabeng kasakitan” (Hilingon an parapo 13-16) *
13. Paano niyato mapapakusog an satong kaimbudan ki Jehova, asin taano ta dapat na niyatong gibuhon iyan ngunyan?
13 Kaimbudan: An tema kan programa kan 2016 na kumbensiyon iyo an “Magdanay na Maimbod ki Jehova!” Itinukdo sa sato kan programang ini na kun igwa kita nin makusog na relasyon ki Jehova, magigin maimbod kita sa saiya. Ipinagirumdom sa sato na magigin dayupot kita ki Jehova paagi sa udok na pagpamibi asin maigot na pag-adal kan saiyang Tataramon. An paggibo kaiyan magtatao sa sato nin kusog na makayanan dawa an pinakadipisil na mga problema. Mantang nagdadangadang an katapusan kan sistema ni Satanas, inaasahan na niyato na mapapaatubang kita sa mas masakit na mga pagbalo sa satong kaimbudan sa Diyos asin sa saiyang Kahadian. Posibleng marhay na padagos kitang magigin puntirya nin pagtuya. (2 Ped. 3:3, 4) Posibleng marhay na mangyari ini lalo na ta nagdadanay kitang neutral. Dapat na niyatong pakusugon an satong kaimbudan ngunyan tanganing magdanay kitang maimbod sagkod sa panahon kan grabeng kasakitan.
14. (a) Anong pagbabago an mangyayari may koneksiyon sa mga brother na nanginginot digdi sa daga? (b) Taano ta kakaipuhanon niyatong magin maimbod sa panahon na iyan?
14 Sa panahon kan grabeng kasakitan, magkakaigwa nin pagbabago may koneksiyon sa mga brother na nanginginot digdi sa daga. Maabot an panahon na an gabos na linahidan na nasa daga pa titipunon pasiring sa langit tanganing makikabtang sa giyera nin Armagedon. (Mat. 24:31; Kap. 2:26, 27) Nangangahulugan ini na dai ta na makakaibanan sa daga an Namamahalang Grupo. Minsan siring, an dakulang kadaklan magdadanay na organisado. Igwa nin may kakayahan na mga brother hali sa ibang mga karnero na manginginot. Kakaipuhanon niyato na ipahiling an satong kaimbudan paagi sa pagsuportar sa mga brother na ini asin paagi sa pagsunod sa saindang mga instruksiyon na hali sa Diyos. Madepende nanggad diyan an satong kaligtasan!
15. Paano niyato mapapauswag an satong pakatagal, asin taano ta mahalaga na gibuhon na niyato iyan ngunyan?
15 Pakatagal: An tema kan programa kan 2017 na kumbensiyon iyo an “Padagos na Magtagal!” Tinabangan kita kan programang ini na pauswagon an satong kakayahan na magtagal sa mga pagbalo. Nanudan niyato na an satong pakatagal dai nakadepende sa marahay na mga kamugtakan. Mapapauswag niyato an satong pakatagal paagi sa pagtitiwala ki Jehova. (Roma 12:12) Lugod na dai ta nanggad paglingawan an ipinanuga ni Jesus: “An makatagal sagkod sa katapusan maliligtas.” (Mat. 24:13) An panugang ini nangangahulugan na dapat kitang magdanay na maimbod sa ibong kan ano man na kadipisilan na napapaatubang sa sato. Paagi sa pagtagal sa lambang mga pagbalo ngunyan, lalong magigin makusog an satong pagtubod bago magpuon an grabeng kasakitan.
16. Sa ano nakadepende an pagkaigwa ta nin kusog nin buot, asin paano niyato lalong mapapakusog an satong buot ngunyan?
16 Kusog nin buot: An tema kan programa kan 2018 na kumbensiyon iyo an “Kusugi an Buot Mo!” Ipinagirumdom sa sato kan programang ini na an pagkaigwa ta nin kusog nin buot dai nakadepende sa satong mga kakayahan o abilidad. Arog kan pakatagal, nagkakaigwa kita nin tunay na kusog nin buot huli sa pagtitiwala ta ki Jehova. Paano niyato mapapakusog an satong pagtitiwala sa saiya? Paagi sa pagbasa kan saiyang Tataramon aroaldaw asin paghurop-hurop sa kun paano ilinigtas kaidto ni Jehova an saiyang banwaan. (Sal. 68:20; 2 Ped. 2:9) Pag sinalakay na kita kan mga nasyon sa panahon kan grabeng kasakitan, kakaipuhanon nanggad niyatong magin makusog an buot asin na magtiwala ki Jehova urog kisa kasuarin man. (Sal. 112:7, 8; Heb. 13:6) Kun nagtitiwala kita ki Jehova ngunyan, magkakaigwa kita kan kusog nin buot na kaipuhan niyato pag salakayon na kita ni Gog. *
MAUGMANG HALATON AN SAINDONG KALIGTASAN
Dai na mahahaloy, si Jesus asin an saiyang hukbo sa langit maluwas sa pakikilaban sa giyera nin Armagedon tanganing laglagon an mga kaiwal nin Diyos! (Hilingon an parapo 17)
17. Taano ta dai kita dapat matakot sa Armagedon? (Hilingon an ritrato sa cover.)
17 Arog kan sinambit sa sinundan na artikulo, kadaklan sa sato namundag asin nabubuhay sa panahon kan huring mga aldaw. Pero naglalaom man kita na makaligtas sa panahon kan grabeng kasakitan. An giyera nin Armagedon iyo an lubos na matapos sa sistemang ini nin mga bagay. Minsan siring, mayo kitang dapat ikatakot. Taano? Huling an Diyos an makikipaglaban para sa sato. (Tal. 1:33; Ezeq. 38:18-20; Zac. 14:3) Pag itinao na ni Jehova an pagbuot, panginginutan ni Jesus an hukbo ni Jehova para makigiyera. Kaibanan niya an binuhay liwat na mga linahidan asin an manampulong ribong anghel. Magkairibanan sindang makikigiyera ki Satanas, sa saiyang mga demonyo, asin sa saindang mga hukbo digdi sa daga.—Dan. 12:1; Kap. 6:2; 17:14.
18. (a) Ano an ipinanuga ni Jehova? (b) Paano pinapakusog kan Kapahayagan 7:9, 13-17 an pagtitiwala mo na ililigtas kita sa maabot na panahon?
18 Ipinanuga ni Jehova: “Mayong armas na ginibo laban sa saimo an magigin mapanggana.” (Isa. 54:17, NW) “Sarong dakulang kadaklan” nin maimbod na mga parasamba ni Jehova an “[makakabalyong buhay] hali sa nag-aging grabeng kasakitan”! Dangan padagos sindang magtatao nin sagradong paglilingkod sa saiya. (Basahon an Kapahayagan 7:9, 13-17.) Tinatawan nanggad kita kan Bibliya nin dakul na dahilan para magtiwala na ililigtas kita sa maabot na panahon! Aram niyato na “an mga maimbod pinoprotektaran ni Jehova.” (Sal. 31:23, NW) An gabos na namumuot asin nag-uumaw ki Jehova mauugmang marhay na mahiling na binibindikar niya an saiyang banal na pangaran.—Ezeq. 38:23.
19. Anong magayunon na pribilehiyo an madali na niyatong makamtan?
19 Ano daw an mababasa mo sa 2 Timoteo 3:2-5 kun an ilinaladawan kaiyan iyo an mga tawo sa bagong kinaban na mayo na sa impluwensiya ni Satanas? (Hilingon an kahon na “ An Magigin Ugali kan mga Tawo sa Bagong Kinaban.”) Si Brother Gangas, * na naglingkod bilang miyembro kan Namamahalang Grupo, arog kaini an pagkaladawan diyan: “Isipa na sana an kinaban pag an gabos na tawo magturugang na sa espirituwal! Madali mo nang makamtan an pribilehiyong mabuhay sa bagong sistema nin mga bagay. Mabubuhay ka sagkod na buhay si Jehova. Mabubuhay kita sagkod lamang.” Magayunon na paglaom nanggad iyan!
KANTA 122 Magin Marigon, Dai Natatanyog!
^ par. 5 Aram niyato na madali nang umabot sa katawuhan an sarong “grabeng kasakitan.” Ano an mangyayari sa mga lingkod ni Jehova sa panahon na iyan? Ano an inaasahan sa sato ni Jehova na gigibuhon niyato sa panahon na iyan? Anong mga kuwalidad an kaipuhan tang pauswagon ngunyan tanganing magdanay na maimbod? Maaaraman niyato an simbag sa artikulong ini.
^ par. 3 PALIWANAG DAPIT SA TATARAMON: An Kakristiyanuhan kompuwesto nin mga relihiyon na naghihingakong Kristiyano sinda alagad dai nagtutukdo sa mga tawo na sambahon si Jehova kauyon kan saiyang mga pamantayan.
^ par. 11 PALIWANAG DAPIT SA TATARAMON: An terminong Gog nin Magog (asin an halipot na porma kaiyan na Gog) nanunungod sa koalisyon nin mga nasyon na masalakay sa dalisay na pagsamba sa panahon kan grabeng kasakitan.
^ par. 11 Para sa mas detalyadong pagtukar dapit sa gabos na mga mangyayari bago an giyera nin Armagedon, hilingon an kapitulo 21 kan librong Namamahala Na an Kahadian nin Diyos! Para sa dagdag na impormasyon mapadapit sa pagsalakay kan Gog nin Magog asin kun paano poprotektaran ni Jehova an saiyang mga lingkod sa panahon kan Armagedon, hilingon an kapitulo 17 asin 18 kan librong Ibinalik ang Dalisay na Pagsamba kay Jehova.
^ par. 16 An programa para sa 2019 kumbensiyon na may temang “An Pagkamuot Dai Nuarin Man Mawawara!” nagpapakusog kan satong pagtitiwala na puwede kitang magdanay na ligtas sagkod lamang sa irarom kan mamumuton na proteksiyon ni Jehova.—1 Cor. 13:8.
^ par. 19 Hilingon an artikulong “An Saiyang mga Ginibo Kasunod Nia” sa Disyembre 1, 1994 na isyu kan An Torrengbantayan.
^ par. 65 DESKRIPSIYON KAN RITRATO: Sa panahon kan grabeng kasakitan, sarong sadit na grupo nin mga Saksi an kusog-buot na nagtitiripon sa sarong kadlagan para sa sarong pagtiripon kan kongregasyon.
^ par. 67 DESKRIPSIYON KAN RITRATO: Hali sa grabeng kasakitan, sarong dakulang kadaklan nin maimbod na mga parasamba ni Jehova an makakabalyong buhay asin maugma!
