1-2. Ano an nanudan nin sarong brother manungod sa pagtao nin konseho?

DAKUL na taon na an nakaagi, dinalaw nin duwang elder an sarong sister na medyo haloy nang dai nakakaatender sa mga pagtiripon. Ipinabasa saiya kan sarong elder an nagkapirang teksto manungod sa pag-atender sa pagtiripon. Paghuna kan elder napakusog ninda an sister sa pagdalaw na iyan. Pero, kan pahali na sinda, sinabi kan sister, “Dai nindo nasasabutan an inaagihan ko ngunyan.” Nagtao tulos nin konseho an mga brother na dai man lamang nguna hinapot an sister manungod sa mga problemang inaagihan niya. Kaya pagmati kan sister dai man nakatabang an konseho ninda.

² Mantang ginigirumdom kan elder an pangyayaring idto, sinabi niya: “Inisip ko ka’dto na daing galang su sister. Pero kan pigparaisip-isip ko iyan, an mas inisip ko palan, bako su kamugtakan kan sister, kundi su mga tekstong gagamiton ko. Dapat hinapot ko nguna siya, ‘Kumusta ka na?’ ‘Ano an puwede kong maitabang?’” Nakanuod nin mahalagang leksiyon an elder sa eksperyensiyang iyan. Ngunyan, saro na siyang maduminamay asin matinabang na pastor.

3. Sairisay sa kongregasyon an puwedeng magtao nin konseho?

 ³ Bilang mga pastor, paninimbagan kan mga elder na magtao nin konseho kun kinakaipuhan. Minsan siring, may mga sitwasyon na tibaad kaipuhan kan ibang tugang sa kongregasyon na magtao nin konseho. Halimbawa, puwedeng magtao nin basado sa Bibliyang sadol an sarong brother o sister sa sarong amigo. (Sal. 141:5; Tal. 25:12) O puwedeng “makapagtao . . . nin sadol sa mga hoben na babayi” an may edad nang sister manungod sa mga bagay na arog kan sinambit sa Tito 2:3-5. Asin, siyempre pa, parating kaipuhan kan mga magurang na magtao nin konseho  asin pagtatanos sa saindang mga aki. Kaya dawa ngani nakapokus an artikulong ini partikular na sa mga elder sa kongregasyon, gabos kita makikinabang sa pagrepaso kan mga puwede tang gibuhon para makatao kita nin konsehong nakakatabang, nakakamotibar, asin ‘nakakapaugma sa puso.’—Tal. 27:9.

4. Ano an pag-uulayan ta sa artikulong ini?

⁴ Sa artikulong ini, pag-uulayan ta an apat na hapot manungod sa pagtao nin konseho: (1) Ano an tamang motibo sa pagtao nin konseho? (2) Kaipuhan daw talagang magtao nin konseho? (3) Siisay an dapat na magtao nin konseho? (4) Paano ka makakatao nin epektibong konseho?

5. Taano ta madaling akuon an konseho nin sarong elder na itinatao sa mamumuton na paagi? (1 Corinto 13:4, 7)

⁵ Namumutan kan mga elder an mga tugang. Kun minsan, ipinapahiling ninda an pagkamuot na iyan paagi sa pagtao nin konseho sa saro na napapasala na nin lakad. (Gal. 6:1) Pero bago kaulayon an saro, puwedeng pag-isipan nin sarong elder an pira sa aspekto nin pagkamuot na sinambit ni apostol Pablo. “An pagkamuot mapasensiya asin mabuot. . . . Kinakaya kaiyan an gabos na bagay, tinitiwalaan an gabos na bagay, linalauman an gabos na bagay, tinatagalan an gabos na bagay.” (Basahon an 1 Corinto 13:4, 7.) Makakatabang sa sarong elder an paghurop-hurop sa mga bersikulong iyan sa Bibliya para siyasaton an saiyang motibo sa pagtao nin konseho asin kaulayon an tugang sa mamumuton na paagi. Kun namamati kan saro na tinatawan nin konseho na nagmamalasakit saiya an elder, mas dakula an posibilidad na akuon niya an konseho.—Roma 12:10.

6. Anong marahay na halimbawa an ipinahiling ni apostol Pablo?

⁶ Nagpahiling si apostol Pablo nin marahay na halimbawa bilang elder. Halimbawa, kan an mga tugang sa Tesalonica mangaipo nin konseho, dai nag-alangan si Pablo na tawan sinda nin konseho. Minsan siring, sa surat niya sa sainda, kinomendaran nguna sinda ni Pablo sa saindang pagtubod, mamumuton na pagpapagal, asin pakatagal. Kinonsiderar man niya an saindang kamugtakan. Nasasabutan niya an sakit nin buhay saka persekusyon na tinatagalan ninda. (1 Tes. 1:3; 2 Tes. 1:4) Sinabi pa ngani niya sa sainda na marahayon sindang halimbawa sa ibang mga Kristiyano. (1 Tes. 1:8, 9) Siguradong ugmahon sinda sa marahayon na komendasyon sainda ni Pablo! Malinaw na namumutan na marhay ni Pablo an saiyang mga tugang. Kaya nakapagtao siya nin epektibong konseho sa duwang surat niya sa mga taga Tesalonica.—1 Tes. 4:1, 3-5, 11; 2 Tes. 3:11, 12.

7. Taano ta posibleng magin negatibo an reaksiyon kan iba sa konseho?

⁷ Ano an posibleng mangyari kun bakong tama an paagi ta nin pagtao nin konseho? Naobserbaran kan sarong eksperyensiyadong elder, “Negatibo an reaksiyon kan iba sa konseho, bakong dahil may sala sa itinaong sadol, kundi dahil dai iyan naitao sa mamumuton na paagi.” Ano an manunudan ta digdi? Mas madaling akuon an konseho kun itinatao iyan huli sa pagkamuot, bakong huli sa pagkairitar.

8. Ano an dapat na ihapot nin sarong elder sa saiyang sadiri pag nagdedesisyon kun baga kaipuhan na tawan nin konseho an saro?

⁸ Dai dapat magin pabigla-bigla an mga elder sa pagtao nin konseho. Bago magkonseho, dapat na ihapot nguna nin sarong elder sa saiyang sadiri: ‘Kaipuhan ko daw talagang sabihon ini? Sigurado daw talaga ako na sala an ginigibo niya? May nabalga daw na pagbuot sa Bibliya? O magkalain lang kami nin opinyon?’ Pagpahiling nin kadunungan kun lilikayan kan mga elder na magin “pabigla-bigla sa mga sinasabi  [ninda].” (Tal. 29:20) Kun dai sigurado an sarong elder kun baga kaipuhan na tawan nin konseho an saro, puwede niyang kaulayon an saro pang elder kun baga may nababalga sa Kasuratan na kaipuhan aksiyunan.—2 Tim. 3:16, 17.

9. Sa pagtao nin konseho manungod sa pagbado asin pag-ayos sa sadiri, ano an manunudan ta ki Pablo? (1 Timoteo 2:9, 10)

⁹ Pag-isipan an sarong halimbawa. Iniisip nin sarong elder na garo may problema sa paagi nin pagbado asin pag-ayos sa sadiri an sarong kapagtubod. Puwedeng ihapot kan elder sa saiyang sadiri, ‘May maka-Kasuratan daw na rason para sabihon saiya an bagay na ini?’ Huling habo kan elder na makapagtao nin sadiring opinyon, puwede niyang haputon an saro pang elder o sarong maygurang na parahayag manungod diyan. Puwede nindang repasuhon an konseho ni Pablo manungod sa pagbado asin pag-ayos sa sadiri. (Basahon an 1 Timoteo 2:9, 10.) May sinambit si Pablo na pangkagabsan na mga prinsipyo, na nagpaparisa na an pagbado nin sarong Kristiyano dapat na angay, mabini, saka rasonable. Pero dai naggibo si Pablo nin lista kan mga dapat asin dai dapat baduon. Aram niya na an mga Kristiyano libreng magpili nin gusto ninda basta mayo iyan nin nababalgang mga pamantayan sa Kasuratan. Kaya sa pagdeterminar kun baga kinakaipuhan magtao nin konseho sa sarong tugang, dapat na pag-isipan kan mga elder kun baga an mga pagpili kaini nagpapahiling nin kabinian asin pagigin rasonable.

10. Ano an dapat tang tandaan kun manungod sa ginibong desisyon kan iba?

¹⁰ Mahalagang tandaan niyato na puwedeng bakong magkapareho an desisyon kan duwang maygurang na Kristiyano, pero puwedeng pareho iyan na akseptable. Dai ta dapat ipirit sa satong mga kapagtubod an sadiri tang pamantayan nin tama asin sala.—Roma 14:10.

11-12. Kun kinakaipuhan na magtao nin konseho, ano an dapat na ihapot kan sarong elder sa saiyang sadiri, asin taano?

¹¹ Kun kinakaipuhan talaga na magtao nin konseho, an sunod na hapot, Siisay an dapat na magtao kaiyan? Bago magtao nin konseho sa sarong may agom na sister o sa sarong menor de edad, makikipag-ulay nguna an sarong elder sa payo kan pamilya, asin an payo kan pamilya posibleng magdesisyon na iyo na an mag-asikaso kan mga bagay-bagay. * O tibaad pilion kaini na magin presente mantang nagtatao nin konseho an elder. Asin, arog kan sinambit sa  parapo 3, may mga sitwasyon na tibaad mas marahay kun may edad nang sister an magkonseho sa sarong hoben na sister.

¹² May saro pang bagay na dapat pag-isipan. Puwedeng haputon kan sarong elder an saiyang sadiri, ‘Ako daw an pinakaangay na magtao nin  konseho, o mas magigin epektibo kun ibang tawo an matao kaiyan?’ Halimbawa, tibaad mas madali para sa sarong indibidwal na hababa an paghiling sa sadiri na akuon an konseho nin sarong elder na nakamati man nin arog kaiyan kisa duman sa dai man nakaeksperyensiya kaiyan. An elder na nakamati man nin arog kaiyan posibleng marhay na mas makapahiling nin empatiya, asin posibleng mas madaling akuon an saiyang sasabihon. Alagad, an gabos na elder may responsabilidad na pakusugon asin dagkahon an mga tugang na gumibo nin ano man na mga pagbabago na hinahagad kan Kasuratan. Kaya an pinakamahalaga iyo na maitao an konseho, dawa pa an elder na nagtatao kaiyan dai nagkaigwa nin kaparehong eksperyensiya.

13-14. Taano ta mahalaga na magdangog an sarong elder?

¹³Magin andam na magdangog. Kun an sarong elder nag-aandam sa pagtao nin konseho, dapat niyang ihapot sa saiyang sadiri: ‘Ano an aram ko sa sitwasyon kan tugang? Kumusta siya ngunyan? May mga inaagihan daw siyang problema na tibaad dai ko aram? Ano an pinakakaipuhan niya ngunyan?’

¹⁴ An prinsipyo na nasa Santiago 1:19 aplikado nanggad sa mga nagtatao nin konseho. Nagsurat si Santiago: “An lambang saro dapat na andam tulos na magdangog, dai tulos nagtataram, dai tulos naaanggot.” Tibaad hunaon kan sarong elder na aram niya na kun ano talaga an sitwasyon, pero aram niya daw talaga? Ipinapagirumdom sato kan Talinhaga 18:13: “Pag an siisay man minasimbag sa sarong bagay bago niya madangog an mga totoong detalye, kamangmangan iyan asin makasusupog.” Pinakamarahay na makua niya an mga detalye sa mismong tatawan nin konseho. Kaya kaipuhan kan elder na magdangog nguna bago magtaram. Girumdumon an leksiyon na nanudan kan elder na sinambit sa introduksiyon kan artikulong ini. Narealisar niya na imbes na ipakipag-ulay tulos an impormasyon na napag-andaman niya, hinapot niya kutana an sister kan mga hapot na arog kan: “Kumusta ka na?” “Ano an puwede kong maitabang?” Kun an mga elder matao nin panahon para maaraman kun ano talaga an sitwasyon, mas posibleng marhay na makatabang asin makapakusog sinda sa mga tugang.

15. Paano maiaaplikar kan mga elder an prinsipyo na nasa Talinhaga 27:23?

¹⁵Midbidon na marhay an aripumpon. Arog kan sinambit sa kapinunan, an epektibong konseho bako lang basta pagbasa nin nagkapirang teksto o pagtao nin saro o duwang suhestiyon. Kaipuhan na mamatian kan mga tugang na nagmamalasakit kita sa sainda, na nasasabutan ta sinda, asin na gusto ta sindang tabangan. (Basahon an Talinhaga 27:23.) Dapat na gibuhon kan mga elder an saindang pinakamakakaya tanganing magin dayupot sa saindang mga tugang.

16. Ano an makakatabang sa mga elder para makatao nin epektibong konseho?

¹⁶ Siguradong lilikayan kan mga elder na makatao nin impresyon na kinakaulay lang ninda an mga tugang pag kaipuhan na magtao nin  konseho, saka kun nakagibo an mga ini nin sala. Imbes, regular na kinakaulay kan mga elder an mga tugang, na ipinapamati an saindang pagmalasakit lalo na pag may mga problemang inaagihan an mga ini. “Kun gigibuhon mo iyan,” an sabi kan sarong eksperyensiyadong elder, “magigin amigo mo sinda. Dangan pag kaipuhan mo nang magtao nin konseho, magigin madali na sa saimo na gibuhon iyan.” Asin mas magigin madali man sa tinatawan mo nin konseho na akuon iyan.

17. Nuarin lalo nang kaipuhan kan elder na magin mapasensiya asin mabuot?

¹⁷Magin mapasensiya asin mabuot. Kaipuhan na magin mapasensiya asin mabuot lalo na kun sa primero habong akuon kan saro an basado sa Bibliyang konseho. Dapat na mag-ingat an sarong elder sa tendensiya na mairitar kun dai tulos akuon o sunudon an saiyang konseho. Sinasabi kan sarong propesiya mapadapit ki Jesus: “An nabaring tambo dai niya rurunuton, asin an mitsang madali nang mapalsok dai niya papalsukon.” (Mat. 12:20) Kaya sa personal na pamibi, puwedeng hagadon ki Jehova kan sarong elder na bendisyunan an tugang na nangangaipo nin konseho asin tabangan ini na masabutan an dahilan kan konseho asin iaplikar iyan. Tibaad kaipuhan kan tugang na tinatawan nin konseho na isip-isipon nguna an sinasabi sa saiya. Kun an elder mapasensiya saka mabuot, an tugang na hinihinguwang tabangan mas makakapagpokus sa mensahe, bako sa paagi nin pagkonseho saiya. Siyempre, an konseho dapat na pirming basado sa Tataramon nin Diyos.

18. (a) Sa pagtao nin konseho, ano an dapat tang tandaan? (b) Arog kan mahihiling sa ritrato saka sa kahon, ano an pinag-uulayan kan mga magurang?

¹⁸Makanuod sa mga sala mo. Bako kitang perpekto kaya dai ta man perpektong maiaaplikar an mga suhestiyon sa artikulong ini. (Sant. 3:2) Makakagibo kita nin sala. Pero kun mangyari man iyan, hinguwahon tang makanuod diyan. Kun namamati kan mga tugang na namumutan ta sinda, posibleng marhay na magin madali sainda na patawadon kita kun makulgan ta sinda dahil sa sinabi o ginibo ta.—Hilingon man an kahon na “Pagirumdom sa mga Magurang.”

19. Paano ta mapapaugma an puso kan satong mga tugang?

¹⁹ Arog kan nasabutan niyato, bakong madali na makapagtao nin epektibong konseho. Bako kitang perpekto, asin iyo man idtong mga tinatawan ta nin konseho. Tandaan an mga prinsipyo na napag-ulayan ta sa artikulong ini. Siguraduhon na tama an saimong motibo sa pagtao nin konseho. Siguraduhon man na talagang kinakaipuhan an konseho asin na ika an pinakaangay na magtao kaiyan. Bago magtao nin konseho, maghapot asin magdangog na marhay tanganing masabutan mo kun ano talaga an sitwasyon kan tatawan mo nin konseho. Hinguwahon na masabutan an saiyang kaisipan. Magin mabuot asin hinguwahon na magin dayupot sa mga tugang. Tandaan an satong pasuhan: Gusto ta na an satong konseho bako lang na magin epektibo kundi ‘nagpapaugma man sa puso.’—Tal. 27:9.