1. Anong marahayon na kuwalidad an mahihiling ta sa mga lingkod ni Jehova?

IHINULA kan Bibliya na an mga lingkod nin Diyos “gikan sa buot na mapresentar kan saindang sadiri” para paglingkudan si Jehova mantang sinusunod an paggiya kan Aki niya. (Sal. 110:3) Nauutob na nanggad ngunyan an propesiyang iyan. Kada taon, an maigot na mga lingkod ni Jehova naggagamit nin ginatos na milyon na oras sa gibuhon na paghuhulit. Boluntaryo nindang ginigibo iyan asin sa sadiri nindang gastos. Nagtatao man sinda nin panahon para tabangan an saindang mga kapagtubod sa pisikal, emosyonal, asin espirituwal na paagi. An nombradong mga brother naggagamit nin dai mabilang na mga oras sa pag-andam kan saindang mga kabtang sa mga pagtiripon asin sa pagpastor sa mga kapagtubod. Ano an nagpapahiro sa mga lingkod ni Jehova para gibuhon an gabos na ini? Pagkamuot—an saindang pagkamuot ki Jehova asin sa kapwa.—Mat. 22:37-39.

2. Arog kan sinasabi sa Roma 15:1-3, anong halimbawa an ipinahiling ni Jesus?

² Nagpahiling si Jesus nin marahayon na halimbawa sa pag-inot sa kapakanan kan iba kisa sa saiyang sadiri. Ginigibo ta an satong pinakamakakaya na magsunod sa mga lakad niya. (Basahon an Roma 15:1-3.) Makikinabang an mga nag-aarog sa saiya. Sinabi ni Jesus: “Igwang urog na kaugmahan sa pagtao kisa sa pag-ako.”—Gibo 20:35.

3. Ano an pag-uulayan ta sa artikulong ini?

³ Sa artikulong ini, pag-uulayan ta an pira sa ginibong pagsasakripisyo  ni Jesus para paglingkudan an iba asin kun paano ta maaarog an halimbawa niya. Pag-uulayan ta man kun paano kita magkakaigwa nin urog na pagmawot na paglingkudan an iba.

4. Paano ininot ni Jesus an kapakanan kan iba kisa sa saiyang sadiri?

⁴Dawa pagal, tinabangan ni Jesus an iba. Pag-isipan kun ano an ginibo niya kan may nag-arabot na dakulon na tawo para mahiling siya sa may gilid nin bukid, na posibleng harani sa Capernaum. Magdamlag kaidtong namibi si Jesus. Siguradong pagal-pagal siya, pero kan mahiling niya an mga tawo, nahirak siya sa mga pobre asin sa mga may hilang na yaraon duman. Dai niya lang pinaumayan sinda kundi itinao man niya an saro sa pinakanakakamotibar na pampublikong diskurso kasuarin man—an Sermon sa Bukid.—Luc. 6:12-20.

5. Paano inaarog kan mga payo nin pamilya an pagigin mapagsakripisyo ni Jesus pag pagal sinda?

⁵Kun paano inaarog si Jesus kan mga payo nin pamilya. Imahinaron an senaryong ini: Pagkatapos nin maghapon na trabaho, an sarong payo nin pamilya nagpuli sa harong na pagal-pagal. Maski ngani nasusugutan siya na kanselaron nguna an saindang Pampamilyang Pagsamba sa bangging iyan, nakimahirak siya ki Jehova para sa kusog na makapanginot sa pag-adal. Sinimbag ni Jehova an pamibi niya, asin naipadagos an pag-adal arog kan dati. Nakanuod an saindang mga aki nin mahalagang leksiyon kan bangging iyan—na para sa saindang mga magurang, an espirituwal na mga bagay an pinakapanginot.

6. Magtao nin halimbawa kun paano ni Jesus isinakripisyo an saiyang panahon para tabangan an iba.

⁶Nagtao si Jesus kan saiyang panahon para sa iba. Naiimahinar mo daw an namatian ni Jesus kan maaraman niyang pinugutan an amigo niyang si Juan na Parabawtismo? Siguradong namundong marhay kaidto si Jesus. Sinasabi kan Bibliya na kan madangog ni Jesus an manungod sa paggadan ki Juan, “naghali siya duman na nakasakay sa bangka pasiring sa sarong puwerang lugar tanganing makapagsolo.” (Mat. 14:10-13) Masasabutan ta kun taano ta gusto niyang magsolo. Kadaklan sa sato mas gustong magluwas nin kamunduan na solo sana. Pero dai iyan nagibo ni Jesus ta bago pa man siya makaabot sa puwerang lugar na idto, nagkairinot na duman su mga tawo. Ano an nagin  reaksiyon ni Jesus? Inisip niya an pangangaipo ninda, asin “nahirak siyang marhay” sa sainda. Nahiling niya na kaipuhan nindang marhay an espirituwal na pampakusog, asin tulos niyang tinabangan sinda. Sa katunayan, “nagpuon siyang magtukdo sa sainda [bako nin dikit na bagay, kundi] nin dakul na bagay.”—Mar. 6:31-34; Luc. 9:10, 11.

7-8. Magtao nin halimbawa na nagpapahiling kun paano inaarog si Jesus kan mamumuton na mga elder sa oras nin pangangaipo.

⁷Kun paano inaarog si Jesus kan mamumuton na mga elder. Inaapresyar tang marhay an ginigibo kan mapagsakripisyong mga elder para sa sato! An dakul sa mga ginigibo nindang iyan dai nahihiling kan kadaklan sa kongregasyon. Halimbawa, kun may medikal na emerhensiya, dali-daling nagpapasiring sa ospital an mga miyembro kan Hospital Liaison Committee para tabangan an saindang mga kapagtubod. Sa parati, nangyayari an mga emerhensiyang iyan sa kamatangaan nin banggi! Pero dahil nahihirak sinda sa saindang mga tugang na nasa kagipitan, iniinot kan mamumuton na mga elder na iyan, kaiba kan saindang mga pamilya, an kapakanan kan saindang mga kapagtubod kisa sa saindang sadiri.

⁸ Nagtatabang man an mga elder sa pagtugdok nin mga Kingdom Hall asin iba pang mga pasilidad saka sa pagresponde pag may kalamidad. Asin kadakul na oras an ginagamit kan mga elder sa satong kongregasyon para sa pagtukdo, pagpakusog, asin pagsuporta sa sato. Angay nanggad sa satong komendasyon an mga tugang na ini saka an saindang pamilya. Lugod na bendisyunan ni Jehova an saindang pagsasakripisyo! Siyempre, arog kan siisay man sa sato, kaipuhan kan mga elder na magin balanse. Dai ninda dapat ubuson an saindang panahon sa siring na teokratikong mga aktibidad na huli kaiyan napapabayaan  na ninda an pangangaipo kan saindang pamilya.

9. Uyon sa Filipos 2:4, 5, ano an dapat na magin kaisipan kan gabos na Kristiyano?

⁹ Basahon an Filipos 2:4, 5. Gabos kita, bako lang an mga elder, puwedeng makanuod na magin mapagsakripisyo arog ni Jesus. Sinasabi kan Bibliya na “nagpakang-uripon siya.” (Fil. 2:7) Pag-isipan an manunudan ta diyan. An sarong mapagpahalagang uripon, o lingkod, mahanap nin mga oportunidad para mapaugma an saiyang kagurangnan. Bilang uripon ni Jehova saka lingkod kan saimong mga tugang, siguradong gusto mo na mas magamit pa ni Jehova saka mas makapaglingkod sa saimong mga kapagtubod. Magigibo mo iyan paagi sa pagkonsiderar kan minasunod na mga suhestiyon.

10. Ano an mga puwede tang ihapot sa satong sadiri?

¹⁰Pag-isipan an saimong sabuot. Ihapot sa sadiri an arog kaining mga hapot: ‘Gurano ako kaandam na gumibo nin mga pagsasakripisyo para tabangan an iba? Halimbawa, ano an gigibuhon ko kun pakiulayan ako na bisitahon an sarong may edad nang brother o sunduon an sarong may edad nang sister pasiring sa pagtiripon? Handa daw akong magtabang pag nangangaipo nin mga boluntaryo sa paglinig sa lugar kan kumbensiyon o sa pagmentenar nin Kingdom Hall?’ Kaiba sa gabos na idinusay ta ki Jehova an gabos na igwa kita. Kaya nauugma siya kun mapagsakripisyo niyatong itinatao an satong panahon saka materyal na mga bagay para tabangan an iba. Pag may mahiling kitang kaipuhan na pauswagon, ano an puwede tang gibuhon?

11. Paano makakatabang sa sato an pamibi para urog pa kitang magin mapagsakripisyo?

¹¹Udok na mamibi ki Jehova. Paano kun may narisa kang kaipuhan mong pauswagon pero mayo kang motibasyon na gibuhon an kinakaipuhan na mga pagbabago? Kun arog kaiyan, udok na mamibi ki Jehova. Magin onesto. Sabihon ki Jehova an namamatian mo, asin hagadon saiya na tawan ka kan “pagmawot saka kan kakayahan na gumibo.”—Fil. 2:13.

12. Paano makakatabang sa kongregasyon an mga hoben na bawtisadong brother?

¹² Kun saro kang hoben na bawtisadong brother, hagadon ki Jehova na tabangan kang magkaigwa nin pagmawot na urog pang makapaglingkod sa kongregasyon. Sa nagkapirang nasyon, mas dakul an mga elder kisa sa mga ministeryal na lingkod, asin dakul sa mga ministeryal na lingkod na iyan an medyo maedad na. Mantang padagos na nagdadakula an satong organisasyon, kaipuhan ta nin mas dakul pang hoben na mga brother na makakatabang sa pangangataman sa banwaan ni Jehova. Kun magigin handa ka na maglingkod sain man kinakaipuhan an saimong tabang, magigin maugma ka. Taano? Huling mapapaugma mo si Jehova, magkakaigwa ka nin marahay na reputasyon sa mga tugang, asin mamamatian mo an pagkakontento huli sa paglilingkod sa iba.

13-14. Ano an mga puwede tang gibuhon para tabangan an satong mga tugang? (Hilingon an ritrato sa cover.)

¹³Magin mapagrisa sa pangangaipo kan iba. Sinadol ni apostol Pablo an mga Hebreo: “Dai nindo paglingawan na gumibo nin marahay asin na maghiras sa iba kan kun ano an igwa kamo, huling nauugmang marhay an Diyos sa siring na mga atang.” (Heb. 13:16) Praktikal nanggad na sadol ini! Dai nahaloy pagkatapos na maresibi an surat na iyan, kinaipuhan kan mga Kristiyanong idto sa Judea na bayaan an saindang mga harong, negosyo, pati an saindang bakong kapagtubod na mga kapamilya asin kinaipuhan nindang “dumulag na pasiring sa kabukidan.” (Mat. 24:16) Siguradong kinaipuhan nindang marhay na magtinarabangan kan panahon na idto. Kun bago pa kaiyan inaaplikar na ninda an sadol ni Pablo na maghiras sa iba kun  ano an igwa sinda, mas magigin pasil sainda na matuod sa bago nindang buhay.

¹⁴ An mga tugang dai man pirming masabi sa sato kan mga pangangaipo ninda. Halimbawa, sarong brother an nagmumundo huli sa pagkagadan kan saiyang agom. Kaipuhan daw niya nin tabang sa pagluto, sa transportasyon, o sa mga gibuhon sa harong? Tibaad dai lang siya magsabi sato ta habo man niyang makaabala. Pero posibleng maapresyar niyang marhay kun kita na an maalok nin kinakaipuhan na tabang. Dai ta dapat isipon na may ibang matabang man saiya o na masabi na lang siya pag kaipuhan niya nin tabang. Haputon an sadiri, ‘Anong tabang an gusto kong itao sako kun ako an nasa sitwasyon niya?’

15. Ano an dapat tang gibuhon kun gusto tang makatabang sa iba?

¹⁵Magin madaling dulukon. Siguradong midbid mo an mga tugang sa kongregasyon nindo na pirming andam na magtabang sa iba. Dai lamang ninda ipinapamati sa sato na naaabala ta sinda. Aram niyato na maaasahan ta sinda pag kaipuhan ta nin tabang, asin gusto nanggad niyato na magin arog man ninda! Si Alan na sarong elder na nasa 40 anyos na gustong magin madaling dulukon. Sa paghurop-hurop sa halimbawa ni Jesus, sinabi ni Alan: “Dawa sibot si Jesus, napaparani saiya an mga tawo ano man an saindang edad saka dai sinda nag-aalangan na maghagad saiya nin tabang. Aram ninda na talagang nagmamalasakit siya sa sainda. Gusto ko talagang magin arog ni Jesus asin mamidbid bilang sarong tawo na madaling dulukon, mainamigo, saka mapagmalasakit.”

16. Paano makakatabang sato an pag-aplikar kan Salmo 119:59, 60 na maarog na marhay an halimbawa ni Jesus?

¹⁶ Dai kita dapat madisganar kun dai ta perpektong maarog si Jesus. (Sant. 3:2) An sarong estudyanteng pintor dai perpektong maaarog an gibo kan saiyang maestrong pintor. Pero mantang nakakanuod an estudyante sa mga sala  niya asin hinihinguwang maarog an saiyang maestro sagkod sa pinakamakakaya niya, padagos siyang mag-uuswag. Sa kaparehong paagi, kun iaaplikar ta an mga nanudan ta sa satong personal na pag-adal sa Bibliya, na ginigibo an pinakamakakaya na baguhon an ano man na kaluyahan ta, maaarog niyato an halimbawa na ipinahiling sa sato ni Jesus.—Basahon an Salmo 119:59, 60.

17-18. Anong mga pakinabang an makakamtan ta mantang inaarog ta an pagigin mapagsakripisyo ni Jesus?

¹⁷ An satong pagigin mapagsakripisyo puwedeng makaulakit. An elder na si Tim nagsabi: “May mga hoben na brother kami na nag-uswag asin nanombrahan bilang mga ministeryal na lingkod—an iba ngani hobenon pa—ta an sarong dahilan iyo na inaarog kaya ninda an nahihiling nindang pagigin andam na maglingkod kan iba. An pagigin mapagsakripisyo ninda nakatabang sa samong kongregasyon asin nagtao nin urog na suporta sa mga elder.”

¹⁸ Sa kinaban ngunyan, kadakul nin tawong makasadiri. Pero ibang-iba nanggad an mga lingkod ni Jehova. Napahiro kita kan pagigin mapagsakripisyo ni Jesus, asin determinado kita na arugon an saiyang halimbawa. Totoo, dai ta perpektong masusundan an saiyang mga lakad, pero puwede tang “sundan [na] marhay an saiyang mga lakad.” (1 Ped. 2:21) Mantang ginigibo ta an satong pinakamakakaya na arugon an pagigin mapagsakripisyo ni Jesus, mamamatian ta man an kaugmahan na resulta kan pag-uyon ni Jehova.