1-2. (a) Taano ta dakul ngunyan an nasasakitan na magtiwala sa mga nasa awtoridad? (b) Ano an pag-uulayan ta sa artikulong ini?

SA NGUNYAN, dakul an nasasakitan na magtiwala sa mga nasa awtoridad. Nahihiling kaya ninda na sa parati pinapaburan kan legal asin pulitikal na sistema an mga tawong mayaman saka makapangyarihan, asin ipinapanguri an hustisya sa mga pobre. Tama nanggad an sinasabi kan Bibliya: “An tawo nananakop sa tawo sa saiyang ikakapahamak.” (Ecl. 8:9) Apuwera kaiyan, may mga lider nin relihiyon na naggigibo nin maraot kaya may mga tawo na nawawaran na nin tiwala sa Diyos. Kaya huli kaiyan, pag may gustong makipag-adal sato nin Bibliya, bako nanggad madali para sa sato na tabangan siyang manudan na magtiwala ki Jehova asin sa Saiyang mga representante digdi sa daga.

² Siyempre, bako sana an mga tinutukduan sa Bibliya an kaipuhan na makanuod na magtiwala ki Jehova asin sa saiyang organisasyon. Dawa an mga haloy na sa katotoohan dapat na maghinguwang dai magluya an pagtitiwala na an mga pamamaagi ni Jehova iyo pirmi an pinakamarahay. Kun minsan, napapaatubang kita sa mga sitwasyon na puwedeng makabalo kan satong pagtitiwala ki Jehova. Sa artikulong ini, pag-uulayan ta an tulong sitwasyon na puwedeng makabalo kan satong pagtubod: (1) pag nakakabasa kita nin sarong partikular na pagkasaysay sa Bibliya, (2) pag nakakaresibi kita nin instruksiyon hali sa organisasyon ni Jehova, asin (3) pag napapaatubang na kita sa mga kadipisilan na mangyayari sa maabot.

3. Paano puwedeng mabalo kan partikular na mga pagkasaysay sa Bibliya an satong pagtitiwala ki Jehova?

 ³ Mantang binabasa ta an Tataramon nin Diyos, tibaad may mga  hapot kita manungod sa paagi nin pagtrato ni Jehova sa nagkapirang indibidwal asin sa mga desisyon na ginibo niya. Halimbawa, sa libro nin Mga Bilang, mababasa niyato na sinentensiyahan ni Jehova nin kagadanan an sarong Israelita na nangua nin panggatong na kahoy sa aldaw nin Sabbath. Pero mga siglo an naglihis, sa ikaduwang libro nin Samuel, mababasa niyato na pinatawad ni Jehova si Hading David sa ginibo kaining pagsambay asin paggadan. (Bil. 15:32, 35; 2 Sam. 12:9, 13) Kaya tibaad maisip ta, ‘Taano daw ta pinatawad ni Jehova si David sa paggadan asin pagsambay kaini, mantang idto lugod na tawong naggibo nin garo dai man gayong seryosong kasalan sinentensiyahan niya nin kagadanan?’ Para masimbag iyan, pag-isipan an tulong punto na magayon na tandaan ta pag nagbabasa kita nin Bibliya.

4. Paano nakakapakusog sa satong pagtitiwala sa mga paghusgar ni Jehova an Genesis 18:20, 21 asin Deuteronomio 10:17?

⁴Dai pirming itinatao kan Bibliya an gabos na detalye. Halimbawa, aram niyato na sinserong pinagsulsulan ni David an mga ginibo niya. (Sal. 51:2-4) Pero ano daw an sabuot kaidtong tawo na nagbalga sa katugunan nin Sabbath? Pinagbasulan daw niya an ginibo niya? May mga binalga na daw siya kaidto na mga katugunan ni Jehova? May binaliwala na daw siya o dai pa ngani sinunod na mga patanid? Warang sinasabi an Bibliya. Minsan siring, makakasigurado kita sa bagay na ini: Si Jehova “dai lamang naggigibo nin inhustisya.” (Deu. 32:4) Bago magdesisyon, inaaram niya an bilog na detalye. Dai siya nagdedesisyon huli sa mga sabi-sabi, pagpapalain-lain, o sa ano man na parating nakakaapektar sa paghusgar nin tawo. (Basahon an Genesis 18:20, 21; Deuteronomio 10:17.) Mantang mas namimidbid ta si Jehova asin naaaraman an mga pamantayan niya, mas nagkukusog man an satong pagtitiwala sa saiyang mga paghusgar. Dawa kun may mga hapot kita manungod sa sarong salaysay sa Bibliya na dai pa masisimbag sa ngunyan, igo na nanggad an naaaraman ta manungod sa satong Diyos kaya makakasigurado kita na “matanos si Jehova sa gabos na dalan niya.”—Sal. 145:17.

5. Paano nakakaapektar sa satong paghusgar an pagkabakong perpekto? (Hilingon man an kahon na “ An Pagkabakong Perpekto Nakakaapektar sa Pagmansay Ta sa Hustisya.”)

⁵An satong paghusgar apektado nin pagkabakong perpekto. Ginibo kita nin Diyos uyon sa  ladawan niya, kaya gusto ta nanggad na tinatratar nin tama an mga tawo. (Gen. 1:26) Pero dahil bako kitang perpekto, puwedeng masala an satong paghusgar, dawa pa iniisip tang aram ta an gabos na detalye. Halimbawa, girumdumon an nagin sabuot ni Jonas sa nagin desisyon ni Jehova na pahilingan nin pagkahirak an mga taga Nineve. Dai nanggad iyan nagustuhan ni Jonas. (Jon. 3:10–4:1) Pero pag-isipan an nagin resulta. Naligtas an labing 120,000 na nagsulsol na mga taga Nineve! Sa katapos-tapusi, si Jonas—bako si Jehova—an kaipuhan na itanos.

6. Taano ta dai kaipuhan ni Jehova na ipaliwanag sa sato an mga desisyon niya?

⁶Dai kaipuhan ni Jehova na ipaliwanag sa mga tawo an mga desisyon niya. Totoo, tinugutan kaidto ni Jehova na sabihon kan mga lingkod niya an saindang sabuot manungod sa mga desisyon na ginibo niya o gigibuhon pa sana. (Gen. 18:25; Jon. 4:2, 3) Asin kun minsan, ipinapaliwanag niya iyan. (Jon. 4:10, 11) Minsan siring, dai obligado si Jehova na magpaliwanag sa sato. Bilang satong Kaglalang, dai niya kaipuhan an pag-aprubar ta, bago man siya humiro o pagkatapos niyang gibuhon an sarong bagay.—Isa. 40:13, 14; 55:9.

7. Anong kadipisilan an puwedeng mapaatubang sa sato, asin taano?

⁷ Siguradong lubos kitang mauyon na pirming tama an ginigibo ni Jehova. Minsan siring, tibaad magin dipisil para sa sato na magtiwala sa mga tawong representante niya. Tibaad magduda kita kun baga an mga may awtoridad sa organisasyon ni Jehova talagang naghihiro kauyon kan paggiya Niya o naghihiro sinda sa sadiri sana nindang kaisipan. Posibleng arog kaiyan an kaisipan kan nagkapira kaidtong mga panahon kan Bibliya. Pag-isipan an mga halimbawa na sinambit sa  parapo 3. Tibaad may nag-isip na kapamilya kan lalaking nagbalga sa katugunan nin Sabbath kun baga talagang nagkonsulta si Moises ki Jehova bago ipataw an sentensiyang kagadanan. Asin tibaad saro sa amigo ni Urias na Hiteo, na an agom nagsambay ki David, an posibleng nag-isip na ginamit ni David an saiyang posisyon bilang hadi tanganing makalibre sa padusa na maninigo saiya. Iyo, dai ta masasabing nagtitiwala kita ki Jehova kun mayo kitang tiwala sa mga representante niya digdi sa daga—an mga tawong pinagtitiwalaan ni Jehova.

8. Ano an pagkakapareho kan sinasambit sa Gibo 16:4, 5 asin kan pagpunsiyonar kan Kristiyanong kongregasyon ngunyan?

⁸ Sa ngunyan, ginigiyahan ni Jehova an daganon na kabtang kan saiyang organisasyon paagi sa “maimbod asin mapagmansay na uripon.” (Mat. 24:45) Arog kan namamahalang grupo kan inot na siglo, an uripon na ini an nanginginot sa mga lingkod nin Diyos sa bilog na kinaban asin nagtatao nin instruksiyon sa mga elder sa kongregasyon. (Basahon an Gibo 16:4, 5.) Dangan, sinisigurado kan mga elder na nasusunod kan mga kongregasyon an instruksiyon na iyan. Ipinapahiling tang nagtitiwala kita sa mga pamamaagi ni Jehova paagi sa pagsunod sa mga instruksiyon na itinatao kan organisasyon asin kan mga elder.

9. Sa anong sitwasyon tibaad dai magin madali sa sato na suportaran an desisyon kan mga elder, asin taano?

⁹ Kun minsan, tibaad dai magin madali sa sato na suportaran an mga desisyon kan mga elder. Halimbawa, kaining mga nakaaging taon, dakul na kongregasyon asin sirkito an inorganisar giraray. Sa nagkapirang sitwasyon, pinakiulayan kan mga elder an mga parahayag na magbalyo sa ibang kongregasyon tanganing lubos na maokupar an mga tukawan sa satong mga Kingdom Hall. Kun pakiulayan kita na magbalyo sa ibang kongregasyon, tibaad dai magin madali sa sato na bayaan an mga amigo saka mga kapamilya ta. Aram tang dai man pinapasabngan nin Diyos an mga elder kun sain ninda puwedeng iasignar an  kada parahayag. Kaya puwedeng magin dipisil sa sato na sunudon an itinatao nindang instruksiyon. Pero nagtitiwala si Jehova sa mga elder sa paggibo kan mga desisyon na iyan, asin kaipuhan ta man na magtiwala sa sainda. *

10. Sigun sa Hebreo 13:17, taano ta dapat kitang makikooperar sa mga elder?

¹⁰ Taano ta dapat kitang makikooperar sa mga elder asin suportaran an mga desisyon ninda dawa dai kita pabor sa desisyon ninda? Huling sa paggibo kaiyan, nakakatabang kita na mapagdanay an pagkasararo kan banwaan nin Diyos. (Efe. 4:2, 3) Nagigin maugma an kongregasyon kun an gabos mapakumbabang nagsusunod sa mga desisyon na napagkauruyunan kan grupo nin kamagurangan. (Basahon an Hebreo 13:17.) Urog sa gabos, ipinapahiling niyato na nagtitiwala kita ki Jehova paagi sa pakikikooperar sa mga pinagkatiwalaan niya na mangataman sa sato.—Gibo 20:28.

11. Ano an makakatabang sa sato para mapakusog ta an satong pagtitiwala sa itinataong instruksiyon kan mga elder?

¹¹ Mapapakusog ta an satong pagtitiwala sa itinataong instruksiyon kan mga elder paagi sa pagsaisip na hinahagad ninda sa pamibi an banal na espiritu pag pinag-uulayan an mga bagay-bagay manungod sa kongregasyon. Pinag-iisipan man nindang marhay an konektadong mga prinsipyo sa Bibliya asin nagkokonsulta sa mga giyang itinatao kan organisasyon ni Jehova. Udok an pagmawot ninda na mapaugma si Jehova asin na makapagtao nin pinakamarahay na pangangataman sa mga lingkod niya. Aram kan maimbod na mga lalaking ini na maninimbag sinda sa Diyos sa saindang paagi nin pagkapot sa mga responsabilidad ninda. (1 Ped. 5:2, 3) Pag-isipan: Sa kinaban na ini na nababanga huli sa rasa, relihiyon, asin pulitika, an mga lingkod ni Jehova nagkakasararo sa pagsamba sa iyo sanang tunay na Diyos. Nagigin posible sana iyan huli sa bendisyon ni Jehova sa saiyang organisasyon!

12. Anong mga bagay an dapat na konsideraron kan mga elder sa pagdeterminar kun baga nagsusulsol an sarong indibidwal?

¹² Pinagkatiwalaan ni Jehova an mga elder nin magabat na paninimbagan na papagdanayon an kalinigan kan kongregasyon. Kun an sarong Kristiyano nakagibo nin magabat na kasalan, inaasahan ni Jehova sa mga elder na determinaran kun baga puwedeng magdanay sa kongregasyon an indibidwal na iyan. Apuwera sa iba pang bagay, kaipuhan nindang maaraman kun baga talagang pinagbabasulan kan indibidwal an ginibo niya. Puwedeng sabihon niya na nagsusulsol siya, pero ikinakaungis niya daw talaga an ginibo niya? Determinado daw siyang dai na utruhon an kasalan? Kun nagin dahilan kan pagkakasala an maraot na pag-iriba, handa daw siyang putulon an pakikiiba-iba sa sainda? May pagpamibing pinag-iisipan kan mga elder an mga detalye saka an sinasabi kan Kasuratan asin kinokonsiderar na marhay an sabuot kan nagkasala sa ginibo niya. Dangan nagdedesisyon sinda kun baga puwedeng magdanay sa kongregasyon an nagkasala. Sa nagkapirang kaso, an nagkasala kaipuhan na itiwalag.—1 Cor. 5:11-13.

13. Ano an tibaad maisip ta kun may amigo o kapamilya kitang matiwalag?

¹³ Paano puwedeng mabalo an satong pagtitiwala sa mga elder? Kun an natiwalag bako tang dayupot na amigo o kapamilya, tibaad madali sa sato na akuon an desisyon kan mga elder. Pero paano kun dayupot siya sa sato? Tibaad mahadit kita na ’baad dai nakonsiderar kan mga elder an gabos na detalye, o tibaad magduda kita kun baga talagang naghusgar sinda siring kan paghusgar ni Jehova. Ano an makakatabang sa sato na magkaigwa nin tamang pagmansay sa desisyon kan mga elder?

14. Ano an marahay na girumdumon ta kun napagdesisyunan kan mga elder na itiwalag an sarong amigo o kapamilya ta?

 ¹⁴ Marahay nanggad na girumdumon niyato na an pagtitiwalag areglo ni Jehova asin na para iyan sa kapakinabangan kan kongregasyon asin kan nagkasala. Kun an dai nagsusulsol na parakasala tutugutan na magdanay sa kongregasyon, puwede siyang magin nakakaraot na impluwensiya. (Gal. 5:9) Saka tibaad dai niya marealisar kun gurano kagabat kan kasalan niya, kaya dai siya gayong mapapahiro na baguhon an saiyang kaisipan asin paggawi tanganing makamtan giraray an pag-uyon ni Jehova. (Ecl. 8:11) Makakasigurado kita na pag nagdedesisyon kun dapat na itiwalag an sarong indibidwal, sineseryosong marhay kan mga elder an saindang paninimbagan. Aram ninda na, arog kan mga hukom sa suanoy na Israel, “naghuhusgar [sinda] bako para sa tawo kundi para ki Jehova.”—2 Cron. 19:6, 7.

15. Taano ta urog nang kaipuhan ta ngunyan na magtiwala sa mga instruksiyon ni Jehova?

¹⁵ Paparani na an katapusan kan sistemang ini nin mga bagay, kaya urog nang kaipuhan tang magtiwala sa mga pamamaagi ni Jehova. Taano? Sa panahon kan dakulang kasakitan, tibaad makaresibi kita nin mga instruksiyon na garo kakaiba, bakong praktikal, saka bakong rasonable. Siyempre, dai man kita personal na kakaulayon ni Jehova. Posibleng marhay na magtao siya nin instruksiyon paagi sa ninombrahan niyang mga representante. Magigin peligroso nanggad kun sa panahon na iyan mag-aalangan kita o pagdududahan ta iyan, na iniisip, ‘Hali daw talaga ki Jehova an instruksiyon na ini, o sadiring kaisipan sana iyan kan mga brother na nanginginot?’ Magtitiwala ka daw ki Jehova asin sa saiyang organisasyon sa kritikal na panahon na iyan? Depende iyan sa kun paano mo minamansay an teokratikong instruksiyon na itinatao sa sato ngunyan. Kun nagtitiwala ka sa mga itinataong instruksiyon ngunyan asin gikan sa buot na sinusunod iyan, posibleng marhay na arog man kaiyan an gigibuhon mo pag-abot kan dakulang kasakitan.—Luc. 16:10.

16. Paano puwedeng mabalo sa maabot an satong pagtitiwala sa paghukom ni Jehova?

¹⁶ May saro pa na marahay na pag-isipan ta—an paghukom ni Jehova sa katapusan kan sistemang ini nin mga bagay. Sa ngunyan, dai kita nawawaran nin paglaom sa mga tawo na bakong lingkod ni Jehova, kaiba na an satong bakong kapagtubod na mga kapamilya. Pero sa Armagedon, si Jehova, paagi ki Jesus, an pinal na madesisyon kan saindang kaaabtan. (Mat. 25:31-33; 2 Tes. 1:7-9) Bako kita an madesisyon kun siisay an papahilingan nin pagkahirak ni Jehova asin kun siisay an dai. (Mat. 25:34, 41, 46) Magtitiwala daw kita sa paghukom ni Jehova, o mapundo na kita sa paglilingkod saiya huling dai  kita uyon sa desisyon niya? Malinaw nanggad, kaipuhan tang pakusugon an satong pagtitiwala ki Jehova ngunyan tanganing lubos kitang magtitiwala sa saiya sa maabot.

17. Paano kita makikinabang sa paghukom ni Jehova sa katapusan kan sistemang ini nin mga bagay?

¹⁷ Imahinara na sana pag mahiling ta na sa bagong kinaban nin Diyos an mga resulta kan paghukom ni Jehova. Mawawara na an palsong relihiyon, pati na an mahanab na sistema nin komersiyo asin mga gobyerno na nang-aapi asin nagdadara nin grabeng pagsakit sa mga tawo sa bilog na kasaysayan. An hilang, paggurang, asin pagkagadan nin mga mahal sa buhay dai ta na maeeksperyensiyahan. Si Satanas asin an mga demonyo ibibilanggo sa laog nin sangribong taon. Mawawara na an mga epekto kan saindang rebelyon. (Kap. 20:2, 3) Sa panahon na iyan, ikakaugma ta nanggad na marhay na nagtiwala kita sa mga pamamaagi ni Jehova!

18. Anong mga leksiyon an manunudan ta sa halimbawa kan mga Israelita, arog kan mababasa sa Bilang 11:4-6 asin 21:5?

¹⁸ Pag yaon na kita sa bagong kinaban nin Diyos, posible pa daw na mabalo an satong pagtitiwala sa mga pamamaagi ni Jehova? Halimbawa, pag-isipan an nangyari dai nahaloy kan makabutas na an mga Israelita sa pagkauripon sa Ehipto. May mga nagpuon na magreklamo huling hinahanap-hanap ninda an mga pagkakan na nakakakan ninda kaidto sa Ehipto, asin ikinabaldi nindang marhay an manna na itinatao sainda ni Jehova. (Basahon an Bilang 11:4-6; 21:5.) Posible daw na magkaigwa man kita nin arog kaiyan na kaisipan pagkatapos kan dakulang kasakitan? Dai ta aram kun gurano kadakul na trabaho an kinakaipuhan para linigon an daga asin padikit-dikit na gibuhon iyan na paraiso. Posibleng marhay na kadakul nin gibuhon asin dai magigin madali an buhay sa primero. Mareklamo daw kita sa mga itatao ni Jehova sa panahon na iyan? Sarong bagay an sigurado: Kun magigin mas mapagpahalaga kita sa mga itinatao sa sato ni Jehova ngunyan, mas posibleng marhay man na magigin arog kita kaiyan sa maabot.

19. Paano mo susumaryuhon an panginot na mga punto sa artikulong ini?

¹⁹ An mga pamamaagi ni Jehova iyo pirmi an tama. Dapat na magin kumbinsido kita diyan. Dapat man na magtiwala kita sa mga pinagkakatiwalaan ni Jehova na magtao kan saiyang mga instruksiyon. Nungkang paglingawan an mga tataramon na sinabi ni Jehova paagi sa saiyang propetang si Isaias: “An saindong kusog yaon sa pagdanay na kalmado asin pagpahiling nin tiwala.”—Isa. 30:15.