1. Ano an kamugtakan ni apostol Juan sa pagtatapos kan inot na siglo C.E.?

SA PAGTATAPOS kan inot na siglo C.E., nasa dipisilon na kamugtakan si apostol Juan. Gurang na siya, nakapreso sa isla nin Patmos, asin posibleng marhay na siya na sana an buhay na apostol. (Kap. 1:9) Aram niya na an mga nagkokontra ilinalagalag an mga kongregasyon asin nagigin dahilan nin pagkabaranga. Garo baga madali nang mawara an tunay na mga Kristiyano.—Jud. 4; Kap. 2:15, 20; 3:1, 17.

2. Sigun sa Kapahayagan 7:9-14, anong nakakaugmang makahulang bisyon an itinao ki Juan? (Hilingon an ritrato sa cover.)

² Sa ibong kan nakakamundong mga kamugtakan na ini, nakaresibi si Juan nin sarong nakakaugmang makahulang bisyon. Diyan, may mga anghel na sinabihan na pugulan an mapandestrosong mga duros kan grabeng kasakitan sagkod na dai pa natatatakan an sarong grupo nin mga uripon. (Kap. 7:1-3) An grupong iyan kompuwesto nin 144,000 na mamamahala kaiba ni Jesus sa langit. (Luc. 12:32; Kap. 7:4) Dangan sinambit ni Juan an saro pang grupo, na sa kadakulaan kaiyan napakurahaw siya: “Uya!”—sarong ekspresyon na puwedeng magparisa na nasurpresa siya sa sarong dai inaasahan na bagay na nahiling niya. Ano an nahiling ni Juan? “Sarong dakulang kadaklan, na dai kayang bilangon nin siisay man, hali sa gabos na nasyon asin tribo asin banwaan saka lengguwahe, na nakatindog sa atubangan kan trono asin sa atubangan kan Kordero.” (Basahon an Kapahayagan 7:9-14.) Imahinara kun gurano nanggad kaugma si Juan na maaraman na dai mabilang na tawo an magsasagibo nin tunay na pagsamba sa maabot na panahon!

3. (a) Taano ta makakapakusog sa satong pagtubod an bisyon ni Juan? (b) Ano an manunudan ta sa artikulong ini?

³ Siguradong napakusog kan bisyon na iyan an pagtubod ni  Juan. Lalo na nanggad na mapapakusog kaiyan an satong pagtubod, huling nabubuhay kita sa panahon kan kautuban kan bisyon! Nahiling niyato an pagtipon sa milyon-milyon na tawo na naglalaom na makaligtas sa grabeng kasakitan asin mabuhay nin daing sagkod sa daga. Sa artikulong ini, maaaraman ta kun paano ihinayag ni Jehova sa saiyang mga lingkod kun siisay an dakulang kadaklan labing walong dekada na an nakaagi. Dangan pag-uulayan ta an duwang aspekto kan grupong iyan: (1) an kadakulaan asin (2) pagigin manlain-lain kan mga miyembro kaiyan. Mapapakusog kaini an pagtubod kan gabos na gustong magin kabilang sa binendisyunan na grupong iyan.

4. Anong katotoohan sa Kasuratan an dai nasasabutan kan Kakristiyanuhan, asin paano napapalain an mga Estudyante sa Bibliya sa bagay na ini?

⁴ An Kakristiyanuhan sa pangkagabsan dai nagtutukdo kan katotoohan sa Kasuratan na maabot an panahon na an makinuyog na mga tawo mabubuhay nin daing sagkod sa daga. (2 Cor. 4:3, 4) Ngunyan, itinutukdo kan kadaklan na relihiyon sa Kakristiyanuhan na gabos na marahay na tawo mapasiring sa langit pag nagadan sinda. Alagad, bakong arog kaiyan an itinukdo kan sadit na grupo nin mga Estudyante sa Bibliya na nagpupublikar kaidto kan The Watch Tower puon kan 1879. Nasabutan ninda na ibabalik nin Diyos an Paraiso sa daga asin na milyon-milyon na makinuyog na tawo an mabubuhay digdi sa daga—bako sa langit. Minsan siring, haloy bago ninda nasabutan nin malinaw kun sairisay an makinuyog na mga tawong ini.—Mat. 6:10.

5. Ano an pakasabot kan mga Estudyante sa Bibliya mapadapit sa 144,000?

⁵ Siyempre, nasabutan man kan mga Estudyante sa Bibliya hali sa Kasuratan na may nagkapira na ‘babakalon hali sa daga’ tanganing mamahala kaiba ni Jesus sa langit. (Kap. 14:3) An grupong iyan magigin kompuwesto nin 144,000 na maigot asin dusay na mga Kristiyano na maimbod na naglingkod sa Diyos kan nabubuhay sinda sa daga. Ano man an pakasabot ninda dapit sa dakulang kadaklan?

6. Ano an pakasabot kan mga Estudyante sa Bibliya mapadapit sa dakulang kadaklan?

⁶ Sa saiyang bisyon, nahiling ni Juan an grupong iyan na “nakatindog sa atubangan kan trono asin sa atubangan kan Kordero.” (Kap. 7:9) Huli sa mga tataramon na iyan, nagkongklusyon an mga Estudyante sa Bibliya na arog kan 144,000, maistar sa langit an dakulang kadaklan. Kun an 144,000 asin an dakulang kadaklan mabubuhay sa langit, ano an pagkakalain kan duwa? Inisip kan mga Estudyante sa Bibliya na an dakulang kadaklan siguradong kompuwesto nin mga Kristiyano na dai lubos na nagin makinuyog sa Diyos kan nabubuhay sinda sa daga. Dawa masasabi man na malinig an saindang pamumuhay, an nagkapira sa sainda tibaad nagdanay sa mga relihiyon kan Kakristiyanuhan. Inisip kan mga Estudyante sa Bibliya na nagpahiling man maski paano nin kaigutan an mga ini alagad dai iyan igo para mamahala sinda kaiba ni Jesus. Huling dai nagin gayong makusog an pagkamuot ninda sa Diyos, an dakulang kadaklan magigin kuwalipikado na magpasiring sa langit sa atubangan kan trono bako na magtukaw sa mga trono.   

7. Sigun sa mga Estudyante sa Bibliya, sairisay an mabubuhay sa daga durante kan Sangribong Taon, asin ano an pakasabot kan mga Estudyante sa Bibliya mapadapit sa maimbod na mga lingkod kan suanoy?

⁷ Kun siring, sairisay an maistar sa daga? Hinuna kan mga Estudyante sa Bibliya na pagkatapos na matipon sa langit an 144,000 asin an dakulang kadaklan, milyon-milyon na iba pa an tatawan nin buhay sa daga tanganing maeksperyensiyahan an mga bendisyon kan Sangribong Taon na Paghadi ni Cristo. Dai inisip kan mga Estudyante sa Bibliya na an milyon-milyon na iyan maglilingkod ki Jehova bago magpuon an Paghadi na iyan ni Cristo. Imbes, inisip ninda na an grupong ini tutukduan kan mapadapit ki Jehova durante kan Sangribong Taon. Dangan pagkatapos  kaiyan, an mga nagsunod sa mga pamantayan ni Jehova bebendisyunan nin buhay na daing katapusan sa daga, alagad an mga nagrebelde lalaglagon. Inisip man kan mga Estudyante sa Bibliya na tibaad may nagkapira na maglilingkod bilang ‘mga prinsipe’ sa daga durante kan panahon na iyan—kaiba diyan an binuhay liwat na “suanoy na mga maninigo” (maimbod na mga lingkod na nagadan bago si Cristo)—na tatawan nin balos na buhay sa langit sa katapusan kan Sangribong Taon.—Sal. 45:16.

8. Anong tulong grupo an hinuna kaidto na may kabtang sa katuyuhan nin Diyos?

⁸ Sa siring, hinuna kan mga Estudyante sa Bibliya na may tulong grupo: (1) an 144,000, na mamamahala kaiba ni Jesus sa langit; (2) an dakulang kadaklan na bakong gayong maigot na mga Kristiyano, na matindog sa atubangan kan trono ni Jesus sa langit; asin (3) an milyon-milyon na tawo na tutukduan kan mapadapit ki Jehova digdi sa daga durante kan Sangribong Taon na Paghadi ni Cristo. * Alagad sa itinalaan na panahon ni Jehova, an liwanag kan katotoohan nagpuon na urog na magliwanag mapadapit sa bagay na ini.—Tal. 4:18.

9. (a) Sa paanong paagi an dakulang kadaklan sa daga makakatindog “sa atubangan kan trono asin sa atubangan kan Kordero”? (b) Taano ta lohikal an pakasabot na ini kan Kapahayagan 7:9?

⁹ Kan 1935, lininaw kun siisay an dakulang kadaklan sa bisyon ni Juan. Narealisar kan mga Saksi ni Jehova na an dakulang kadaklan dai man literal na mapasiring sa langit para makatindog “sa atubangan kan trono asin sa atubangan kan Kordero.” Imbes, an pagtindog ninda piguratibo. Dawa sa daga sinda maistar, an dakulang kadaklan makakatindog “sa atubangan kan trono” paagi sa pagmidbid sa awtoridad ni Jehova asin sa pagpasakop sa saiyang soberaniya. (Isa. 66:1) Makakatindog sinda sa “atubangan kan Kordero” paagi sa pagtubod sa atang na pantubos ni Jesus. Kaagid kaiyan, sa Mateo 25:31, 32, “an gabos na nasyon”—kaiba na an mga maraot—sinambit na “titiripunon sa atubangan” ni Jesus sa saiyang mamuraway na trono. Malinaw na an gabos na nasyon na ini mayo sa langit kundi nasa daga. Lohikal an bagong pakasabot na ini. Naipapaliwanag kaiyan kun taano ta mayong sinasabi an Bibliya na dinara sa langit an dakulang kadaklan. Saro sanang grupo an tinawan kan panuga na mabuhay nin daing katapusan sa langit—an 144,000, na ‘mamamahala sa daga bilang mga hadi’ kaiba ni Jesus.—Kap. 5:10.

10. Taano ta kaipuhan kan dakulang kadaklan na matukduan kan mapadapit ki Jehova bago an Sangribong Taon?

¹⁰ Kaya puon 1935, nasabutan kan mga Saksi ni Jehova na an dakulang kadaklan sa bisyon ni Juan kompuwesto nin sarong grupo nin maimbod na mga Kristiyano na igwa kan paglaom na mabuhay nin daing katapusan sa daga. Tanganing makaligtas sa grabeng kasakitan, kaipuhan na matukduan an dakulang kadaklan kan mapadapit ki Jehova bago magpuon an Sangribong Taon. Kaipuhan nindang magpahiling nin makusog na pagtubod tanganing “makadulag . . . sa gabos na bagay na ini na kaipuhan mangyari” bago an Sangribong Taon na Paghadi ni Cristo.—Luc. 21:34-36.

11. Taano ta inisip kan nagkapirang Estudyante sa Bibliya na may nagkapirang dadarahon sa langit pagkatapos kan Sangribong Taon?

¹¹ Paano man an dapit sa pakasabot kan mga Estudyante sa Bibliya na may mga arugan na lingkod sa daga na bubuhayon liwat pasiring sa langit pagkatapos kan Sangribong Taon? Sinambit an posibilidad na iyan dakul na taon na an nakaagi sa Pebrero 15, 1913, na isyu kan The Watch Tower. An ideyang iyan nakabasar sa pangangatanusan na, ‘Taano ta an maimbod na mga lingkod kan suanoy babalusan sana nin buhay sa daga mantang an mga Kristiyano na bakong arog  ninda kaimbod babalusan nin buhay sa langit?’ Siyempre, iyan an inisip ninda huli sa duwang salang paghuna ninda: (1) na an dakulang kadaklan maistar sa langit asin (2) na an dakulang kadaklan kompuwesto nin bakong gayong maigot na mga Kristiyano.

12-13. Ano an aram kan mga linahidan asin kan dakulang kadaklan kun dapit sa saindang balos?

¹² Pero arog kan aram na niyato, puon kan 1935, malinaw na nasabutan kan mga Saksi ni Jehova na an mga makakaligtas sa Armagedon iyo an dakulang kadaklan sa bisyon ni Juan. Sinda ‘mabalyo hali sa nag-aging grabeng kasakitan’ digdi sa daga, asin ‘padagos sindang makurahaw sa makusog na boses, na nagsasabi: “Utang niyato an satong kaligtasan sa satuyang Diyos, na nakatukaw sa trono, asin sa Kordero.”’ (Kap. 7:10, 14) Dugang pa, itinutukdo kan Kasuratan na an mga binuhay liwat pasiring sa langit nag-aako nin “sarong bagay na mas marahay” kisa sa aakuon kan maimbod na mga lingkod kan suanoy. (Heb. 11:40) Huli kaiyan, an satong mga tugang nagpuon na maigot na imbitaran an mga tawo na maglingkod ki Jehova asin magkaigwa kan paglaom na buhay na daing katapusan sa daga.

¹³ An mga kabilang sa dakulang kadaklan nag-uugma sa saindang paglaom. Nasasabutan ninda na si Jehova an nagdedesisyon kun sain maglilingkod sa saiya an maimbod na mga parasamba niya, kun baga sa langit o sa daga. Aram kan mga linahidan asin kan dakulang kadaklan na an saindang balos nagin posible huli sana sa daing kapantay na kabuutan ni Jehova na ipinahiling paagi sa atang na pantubos ni Jesu-Cristo.—Roma 3:24.

14. Pagkatapos kan 1935, taano ta dakul an nag-isip kun paano mauutob an hula mapadapit sa dakulang kadaklan?

¹⁴ Pagkatapos na nagin malinaw kan 1935 an pakasabot kan mga lingkod ni Jehova, dakul pa man giraray an nag-isip kun paano an mga may daganon na paglaom magigin sarong kadaklan na dakula an bilang. Halimbawa, 12 anyos kaidto si Ronald Parkin kan lininaw kun siisay an dakulang kadaklan. “Kan panahon na iyan,” an sabi niya, “mga 56,000 an parahayag sa bilog na kinaban asin dakul, tibaad kadaklan sa sainda, mga linahidan. Kaya an dakulang kadaklan garo baga bakong gayong dakula an bilang.”

15. Paano nagpapadagos an pagtipon sa dakulang kadaklan?

¹⁵ Pero kan suminunod na mga dekada, nagpadara nin mga misyonero sa dakul na kadagaan, asin an bilang kan mga Saksi ni Jehova dagos-dagos na nagdakula. Dangan kan 1968, pinunan an sarong programa nin pag-adal sa Bibliya gamit an librong An Katotoohan na Minagiya Pasiring sa Buhay na Daing Sagkod. An simpleng paliwanag kaiyan mapadapit sa katotoohan sa Bibliya nagustuhan nanggad nin dakulon na tawo. Sa laog nin apat na taon, labing kabangang milyon na bagong disipulo an nabawtismuhan. Mantang nagluluya an impluwensiya kan Iglesiya Katolika  sa Latin Amerika saka sa ibang mga nasyon asin mantang hinahali an mga restriksiyon sa satong gibuhon sa Sirangan na Europa asin sa nagkapirang lugar sa Aprika, milyon-milyon pa an nabawtismuhan. (Isa. 60:22) Kan nakaaging mga taon, nagprodusir an organisasyon ni Jehova nin nagkapirang iba pang epektibong kasangkapan tanganing tabangan an mga tawo na manudan kun ano an itinutukdo kan Bibliya. Malinaw na sarong dakulang kadaklan—na labi nang walong milyon ngunyan—an natipon.

16. Sain hali an tinitipon na dakulang kadaklan?

¹⁶ Kan isinusurat ni Juan an bisyon, sinabi niya na an dakulang kadaklan hali sa “gabos na nasyon asin tribo asin banwaan saka lengguwahe.” May kaagid nang ihinula kaidto si propeta Zacarias. Isinurat niya: ‘Sa mga aldaw na idto mangyayari na an sampulong tawo sa gabos na tataramon kan mga nasyon, makarapot sa gayad kan gubing nin sarong Judio, na magsasarabing: “Maiba kami sa saindo, huli ta samuyang nadangog na an Diyos yaon diyan sa saindo.”’—Zac. 8:23.

17. Ano an isinasagibo tanganing tabangan an mga tawo hali sa gabos na nasyon asin lengguwahe?

¹⁷ Nasasabutan kan mga Saksi ni Jehova na tanganing matipon an mga tawo sa gabos na lengguwahe, an maugmang bareta kaipuhan na ihulit sa dakul na lengguwahe. Labing 130 taon na kitang nagtatradusir nin mga materyal sa pag-adal nin Bibliya, alagad ngunyan isinasagibo niyato  an pinakadakulang gibuhon nin pagtradusir kasuarin man sa ginatos na lengguwahe. Malinaw na nagsasagibo nin milagro si Jehova sa satong panahon—an pagtipon sa dakulang kadaklan hali sa gabos na nasyon. Salamat sa padagos na pagdakul kan lengguwahe na diyan makukua an espirituwal na kakanon, an grupong ini na hali sa manlain-lain na kadagaan nagkakasararo sa pagsamba. Asin an mga Saksi midbid sa kaigutan ninda sa paghuhulit asin sa saindang pagkamuot bilang magturugang. Nakakapakusog nanggad iyan sa pagtubod!—Mat. 24:14; Juan 13:35.

18. (a) Kauyon kan Isaias 46:10, 11, taano ta dai kita nagngangalas na inutob ni Jehova an propesiya dapit sa dakulang kadaklan? (b) Taano ta dai namamatian kan mga may paglaom na mabuhay sa daga na iniitsa-puwera sinda?

¹⁸ Nauugma nanggad kita huli sa propesiya mapadapit sa dakulang kadaklan! Dai kita nagngangalas na inutob ni Jehova an propesiya sa arog kaiyan kamakangangalas na paagi. (Basahon an Isaias 46:10, 11.) An mga kabilang sa dakulang kadaklan nagpapasalamat sa paglaom na itinao ni Jehova sa sainda. Dai ninda namamatian na iniitsa-puwera sinda dahil dai sinda linahidan kan espiritu nin Diyos para maglingkod kaiba ni Jesus sa langit. Sa bilog na Kasuratan, makakabasa kita nin dapit sa maimbod na mga lalaki asin babayi na giniyahan kan banal na espiritu; alagad bako sindang kabilang sa 144,000. Saro sa sainda si Juan Bautista. (Mat. 11:11) Kaiba man diyan si David. (Gibo 2:34) Sinda asin an dakulon na iba pa bubuhayon liwat para mag-istar sa paraisong daga. Gabos sinda—kaiba kan dakulang kadaklan—magkakaoportunidad na ipahiling an saindang kaimbudan ki Jehova asin sa saiyang soberaniya.

19. Kun nasasabutan ta an kahulugan para sa sato kan kautuban kan bisyon ni Juan mapadapit sa sarong dakulang kadaklan, ano an gigibuhon niyato?

¹⁹ Dai pa nangyari kasuarin man sa kasaysayan nin tawo na pinagkasararo nin Diyos an milyon-milyon na tawo hali sa gabos na nasyon. An satong paglaom man mabuhay sa langit o sa daga, kaipuhan niyatong tabangan an pinakadakul na tawong posible na magin kabilang sa dakulang kadaklan nin “ibang mga karnero.” (Juan 10:16) Madali nang paabuton ni Jehova an ihinulang grabeng kasakitan na malaglag sa mga gobyerno asin relihiyon na nagpapasakit na marhay sa mga tawo. Pambihirang pribilehiyo nanggad an naghahalat sa gabos na miyembro kan dakulang kadaklan—an maglingkod ki Jehova sa daga sagkod lamang!—Kap. 7:14.