1, 2. (a) Ano an sinabi ni Jehova na mangyayari sa satong panahon? (b) Anong mga hapot an sisimbagon sa artikulong ini? (Hilingon an ritrato sa itaas.)

SI Jehova naghula mapadapit sa panahon na kinabubuhayan niyato: ‘Sa mga aldaw na idto mangyayari na an sampulong tawo sa gabos na tataramon kan mga nasyon, makarapot sa gayad kan gubing nin sarong Judio, na magsasarabing: “Maiba kami sa saindo, huli ta samuyang nadangog na an Diyos yaon diyan sa saindo.”’ (Zac. 8:23) Arog kan piguratibong sampulong lalaking idto, an mga may daganon na paglaom ‘nagkarapot sa gayad kan gubing nin sarong Judio.’ Para sa sainda, sarong pribilehiyo na makaibanan an mga linahidan nin banal na espiritu, na inaapod man na ‘Israel nin Diyos,’ huling aram ninda na binebendisyunan ni Jehova an grupong ini.—Gal. 6:16.

² Arog kan ihinula ni propeta Zacarias, sinabi ni Jesus na magkakasararo an banwaan nin Diyos. Sinabi niyang may duwang grupo an saiyang mga parasunod, an saro inapod niyang ‘sadit na aripumpon’ asin an saro, ‘ibang mga karnero.’ Pero sinabi niya na sinda magigin ‘sarong aripumpon’ na may “sarong pastor.” (Luc. 12:32, BPV [1]; Juan 10:16) Huling duwang grupo ini, tibaad may mga maghapot: (1) Kaipuhan daw na maaraman kan ibang mga karnero an pangaran kan mga linahidan ngunyan? (2) Paano dapat mansayon kan mga linahidan  an saindang sadiri? (3) Paano mo dapat trataron an sarong kakongregasyon mo na nakikikabtang na sa mga emblema sa Memoryal? (4) Dapat ka daw na mahadit sa pagdakul kan nakikikabtang sa Memoryal? Sisimbagon an mga hapot na iyan sa artikulong ini.

3. Taano ta imposibleng maaraman kun sairisay an talagang magigin kabtang kan 144,000?

³ Kaipuhan daw na maaraman kan ibang mga karnero an pangaran kan gabos na linahidan ngunyan? Dai. Taano? Huling an langitnon na pag-apod sa sainda saro sanang imbitasyon. Dai kaiyan pinapatunayan na talagang aakuon ninda an saindang langitnon na balos. Aram ini ni Satanas kaya naggagamit siya nin ‘bakong tunay na propeta tanganing mapatubod ninda an mga tawo, kun posible sagkod an mga tawong pinili nin Diyos.’ (Mat. 24:24, BPV) Imposibleng maaraman kun baga aakuon nin sarong linahidan na Kristiyano an saiyang balos sagkod na dai pa siya hinuhukuman ni Jehova na maninigo na magkamit kan premyong iyan. Si Jehova an madesisyon kaini asin an matao kan pangultimong pagtatak magsalang bago magadan an sarong nagdanay na maimbod na linahidan o bago magpuon an ‘dakulang kahurasaan.’ (Kap. 2:10; 7:3, 14) Kaya daing saysay kun pupurbaran pa nin siisay man na nabubuhay sa kinaban na aramon kun sairisay sa mga lingkod nin Diyos ngunyan an talagang magigin kabtang kan 144,000 sa maabot na panahon. [2]

4. Kun imposibleng maaraman kun sairisay sa daga ngunyan an talagang mga linahidan, paano kita “maiba” sa sainda?

⁴ Kun imposibleng maaraman kun sairisay sa daga ngunyan an talagang espirituwal na mga Israelita, paano “maiba” sa sainda an mga miyembro kan ibang mga karnero? Mangnuhon an sinasabi kan hula ni Zacarias dapit sa piguratibong sampulong lalaki. Sinda ‘makarapot sa gayad kan gubing nin sarong Judio, na magsasarabing: “Maiba kami sa saindo, huli ta samuyang nadangog na an Diyos yaon diyan sa saindo.”’ Maski ngani sarong Judio sana an sinambit digdi, duwang beses ginamit kan sampulong lalaki an tataramon na “saindo” na nanunungod sa labi sa sarong tawo. Nangangahulugan kun siring na bako sanang sarong tawo an espirituwal na Judiong ini, kundi nagrerepresentar ini sa bilog na grupo nin mga linahidan. Kaya dai na kaipuhan na midbidon pa kun siisay an lambang espirituwal na Judio, dangan magsunod sa saiya. Imbes, kaipuhan niyatong midbidon an mga ini bilang sarong grupo, dangan suportaran sinda bilang sarong grupo. Dai kita nuarin man dinadagka kan Bibliya na magsunod sa sarong indibidwal. Si Jesus an satong Lider.—Mat. 23:10.

5. Anong patanid an dapat na pag-isipan na marhay kan mga linahidan, asin taano?

⁵ Dapat na pag-isipan na marhay kan mga nakikikabtang sa mga emblema sa Memoryal an patanid na nasa 1 Corinto 11:27-29. (Basahon.) Anong punto an gustong ipaabot digdi ni apostol Pablo? Bakong maninigo an pakikikabtang sa mga emblema nin sarong linahidan na Kristiyano kun dai niya pinagdadanay an marahay na relasyon ki Jehova. (Heb. 6:4-6; 10:26-29) Ipinapagirumdom kan patanid na ini sa linahidan na mga Kristiyano na dai pa ninda nakakamtan an saindang balos. Dapat sindang padagos na magdanay na maimbod para makamtan an ‘premyo kan pag-apod nin Diyos pasiring sa buhay na mayong katapusan duman sa langit, sa paagi ni Cristo Jesus.’ —Fil. 3:13-16, BPV.

6. Paano dapat mansayon kan mga linahidan an saindang sadiri?

⁶ Pinasabngan si Pablo na pakiulayan an linahidan na mga Kristiyano na “maglakaw nin maninigo sa pag-apod na iinapod sa [sainda].”  Paano ninda gigibuhon ini? An sabi ni Pablo, dapat na sinda “may lubos na kapakumbabaan saka kahuyuan, na may pagpapasensiya, na nagpapatirios-tiusan sa pagkamuot, na maigot na naghihinguwang papagdanayon an pagkasararo kan espiritu sa nakakapasararong bugkos nin katuninungan.” (Efe. 4:1-3, NW) An banal na espiritu nagtatabang sa mga lingkod ni Jehova na magin mapakumbaba, bakong magin mapalangkaw. (Col. 3:12) Mapakumbabang minimidbid kan mga linahidan na dai man nangangahulugan na mas dakul sindang inaakong banal na espiritu kisa sa mga may daganon na paglaom. Dai ninda iniisip na mas nasasabutan ninda an Bibliya kisa sa kiisay man; ni pinapatunayan ninda sa ano man na paagi na nakakalabi sinda. Nungka man nindang aagdahon an iba na makikabtang na sa mga emblema sa Memoryal huling sa hiling ninda linahidan man an mga ini; imbes, mapakumbaba nindang minimidbid na si Jehova sana an puwedeng mag-imbitar sa mga tawo para magduman sa langit.

7, 8. Sa ano dai naglalaom an linahidan na mga Kristiyano, asin taano?

⁷ Dawa sarong marahayon na pribilehiyo an magin linahidan na Kristiyano, dai sinda naglalaom na tatrataron sinda kan iba sa espesyal na paagi. (Efe. 1:18, 19; basahon an Filipos 2:2, 3.) Kan lahidan sinda kan banal na espiritu, dai ini ipinaisi ni Jehova sa kinaban. Kaya dai sinda nagngangalas kun may mga dai tulos nagtutubod na sinda linahidan. An totoo, aram ninda an ipinapatanid kan Bibliya na dai tulos maniwala sa saro na nagsasabing ninombrahan siya nin Diyos para sa sarong espesyal na paninimbagan. (Kap. 2:2) Kaya, dai ninda gagamiton na garo “calling card” an saindang pagigin linahidan pag nagpapabisto sinda sa iba. Sa parati, dai ngani ninda ini sinasabi sa iba para malikayan na madara an atensiyon kan mga tawo sa sainda; ni ipinaghahambog man ninda an magigin balos ninda sa maabot na panahon.—1 Cor. 1:28, 29; basahon an 1 Corinto 4:6-8.

⁸ Dugang pa, dai man iniisip kan linahidan na mga Kristiyano na miyembro sinda nin sarong asosasyon nin piling mga tawo. Dai man ninda hinahanap an iba pang linahidan para mag-iribanan sinda o magbilog nin mga grupo para sa pag-adal nin Bibliya. (Gal. 1:15-17) Kun gigibuhon ninda ini, magkakaigwa nin pagkabaranga sa laog kan kongregasyon asin makakaulang ini sa banal na espiritu na nagtatabang na magin matuninong asin nagkakasararo an banwaan nin Diyos.—Basahon an Roma 16:17, 18.

9. Taano ta dapat kitang mag-ingat sa satong pagtratar sa sarong nakikikabtang sa mga emblema sa Memoryal? (Hilingon an kahon na “ An Pagkamuot ‘Dai Minagawi na Mayong Modo.’”)

⁹ Paano mo dapat trataron an sarong nakikikabtang sa mga emblema sa Memoryal? Sinabi ni Jesus sa saiyang mga disipulo: “Kamo gabos magturugang.” Sinabi pa niya: ‘An siisay man na magpalangkaw sa saiya man sana ibababa, asin an siisay man na magpakumbaba sa saiya man sana ilalangkaw.’ (Mat. 23:8-12) Kaya, bakong tama na ilangkaw o umawon na marhay an sarong tawo, dawa linahidan siyang tugang ni Cristo. Kun dapit sa mga elder, dinadagka kita kan Bibliya na arugon an saindang pagtubod, pero nungkang ipinagbubuot sa sato na ibilang na satong lider an siisay man na tawo. (Heb. 13:7) Iyo, sinasabi kan Bibliya na may mga “angay sa dobleng onra.” Pero angay sinda sa siring na onra bakong huli ta linahidan sinda kundi sinda “nanginginot sa marahay na paagi” asin “nagmamaigot sa pagpahayag asin pagtukdo.” (1 Tim. 5:17, NW) Kaya, puwedeng mapasupog an sarong linahidan kun tatawan niyato siya nin sobrang atensiyon o uumawon na marhay. O puwede pa nganing madipisilan siyang magdanay na mapakumbaba kun espesyal an pagtratar niyato sa saiya. (Roma 12:3) Habo nanggad niyato na magin dahilan kan pagkakasala kan saro sa mga tugang ni Cristo!—Luc. 17:2.

10. Paano ta maipapahiling an paggalang sa mga linahidan?

 ¹⁰ Paano ta maipapahiling an tamang paggalang sa mga pinili ni Jehova? Dai niyato sinda hahaputon kun paano sinda nagin linahidan. Personal na bagay ini na mayo kitang diretsong maaraman. (1 Tes. 4:11; 2 Tes. 3:11) Dai man niyato dapat isipon na linahidan man an saindang agom, mga magurang, o kapamilya. Dai namamana sa kapamilya an pagigin linahidan. (1 Tes. 2:12) Dapat man niyatong likayan na haputon an agom kan mga linahidan kun ano an namamatian ninda na sa maabot na panahon dai sinda magkakaibanan sa Paraiso. Imbes na maghapot nin mga bagay na makakakulog sa iba, lubos kitang magtiwala na sa bagong kinaban, ibubuka ni Jehova an saiyang kamot asin ‘papaniguan an mawot nin lambang bagay na may buhay.’—Sal. 145:16, NW.

11. Paano niyato mapoprotektaran an satong sadiri kun lilikayan niyato an labi-labing paghanga sa mga tawo?

¹¹ Mapoprotektaran ta an satong sadiri kun dai ta tinatratar an mga linahidan na mas importante kisa sa iba. Paano? Sinasabi sa sato kan Bibliya na puwedeng makalaog sa kongregasyon an ‘bakong tunay na mga tugang’ na posibleng maghingako pa nganing mga linahidan. (Gal. 2:4, 5; 1 Juan 2:19) Dugang pa, tibaad an ibang linahidan minasuhay na sa pagtubod. (Mat. 25:10-12; 2 Ped. 2:20, 21) Kun lilikayan niyato an labi-labing paghanga sa mga tawo, dai kita mairarayo kan siring na mga tawo sa katotoohan; ni maaapektaran man an satong pagtubod kun an sarong linahidan, midbid na marhay na Kristiyano, o haloy nang lingkod ni Jehova dai na magin maimbod.—Jud. 16.

12, 13. Taano ta dai kita dapat mahadit sa pagdakul kan nakikikabtang sa mga emblema sa Memoryal?

¹² Sa laog nin dakul na taon, an bilang kan mga nakikikabtang sa Memoryal padagos na nagbababa. Pero kaining nakalihis na mga taon, padagos na naglalangkaw iyan. Dapat daw niyatong ikahadit ini? Dai. Aramon niyato kun taano.

¹³ “Midbid ni Jehova an mga sadiri niya.” (2 Tim. 2:19, NW) Dai kayang maaraman kan mga inasignaran na magbilang sa Memoryal kun sairisay an talagang linahidan. Kaya nakakaiba sa bilang idtong mga naghuhuna na linahidan sinda pero bako man. Halimbawa, may mga nakikikabtang dati sa Memoryal an nagpundo nang makikabtang. An iba tibaad may problema sa isip o emosyon asin naniniwala na mamamahala sinda kaiba  ni Cristo sa langit. Kaya, dai mahihiling sa bilang kan mga nakikikabtang kun pira na sana talaga an mga natatadang linahidan sa daga.

14. Ano an sinasabi kan Bibliya dapit sa bilang kan mga linahidan na yaon pa sa daga sa pagpuon kan dakulang kahurasaan?

¹⁴ Manunumpungan an mga linahidan sa dakul na parte kan daga pag nagdatong si Jesus para tipunon sinda sa langit. Ini an sinasabi kan Bibliya mapadapit ki Jesus sa panahon na iyan: ‘Susuguon niya an saiyang mga anghel kaiba an dakulang tanog nin trumpeta, asin titiripunon ninda an saiyang mga pinili hali sa apat na duros, magpuon sa sarong puro nin langit sagkod sa ibong.’ (Mat. 24:31) Sinasabi kan Bibliya na kadikit sana sa mga linahidan an matatada sa daga sa huring mga aldaw. (Kap. 12:17) Pero, dai kaiyan sinasabi kun pirang linahidan an yaon pa sa daga sa pagpuon kan dakulang kahurasaan.

15, 16. Ano an dapat tang tandaan kun dapit sa pagpili ni Jehova sa mga magigin kabilang sa 144,000?

¹⁵ Si Jehova an nagdedesisyon kun nuarin siya mapili nin mga linahidan. (Roma 8:28-30) Pinunan ni Jehova an pagpili nin mga linahidan pagkatapos na buhayon liwat si Jesus, asin minalataw na an gabos na tunay na Kristiyano kan inot na siglo mga linahidan. Puon kan inot na siglo sagkod na magpuon an huring mga aldaw, mga palsong Kristiyano an kadaklan sa mga naghihingakong parasunod ni Cristo; iinagid sinda ni Jesus sa mga ‘duot.’ Pero kan panahon na iyan, padagos an paglahid ni Jehova sa nagkapirang tunay na Kristiyano, asin iinagid sinda ni Jesus sa “trigo” na matubong kaiba kan mga duot. (Mat. 13:24-30) Sa panahon kan huring mga aldaw, padagos na nagpipili si Jehova nin mga magigin kabilang sa 144,000. [3] Kaya kun magdesisyon an Diyos na mahalat siya sagkod sa madali nang magpuon an katapusan bago niya pilion an iba pa, siisay man kita para kuwestiyunon an saiyang kadunungan? (Isa. 45:9; Dan. 4:35; basahon an Roma 9:11, 16.) [4] Dapat kitang mag-ingat na an satong reaksiyon dai magin arog kan mga trabahador na nagreklamo sa saindang kagurangnan kun paano niya trinatar an mga trabahador na huring nagtrabaho.—Basahon an Mateo 20:8-15.

¹⁶ Dai kabilang sa “maimbod asin mapagmansay na uripon” an gabos na may langitnon na paglaom. (Mat. 24:45-47, NW) Arog kan inot na siglo, si Jehova asin si Jesus nagpapakakan ngunyan sa dakul paagi sa nagkapira. Pirang linahidan na Kristiyano sana kan inot na siglo an ginamit para isurat an Kristiyanong Griegong Kasuratan. Siring man sa ngunyan, pirang linahidan na Kristiyano sana an ginagamit para magtao nin espirituwal na “kakanon sa tamang panahon.”

17. Ano an mga nanudan niyato sa artikulong ini?

¹⁷ Ano an mga nanudan niyato sa artikulong ini? Nagdesisyon si Jehova na magtao nin duwang klaseng balos—langitnon na buhay para sa espirituwal na mga Judio asin daganon na buhay para sa simbolikong sampulong lalaki. Pero, parehong pamantayan nin kaimbudan an hinahagad niya sa duwang grupong ini. Gabos sinda dapat na magdanay na mapakumbaba, nagkakasararo, asin naghihinguwang mapagdanay an katuninungan sa kongregasyon. Mantang nagdadangadang an katapusan, lugod na magin determinado kita gabos na maglingkod bilang sarong aripumpon sa panginginot ni Cristo.