1, 2. (a) Taano ta masasabi niyato na puwedeng magin katuod nin Diyos an mga tawo? (b) Ano an pag-uulayan ta sa artikulong ini?

PUON sa pagkamundag sagkod sa pagkagadan, an pinakakaipuhan niyato iyo an pagkamuot. Kaipuhan asin hinahanap-hanap kan mga tawo an pagkamuot—bako sanang romantikong pagkamuot. Gustong-gusto niyatong magkaigwa nin dayupot na mga amigo na namumuot sa sato. Pero igwa nin sarong klase nin pagkamuot na mas kaipuhan niyato kisa sa iba—an pagkamuot ni Jehova. Dakul na tawo an dai nagtutubod na puwede kitang mamutan asin magin dayupot na katuod kan Diyos na Makakamhan sa Gabos na sarong dai nahihiling na Espiritu sa langit. May arog man daw kita kaiyan na pagduda? Mayo nanggad!

² Naaraman niyato sa Bibliya na nagin katuod nin Diyos an bakong perpektong mga tawo. Kapaki-pakinabang nanggad na hurop-hurupon an mga halimbawa ninda, huling an pakikikatuod sa Diyos iyo an pinakamahalaga niyatong pasuhan sa buhay. An sarong marahayon na halimbawa nin tawo na nagkaigwa kan arog kaiyan na pakikikatuod iyo si Abraham. (Basahon an Santiago 2:23.) Paano nagin katuod ni Jehova  si Abraham? Sa pagtubod nakabasar an dayupot na pakikikatuod ni Abraham ki Jehova. Sa katunayan, inaapod kan Bibliya si Abraham na “ama nin gabos na minatubod.” (Roma 4:11) Kaya pag-ulayan niyato kun paano nagin dayupot na katuod nin Diyos si Abraham huli sa saiyang pagtubod. Asin mantang ginigibo ta iyan, ihapot niyato sa sadiri, ‘Paano ko maaarog an pagtubod ni Abraham asin mapapakusog an pakikikatuod ko ki Jehova?’

3, 4. (a) Ano an posibleng pinakamasakit na pagbalo sa pagtubod ni Abraham? (b) Taano ta andam si Abraham na iatang si Isaac?

³ Imahinara an sarong may edad nang lalaki na luway-luway na nagtutukad sa bukid. Iyan an pinakamasakit na pagbaklay na ginibo niya sa bilog niyang buhay. Pero bako iyan huli sa edad niya; makusog pa si Abraham dawa mga 125 anyos na siya kaidto. ^[1] Nakasunod sa saiya an saiyang aking lalaki, si Isaac, na mga 25 anyos na. Dara ni Isaac an mga panggatong mantang dara man ni Abraham an kutsilyo saka mga bagay na kaipuhan para makagibo nin kalayo. Hinagad ni Jehova ki Abraham na iatang an mismong aki kaini!—Gen. 22:1-8.

⁴ Iyan na gayod an pinakamasakit na pagbalo sa pagtubod ni Abraham. May mga nagsasabi na maringis an Diyos huli sa paghagad niya ki Abraham kan siring na bagay. An iba nagsasabi man na nagkuyog si Abraham huling dai niya namumutan an saiyang aki. Nasasabi ninda iyan huling mayo sinda nin pagtubod asin dai ninda nasasabutan kun ano iyan. (1 Cor. 2:14-16) Dai nagkuyog si Abraham nin basta na sana na dai nag-iisip. Kundi, nagkuyog siya huling kaya niyang makahiling. Paagi kan saiyang mga mata nin tunay na pagtubod, nahiling niya na an saiyang Ama sa langit, si Jehova, nungkang hahagadon sa Saiyang maimbod na mga lingkod an ano man na maresulta sa permanenteng danyos sa sainda. Aram ni Abraham na kun makuyog siya ki Jehova, bebendisyunan niya siya asin an saiyang namumutan na aki. Ano an kinaipuhan ni Abraham para magkaigwa siya kan arog kaiyan kakusog na pagtubod? Kinaipuhan niya an kaaraman asin eksperyensiya.

5. Paano posibleng nanudan ni Abraham an manungod ki Jehova, asin ano an epekto sa saiya kan kaaraman na iyan?

⁵ Kaaraman. Dawa nagdakula si Abraham sa Ur, sarong siyudad kan mga Caldeo na lakop an idolatriya, nanudan niya an manungod ki Jehova. Paano iyan nangyari mantang an ama niya mismo, si Tera, sarong parasamba sa idolo? (Jos. 24:2) Mayong espesipikong sinasabi an Bibliya, pero ipinapahiling kaiyan na si Abraham ikasiyam na henerasyon hali sa aki ni Noe na si Sem, sarong lalaking may makusog na pagtubod. Nabuhay si Sem sagkod kan mga 150 anyos na si Abraham. Dai niyato masisigurado kun ki Sem naaraman ni Abraham an manungod ki Jehova. Pero, posibleng marhay na itinukdo ni Sem sa saiyang pamilya an mga kaaraman niya manungod ki Jehova. Sa ano man na paagi, an kaaraman na iyan nakaabot ki Abraham asin nakataros sa saiyang puso. Namutan niya an Diyos huli sa mga nanudan niya, asin an kaaraman na iyan nakatabang na mapakusog an saiyang pagtubod.

6, 7. Paano nakapakusog sa pagtubod ni Abraham an mga eksperyensiya niya?

⁶ Eksperyensiya. Paano nagkaigwa nin eksperyensiya si Abraham na nakapakusog sa pagtubod niya ki Jehova? Sinasabi na kun ano an iniisip niyato iyan man an mamamatian ta, asin kun ano an namamatian niyato iyan man an gigibuhon ta. Napahiro an puso ni Abraham kan mga nanudan niya manungod ki Jehova, asin huli kaiyan nagkaigwa siya nin hararom na may pagkangirhat na paggalang ki Jehova, an ‘Kahuruhalangkawing Diyos, Kaggibo kan langit asin daga.’ (Gen. 14:22, BPV ^[2]) An Bibliya inaapod an pagmating iyan na ‘diyosnon na pagkatakot,’ asin kaipuhan iyan tanganing magkaigwa nin dayupot na pakikikatuod sa Diyos. (Heb. 5:7; Sal. 25:14) An kuwalidad na iyan an nakapahiro ki Abraham na magkuyog sa Diyos.

⁷ Sinabi nin Diyos sa may edad nang si Abraham asin Sara na humali sa Ur asin magbalyo sa ibang  nasyon. Maistar sinda sa mga tolda sa natatadang panahon kan saindang buhay. Huli sa pagigin makinuyog ni Abraham, binendisyunan asin prinotektaran siya ni Jehova. Halimbawa, natakot si Abraham na kukuanon sa saiya an saiyang magayon na agom na si Sara asin siya man ipapagadan. May dahilan siya para matakot, pero dai niya tinugutan na mapugulan siya kaiyan sa pagkuyog ki Jehova. Nag-interbenir si Jehova asin prinotektaran si Abraham saka Sara sa milagrosong paagi nin bako sanang sarong beses. (Gen. 12:10-20; 20:2-7, 10-12, 17, 18) Nakapakusog sa pagtubod ni Abraham an mga eksperyensiyang iyan.

8. Paano kita magkakaigwa nin kaaraman asin eksperyensiya na magpapakusog kan pakikikatuod ta ki Jehova?

⁸ Puwede man daw kitang magin dayupot na katuod ni Jehova? Iyo nanggad! Sa ngunyan, pasil na niyatong makukua an kinakaipuhan tang kaaraman asin eksperyensiya. Dikit sana an kaaraman ni Abraham kun ikukumparar sa abundang kaaraman ngunyan na yaon sa Bibliya. (Dan. 12:4; Roma 11:33) Pano-pano an Tataramon nin Diyos nin kaaraman mapadapit sa “Kaggibo kan langit asin daga.” Makakatabang an mga kaaraman na ini para mapararom an paggalang asin pagkamuot ta ki Jehova. An paggalang asin pagkamuot na iyan magpapahiro sa sato na magkuyog sa saiya. Pag nagkukuyog kita sa saiya, mahihiling niyato kun paano niya kita pinoprotektaran saka binebendisyunan, asin iyan an satong magigin eksperyensiya. Mapapatunayan niyato na an bilog na pusong paglilingkod sa Diyos nagtatao nin pagkakontento, katuninungan, asin kaugmahan. (Sal. 34:8; Tal. 10:22) Mantang mas nagdadakul an kaaraman niyato dapit ki Jehova asin mas naeeksperyensiyahan ta an saiyang mga bendisyon, mas makusog man an satong pagtubod asin pakikikatuod sa saiya.

9, 10. (a) Ano an kaipuhan tanganing magin mas makusog an sarong pakikikatuod? (b) Ano an nagpapahiling na pinahalagahan asin pinakusog ni Abraham an saiyang pakikikatuod ki Jehova?

⁹ An pakikikatuod puwedeng iagid sa sarong mahalagang kayamanan. (Basahon an Talinhaga 17:17.) Pero bako iyan arog nin sarong mamahalon na plorera na ginigibo ta sanang pandekorasyon. Iyan mas arog sa sarong magayon na burak na kaipuhan nin tubig asin pag-ataman tanganing magbukad. Pinahalagahan na marhay ni Abraham asin pinagdanay an saiyang pakikikatuod ki Jehova. Paano niya ginibo iyan?

¹⁰ Nungkang inisip ni Abraham na igo na an diyosnon na pagkatakot asin an pagkuyog na naipahiling niya kan nakaagi. Kan magbaklay siya pasiring sa Canaan, kaiba an saiyang pamilya asin mga suruguon, padagos siyang nagpagiya ki Jehova sa paggibo nin mga desisyon—sadit man iyan o dakula. Sarong taon bago mamundag si Isaac, kan 99 anyos na si Abraham, ipinagbuot ni Jehova ki Abraham na turion an gabos na lalaki na kairiba niya sa harong. Kinuwestiyon daw ni Abraham an pagbuot na iyan o naghanap siya nin dahilan para dai niya gibuhon iyan? Dai, nagtiwala siya sa Diyos asin nagkuyog sa ‘aldaw man sanang iyan.’—Gen. 17:10-14, 23.

11. Taano ta nahadit si Abraham mapadapit sa Sodoma asin Gomora, asin paano siya tinabangan ni Jehova?

 ¹¹ Huling kinatudan ni Abraham na magkuyog ki Jehova dawa sa garo baga saradit na bagay, nagin makusog an pakikikatuod niya sa Diyos. Dai siya nag-alangan na sabihon ki Jehova an nasa puso niya, nagpapatabang siya kun may masakit siyang mga hapot. Halimbawa, kan maaraman niyang lalaglagon nin Diyos an Sodoma asin Gomora, nahadit si Abraham ta tibaad makaibang malaglag an mga matanos. Tibaad nahadit siya sa pamangkin niyang si Lot asin sa pamilya kaini na nakaistar sa Sodoma. May dakulang kapakumbabaan asin pagtitiwala na naghapot si Abraham sa Diyos, an ‘Hukom kan bilog na kinaban.’ Mapasensiyang ipinahiling ni Jehova ki Abraham kun gurano Siya kamahihirakon. Ipinaliwanag ni Jehova na dawa sa panahon nin paghukom, binabasa niya an lambang puso asin hinahanap an marahay na mga tawo tanganing iligtas sinda.—Gen. 18:22-33.

12, 13. (a) Kan huri, paano nakatabang ki Abraham an saiyang kaaraman asin eksperyensiya? (b) Ano an nagpapahiling na may tiwala si Abraham ki Jehova?

¹² Kaya malinaw na an lambang kaaraman asin eksperyensiya ni Abraham nakatabang sa saiya na mapagdanay an saiyang dayupot na pakikikatuod ki Jehova. Kan huri, kan mapaatubang siya sa sarong masakit na pagbalo—an paghagad ni Jehova na iatang an saiyang aking si Isaac—napaghurop-hurop niya kun anong klaseng Persona an saiyang Katuod sa langit sigun sa mga naaaraman niya dapit sa saiya. Balikan ta ngunyan an maimbod na lalaking ini mantang nagbabaklay patukad sa Moria. Inisip daw niya na bigla na sanang nagbago si Jehova, nagin nang maringis asin daing hirak? Para ki Abraham, imposibleng mangyari iyan! Taano ta masasabi niyato iyan?

¹³ Bago bayaan an kaiba niyang mga suruguon, sinabi ni Abraham: ‘Maghalat kamo digdi saka an asno, asin ako pati an aki malakaw sagkod duman, asin mamimibi kami, asin babalikan niyamo kamo.’ (Gen. 22:5) Ano an buot sabihon ni Abraham? Nagpuputik daw siya sa mga suruguon niya kan sabihon niya sa sainda na mabalik siya kaiba si Isaac mantang aram niyang iaatang niya ini? Dai. Tinatabangan kita kan Bibliya na masabutan an iniisip ni Abraham. (Basahon an Hebreo 11:19.) Inisip ni Abraham na ‘an Diyos maibabangon [si Isaac] minsan hali sa mga gadan.’ Iyo, nagtutubod si Abraham sa pagkabuhay liwat. Aram niya na ibinalik ni Jehova an kakayahan ninda ni Sara na magkaaki dawa maedad na sindang marhay. (Heb. 11:11, 12, 18) Huli kaiyan, naaraman niyang mayong imposible ki Jehova. Kaya nagtiwala siya na ano man an mangyari sa aldaw na idto, bubuhayon ni Jehova an saiyang namumutan na aki tanganing mautob an gabos na mga panuga ni Jehova. Iyo, bakong makangangalas na inapod si Abraham na “ama nin gabos na minatubod”!

14. Anong mga bagay an nasasakitan kang gibuhon sa paglilingkod ki Jehova, asin paano ka matatabangan kan halimbawa ni Abraham?

¹⁴ Kumusta man kita? Totoo, dai man hinahagad sa sato ngunyan ni Jehova na iatang an satong aki. Pero hinahagad niya sa sato na sunudon siya dawa kun an saiyang mga pagbuot masakit para sa sato o dai niyato nasasabutan kun taano ta ipinapagibo  iyan sa sato. May naiisip ka daw na sarong bagay na hinahagad sa saimo ni Jehova na nasasakitan kang gibuhon? Para sa iba, masakit an maghulit. Tibaad masusupgon sinda, kaya nasasakitan sindang ipakipag-ulay an maugmang bareta sa mga dai ninda kamidbid. Para man sa iba, tibaad masakit an magin naiiba sa eskuwelahan o sa trabaho. (Ex. 23:2; 1 Tes. 2:2) May panahon daw na namamatian mo an arog kan ki Abraham, na garo ka nagtutukad sa Bukid nin Moria para gibuhon an sarong bagay na masakit para sa saimo? Kun iyo, mapakusog ka lugod kan halimbawa ni Abraham asin kan saiyang pagtubod! Kun huhurop-hurupon niyato an mga halimbawa kan maimbod na mga lalaki asin babayi, mapapahiro kita kaiyan na arugon sinda asin mas magin harani sa satong Katuod, si Jehova.—Heb. 12:1, 2.

15. Taano ta makakasiyerto kita na dai pinagbasulan ni Abraham na nagin maimbod asin makinuyog siya ki Jehova?

¹⁵ Pinagbasulan daw ni Abraham na nagin maimbod asin makinuyog siya ki Jehova? Mangnuhon an sinasabi kan Bibliya dapit sa pagkagadan ni Abraham: ‘Naputulan nin ginhawa si Abraham, asin siya nagadan na gurang nang marhay, gurangon na asin [kontento].’ (Gen. 25:8) Kan 175 anyos na si Abraham, maluya na an saiyang hawak, pero nahurop-hurop niya an halawig niyang buhay asin nakontento siya. Taano? Huling sa nagin buhay niya, nagdanay na pinakamahalaga an pakikikatuod ki Jehova. Pero, pag nababasa niyato na si Abraham ‘gurangon na asin kontento,’ dai ini nangangahulugan na dai na niya gustong mabuhay pa sa maabot na panahon.

16. Anong mga bagay an magpapaugma ki Abraham sa Paraiso?

¹⁶ Sinasabi kan Bibliya manungod ki Abraham: “Hinahalat niya an siyudad na may tunay na mga pundasyon, na an nagdisenyo asin nagtugdok iyo an Diyos.” (Heb. 11:10, NW) Nagtutubod si Abraham na maabot an panahon na mahihiling niyang namamahala sa bilog na daga an siyudad na iyan, an Kahadian nin Diyos—asin mangyayari nanggad iyan! Naiimahinar mo daw kun gurano kaugma si Abraham mantang nabubuhay siya sa paraisong daga asin padagos na pinapakusog an pakikikatuod niya ki Jehova? Siguradong magigin maugma siya pag naaraman niyang sa laog nin rinibong taon pagkagadan niya, nakatabang sa mga lingkod ni Jehova an saiyang halimbawa nin pagtubod! Maaaraman pa ngani niya sa Paraiso na an pag-atang niya sa Bukid nin Moria “simbolo” nin mas dakula pang bagay. (Heb. 11:19, NW) Asin maaaraman niya na an namatian niyang kulog kan inaandam niyang iatang si Isaac nakatabang sa minilyon na maimbod na tawo na masabutan an kulog na namatian ni Jehova kan itao niya an saiyang Aki, si Jesu-Cristo, bilang pantubos. (Juan 3:16) Nakatabang sa sato gabos an halimbawa ni Abraham na mas pahalagahan pa an pantubos, an pinakadakulang kapahayagan nin pagkamuot na ginibo kasuarin man sa bilog na kasaysayan!

17. Ano an determinado mong gibuhon, asin ano an pag-uulayan niyato sa masunod na artikulo?

¹⁷ Lugod na an lambang saro sa sato magin determinadong arugon an pagtubod ni Abraham. Arog niya, kaipuhan niyato an kaaraman asin eksperyensiya. Mantang padagos niyatong minimidbid si Jehova nin urog pa asin kinukuyog siya, mahihiling niyato kun paano niya kita binebendisyunan asin pinoprotektaran. (Basahon an Hebreo 6:10-12.) Lugod na magin Katuod niyato si Jehova sagkod lamang! Sa masunod na artikulo, pag-uulayan niyato an tulo pang halimbawa nin maimbod na mga tawo na nagin dayupot na mga katuod nin Diyos.