Kun totoo iyan, isipa kun ano an puwedeng magin kahulugan kaiyan sa sato. Halimbawa, sarong brother na an aking lalaki naghugot an naghapot: ‘Patiinot na daw na pig-aram ni Jehova kun baga makakaya mi ni agom an paghugot kan aki mi? Nangyari daw iyan dahil nahiling na niya na talagang makakaya mi iyan?’ Igwa daw nin marahay na dahilan para magtubod kita na kinokontrol ni Jehova an gabos na bagay na nangyayari sa satong buhay?

Kun urog ta pang sisiyasaton an mga tataramon ni Pablo na nakarekord sa 1 Corinto 10:13, makakapagkongklusyon kita nin arog kaini: Dai nin maka-Kasuratan na dahilan para magtubod kitang patiinot nang pig-aaram ni Jehova kun anong mga pagbalo an makakaya ta dangan, basado diyan, pinipili kun ano an mga aatubangon ta. Pag-ulayan ta an apat na dahilan kun taano ta makakapagkongklusyon kita nin arog kaiyan.

Inot, tinawan ni Jehova an mga tawo nin libertad na magdesisyon. Gusto niya na kita mismo an magpili kan magigin buhay ta. (Deut. 30:19, 20; Jos. 24:15) Kun pipilion ta an tamang paagi nin pamumuhay, makakaasa kita na gigiyahan kita ni Jehova. (Tal. 16:9) Pero kun an sala an pipilion niyato, sasaparon ta an mga konsekwensiya kaiyan. (Gal. 6:7) Kun si Jehova an nagpipili kun anong mga pagbalo an aatubangon ta, bako daw na garo man sana daing halaga an itinao niyang libertad na magdesisyon?

Ikaduwa, dai kita ilinilikay ni Jehova sa “panahon asin dai inaasahan na mga pangyayari.” (Par. 9:11, NW) An grabeng mga aksidente, na posibleng makamumundo an resulta, puwedeng mangyari huling yaon kita sa salang lugar sa salang panahon. May sinambit si Jesus na trahedya kun sain 18 katawo an nagadan kan marumpagan sinda nin tore. Ipinahiling diyan ni Jesus na bakong kabutan nin Diyos an saindang pagkagadan. (Luc. 13:1-5) Rasonable daw na isipon niyato na patiinot nang nagdesisyon an Diyos kun siisay an mabubuhay asin magagadan sa dai inaasahan na mga pangyayari?

Ikatulo, an kada saro sa sato kalabot sa isyu dapit sa integridad. Girumdumon na kinuwestiyon ni Satanas an integridad kan gabos na naglilingkod ki Jehova, na sinasabing dai kita magdadanay na maimbod ki Jehova pag napaatubang kita sa mga pagbalo. (Job 1:9-11; 2:4; Kap. 12:10) Kun ililikay kita ni Jehova sa nagkapirang mga pagbalo huling sa hiling niya dai ta iyan kakayanon, bako daw minaluwas na tama an sahot ni Satanas na naglilingkod sana kita sa Diyos dahil sa pakinabang na nakukua niyato?

 Ikaapat, dai ni Jehova kaipuhan na aramon nin patiinot an gabos na mangyayari sa sato. Kun patiinot nang pinipili nin Diyos kun anong mga pagbalo an aatubangon niyato buot sabihon aram na niya an gabos na mangyayari sa sato. Pero bako arog kaiyan an sinasabi sa Kasuratan. Iyo, kaya nin Diyos na aramon nin patiinot an mga mangyayari sa maabot na panahon. (Isa. 46:10) Pero ipinapahiling kan Bibliya na pinipili sana nin Diyos kun anong mga pangyayari sa maabot an gusto niyang aramon. (Gen. 18:20, 21; 22:12) Kaya, dawa may kakayahan siyang aramon nin patiinot an mga bagay-bagay, kinokonsiderar niya man an satong libertad na magdesisyon. Bako daw na arog kaiyan an aasahan ta sa Diyos na nagpapahalaga sa satong katalingkasan asin pirming timbang sa paggamit kan saiyang mga kakayahan?—Deut. 32:4; 2 Cor. 3:17.

Paano ta ngunyan sasabuton an mga tataramon ni Pablo na ‘dai nin Diyos tutugutan na mapaatubang kamo sa sugot na dai nindo makakaya’? An sinasabi digdi ni Pablo iyo idtong ginigibo ni Jehova durante nin pagbalo, bako idtong bago nin pagbalo. * Sinisiyerto kaiyan sa sato na ano man na pagbalo an mag-abot sa sato, susuportaran kita ni Jehova kun magtitiwala kita sa saiya. (Sal. 55:22) An nakakarangang mga tataramon na iyan ni Pablo basado sa duwang pundamental na katotoohan.

Inot, an mga inaatubang tang pagbalo ‘napapaatubang man sa iba.’ Kaya, bako nang bago sato an mga pagbalong naeeksperyensiyahan nin tawo. An siring na mga pagbalo kaya tang atubangon—kun masarig kita sa Diyos. (1 Ped. 5:8, 9) Sa konteksto kan 1 Corinto 10:13, an sinasabi diyan ni Pablo na mga sugot iyo idtong napaatubang sa mga Israelita kan sinda nasa kaawagan. (1 Cor. 10:6-11) An gabos na iyan naeksperyensiyahan na nin tawo asin kayang atubangon kan maimbod na mga Israelita. Apat na beses na sinabi ni Pablo na “nagkapira sa sainda” an nagsuway ki Jehova. Makamumundo ta may mga Israelita na nagpadara sa maraot na mga pagmawot dahil dai sinda nagsarig sa Diyos.

Ikaduwa, “an Diyos maimbod.” Ipinapahiling kan mga nababasa ta manungod sa mga ginibo nin Diyos para sa saiyang mga lingkod na maimbod niyang namumutan an ‘mga namumuot sa saiya asin nagkukuyog kan saiyang mga tugon.’ (Deut. 7:9) Ipinapahiling man kaiyan na pirming inuutob nin Diyos an saiyang mga panuga. (Jos. 23:14) Huli sa mga ginibo nin Diyos kaidto na kaimbudan, makakapagtiwala an mga namumuot asin nagkukuyog sa saiya na uutubon niya an duwang panugang ini kun mapadapit sa mga pagbalong mapapaatubang sa sainda: (1) Dai niya tutugutan an ano man na pagbalo na umabot sa puntong dai na nanggad iyan makakaya, asin (2) “magibo . . . siya nin paagi tanganing makayanan” ninda iyan.

Paano si Jehova naggigibo nin paagi na makayanan kan mga nagsasarig sa saiya an mga pagbalong inaagihan ninda? Siyempre pa, kun kabutan niya, puwede niyang halion na sana an pagbalo. Pero girumdumon na sinabi ni Pablo: “Magibo man siya [si Jehova] nin paagi tanganing makayanan nindo iyan.” Kaya sa dakul na sitwasyon, naggigibo siya nin “paagi”—itinatao niya sa sato an ano man na kaipuhan niyato para talagang matagalan ta an mga pagbalo. Isip-isipa ining nagkapirang mga ginigibo ni Jehova na “paagi” para sa sato:

• ‘Rinaranga niya kita sa gabos tang kasakitan.’ (2 Cor. 1:3, 4) Puwedeng paginhawahon ni Jehova an satong isip, puso, asin pagmati paagi kan saiyang Tataramon, banal na espiritu, asin kan espirituwal na kakanon na itinatao kan maimbod na uripon.—Mat. 24:45; Juan 14:16, nota; Roma 15:4.

• Puwede niya kitang giyahan paagi kan banal na espiritu. (Juan 14:26) Kun mag-abot an mga pagbalo, puwedeng ipagirumdom sa sato kan espiritu an mga istorya asin prinsipyo sa Bibliya, na makakatabang sa sato na gumibo nin madunong na mga desisyon.

• Puwede niyang gamiton an saiyang mga anghel para tabangan kita.—Heb. 1:14.

• Puwede niyang gamiton an satong mga kapagtubod tanganing paagi sa saindang mga tataramon asin gibo sinda magin “tabang na nagpapakusog” sa sato.—Col. 4:11, nota.

Ano ngunyan an maikokongklusyon ta manungod sa kahulugan kan mga tataramon ni Pablo sa 1 Corinto 10:13? Dai ni Jehova pinipili kun anong mga pagbalo an aatubangon niyato. Pero kun mag-abot an mga pagbalo, makakasiyerto kita sa bagay na ini: Kun lubos kitang magtitiwala ki Jehova, dai niya tutugutan an satong mga pagbalo na umabot sa puntong dai na niyato iyan kayang tagalan; pirmi siyang magibo nin paagi na matagalan niyato an mga iyan. Nakakaranga nanggad na maaraman iyan!