Namundag ako sa Ciudad Mante, sarong magayon na rehiyon sa estado nin Tamaulipas, Mexico. Kadaklan kan mga nakaistar sa siyudad na iyan mga matinao asin mabubuot. Pero delikadong lugar man iyan huli sa mga krimen na gibo nin mga gang.

Panduwa ako sa apat na magturugang na puro lalaki. Pinabunyagan ako sa Katoliko kan sakong mga magurang, asin kan huri nagin saro ako sa miyembro nin choir sa simbahan. Takot ako sa Diyos ta habo kong mapadusahan asin suluon nin daing katapusan sa impiyerno.

Kan singko anyos ako, binayaan kami ni Papa. Munduon ako kaidto asin grabe an kapungawan ko. Dai ko maintindihan kun ta’no ta binayaan niya kami, dawa padangaton mi siyang marhay. Kinaipuhan ni Mama na magtrabaho nin halawig na oras tanganing masuportaran an pangangaipo ming magturugang.

Huling mayo pirmi si Mama, dai ako naglalaog sa klase asin nakikipagbarkada sa mga mas gurang sako. Nakanuod ako saindang magmuda, magsigarilyo, maghabon, asin makisuntukan. Gusto kong ako an magin hadi-hadi kaya nag-adal ako nin boksing, wrestling, karate, saka maggamit nin mga armas. Kaya nagin bayolenteng tin-edyer ako. Pirmi akong naiimbuwelto sa mga baradilan, asin pirang beses nang haros magkarigos ako sa dugo asin binabayaan sa tinampo na haros gadan na. Grabeng kulog an namamati ni Mama pag naabutan niya akong arog kaiyan asin kaipuhan na alsahon asin idalagan sa ospital!

Kan 16 anyos na ako, nagbisita sa harong mi an dati kong kakawat na si Jorge. Sinabi niya na saro na siyang Saksi ni Jehova asin gusto niyang sabihon samo an sarong importanteng mensahe. Ipinaliwanag niya an saiyang paniniwala gamit an Bibliya. Kaidto ko lang i’to nabasa kaya nagkainteres akong marhay na maaraman an dapit sa pangaran nin Diyos asin sa saiyang mga katuyuhan. Inalok kami ni Jorge na mag-adal nin Bibliya, asin inako mi iyan.

Naugma talaga ako kan maaraman ko an katotoohan dapit sa nagkakalayong impiyerno—na bako palan iyan katukduan kan Bibliya. (Salmo 146:4; Parahulit 9:5) Kan maaraman ko iyan, bako nang  nakakatakot an hiling ko sa Diyos kundi saro nang mamumuton na Ama na daing ibang gusto kundi an pinakamarahay para sa saiyang mga aki.

Mantang nagpapadagos ako sa pag-adal nin Bibliya, nahiling kong kaipuhan kong baguhon an personalidad ko. Kaipuhan kong magin mapakumbaba asin ipundo an kadahasan. Nakatabang sako an 1 Corinto 15:33. Sabi diyan: ‘An maraot na pag-iriba nakakaraot kan mga marahay na ugali.’ Napag-isip-isip ko na kun gusto kong magbago, kaipuhan kong ipundo an pakikiiba sa mga tawong may maraot na impluwensiya sa sako. Kaya imbes na makiiba-iba sa dati kong mga amigo, nakipag-amigo ako sa mga miyembro kan tunay na Kristiyanong kongregasyon—mga tawo na rineresolberan an iriwal, bakong paagi sa pakisuntukan o ano man na kadahasan, kundi paagi sa pag-aplikar kan mga prinsipyo sa Bibliya.

An saro pang teksto na nakatabang sa sako iyo an Roma 12:17-19. Sinasabi diyan: ‘Dai kamo magbalos sa kiisay man nin maraot sa maraot. Kun mahihimo siring sa makakaya nindo, makipagkatuninungan kamo sa gabos na tawo. Dai kamo magbalos, huli ta nasusurat: “‘Sa sako an pagbalos; ako an mabalos,’ sabi kan Kagurangnan.”’ Nanudan kong akuon na ipabaya ki Jehova an inhustisya sa sadiri niyang paagi asin panahon. Padiit-diit, nahali ko an pagigin madahas ko.

Dai ko malilingawan su nangyari kaidto sarong banggi kan papuli na ako. Dinaguso ako kan mga hoben hali sa dati ming kalaban na gang. Pinakol ako sa likod kan lider ninda, asin kinurahawan ako, “Lumaban ka!” Namibi ako kaidto nin halipot, asin hinagad ko ki Jehova na tabangan akong kayanon an pag-atake. Gustuhon ko nang magbalos, pero nagdulag na sana ako. Kan sunod na aldaw, nakasabatan ko idtong lider kan gang. Umininit an dugo ko asin gustuhon ko nang magbalos, pero namibi giraray ako ki Jehova na tabangan akong pugulan an sadiri ko. Nangalas ako kan ruminani siya sako dangan nagsabi: “Pasensiya na sa nangyari kasubanggi. An totoo, gusto kong magin arog mo. Gusto ko man mag-adal nin Bibliya.” Marahay na sana talaga ta napugulan ko an kaanggutan ko! Dahil diyan, pareho na kaming nag-adal nin Bibliya.

Kaya lang nagpundo an mga kapamilya ko sa pag-adal nin Bibliya kan panahon na idto. Pero desidido akong ipadagos an pag-adal asin dai tugutan an siisay man o ano man na mapapundo ako. Aram ko na kun regular akong makikiiba sa mga lingkod nin Diyos, mahahali an mga hinanakit sa puso ko asin magkakaigwa ako nin espirituwal na pamilya. Nag-uswag ako sa espirituwal kaya kan 1991 nabawtismuhan ako bilang Saksi ni Jehova.

Dati pano nin hinanakit an puso ko, siga, saka bayolente. Pero biyong binago kan Tataramon nin Diyos an buhay ko. Ngunyan sinasabi ko sa siisay man na gustong magdangog an mensahe kan Bibliya. Beynte tres na taon na ako sa pribilehiyo bilang bilog na panahon na ministro.

Nakapagboluntaryo man ako sa sangang opisina kan Mga Saksi ni Jehova sa Mexico. Namidbid ko duman si Claudia, sarong aktibong marhay na Kristiyano, asin ikinasal kami kan 1999. Nagpapasalamat talaga ako ki Jehova na binendisyunan niya ako nin mapagsuportar na agom!

Naglingkod kami sa Mexican Sign Language congregation, para tabangan an mga pula na mamidbid si Jehova. Pagkatapos, inimbitaran kami na magbalyo sa Belize para duman magtukdo nin Bibliya sa mga tawo. Mas simpleng marhay an buhay mi digdi pero yaon na an gabos na kaipuhan mi para magin maugma. Dai mi ini iriribay sa ano man na bagay.

Nakipag-adal giraray nin Bibliya si Mama dangan nabawtismuhan. Mga Saksi ni Jehova na man an matua kong tugang saka an agom niya pati mga aki. An iba sa mga dati kong barkada kaidto na napaabutan ko kan mensahe kan Kahadian naglilingkod na man ngunyan ki Jehova.

Nakakamundo ta an iba sa mga kapamilya ko gadan na ta dai ninda binago an saindang madahas na pamumuhay. Kun dai ako nagbago, tibaad arog na man ako sainda ngunyan. Nagpapasalamat ako na irinani ako ni Jehova sa saiya asin sa mga nagsasamba sa saiya, na mabuot asin mapasensiyang nagtukdo sako kun paano isasabuhay an mga prinsipyo sa Bibliya.