Imahinaron na pakaduman mo pa sana sa ibang nasyon. Bako kang pamilyar sa mga tawo duman pati na sa mga kaugalian, pagkakan, asin kuwartang ginagamit ninda. Natural sana na madisganar ka.

Tibaad arog man kaiyan an mamatian mo sa inot na beses mong pagbasa kan Bibliya. Garo ka nagbalik sa suanoy na kinaban na bako kang pamilyar. May manunumpungan kang mga tawo na inaapod na mga Filisteo. Makakahiling ka man nin kakaibang mga kostumbre arog nin ‘pagpasing’ o paggisi nin bado, saka an pagkakan na inaapod na manna pati na an sinsilyo na inaapod na drakma. (Exodo 16:31; Josue 13:2; 2 Samuel 3:31; Lucas 15:9, An Banal na Biblia [Paulines]) Tibaad makaribong an gabos na ini. Arog nin pagduman sa ibang nasyon, bako daw na mapasalamat ka kun may magpaliwanag sa saimo kan mga bagay-bagay?

Kan punan na isurat an banal na mga kasuratan kan ika-16 na siglo B.C.E., may itinatao nang tabang sa mga tawo para masabutan iyan. Halimbawa, an inot na lider kan nasyon nin Israel na si Moises, “ipinaliwanag sainda” kun ano an nasusurat.—Deuteronomio 1:5, BPV. *

Pakalihis nin mga sampulong siglo, igwa pa man giraray nin mga kuwalipikadong paratukdo kan Kasuratan. Kan 455 B.C.E., nagtiripon sa sarong plasa sa siyudad nin Jerusalem an sarong dakulang grupo nin mga Judio kaiba an dakul na aki. Yaon duman an mga paratukdo kan Bibliya na ‘nagbabasa sa [iyo man sanang banal na] libro.’ Pero bako sana iyan an ginibo ninda. ‘Ipinaliwanag ninda an kahulugan, sa siring nasasabutan an binabasa.’—Nehemias 8:1-8, An Banal na Biblia (Paulines).

Pakalihis nin limang siglo, arog man kaiyan na pagtutukdo an ginibo ni Jesu-Cristo. Sa katunayan, mas midbid siya nin mga tawo bilang sarong paratukdo. (Juan 13:13) Nagtukdo siya sa darakulang grupo nin tawo, siring man sa mga indibidwal. Sarong beses, nagtaram siya sa sarong dakulang grupo kun sain ipinahayag niya an bantog na Sermon sa Bukid, asin an mga tawo ‘nagngaralas sa saiyang pagtukdo.’ (Mateo 5:1, 2; 7:28) Kan tigsuli kan 33 C.E., bulan nin Abril, kinaulay ni Jesus an duwa sa mga disipulo niya kan naglalakaw sinda sa dalan pasiring sa sarong baryo harani sa Jerusalem, asin ‘ipinaliwanag niya sa sainda an mga kasuratan.’—Lucas 24:13-15, 27, 32, BPV.

An mga disipulo ni Jesus mga paratukdo man kan Tataramon nin Diyos. Sarong beses, may opisyal kan Etiopia na nagbabasa nin sarong partikular na teksto sa Kasuratan. Rinanihan siya asin hinapot nin sarong disipulo na an pangaran Felipe: “Nakakasabot ka kan binabasa mo?” Nagsimbag an Etiope: ‘Papanuhon ko kun daing magtukdo sako?’ Dangan ipinaliwanag sa saiya ni Felipe an kahulugan kan teksto.—Guibo 8:27-35.

Arog kan mga paratukdo kan Bibliya kan nakaaging panahon, an mga Saksi ni Jehova sa ngunyan nagtutukdo man kan Bibliya sa 239 kadagaan sa bilog na kinaban. (Mateo 28:19, 20) Surusemana, labi sa siyam na milyon na indibidwal an tinatabangan ninda na masabutan an Bibliya. An dakul sa sainda bakong Kristiyano. Daing bayad an pag-adal asin puwede iyan na gibuhon sa harong kan tinutukduan o sa iba pang kumbenyenteng lugar. An iba ngani nakakapag-adal paagi sa telepono o video, gamit an kompyuter o mobile device.

Kontakon tabi an siisay man na Saksi ni Jehova para sa detalye kun paano ka makikinabang sa arog kaining pag-adal. Mahihiling mo na bako man dipisilon masabutan an Bibliya, kundi, ‘kapaki-pakinabang iyan sa pagtukdo, sa pagsagwi, sa pagpakarhay, sa pagpatuod na nasa katanusan,’ tanganing ika magin lubos na may kakayahan, ‘andam nanggad sa gabos na marahay na gibo.’—2 Timoteo 3:16, 17.