An Katotoohan Manungod sa Mangyayari sa Maabot na Panahon
Naisip-isip mo na daw kun ano an nakatagama sa maabot? Ipinapahiling kan Bibliya an mapadapit sa mahahalagang pangyayari na madali nang mangyari na makakaapektar sa gabos na tawo sa daga.
Ipinaliwanag ni Jesus kun paano kita ‘makakasiyerto na harani na an Kahadian nin Diyos.’ (Lucas 21:31) Nagpropesiya siya na, apuwera sa iba pang bagay, magkakaigwa nin darakulang giyera, makukusog na linog, kakulangan nin kakanon, saka epidemya—mga bagay na nahihiling ta mismo ngunyan.—Lucas 21:10-17.
Ipinapahiling pa kan Bibliya na sa “huring mga aldaw” kan pamamahala nin tawo, magigin maraot an paggawi kan mga tawo. Mababasa mo iyan sa 2 Timoteo 3:1-5. Pag nahiling mo na an mga ugali saka paggawing iyan, siguradong mauyon kang nangyayari na ngunyan an propesiyang iyan sa Bibliya.
Ano an buot sabihon kaini? Madali nang humiro an Kahadian nin Diyos para gumibo nin darakulang pagbabago na magtatao nin marahayon na buhay digdi sa daga. (Lucas 21:36) Sa Bibliya, an Diyos nanunuga nin marahay na mga bagay para sa daga asin para sa mga tawo na maistar diyan. Uni an nagkapirang halimbawa.
MARAHAY NA PAMAMAHALA
“Asin may itinao sa saiya [ki Jesus] na pamamahala, onra, asin sarong kahadian, tanganing an mga banwaan, mga nasyon, asin mga grupong manlain-lain an lengguwahe gabos maglingkod sa saiya. An saiyang pamamahala sarong daing sagkod na pamamahala na dai malihis, asin an saiyang kahadian dai malalaglag.”—DANIEL 7:14.
Kun ano an kahulugan kaini: Magkakaigwa ka nin maugmang buhay sa irarom kan sarong pinakamarahay na gobyerno sa bilog na kinaban na inestablisar nin Diyos asin an Hadi kaiyan iyo an saiyang Aki.
MARAHAY NA SALUD
“Mayo nin residente an magsasabi: ‘May hilang ako.’”—ISAIAS 33:24.
Kun ano an kahulugan kaini: Dai ka na nuarin man magkakahilang o magkakaigwa nin ano man na diperensiya sa pisikal; mabubuhay ka asin dai ka na magagadan.
LUBOS NA KATUNINUNGAN
“Pinapapundo niya an mga giyera sa bilog na daga.”—SALMO 46:9.
Kun ano an kahulugan kaini: Mawawara na an peligro kan giyera asin an gabos na pagsakit na dara kaiyan.
AN DAGA MAPAPANO NIN MARAHAY NA MGA TAWO
“An mga maraot mawawara na . . . Magigin pagsadiri kan mga mahuyo an daga.”—SALMO 37:10, 11.
Kun ano an kahulugan kaini: Mawawara na an mga maraot na tawo, an mga tawo sanang gustong magsunod sa Diyos an magdadanay.
AN BILOG NA DAGA MAGIGIN PARAISO
“Matugdok sinda nin mga harong asin maistar sa mga iyan, asin magibo sinda nin mga ubasan asin kakakanon an bunga kan mga iyan.”—ISAIAS 65:21, 22.
Kun ano an kahulugan kaini: Magigin magayon an bilog na daga. Uutubon nin Diyos an satong pamibi na an saiyang kabutan mangyari “sa daga.”—Mateo 6:10.
Puwede Mo Man Magustuhan
SIMBAG SA MGA HAPOT SA BIBLIYA
Ano an Gigibuhon kan Kahadian nin Diyos?
Aramon kun ano an puwede mong lauman pag namahala na an gobyerno nin Diyos sa bilog na daga.
