KATAWUHAN

An sinasabi kan Bibliya: ‘Dai linalang kan Diyos an daga na mayong katuyuhan, kundi hinaman iyan tanganing istaran.’—ISAIAS 45:18.

PLANETANG DAGA

An sinasabi kan Bibliya: “Sarong henerasyon an minaagi, asin sarong henerasyon an minaabot, pero an daga nagdadanay sagkod lamang.”—ECLESIASTES 1:4.

AN KAHULUGAN KAIYAN: Sinasabi kan Bibliya na an daga dai nuarin man magugunaw asin pirmi iyan na iistaran. Kaya ano an buot sabihon kan katapusan kan kinaban?

PAG-ISIPAN: Ikinukumparar kan Bibliya an maabot na katapusan kan kinaban na ini sa nangyari kan panahon ni Noe. Kan panahon na idto, “napano an daga nin kadahasan.” (Genesis 6:13) Pero si Noe matanos. Kaya ilinigtas kan Diyos si Noe saka an saiyang pamilya. Pero pinuho niya an maraot na mga tawo paagi sa baha. Arog kaini an sinabi kan Bibliya sa nangyari kaidto: “An kinaban kan panahon na idto nalaglag kan iyan paabutan nin baha.” (2 Pedro 3:6) Nagin katapusan iyan nin sarong kinaban. Pero, ano su natapos? Bako an daga kundi an maraot na mga tawo sa daga. Kaya pag binabanggit kan Bibliya an katapusan kan kinaban, bako an planetang Daga an sinasabi diyan na matatapos kundi an maraot na mga tawo sa daga an matatapos pati an sistema nin mga bagay na ginibo ninda.

MGA PROBLEMA SAKA KARATAN

An sinasabi kan Bibliya: “Dikit na sanang panahon, asin an mga maraot mawawara na; hihilingon mo an dati nindang kinamumugtakan, asin mayo na sinda diyan. Alagad magigin pagsadiri kan mga mahuyo an daga, asin makakanumpong sinda nin labi-labing kaugmahan huli sa abundang katuninungan.”—SALMO 37:10, 11.

AN KAHULUGAN KAIYAN: Dai lubos na napara kan Baha kan panahon ni Noe an karatan. Pakatapos kan Baha nagin miserable na naman an buhay kan mga tawo dahil sa mga maraot. Pero madali nang tapuson nin Diyos an karatan. Arog kan sinabi kan salmista: “An mga maraot mawawara na.” Tatapuson nin Diyos an karatan paagi sa saiyang Kahadian—sarong pambilog na kinaban na gobyerno na papamahalaan hali sa langit an mga tawong masinunod sa Diyos.

PAG-ISIPAN: Susuportaran daw kan mga namamahala ngunyan sa daga an Kahadian nin Diyos? Ipinapahiling kan Bibliya na dai. May kamangmangan nindang lalabanan an Kahadian nin Diyos. (Salmo 2:2) Ano an magigin resulta? Sasalidahan kan Kahadian nin Diyos an gabos na gobyerno nin tawo, asin “ini sana an magdadanay sagkod lamang.” (Daniel 2:44) Pero taano ta kaipuhan na tapuson an pamamahala nin tawo?

An sinasabi kan Bibliya: “Bako para sa tawong naglalakaw dawa an giyahan an sadiring lakad niya.”—JEREMIAS 10:23.

AN KAHULUGAN KAIYAN: Dai linalang an mga tawo na may kakayahan na pamahalaan an sadiri ninda. Bakong magayon an resulta kan pamamahala ninda sa mga tawo saka kan pagpurbar nindang resolberan an mga problema kan mga ini.

PAG-ISIPAN: Binabanggit kan Britannica Academic na dai kaya kan suway-suway na gobyerno na “halion an problema kan kinaban sa pagtios, gutom, hilang, natural na kalamidad, asin giyera o iba pang kadahasan.” Sinabi pa kaiyan: “An iba . . . naniniwala na sarong klase nin pambilog na kinaban na gobyerno sana an makakatao nin permanenteng solusyon sa mararaot na bagay na ini.” Pero dawa pa magkasararo an gabos na gobyerno nin tawo, bakong perpektong mga tawo pa man giraray an mamamahala sa kinaban—mga tawo na dai kayang resolberan an mga problema na binanggit sa inutan. An Kahadian nin Diyos sana an gobyerno na may kakayahan na permanenteng resolberan an gabos na problema sa bilog na kinaban.

Kaya ipinapahiling kan Bibliya na an katapusan kan kinaban—an maraot na sistema nin mga bagay ngunyan—dai dapat katakutan kan marahay na mga tawo. An totoo, sarong bagay iyan na dapat abangan dahil an raot nang lumang kinaban na ini riribayan na kan magayunon na marhay na bagong kinaban nin Diyos!

Nuarin mangyayari an gabos na ini? Ipapaliwanag sa sunod na artikulo an simbag diyan kan Bibliya.