‘Namumugtak sa langit an sarong trono asin an saro na nagtutukaw sa trono; asin an nagtutukaw, kun paghilingon, nakakaagid sa sarong gapong jaspe asin sa sardio; asin may hablon-dawani sa palibot kan trono na kun paghilingon nakakaagid sa esmeralda.’—Kapahayagan 4:2, 3.

‘Igwa nin sinag duman sa palibot. Siring na an hablon-dawani yaon diyan sa mga dagom kun aldaw na nag-uuran, siring man sana an kamugtakan kan sinag duman sa palibot. Iyo ini an kabaing kan kamurawayan ni Jehova.’—Ezequiel 1:27, 28.

Ipinahiling sa mga bisyon na ini, na itinao ki apostol Juan asin propeta Ezekiel, kun gurano kamuraway kan Kahuruhalangkawing Diyos na si Jehova paagi sa paggamit kan mga bagay na madali tang maintindihan—nagkikinang na mga bato, hablon-dawani (rainbow), asin kahanga-hangang trono. Itinutukdo kaiyan sa sato na an presensiya ni Jehova kahanga-hanga sa kagayunan, magaya-gaya, asin trangkilo.

An mga deskripsiyon na ini dapit sa Diyos kauyon kan mga tataramon kan salmista na nagsurat: ‘Dakulaon nanggad si Jehova, asin ta maninigo siya sa halangkawon na pag-umaw; makapangyarihan sa gabos na mga diyos. Huli ta an gabos na diyos nin mga banwaan anas mga anito, alagad si Jehova kaglalang kan kalangitan. An pag-umaw asin kadakulaan sa atubang niya; kasarigan asin kamurawayan sa saiyang santuwaryo.’—Salmo 96:4-6.

Dawa ngani Supremo si Jehova, inaagda niya kitang dumulok sa saiya sa pamibi asin sinisigurado niya sa sato na dadangugon niya kita. (Salmo 65:2) Dakulaon an pagkamuot asin pagmakulog sa sato nin Diyos kaya talagang nasabi ni apostol Juan: ‘An Diyos pagkamuot.’—1 Juan 4:8.

‘Huling pano kan banal na espiritu, [an Kristiyanong disipulo na si Esteban] nagtangad sa langit asin nahiling niya an kamurawayan nin Diyos asin si Jesus na nagtitindog sa tuo nin Diyos, asin siya nagsabi, “Uya nahihiling kong bukas an kalangitan asin an Aki nin tawo nagtitindog sa tuo nin Diyos.”’—Guibo 7:55, 56.

Kan ipahiling ki Esteban an bisyon na ini, dai pa sana nahahaloy na ipinagadan si Jesus kan mismong mga kaulay digdi ni Esteban—an mga Judiong lider nin relihiyon. Kinumpirmar kan bisyon na ini na buhay si Jesus asin totoong binuhay siya liwat asin tinawan nin onra. Mapadapit diyan, si apostol Pablo  nagsabi na ‘si Jesus binuhay liwat nin Diyos sa mga gadan, asin pinatukaw sa saiyang tuo sa mga langitnon na kamugtakan, sa itaas na marhay kan gabos na pagbuot, asin kapangyarihan, asin kabagsikan, asin kasakupan, patin sa gabos na ngaran na inginaran, bako sanang sa kinaban na ini kundi man sa maabuton.’—Efeso 1:20, 21.

Apuwera sa mga deskripsiyon dapit sa halangkawon na posisyon ni Jesus, ipinapahiling kan Kasuratan na arog ni Jehova, si Jesus nagmamakulog na marhay sa mga tawo. Durante kan ministeryo ni Jesus digdi sa daga, nagparahay siya nin mga may hilang asin may diperensiya sa pisikal, saka nagbuhay nin mga gadan. Kan isinakripisyo niya an saiyang buhay, ipinahiling niya an saiyang dakulang pagkamuot sa Diyos asin sa katawuhan. (Efeso 2:4, 5) Ipinapahiling kan pagtindog ni Jesus sa tuo nin Diyos na dai na mahaloy gagamiton niya an saiyang awtoridad tanganing bendisyunan an makinuyog na mga tawo sain man na lugar.

‘Naghihiling ako [si propeta Daniel] sagkod na nagburugtak nin mga trono asin an Suanoy kan mga Aldaw [si Jehova] tuminukaw. Mga manribo-ribo an nagririlingkod sa saiya, asin mga laksa nin mga laksa an nagtatarabang duman sa atubangan niya.’—Daniel 7:9, 10.

Sa bisyon na ini dapit sa kalangitan, bako sanang sarong anghel an nahiling ni Daniel kundi kadakul. Talagang nakakapanggirabo an bisyon na iyan! An mga anghel mamuraway na mga espiritu, intelihente asin makapangyarihan. May mga ranggo sinda, arog kan serafin asin kerubin. Labing 250 beses na sinambit sa Bibliya an mga anghel.

An mga anghel bakong mga dating tawo na nag-istar sa daga. Haloy nang ginibo nin Diyos an mga anghel bago pa an tawo. Kan lalangon nin Diyos an daga, yaon an mga anghel, na nagmamasid asin nagkururahaw sa pag-umaw.—Job 38:4-7.

An saro sa ginigibong paglilingkod sa Diyos kan maimbod na mga anghel iyo an may koneksiyon sa pinakaimportanteng gibuhon ngunyan digdi sa daga—an pagbalangibog kan maugmang bareta kan Kahadian nin Diyos. (Mateo 24:14) An paglilingkod nindang iyan ihinayag sa sarong bisyon na ipinahiling ki apostol Juan, na nagsurat: ‘Ako nakahiling nin saro pang anghel na naglalayog sa tahaw nin langit, na igwa nin daing katapusan na marahay na bareta na ipagbabalangibog sa mga nag-iirok sa daga, asin sa gabos na nasyon asin tribo asin tataramon patin banwaan.’ (Kapahayagan 14:6) Bakong arog  kaidtong panahon, dai na direktang nakikipag-ulay ngunyan an mga anghel sa mga tawo, pero ginigiyahan ninda an mga naghuhulit kan maugmang bareta sa mga tawong sinsero.

‘Nangyari an ralaban sa langit: Si Miguel [si Jesu-Cristo] asin an saiyang mga anghel nagruluwas sa pakilaban sa dragon; asin an dragon asin an saiyang mga anghel nakilaban. Asin sinda dai nakadaog, minsan an saindang kamugtakan dai na nakua sa langit. Asin hinulog an dakulang dragon, an gurang na halas, an inaapod na Diyablo asin Satanas, an paradaya sa bilog na kinaban; siya hinulog sa daga asin an saiyang mga anghel hinulog sa kaibahan niya.’—Kapahayagan 12:7-9.

May panahon na nagin maribok sa langit. Sa kapinunan kan kasaysayan nin tawo, saro sa mga anghel, na nagkaigwa nin grabeng pagmawot na sambahon, an nagrebelde ki Jehova asin nagin Satanas, na an buot sabihon “Paratumang.” Kan huri uminiba sa rebelyon an ibang mga anghel kaya nagi sindang mga demonyo. Kinalaban kan marauton na mga anghel na ini si Jehova asin inimpluwensiyahan an mayoriya kan katawuhan na sumuway sa mamumuton na paggiya ni Jehova.

Si Satanas asin an mga demonyo marauton asin daing hirak. Kaiwal sinda kan mga tawo asin sinda an dahilan kan kadaklan sa mga pagsakit sa kinaban. Halimbawa, ginadan ni Satanas an ataman na mga hayop asin mga suruguon kan maimbod na tawong si Job. Tapos, ginadan niya gabos an 10 aki ni Job paagi sa pagpadara nin ‘makusugon na duros’ na guminaba sa harong na pinagtitiripunan kan mga ini. Dangan, pinasakitan ni Satanas si Job paagi sa ‘makulugon na pigsa magpuon sa dapan kan saiyang bitis sagkod sa alimpoporo kan saiyang payo.’—Job 1:7-19; 2:7.

Pero madali nang paraon si Satanas. Kan ihulog siya sa daga, aram niya nang ‘kadikit na sana an panahon niya.’ (Kapahayagan 12:12) Sigurado na an katapusan ni Satanas, asin talagang maugmang bareta iyan!

‘Ika [si Jesus] buminakal para sa Diyos [nin mga tawo hali sa] gabos na tribo asin tataramon asin banwaan patin nasyon, asin ginibo mo sinda na magin kahadian asin mga saserdote para sa satong Diyos asin sinda maghahadi sa daga.’—Kapahayagan 5:9, 10.

Arog ni Jesus, may mga tawo man hali sa daga na bubuhayon pasiring sa langit. Sinabi ni Jesus sa saiyang maimbod na mga apostol: ‘Ako maduman sa pag-andam saindo nin lugar. Asin ako madigdi liwat, asin iiiba ko kamo tanganing kun sain ako, duman man kamo.’—Juan 14:2, 3.

 May katuyuhan an pagsakat ninda sa langit. Kaiba ni Jesus, sinda an mahadi sa sarong gobyerno na pag-abot nin panahon mamamahala sa mga tawo sa daga asin mapaabot nin mga bendisyon. Ini an Kahadian na sinabi ni Jesus na ipamibi kan mga parasunod niya sa modelong pamibi: ‘Ama niyamo na yaon ka sa langit, sasambahon an ngaran mo. Dumatong lugod an Kahadian mo. Gibuhon an buot mo, digdi sa daga nin siring sa langit.’—Mateo 6:9, 10.

‘Ako [si apostol Juan] nakadangog nin halangkaw na tingog hali sa trono, na an sabi: “Uya, an tabernakulo nin Diyos nasa mga tawo. Asin papahidon niya an gabos na luha sa saindang mga mata; asin an kagadanan mawawara na; dai na sagkod magkakaigwa nin pagmundo, ni pagtangis, ni kulog. An mga inot na bagay nakalihis na.”’—Kapahayagan 21:3, 4.

An makahulang bisyon na ini nanunungod sa panahon na tatapuson na kan Kahadian nin Diyos, sa pamamahala ni Jesus asin kan mga tawong binuhay hali sa daga, an pamamahala ni Satanas asin gigibuhon nang paraiso an daga. Mawawara na an mga bagay na nagtatao nin grabeng kulog asin kamunduan sa katawuhan. Pati kagadanan mawawara na.

Pero, paano man idtong binilyon na nagadan asin dai bubuhayon pasiring sa langit? Maabot an panahon na bubuhayon liwat sinda, na may paglaom na mabuhay nin daing sagkod sa Paraiso digdi sa daga.—Lucas 23:43.