1. Taano ta naaapresyar mo an mga tawong mapasensiya?

 NAAAPRESYAR ta gabos an mga tawong mapasensiya. Taano man? Hanga kita sa mga tawong nakakapaghalat na dai nauuyam. Naaapresyar niyato na mapasensiya sa sato an iba pag nakakagibo kita nin sala. Asin nagpapasalamat kita ta nagin mapasensiya sa sato an nagtukdo sa sato nin Bibliya kan nasasakitan kitang manudan, akuon, o iaplikar an sarong katukduan sa Bibliya. Urog sa gabos, nagpapasalamat nanggad kita huling mapasensiya sa sato an Diyos na Jehova!—Roma 2:4.

2. Sa anong mga sitwasyon tibaad masakitan kitang magin mapasensiya?

² Dawa ngani naaapresyar ta an pagigin mapasensiya kan iba, tibaad kita mismo nasasakitan kun minsan na magin mapasensiya. Halimbawa, tibaad masakitan kitang magin kalmado pag natatrapik kita, lalo na kun huri na kita sa dudumanan ta. Tibaad mag-init an payo ta pag napaanggot kita kan iba. Asin, kun minsan, puwedeng magin dipisil sa sato an padagos na paghalat sa ipinanuga ni Jehova na bagong kinaban. Gusto mo daw na magin mas mapasensiya? Sa artikulong ini, pag-uulayan ta kun ano an buot sabihon kan pagigin mapasensiya asin kun taano ta mahalagang marhay iyan. Pag-uulayan ta man kun ano an makakatabang sa sato na magin mas mapasensiya.

3. Ano an reaksiyon nin sarong mapasensiyang tawo pag siya pinoprobokar?

³ Pag-isipan an apat na paagi na maipapahiling ta an pagkamapasensiya. Inot, an sarong mapasensiyang tawo dai tulos naaanggot. Hinihinguwa niyang magdanay na kalmado asin dai siya nagbabalos pag napoprobokar o nai-stress. An pananaram na “dai tulos naaanggot” inot na nasambit sa Bibliya kan ilinaladawan si Jehova bilang “sarong Diyos na mahihirakon asin mapagmalasakit, dai tulos  naaanggot asin abunda sa maimbod na pagkamuot saka katotoohan.”—Exo. 34:6.

4. Ano an reaksiyon nin sarong mapasensiyang tawo pag kaipuhan niyang maghalat?

⁴ Ikaduwa, an sarong mapasensiyang tawo kalmadong nakakapaghalat. Kun an pag-abot nin sarong bagay mas naghahaloy kisa sa inaasahan, hinihinguwa kan siring na tawo na dai mapungot o mairitar. (Mat. 18:26, 27) Dakul na sitwasyon kun sain kaipuhan tang kalmadong maghalat. Halimbawa, mantang nagtataram an iba, kaipuhan tang mapasensiyang magdangog, na dai nagsasaliot. (Job 36:2) Tibaad kaipuhan ta man na magin mapasensiya pag tinatabangan an sarong tinutukduan na masabutan an sarong katukduan sa Bibliya o mapangganahan an sarong maraot na gawi-gawi.

5. Ano an saro pang paagi na maipapahiling an pagkamapasensiya?

⁵ Ikatulo, an sarong mapasensiyang tawo bakong pabigla-bigla. Totoo, may mga sitwasyon na kaipuhan tang humiro tulos. Minsan siring, pag an sarong mapasensiyang tawo may mahalagang trabaho na kaipuhan tapuson, dai niya hihidalion na punan iyan; dai niya man hihidalion na tapuson iyan. Imbes, nagtatagama siya nin rasonableng lawig nin panahon para planuhon an mga gigibuhon niya. Dangan matao siya nin igong panahon para tapuson an trabahong iyan.

6. Ano an reaksiyon nin sarong mapasensiyang tawo pag nag-aagi siya nin mga pagbalo o kadipisilan?

⁶ Ikaapat, an sarong mapasensiyang tawo hinihinguwang tagalan an mga pagbalo na dai nagrereklamo. Sa puntong ini, an pagkamapasensiya konektadong marhay sa pakatagal. Siyempre, bako man sala na sabihon sa sarong dayupot na amigo an namamatian ta manungod sa sarong pagbalo. Alagad, gigibuhon kan sarong mapasensiyang tawo an pinakamakakaya niya na padagos na magtagal mantang pinapagdanay an pagigin positibo. (Col. 1:11) Bilang mga Kristiyano, kaipuhan tang ipahiling an pagkamapasensiya sa gabos na paaging ini. Taano? Aramon ta an pirang mga dahilan.

7. Uyon sa Santiago 5:7, 8, taano ta mahalagang marhay an pagkamapasensiya? (Hilingon man an ritrato.)

⁷ Mahalagang marhay sa satong kaligtasan an pagkamapasensiya. Arog kan maimbod na mga lingkod kaidto, kaipuhan tang mapasensiyang maghalat na utubon nin Diyos an mga panuga niya. (Heb. 6:11, 12) Iinaagid kan Bibliya an sitwasyon ta sa sarong parauma. (Basahon an Santiago 5:7, 8.) An sarong parauma mahigos na nagtatanom asin nagbabaribi kan saiyang mga itinanom, pero dai niya man aram nin eksakto kun nuarin iyan maturubo. Kaya mapasensiyang naghahalat an parauma, na nagtitiwala na may aanihon siya. Sa kaagid na paagi, nagdadanay man kitang sibot sa espirituwal na mga aktibidad dawa ngani “dai [ta] aram kun anong aldaw maabot an [satong] Kagurangnan.” (Mat. 24:42) Mapasensiya kitang naghahalat, na may kumpiyansa na sa itinalaan na panahon ni Jehova, uutubon niya an gabos na ipinanuga niya. Kun dai kita magigin mapasensiya, puwedeng mapagal kita sa paghalat asin luway-luway na maparayo sa katotoohan. Tibaad magpuon na man kitang magpokus sa mga bagay na iniisip tang makakapaugma sa sato ngunyan. Pero kun mapasensiya kita, makakatagal kita sagkod sa katapusan asin makakaligtas.—Mik. 7:7; Mat. 24:13.

8. Paano an pagkamapasensiya makakatabang sa sato na magkaigwa nin marahay na relasyon sa iba? (Colosas 3:12, 13)

⁸ An pagkamapasensiya makakatabang sa sato na magkaigwa nin marahay na relasyon sa iba. Nakakatabang iyan sa sato na atentibong magdangog pag nagtataram an iba. (Sant. 1:19) An pagkamapasensiya nakakakontribwir man sa katuninungan. Pinupugulan kita kaiyan na dai magin pabigla-bigla sa satong reaksiyon asin na dai magtaram nin bakong mabuot pag nai-stress kita. Asin kun mapasensiya kita, dai kita tulos maaanggot pag may nakakulog kan buot ta. Imbes na magbalos, ‘padagos tang pagpapasensiyahan an lambang saro asin lubos na papatawadon an lambang saro.’—Basahon an Colosas 3:12, 13.

9. Paano an pagkamapasensiya makakatabang sa sato pag kaipuhan tang gumibo nin mga desisyon? (Talinhaga 21:5)

⁹ An pagkamapasensiya makakatabang man sa sato na gumibo nin mas marahay na mga desisyon. Imbes na magin pabigla-bigla o maghidali, matao kita nin panahon para siyasaton asin turutimbangon an mga opsiyon na naiisip ta. (Basahon an Talinhaga 21:5.) Halimbawa, kun naghahanap kita nin trabaho, tibaad may tendensiya kitang akuon an inot na ialok sato na trabaho, dawa makakaulang iyan sa pagsamba niyato ki Jehova. Pero, kun mapasensiya kita, matao kita nin panahon para pag-isipan an mga bagay arog kan lugar, oras, asin kan puwedeng magin epekto kan trabaho sa satong pamilya asin sa satong espirituwalidad. Paagi sa pagigin mapasensiya, malilikayan ta na makagibo nin bakong marahay na desisyon.

10. Paano magigin mas mapasensiya an sarong Kristiyano asin padagos na maipapahiling iyan?

¹⁰ Ipamibi na magin mas mapasensiya. An pagpapasensiya sarong aspekto kan bunga kan espiritu. (Gal. 5:22, 23) Kaya puwede kitang mamibi para sa banal na espiritu asin hagadon ki Jehova na tabangan kitang patalubuon an bunga kaiyan. Kun mapaatubang kita sa sarong sitwasyon na diyan mababalo an satong pasensiya, ‘padagos kitang mahagad’ nin banal na espiritu na tabangan kitang magin mapasensiya. (Luc. 11:9, 13) Puwede ta man na hagadon ki Jehova na tabangan kitang mansayon an mga bagay-bagay kapareho kan pagmansay niya. Dangan pagkatapos na mamibi, kaipuhan tang gibuhon an pinakamakakaya ta na magin mapasensiya kada aldaw. Mantang mas parati kitang namimibi na magin mapasensiya asin naghihinguwa kitang ipahiling iyan, mas makakagamot sa satong puso an kuwalidad na  iyan asin magigin parte na iyan kan satong personalidad.

11-12. Paano nagpahiling si Jehova nin pagkamapasensiya?

¹¹ Hurop-hurupon an mga halimbawa sa Bibliya. Dakul na halimbawa sa Bibliya nin mga tawong mapasensiya. Paagi sa paghurop-hurop sa mga halimbawang iyan, makakanuod kita nin mga paagi kun paano maipapahiling an pagkamapasensiya. Bago niyato pag-ulayan an pira sa mga halimbawang iyan, hilingon ta nguna an pinakamarahay na halimbawa nin pagkamapasensiya—si Jehova.

¹² Sa hardin nin Eden, pinakaraot ni Satanas an pangaran ni Jehova asin inatake an Saiyang reputasyon bilang sarong rasonable asin mamumuton na Tagapamahala. Imbes na gadanon tulos an parapakaraot, nagin mapasensiya asin nagpugol si Jehova huling aram niya na kaipuhan nin panahon para mapatunayan na an Saiyang pamamahala iyo an pinakamarahay. Asin mantang naghahalat siya, tinatagalan niya an gabos na pagpakaraot sa saiyang pangaran. Dugang pa, mapasensiyang naghahalat si Jehova tanganing mas dakul na tawo an magkaoportunidad na mabuhay nin daing sagkod. (2 Ped. 3:9, 15) Bilang resulta, minilyon na tawo an nakamidbid saiya. Kun mapokus kita sa mga pakinabang kan pagkamapasensiya ni Jehova, posibleng marhay na magigin mas pasil sa sato na halaton an itinalaan niyang panahon na ipaabot an katapusan.

13. Paano perpektong inarog ni Jesus an pagkamapasensiya kan saiyang Ama? (Hilingon man an ritrato.)

¹³ Perpektong inarog ni Jesus an pagkamapasensiya kan saiyang Ama, asin ipinahiling niya an kuwalidad na iyan kan yaon siya digdi sa daga. Siguradong dai nagin pirming pasil sa saiya na magpahiling nin pasensiya, lalo na sa mapagsagin-sagin na mga eskriba asin mga Fariseo. (Juan 8:25-27) Alagad, arog kan saiyang Ama, si Jesus dai tulos naaanggot. Dai siya nagbalos kan  ininsulto siya o prinobokar. (1 Ped. 2:23) Mapasensiyang tinagalan ni Jesus an mga pagbalo na dai nagrereklamo. Kaya angay sana na sinasabi sa sato kan Bibliya na “isipon [na] marhay an saro na nagtagal kan malanit na pananaram hali sa mga parakasala”! (Heb. 12:2, 3) Sa tabang ni Jehova, mapasensiya ta man na matatagalan an ano man na pagbalo na mag-abot sa sato.

14. Ano an manunudan ta sa pagkamapasensiya ni Abraham? (Hebreo 6:15) (Hilingon man an ritrato.)

¹⁴ Paano kun an mga inaasahan ta manungod sa katapusan dai pa nauutob? Tibaad inasahan tang kaidto pa kutana dapat nag-abot an katapusan. Asin tibaad nahahadit kita ngunyan ta ’baad dai ta na abutan an pag-abot kaiyan. Ano an makakatabang sa sato para padagos na mapasensiyang maghalat? Pag-isipan an halimbawa ni Abraham. Kan si Abraham 75 anyos na asin mayong aki, nanuga sa saiya si Jehova: “Gigibuhon takang sarong dakulang nasyon.” (Gen. 12:1-4) Nahiling daw ni Abraham an kautuban kan panugang iyan? Dai lubos. Pagkabalyo sa Salog nin Eufrates asin pagkatapos na maghalat nin 25 taon, nahiling ni Abraham an milagrosong pagkamundag kan aki niyang si Isaac, asin pakalihis nin 60 pang taon, namundag an mga makuapo niyang si Esau saka si Jacob. (Basahon an Hebreo 6:15.) Pero dai lamang nahiling ni Abraham an saiyang mga gikan na magin sarong dakulang nasyon asin manahon an Dagang Panuga. Alagad, an maimbod na lalaking iyan nagkaigwa nin dayupot na pakikiamigo sa saiyang Kaglalang. (Sant. 2:23) Asin pag binuhay liwat si Abraham, siguradong mauugma siyang maaraman na an saiyang pagtubod asin pagpapasensiya, o pakatios, nagresulta nin mga bendisyon sa gabos na nasyon! (Gen. 22:18) Ano an leksiyon? Tibaad dai ta man tulos mahiling an kautuban kan gabos na panuga ni Jehova. Pero, kun mapasensiya kita arog ni Abraham, makakasigurado kitang babalusan kita ni Jehova ngunyan  asin lalo na sa Saiyang ipinanugang bagong kinaban.—Mar. 10:29, 30.

15. Ano an puwede tang pag-adalan sa satong personal na pag-adal?

¹⁵ Dakul na iba pang halimbawa sa Bibliya nin mga tawong mapasensiya. (Sant. 5:10) Taano ta dai gibuhon na sarong proyekto sa pag-adal an pagsiyasat sa mga halimbawang iyan? b Halimbawa, dawa ngani akion pa si David kan lahidan siya para magin hadi kan Israel sa maabot, kinaipuhan niyang maghalat nin dakul na taon bago itao saiya an pagkahadi. Si Simeon asin si Ana maimbod na sinamba si Jehova mantang hinahalat ninda an ipinanugang Mesiyas. (Luc. 2:25, 36-38) Mantang pinag-aadalan mo an siring na mga pagkasaysay, aramon an simbag sa minasunod na mga hapot: Ano daw an nakatabang sa tawong ini para makapahiling nin pagpapasensiya? Paano siya nakinabang sa pagigin mapasensiya? Paano ko siya maaarog? Puwede ka man makinabang sa pakanuod manungod sa mga dai nagpahiling nin pagpapasensiya. (1 Sam. 13:8-14) Tibaad maihapot mo: ‘Ano daw an dahilan kaya dai sinda nagin mapasensiya? Ano an mga konsekwensiya na sinapar ninda?’

16. Ano an nagkapirang pakinabang kan pagigin mapasensiya?

¹⁶ Isip-isipon an mga pakinabang kan pagigin mapasensiya. Pag kita mapasensiya, mas maugma asin mas kalmado kita. Kaya an pagkamapasensiya nakakatabang sa satong mental asin pisikal na salud. Pag mapasensiya kita sa iba, nagkakaigwa kita nin mas marahay na relasyon sa sainda. Mas nagkakasararo an satong kongregasyon. Kun may magprobokar sa sato, an satong pagigin dai tulos naaanggot makakatabang para dai maglala an sitwasyon. (Sal. 37:8, nota sa ibaba; Tal. 14:29) Pero urog sa gabos, pag mapasensiya kita, inaarog ta an satong Ama sa langit asin nagigin mas dayupot kita sa saiya.

17. Ano an dapat na magin determinasyon ta?

¹⁷ Magayunon saka kapaki-pakinabang nanggad na kuwalidad an pagkamapasensiya! Dawa ngani tibaad bako pirming pasil sa sato na magin mapasensiya, sa tabang ni Jehova, padagos tang mapapatalubo an kuwalidad na ini. Asin mantang mapasensiya kitang naghahalat kan bagong kinaban, makakapagtiwala kita na “an mata ni Jehova nakabantay sa mga may pagkatakot sa saiya, sa mga naghahalat kan maimbod na pagkamuot niya.” (Sal. 33:18) Lugod na magin determinado kita gabos na padagos na isulot an pagkamapasensiya.