1-2. (a) Taano ta nasabi ni apostol Pablo na an pagkamuot iyo “an pinakaurog” na kuwalidad? (b) Anong mga hapot an pag-uulayan niyato?

 KAN ipinapaliwanag ni apostol Pablo an manungod sa pagtubod, paglaom, asin pagkamuot, nagkongklusyon siya paagi sa pagsabi na “an pinakaurog sa mga [kuwalidad na] ini iyo an pagkamuot.” (1 Cor. 13:13) Taano ta nasabi ini ni Pablo? Sa maabot na panahon, dai ta na kakaipuhanon na magkaigwa nin pagtubod sa mga panuga nin Diyos manungod sa saiyang bagong kinaban o nin paglaom na an mga panugang iyan mauutob huling an mga bagay na iyan nagkakatotoo na. Pero pirmi tang kakaipuhanon na magkaigwa nin pagkamuot ki Jehova asin sa mga tawo. Sa katunayan, an pagkamuot ta para sa sainda padagos na makusog sagkod pa man.

² Huling pirmi tang kakaipuhanon na magkaigwa nin pagkamuot, pag-uulayan ta an tulong hapot. Inot, taano ta dapat tang mamutan an lambang saro? Ikaduwa, paano ta maipapahiling iyan? Ikatulo, paano ta mapapagdanay na makusog an pagkamuot ta sa lambang saro?

3. Taano ta dapat tang mamutan an lambang saro?

³ Taano ta mahalaga na mamutan ta an lambang saro? An sarong dahilan iyo na an pagkamuot nagpapamidbid sa sato bilang tunay na mga Kristiyano. Sinabi ni Jesus sa saiyang mga apostol: “Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:35) Siring man, nagdadanay kitang nagkakasararo huli sa pagkaigwa niyato nin pagkamuot sa lambang saro. Inapod ni Pablo an pagkamuot na “bugkos nin lubos na pagkasararo.” (Col. 3:14) Minsan siring, may saro pang mahalagang dahilan kun taano ta kaipuhan tang mamutan an lambang saro. Nagsurat si apostol Juan sa saiyang mga  kapagtubod: “An siisay man na namumuot sa Diyos dapat man na mamuot sa saiyang tugang.” (1 Juan 4:21) Pag ipinapahiling niyato an satong pagkamuot sa lambang saro, ipinapahiling ta an satong pagkamuot sa Diyos.

4-5. Iilustrar kun ano an koneksiyon kan pagkamuot ta sa Diyos asin kan pagkamuot ta sa lambang saro.

⁴ Sa paanong paagi magkakonektar na marhay an satong pagkamuot sa Diyos asin an pagkamuot na ipinapahiling ta sa satong mga tugang? Para iilustrar, pag-isipan kun paano magkakoronektar an satong puso asin an iba pang parte kan satong hawak. Pag kinukuanan kita nin pulso kan sarong doktor para mahiling kun baga maluya iyan o makusog, puwede iyan magtao saiya nin nagkapirang impormasyon manungod sa kondisyon kan satong puso. Paano ta iyan maiaagid sa pinag-uulayan tang pagkamuot?

⁵ Kun paano an sarong doktor nakakakua nin nagkapirang impormasyon manungod sa kondisyon kan satong puso pag pigkukuanan kita nin pulso, makakakua man kita nin ideya kun gurano kakusog kan satong pagkamuot sa Diyos paagi sa pag-ebalwar kan pagkamuot niyato sa iba. Kun marisa niyato na medyo nagluya na an satong pagkamuot sa mga kapagtubod, puwedeng ipinapahiling kaini na an satong pagkamuot sa Diyos nagluluya na man. Pero pag pirmi kitang nagpapahiling nin pagkamuot sa satong mga kapagtubod, indikasyon iyan na makusog an satong pagkamuot sa Diyos.

6. Pag nagluluya na an satong pagkamuot sa satong mga tugang, taano ta sarong seryosong problema iyan? (1 Juan 4:​7-9, 11)

⁶ Pag nagluluya na an satong pagkamuot sa satong mga tugang, sarong seryosong problema iyan. Taano? Huling nangangahulugan iyan na namemeligro an satong espirituwalidad. Lininaw iyan ni apostol Juan kan ipinagirumdom niya sa sato: “Kun an saro dai namumuot sa saiyang tugang, na nahihiling niya, dai man niya magigibong mamuot sa Diyos, na dai niya nahihiling.” (1 Juan 4:20) Ano an itinutukdo kaini sa sato? Mauugma sana sa sato si Jehova kun ‘namumutan ta an lambang saro.’—Basahon an 1 Juan 4:​7-9, 11.

7-8. Ano an nagkapirang paagi na puwede tang maipahiling an satong pagkamuot sa lambang saro?

⁷ Dakul na beses na mababasa ta sa Tataramon nin Diyos an pagbuot na “kamutan . . . an lambang saro.” (Juan 15:​12, 17; Roma 13:8; 1 Tes. 4:9; 1 Ped. 1:22; 1 Juan 4:11) Minsan siring, an pagkamuot sarong kuwalidad kan puso, o kan panglaog na pagkatawo, asin mayo nin tawong makakahiling kan laog kan satong puso. Kun siring, paano ta maipapahiling an satong pagkamuot sa lambang saro? Paagi sa satong mga tataramon asin mga ginigibo.

⁸ Dakul nin paagi na maipapahiling tang namumutan ta an satong mga tugang. Uni an nagkapirang halimbawa: “Magtaram kamo nin katotoohan sa lambang saro.” (Zac. 8:16) “Papagdanayon nindo an katuninungan sa lambang saro.” (Mar. 9:50) Manginot “sa pagtao nin onra sa lambang saro.” (Roma 12:10) “Maugmang akuon an lambang saro.” (Roma 15:7) “Padagos na . . . patawadon an lambang saro.” (Col. 3:13) “Padagos na darahon an mga pasanon kan lambang saro.” (Gal. 6:2) “Padagos nindong rangahon . . . an lambang saro.” (1 Tes. 4:18) “Padagos na . . . parigunon an lambang saro.” (1 Tes. 5:11) “Ipamibi an lambang saro.”​—Sant. 5:16.

9. Taano ta an pagranga sa iba sarong mahalagang ekspresyon kan satong pagkamuot? (Hilingon man an ritrato.)

⁹ Pag-ulayan niyato an saro sa mga ekspresyon kan satong pagkamuot na sinambit sa sinundan na parapo. Sisiyasaton niyato an sadol ni Pablo: “Padagos nindong rangahon . . . an lambang saro.” Taano ta an pagranga sa iba sarong mahalagang ekspresyon kan satong pagkamuot? Sigun sa sarong reperensiya sa Bibliya,  an tataramon na ginamit ni Pablo para sa termino na “rangahon” nangangahulugan na “pagtindog kataid nin saro para pakusugon siya pag nag-aagi siya nin grabeng problema.” Kaya, pag pigraranga ta an sarong kapagtubod na nasa kasakitan, tinatabangan ta siya na makabangon asin na magpadagos sa paglakaw sa dalan pasiring sa buhay. Sa kada beses na rinaranga ta an sarong tugang, ipinapahayag ta an satong pagkamuot para sa satong kapagtubod.​—2 Cor. 7:​6, 7, 13.

10. Paano magkakonektar an pagmalasakit asin pagranga?

¹⁰ An pagmalasakit asin pagranga magkakonektar na marhay. Sa paanong paagi? An sarong mapagmalasakit na tawo napapahirong rangahon an iba asin naghihinguwang pagianon an saindang pagsakit. Kaya inot, nakakamati kita nin pagmalasakit; dangan, nagtatao kita nin pagranga. Mangnuhon kun paano ikinonektar ni Pablo an pagmalasakit ni Jehova sa pagranga na itinatao Niya. Ilinadawan ni Pablo si Jehova bilang “an Ama nin mamumuton na pagkahirak asin an Diyos nin gabos na karangahan.” (2 Cor. 1:3) Sa bersikulong ini, ginamit ni Pablo an ekspresyon na “mamumuton na pagkahirak” para iladawan an pakamati nin pagmalasakit sa iba. Kaya, “an Diyos inaapod na an Ama, o an Gikanan, nin mamumuton na pagkahirak huli sa saiyang grabeng pagmalasakit sa mga tawo.” Asin an pagmalasakit na iyan nagpapahiro sa saiya na rangahon kita “sa gabos tang inaagihan na pagbalo.” (2 Cor. 1:4) Kun paanong an malinig na tubig na nagbubulos hali sa sarong burabod nakakarepresko asin nakakapaginhawa sa mga napapaha, nagtatao man si Jehova nin kaginhawahan asin pagranga sa mga nasasakitan. Paano ta maaarog si Jehova sa pagpahiling nin pagmalasakit asin pagranga sa iba? An sarong paagi para magibo ini iyo an pagpatalubo sa satong puso nin mga kuwalidad na may koneksiyon sa pagtao nin pagranga. Ano an pira sa mga kuwalidad na ini?

11. Sigun sa Colosas 3:12 asin 1 Pedro 3:​8, ano pa an ibang mga kuwalidad na dapat tang patalubuon tanganing mapagdanay an pagkamuot na nagpapahiro sa sato na rangahon an iba?

¹¹ Ano an makakatabang sa sato na mapagdanay an pagkamuot na kaipuhan niyato tanganing ‘padagos tang maranga an lambang saro’ sa aroaldaw? Kaipuhan tang patalubuon an marahayon na mga kuwalidad na arog kan pakikidamay, pagkamuot na sa-magturugang, asin kabuutan. (Basahon an Colosas 3:12; 1 Pedro 3:8.) Paano makakatabang sa sato an mga kuwalidad na ini? Pag an pagigin mapagmalasakit asin an mga kuwalidad na konektado diyan nagin parte na kan satong pagkatawo, magkakaigwa kita nin makusog na pagmawot na rangahon an mga nagsasakit. Arog kan sinabi ni Jesus, “sa kapanuan kan puso nagtataram an nguso. An marahay na tawo nagpapaluwas nin marahay hali sa natipon niyang marahay na mga bagay.” (Mat. 12:​34, 35) An pagranga niyato sa satong mga tugang na nangangaipo mahalaga nanggad na paagi nin pagpahayag kan satong pagkamuot sa sainda.

12. (a) Taano ta kaipuhan tang padagos na mag-ingat? (b) Anong hapot an pag-uulayan ta?

¹² Gusto niyato gabos na “padagos [na] kamutan an lambang saro.” (1 Juan 4:7) Minsan siring, mahalaga na girumdumon niyato na nagpatanid si Jesus na “magigin malipot an pagkamuot kan kadaklan.” (Mat. 24:12) Dai digdi sinasabi ni Jesus na mangyayari ini sa kadaklan sa mga disipulo niya. Pero, dapat na mag-ingat kita tanganing dai kita maimpluwensiyahan kan kawaran nin pagkamuot kan mga tawo sa palibot niyato. Mantang isinasaisip iyan, pag-ulayan ta an mahalagang hapot na ini: Ano an makakatabang sa sato para maaraman kun baga makusog an pagkamuot ta sa satong mga tugang?

13. Ano an puwedeng makatesting sa satong pagkamuot?

¹³ An sarong paagi para madeterminaran kun  gurano kakusog kan satong pagkamuot iyo an pag-aram kun paano ta inaatubang an partikular na mga sitwasyon sa buhay. (2 Cor. 8:8) Sinambit ni apostol Pedro an saro sa sitwasyon na iyan: “Urog sa gabos, magkaigwa nin makusog na pagkamuot sa lambang saro, huli ta an pagkamuot nagtatahob sa dakul na kasalan.” (1 Ped. 4:8) Kaya an mga kaluyahan asin pagkabakong perpekto kan iba puwedeng makatesting kan satong pagkamuot.

14. Uyon sa 1 Pedro 4:​8, anong klase nin pagkamuot an kaipuhan ta? Iilustrar.

¹⁴ Siyasaton ta pa an sinabi ni Pedro. Sinasambit sa inot na parte kan bersikulo 8 an klase nin pagkamuot na kaipuhan ta—an “makusog na pagkamuot.” An tataramon na ginamit ni Pedro para sa “makusog” literal na nangangahulugan na “nababanat.” Sinasabi sa ikaduwang parte kan bersikulo kun ano an gigibuhon ta kun igwa kita nin makusog na pagkamuot—tatahuban ta an mga kasalan kan satong mga tugang. Mailaladawan ta iyan sa arog kaining paagi: Kinakaputan ta ngaya kan duwa niyatong kamot an pagkamuot, na garo iyan sarong kapidaso nin tela na nababanat, asin binabanat ta iyan nin binabanat sagkod matahuban kaiyan, bako lang an saro o duwa, kundi “dakul na kasalan.” An pagtahob sarong matalinhagang tataramon para sa pagpatawad. Kun paano an sarong kapidasong tela puwedeng makatahob sa mantsa, an  pagkamuot puwedeng makatahob sa mga kaluyahan asin pagkabakong perpekto kan iba.

15. Ano an makakaya tang gibuhon kun igwa kita nin makusog na pagkamuot sa satong mga tugang? (Colosas 3:13)

¹⁵ An satong pagkamuot sa iba dapat na magin makusog nanggad na huli kaiyan magigibo tang patawadon an mga pagkukulang kan satong mga kapagtubod—dawa ngani kun minsan mangaipo iyan nin grabeng paghihinguwa. (Basahon an Colosas 3:13.) Pag nagigibo tang patawadon an iba, ipinapahiling niyato na makusog an satong pagkamuot asin na gusto tang mapaugma si Jehova. Ano pa an makakatabang sa sato para mapalampas an nakakairitar na mga paggawi asin mga salang nagigibo kan iba?

16-17. Ano pa an makakatabang sa sato para palampason an saradit na pagkukulang kan iba? Iilustrar. (Hilingon man an ritrato.)

¹⁶ Magpokus bako sa negatibo kundi sa positibong mga kuwalidad kan saimong mga tugang. Pag-isipan an pagkumparar na ini. Imahinara na yaon ka sa sarong pagtiripon-tipon kaiba an mga tugang. Nag-e-enjoy ka, dangan sa pagtatapos kan pagtiripon-tipon, nagritrato ka kaiba an grupo. Nagritrato ka pa ngani nin duwa pa enkaso bakong magayon su nainot. Kaya ngunyan may tulo kang ritrato. Kaya lang sa sarong ritrato, nahiling mo na su sarong brother nakamurusdot. Ano an gigibuhon mo sa ritratong iyan? Idi-delete mo iyan ta igwa ka pa man nin duwang ritrato, na an gabos nakangirit pati na su brother.

 ¹⁷ Ikumparar ta an mga ritratong iyan sa mga bagay na gusto tang pirming girumdumon. Sa parati may marahay kitang nagigirumduman sa mga pagkakataon na nakaibanan ta an mga tugang. Pero halimbawa ngaya may nagigirumduman ka na sarong pagkakataon na may nasabi o may nagibong maraot sa saimo an sarong tugang. Ano an dapat mong gibuhon sa bakong magayon na nagigirumduman mong iyan? Puwede mo daw na lingawan na iyan, arog kan gigibuhon mong pag-delete sa saro sa mga ritratong idto? (Tal. 19:11; Efe. 4:32) Magigibo tang lingawan an nagigirumduman tang saradit na pagkukulang kan sarong kapagtubod ta dakul kitang marahay na nagigirumduman sa pakikiiba-iba niyato sa tugang na iyan. An mga pangyayaring iyan an gusto tang pirming girumdumon asin pahalagahan.

18. Anong panginot na mga punto manungod sa pagkamuot an pinag-ulayan niyato sa artikulong ini?

¹⁸ Taano ta gusto tang papagdanayon na makusog an satong pagkamuot sa lambang saro? Arog kan napag-ulayan ta, pag ipinapahiling ta an pagkamuot sa satong mga tugang, ipinapahiling ta na namumutan ta si Jehova. Paano ta maipapahiling an satong pagkamuot sa satong mga kapagtubod? An sarong paagi na magigibo ta iyan iyo an pagranga sa sainda. ‘Padagos tang mararanga an lambang saro’ kun igwa kita nin pagmalasakit sa iba. Paano ta mapapagdanay na makusog an satong pagkamuot sa lambang saro? Paagi sa padagos na paggibo kan satong pinakamakakaya na patawadon an mga salá kan iba.

19. Taano ta lalo nang mahalaga sa ngunyan na magpahiling nin pagkamuot sa lambang saro?

¹⁹ Taano ta lalo nang mahalaga sa ngunyan na ipahiling ta an satong pagkamuot sa lambang saro? Mangnuhon an sarong dahilan na itinatao ni Pedro: “An katapusan kan gabos na bagay harani na. Kaya, . . . magkaigwa [kamo] nin makusog na pagkamuot sa lambang saro.” (1 Ped. 4:​7, 8) Mantang mas lalong naghaharani an katapusan kan maraot na kinaban na ini, ano an aasahan ta? Kun manungod sa mga parasunod ni Jesus, ihinula niya: “Ikakaungis kamo kan gabos na nasyon huli sa pangaran ko.” (Mat. 24:9) Para matagalan an siring na pagkaungis, kaipuhan niyatong magdanay na nagkakasararo. Mantang ginigibo ta iyan, an mga paghihinguwa ni Satanas na magkabaranga kita dai magigin mapanggana, huling dayupot kitang pinagkakasararo kan pagkamuot—an “bugkos nin lubos na pagkasararo.”​—Col. 3:14; Fil. 2:​1, 2.