1. Ano an mensahe ni propeta Isaias sa mga kapwa niya Israelita?

 ILINADAWAN ni propeta Isaias si Jehova bilang “Diyos nin katotoohan.” Sa literal, an tataramon na “katotoohan” nangangahulugan na “amen.” (Isa. 65:​16, nota sa ibaba) An “amen” nangangahulugan na “mangyari lugod,” o “iyo nanggad.” Pag ginagamit sa Bibliya an tataramon na “amen” may koneksiyon ki Jehova o ki Jesus, sarong garantiya iyan na totoo an sarong bagay. Kaya, malinaw an mensahe ni Isaias sa mga kapwa niya Israelita: Pirming mapagtitiwalaan an mga propesiya ni Jehova. Pinatunayan iyan ni Jehova paagi sa pag-utob kan lambang panuga niya.

2. Taano ta makakapagtiwala kita sa mga panuga ni Jehova manungod sa satong puturo, asin anong mga hapot an pag-uulayan ta?

² Makakapagtiwala man daw kita sa mga panuga ni Jehova manungod sa satong puturo? Haros 800 na taon pakatapos kan panahon ni Isaias, ipinaliwanag kan apostol na si Pablo kun taano ta an mga panuga nin Diyos pirming mapagtitiwalaan. Sinabi ni Pablo: “Imposibleng magputik an Diyos.” (Heb. 6:18) Kun paanong an sarong burabod dai makakapaluwas nin tubig-tabang saka tubig-dagat, si Jehova, an Gikanan nin katotoohan, dai man makakapagputik. Kaya, lubos kitang makakapagtiwala sa ano man na sinasabi ni Jehova, kaiba na an gabos niyang panuga manungod sa satong puturo. Sa artikulong ini, pag-uulayan ta an mga hapot na ini: Ano an ipinanuga ni Jehova na itatao niya sa sato sa maabot? Asin anong garantiya an itinao ni Jehova na an saiyang panuga magkakatotoo?

3. (a) Anong panuga an gustong-gusto kan mga lingkod nin Diyos? (Kapahayagan 21:​3, 4) (b) Ano an reaksiyon kan nagkapira pag sinasabi ta sainda an panuga na iyan?

³ Pag-uulayan ta an panuga na gustong-gusto kan mga lingkod nin Diyos sa bilog na kinaban. (Basahon an Kapahayagan 21:​3, 4.) Nangangako si Jehova na maabot an panahon kun sain “an kagadanan mawawara na. Dai na man magkakaigwa nin pagmundo, o nin pagtangis, o nin kulog.” Ginagamit kan dakul sa sato pag naghuhulit sa iba an nakakataros sa pusong mga tataramon na ini sa Bibliya manungod sa buhay sa Paraiso. Ano an reaksiyon kan nagkapira pag sinasabi ta sa sainda an panugang iyan? Tibaad sabihon ninda, “Garo sobra man kagayon kaiyan para paniwalaan.”

4. (a) Ano an aram asin patiinot nang nahiling ni Jehova? (b) Apuwera sa sinabi niyang panuga, ano pa an ginibo ni Jehova?

⁴ Siyempre, kan pasabngan Niya si apostol Juan para isurat an panugang ini manungod sa buhay sa Paraiso, aram ni Jehova na sasabihon ta ngunyan sa iba an paglaom na ini pag naghuhulit kan mensahe kan Kahadian. Patiinot man na nahiling ni Jehova na magigin masakit para sa dakul na maniwala sa panugang ini na “mga bagong bagay.” (Isa. 42:9; 60:2; 2 Cor. 4:​3, 4) Kaya paano ta tatabangan an iba—asin an satong sadiri—na magin kumbinsido na an mga bendisyon na sinasabi sa Kapahayagan 21:​3, 4 magkakatotoo? Dai sana sinabi ni Jehova an nakakataros sa pusong panuga na ini kundi nagtao man siya nin nakakakumbinsir na mga dahilan kun taano ta makakapagtiwala kita diyan. Anong mga dahilan an itinao niya?

5. Igwa kita nin anong mga dahilan para magtiwala sa panuga nin Diyos na Paraiso, asin sain ta iyan mababasa?

⁵ Mababasa ta an mga dahilan na magtiwala sa panuga ni Jehova na Paraiso sa sunod na mga bersikulo. Mababasa ta diyan: “An Saro na nakatukaw sa trono nagsabi: ‘Uya! Ginigibo kong bago an gabos na bagay.’ Sinabi man niya: ‘Isurat mo, huli ta an mga tataramon na ini maimbod asin totoo.’ Asin sinabi niya sa sako: ‘Nautob na an mga iyan! Ako an Alpha asin an Omega, an kapinunan asin an katapusan.’”—Kap. 21:​5, 6a.

6. Taano ta an mga garantiya na mababasa sa Kapahayagan 21:​5, 6 nagpapakusog sa satong pagtitiwala sa panuga nin Diyos?

⁶ Taano ta an mga tataramon na ini sa Bibliya nakakapakusog kan satong pagtitiwala sa panuga nin Diyos? Manungod sa mga bersikulong iyan ini an sinasabi kan librong Kapahayagan Kulminasyon Kaiyan: “Garo baga pinipirmahan mismo ni Jehova para sa maimbod na katawuhan an sarong garantiya, o titulo, sa mga bendisyon na ini sa ngapit.” b An panuga nin Diyos mababasa sa Kapahayagan 21:​3, 4. Dangan, sa bersikulo 5 asin 6, mahihiling ta an pirma ni Jehova, sabi ngani, na naggagarantiya sa pagigin totoo kan saiyang panuga. Urog ta pang siyasaton an mga tataramon na ginamit ni Jehova sa saiyang garantiya.

7. Taano ta interesanteng marhay kun paano inintrodusir an garantiya nin Diyos, asin taano ta mahalagang marhay iyan?

⁷ An garantiya nin Diyos inintrodusir sa arog kaining paagi: “An Saro na nakatukaw sa trono nagsabi.” (Kap. 21:5a) Iniintrodusir kan mga tataramon na ini an saro sa tulo sanang pagkakataon sa libro nin Kapahayagan kun sain si Jehova an nagtataram sa mga bisyon. Kaya an garantiyang ini itinao, bako nin sarong makapangyarihan na anghel, ni kan binuhay liwat na si Jesus, kundi ni Jehova mismo! Kaya idinuduon kaiyan an pagigin mapagtitiwalaan kan sunod na mga tataramon. Taano man? Huling si Jehova “dai makakapagputik.” (Tito 1:2) Kaya  mapagtitiwalaan ta nanggad an mga tataramon na mababasa sa Kapahayagan 21:​5, 6.

8. Paano idinuon ni Jehova an pagigin sigurado kan saiyang panuga? (Isaias 46:10)

⁸ Sunod, pag-ulayan ta an tataramon na “Uya!” (Kap. 21:5) An Griegong tataramon na itrinadusir na “uya!” pauruutrong ginamit sa libro nin Kapahayagan. Sinasabi kan sarong reperensiya na an ekspresyon na iyan ginamit bilang “sarong paagi nin pagkua nin atensiyon kan parabasa sa sunod na mababasa niya.” Ano an sunod na sinabi nin Diyos? Sinabi niya: “Ginigibo kong bago an gabos na bagay.” Iyo, manungod sa mga pagbabago sa maabot an sinasabi ni Jehova, pero para sa saiya an panugang ini sigurado nanggad na magkakatotoo kaya sinasabi niya an mga pagbabagong ini na garo baga nangyayari na.​—Basahon an Isaias 46:10.

9. (a) An mga tataramon na ‘ginigibong bago an gabos na bagay’ nanunungod sa anong duwang aktibidad ni Jehova? (b) Ano an mangyayari sa presenteng “langit” asin “daga”?

⁹ Pag-ulayan ta an sunod na frase sa Kapahayagan 21:5: “Ginigibo kong bago an gabos na bagay.” Sa kapitulong ini, an fraseng iyan nanunungod sa duwang aktibidad ni Jehova—an pagsalida asin paghirahay. Inot, ano an sasalidahan ni Jehova? Sa Kapahayagan 21:​1, mababasa ta: “An dating langit asin an dating daga napara na.” “An dating langit” nanunungod sa pulitikal na mga gobyerno na impluwensiyado ni Satanas asin kan saiyang mga demonyo. (Mat. 4:​8, 9; 1 Juan 5:19) Arog kan pagkagamit sa Bibliya, an “daga” puwedeng ipanungod sa mga nakaistar sa daga. (Gen. 11:1; Sal. 96:1) Kun siring, “an dating daga” nanunungod sa maraot na sosyedad nin tawo sa ngunyan. Dai sana basta papakarhayon ni Jehova an presenteng “langit” asin “daga”; imbes, biyo niyang lilinigon iyan paagi sa pagsalida diyan. Sasalidahan niya an presenteng langit asin an presenteng daga nin “sarong bagong langit asin . . . sarong bagong daga”—buot sabihon, nin sarong bagong gobyerno asin sarong bagong sosyedad nin tawo.

10. Anong mga bagay an gigibuhon na bago ni Jehova?

¹⁰ An sunod na mababasa ta sa Kapahayagan 21:​5, iyo an sinasabi ni Jehova manungod sa mga bagay na gigibuhon niyang bago. Mangnuhon na dai sinabi ni Jehova: “Ginigibo ko an gabos na bagong bagay.” Imbes, sinabi niya: “Ginigibo kong bago an gabos na bagay.” Gigibuhon ni Jehova an daga saka an mga tawo na garo man sana bago paagi sa pagdara sa sainda pasiring sa perpektong kamugtakan. Arog kan ihinula ni Isaias, an bilog na daga gigibuhon na magin sarong arog hardin na parke—siring sa hardin nin Eden. Gigibuhon man kitang bago, paagi sa lubos na pagpapaumay sa lambang saro. An pilay, buta, asin púla mararahay, asin dawa an mga gadan bubuhayon.​—Isa. 25:8; 35:​1-7.

11. Anong pagbuot asin anong dahilan an itinao ni Jehova ki Juan?

¹¹ Ano pa an kaiba sa garantiyang itinao nin Diyos? Sinabi ni Jehova ki Juan: “Isurat mo, huli ta an mga tataramon na ini maimbod asin totoo.” (Kap. 21:5) Nagtao si Jehova bako lang nin pagbuot na “isurat” an mga sinabi niya. Nagtao man siya nin dahilan kun taano. Sinabi niya: “Huli ta an mga tataramon na ini maimbod asin totoo”—buot sabihon, an mga tataramon nin Diyos mapagtitiwalaan asin maaasahan. Nagpapasalamat nanggad kita na sinunod ni Juan an pagbuot. Kaya, nababasa ta ngunyan an manungod sa panuga nin Diyos na Paraiso asin nahuhurop-hurop an magayunon na mga bendisyon na naghahalat sa sato.

12. Taano ta tama sanang sabihon ni Jehova: “Nautob na an mga iyan!”?

 ¹² Ano an sunod na sinabi nin Diyos? “Nautob na an mga iyan!” (Kap. 21:6) Ngunyan sinasabi ni Jehova na garo baga an gabos na bagay na sinambit manungod sa panugang Paraiso nauutob na. Asin tama sanang masabi niya iyan huling mayong makakapugol sa saiya sa pag-utob kan saiyang katuyuhan. Tinatawan kita ni Jehova nin saro pang mapuwersang asigurasyon manungod sa saiyang panuga sa sunod na parte kan saiyang garantiya. Ano iyan?

13. Taano ta sinabi ni Jehova: “Ako an Alpha asin an Omega”?

¹³ Arog kan sinambit kasubago, tulong beses na si Jehova mismo an nagtataram ki Juan sa mga bisyon. (Kap. 1:8; 21:​5, 6; 22:13) Sa lambang pagkakataon na iyan, sinabi ni Jehova an iyo man sanang mga tataramon: “Ako an Alpha asin an Omega.” An Griegong alpabeto nagpupuon sa letrang alpha, asin nagtatapos iyan sa letrang omega. Paagi sa paggamit kan deskripsiyon na “an Alpha asin an Omega,” ipinaparisa ni Jehova na pag may pinunan siyang sarong bagay, mapanggana niyang tatapuson iyan.

14. (a) Magtao nin halimbawa kun nuarin garo man sana sinabi ni Jehova “Alpha,” asin kun nuarin garo man sana sasabihon niya “Omega.” (b) Anong garantiya an mababasa sa Genesis 2:​1-3?

¹⁴ Pagkatapos na lalangon ni Jehova si Adan asin Eva, sinabi Niya an saiyang orihinal na katuyuhan para sa katawuhan asin para sa daga. Sinasabi kan Bibliya: “Binendisyunan . . . sinda kan Diyos asin sinabihan: ‘Magkaigwa kamo nin mga aki asin magpakadakul kamo, panua nindo an daga asin sakupon iyan.’” (Gen. 1:28) Kan panahon na iyan, garo man sana sinabi ni Jehova “Alpha.” Malinaw niyang sinabi an saiyang katuyuhan: Maabot an panahon na an daga mapapano nin perpekto, masinunod na mga gikan ni Adan  asin Eva asin gigibuhon iyan na magin paraiso. Sa maabot na panahon na iyan, garo man sana sasabihon ni Jehova “Omega.” Pagkatapos na mahaman “an kalangitan saka an daga pati an gabos na yaon diyan,” nagtao si Jehova nin garantiya. Mababasa iyan sa Genesis 2:​1-3. (Basahon.) Itinagama ni Jehova an ikapitong aldaw na sagradong aldaw para sa saiya. Ano an buot sabihon kaiyan? Ginagarantiyahan ni Jehova na uutubon niya an saiyang katuyuhan para sa katawuhan asin para sa daga. Lubos na mauutob iyan sa katapusan kan ikapitong aldaw na iyan.

15. Taano ta garo baga naulang ni Satanas an katuyuhan nin Diyos para sa katawuhan?

¹⁵ Pagkatapos na magrebelde si Adan asin Eva, nagin sindang mga parakasala asin naipasa ninda an kasalan saka kagadanan sa saindang mga aki. (Roma 5:12) Bilang resulta, garo baga naulang ni Satanas an katuyuhan nin Diyos na panuon an daga nin perpekto asin masinunod na mga tawo. Minaluwas na garo baga ginibo ni Satanas na magin imposible para ki Jehova na masabi niyang “Omega.” Tibaad naisip ni Satanas na mayo nang ibang magigibo si Jehova. Tibaad naisip niya na gagadanon na lang nin Diyos si Adan saka si Eva asin magibo nin bagong perpektong mag-agom para utubon an Saiyang katuyuhan para sa katawuhan. Pero kun ginibo iyan nin Diyos, tibaad akusaran siya kan Diyablo na putikon Siya. Taano? Huling sa Genesis 1:​28, sinabihan ni Jehova si Adan saka si Eva na papanuon kan saindang mga aki an daga.

16. Taano ta tibaad naisip ni Satanas na puwede niyang akusaran si Jehova na dai kaini kayang gibuhon an ipinanuga Niya?

¹⁶ Ano pa an tibaad naisip ni Satanas na puwedeng gibuhon nin Diyos? Tibaad naisip ni Satanas na tutugutan ni Jehova si Adan saka si Eva na magkaigwa nin bakong perpektong mga aki na dai na nuarin man magigin perpekto. (Ecl. 7:20; Roma 3:23) Kun siring, siguradong aakusaran si Jehova kan Diyablo na dai niya kayang gibuhon an ipinanuga niya. Taano? Huling sa paggibo kaiyan dai mauutob an katuyuhan nin Diyos, an panuon an Paraisong daga nin perpekto, asin masinunod na mga gikan ni Adan asin Eva.

17. Paano ni Jehova rinesolberan an pagrebelde ni Satanas asin kan inot na mga tawo, asin ano an magigin resulta kaiyan? (Hilingon man an ritrato.)

¹⁷ Rinesolberan ni Jehova an pagrebelde ni Satanas asin kan inot na mga tawo sa paaging siguradong nakapabiglang marhay ki Satanas. (Sal. 92:5) Imbes na mapatunayan na sarong putikon, napatunayan na totoo an sinasabi ni Jehova paagi sa pagtugot niya ki Adan asin Eva na magkaigwa nin mga aki. Asin imbes na mapatunayan  na dai niya kayang gibuhon an ipinanuga niya, napatunayan na mayong makakaulang ki Jehova. Sinigurado niya na magkakatotoo an saiyang katuyuhan paagi sa pagtao nin sarong “gikan” na maligtas sa masinunod na mga aki ni Adan asin Eva. (Gen. 3:15; 22:18) Siguradong napangalas na marhay si Satanas sa ginibo ni Jehova na areglo na pantubos! Taano? Huling sarong areglo iyan na nakabasar sa bakong makasadiring pagkamuot. (Mat. 20:28; Juan 3:16) Mayo si Satanas kan kuwalidad na iyan ta makasadiri siya. Kaya, ano an mangyayari huli sa areglo na pantubos? Sa katapusan kan Milenyo, an perpekto asin masinunod na mga gikan ni Adan asin Eva maistar sa paraisong daga—arog mismo kan orihinal na katuyuhan ni Jehova. Sa panahon na iyan, garo man sana sasabihon ni Jehova “Omega.”

18. Anong tulong asigurasyon an itinao nin Diyos sa sato? (Hilingon man an kahon na “ Tulong Dahilan Para Magtiwala sa Panuga ni Jehova.”)

¹⁸ Sa napag-ulayan ta, anong mga asigurasyon an puwede tang sabihon sa mga nagdududa na magkakatotoo an panuga nin Diyos na Paraiso? Inot, si Jehova mismo an nanuga kaiyan. Sinasabi kan libro nin Kapahayagan: “An Saro na nakatukaw sa trono nagsabi: ‘Uya! Ginigibo kong bago an gabos na bagay.’” Igwa siya nin kadunungan, kapangyarihan, asin pagmawot na utubon an saiyang panuga. Ikaduwa, an kautuban kan saiyang panuga siguradong-sigurado na sa pagmansay ni Jehova, nangyayari na iyan. Tama sanang sabihon niya: “An mga tataramon na ini maimbod asin totoo. . . . Nautob na an mga iyan!” Ikatulo, pag may pinunan si Jehova na sarong bagay, mapanggana niyang tatapuson iyan, arog kan sinisigurado kan mga tataramon na “Ako an Alpha asin an Omega.” Papatunayan ni Jehova na si Satanas putikon asin dai Siya kayang papunduhon sa pag-utob kan Saiyang katuyuhan.

19. Pag may saro na nagdududa sa panuga nin Diyos na Paraiso, ano an puwede mong gibuhon?

¹⁹ Tandaan, sa kada beses na ihinihiras mo sa mga nakakaulay mo sa ministeryo an manungod sa garantiya nin Diyos, pinapakusog mo an saimong pagtitiwala sa mga panuga ni Jehova. Kaya pag binasa mo sa sunod an nakakataros sa pusong panuga manungod sa maabot na Paraiso arog kan sinasabi sa Kapahayagan 21:4 tapos may magsabing, “Garo sobra man kagayon kaiyan para paniwalaan,” ano an puwede mong gibuhon? Taano ta dai basahon asin ipaliwanag an bersikulo 5 asin 6? Ipahiling kun paano ginagarantiyahan ni Jehova an saiyang panuga paagi sa paglaag diyan, sabi ngani, kan saiya mismong pirma.​—Isa. 65:16.