1-2. Ano an puwedeng makatabang sato na masabutan kun ano an namamatian ni Jehova sa pagpakaraot sa saiyang pangaran?

 IMAHINARA ini: Saro sa namumutan mo an nagsabi nin marauton na bagay manungod saimo. Aram mong bako iyan totoo; pero, may mga nagtubod diyan. An mas maraot pa, ta pigparapangistorya ninda iyan sa iba, asin dakul pang iba an nagturubod. Ano an mamamatian mo? Kun nagmamalasakit ka sa mga tawo asin pinapahalagahan mo an saimong reputasyon, siguradong makukulgan ka sa pagpakaraot na iyan, bako?​—Tal. 22:1.

² An senaryong ini puwedeng makatabang sa sato na masabutan kun ano an namatian ni Jehova kan pinakaraot an saiyang reputasyon. An saro sa saiyang espiritung mga aki nagsabi nin kaputikan manungod sa saiya sa inot na babayi, si Eva. Nagtubod si Eva sa kaputikan na iyan. Huli sa kaputikan na iyan, an inot tang magurang nagrebelde ki Jehova. Bilang resulta, an kasalan asin kagadanan naglaog sa katawuhan. (Gen. 3:1-6; Roma 5:12) An gabos na problema na nahihiling ta sa kinaban​—an kagadanan, giyera, grabeng pagsakit​—bunga kan mga kaputikan na pinunan ni Satanas na ipalakop sa hardin nin Eden. Nakukulgan daw si Jehova sa mga pagpakaraot na iyan asin sa mga resulta kaiyan? Siguradong iyo. Alagad, dai si Jehova naghihinanakit o nagtatanom nin kulog nin buot. Sa katunayan, nagdadanay siya na sarong “maugmang Diyos.”​—1 Tim. 1:11.

3. Anong pribilehiyo an igwa kita?

³ May pribilehiyo kita na makatabang sa pagbindikar kan pangaran ni Jehova paagi sa pagsunod sa simpleng pagbuot na ini: “Umawon an pangaran ni Jehova.” (Sal. 113:1) Magigibo ta iyan paagi sa pagtaram nin marahay na mga bagay manungod sa Saro na irinerepresentar kan banal na pangaran na iyan. Gusto mo man daw na gibuhon iyan? Pag-ulayan ta an tulong mapuwersang dahilan na makakatabang sa sato na bilog na pusong umawon an pangaran kan satong Diyos.

 NAPAPAUGMA TA SI JEHOVA PAG INUUMAW TA AN SAIYANG PANGARAN

4. Taano ta nakakapaugma ki Jehova pag inuumaw ta an pangaran niya? Iilustrar. (Hilingon man an ritrato.)

⁴ Napapaugma ta an satong Ama sa langit pag inuumaw ta an saiyang pangaran. (Sal. 119:108) Pero buot sabihon daw kaini na an makakamhan na Diyos arog nin bakong perpektong mga tawo na gustong inuumaw huling kaipuhan ninda nin asigurasyon? Dai. Pag-isipan an sarong ilustrasyon. Sarong sadit na aking babayi an mapagpadangat na kinugos sa liog an saiyang ama asin nagsabi, “Ika po papa an pinaka the best na papa sa gabos!” Nagngirit an ama asin ugmahon siyang marhay sa gikan sa buot na ginibo kan aki. Taano? Iisipon ta daw na saro siyang tawo na kulang sa asigurasyon, na naglalaom na pirmi siyang uumawon kan saiyang aki? Dai. Imbes, nagtitiwala kita na saro siyang marigon na ama na nauugma sa pagpadangat asin pagpapahalaga kan saiyang aki. Aram niya na an siring na mga kuwalidad makakatabang sa saiyang aki na magin maugma mantang nagdadakula. Sa kaparehong paagi, si Jehova, an pinakanangungurog na Ama, nauugma pag inuumaw ta siya.

5. Paagi sa pag-umaw sa pangaran nin Diyos, anong kaputikan an mapapatunayan ta na bakong totoo?

⁵ Pag inuumaw ta an satong Ama sa langit, nakakatabang kita na mapatunayan na bakong totoo an sarong kaputikan na imbuwelto kita. Hinihingako ni Satanas na mayong tawo na maimbod na dedepensahan an pangaran nin Diyos. Mayo daa sa sato nin may integridad. Sinasabi niya na mapundo kita sa paglilingkod sa Diyos pag naisip ta na makikinabang kita kun gigibuhon ta iyan. (Job 1:9-11; 2:4) Pero pinatunayan kan maimbod na si Job na si Satanas sarong putikon. Ika, magdadanay ka man daw na maimbod? An lambang saro sa sato may pribilehiyo na idepensa an pangaran kan satong Ama asin paugmahon siya paagi sa paglilingkod sa saiya nin may integridad. (Tal. 27:11) Dakulang onra nanggad na gibuhon iyan.

6. Paano ta maaarog si Hading David asin an mga Levita? (Nehemias 9:5)

⁶ An pagkamuot sa Diyos nagpapahiro sa maimbod na mga tawo na umawon nin bilog na puso an Saiyang pangaran. Si Hading David nagsurat: “Uumawon ko si Jehova; uumawon kan bilog kong pagkatawo an banal na pangaran niya.” (Sal. 103:1) Nasasabutan ni David na an pag-umaw sa pangaran ni Jehova pag-umaw mismo ki Jehova. Kalabot sa pangaran ni Jehova an saiyang reputasyon, kaya maiisip ta diyan an gabos na magagayon niyang kuwalidad asin an saiyang kahanga-hangang mga gibo. Para ki David, banal an pangaran kan saiyang Ama asin gusto niyang umawon iyan. Gusto niyang gibuhon iyan sa ‘bilog niyang pagkatawo’ o nin bilog na puso. Arog man kaiyan an ginibo kan mga Levita mantang pinapanginutan ninda an pag-umaw ki Jehova.  Mapakumbaba nindang inako na kulang an saindang mga tataramon para lubos nindang maipahayag an pag-umaw na maninigo sa sagradong pangaran ni Jehova. (Basahon an Nehemias 9:5.) Siguradong an siring na mapakumbaba asin udok sa pusong pag-umaw nakapaugma sa puso ni Jehova.

7. Paano ta mauumaw si Jehova sa satong ministeryo asin sa satong buhay sa aroaldaw?

⁷ Sa ngunyan mapapaugma ta man si Jehova paagi sa pagtaram manungod sa saiya sa paaging nagpapahiling na nagpapasalamat asin namumutan ta siyang marhay. Pag nasa ministeryo kita, pirmi tang isinasaisip na an panginot tang katuyuhan iyo na tabangan an mga tawo na magin harani ki Jehova, na mamati ninda an arog kan namamatian ta sa satong namumutan na Ama. (Sant. 4:8) Nauugma kitang ipahiling sa mga tawo kun paano si Jehova ilinaladawan kan Bibliya, na ihinahayag an saiyang pagkamuot, hustisya, kadunungan, kapangyarihan, asin iba pang magagayon na kuwalidad. Nauumaw ta man si Jehova asin napapaugma siya paagi sa paghihinguwa na arugon siya. (Efe. 5:1) Pag ginigibo ta iyan, mapapalain kita sa maraot na kinaban na ini. Puwedeng marisa iyan kan mga tawo asin tibaad mag-isip sinda kun taano. (Mat. 5:14-16) Mantang nakakaibanan ta sinda sa aroaldaw, puwedeng magkaigwa kita nin pagkakataon na ipaliwanag sainda kun taano. Bilang resulta, napaparani sa satong Diyos an sinserong mga tawo. Pag inuumaw ta si Jehova sa arog kaining mga paagi, napapaugma ta siya.​—1 Tim. 2:3, 4.

NAPAPAUGMA TA SI JESUS PAG INUUMAW TA AN PANGARAN NI JEHOVA

8. Paano si Jesus nanginot sa pag-umaw sa pangaran ni Jehova?

⁸ Sa gabos na intelihenteng mga linalang sa langit asin sa daga, mayo nin ibang mas nakakamidbid sa Ama kundi an Aki. (Mat. 11:27) Namumutan ni Jesus an saiyang Ama, asin siya an nanginginot sa pag-umaw kan pangaran ni Jehova. (Juan 14:31) Sa pamibi niya sa saiyang Ama kan banggi bago siya magadan, sinumaryo niya an saiyang ministeryo sa daga sa arog kaining paagi: “Ipinamidbid ko sa sainda an saimong pangaran.” (Juan 17:26) Ano an buot niyang sabihon?

9. Paano ni Jesus ginamit an sarong parabula para ipaliwanag sa pinakamalinaw na paagi an manungod sa saiyang Ama?

⁹ Dai lang basta sinabi ni Jesus sa mga tawo na Jehova an pangaran nin Diyos. Aram na kan mga Judiong tinutukduan ni Jesus an pangaran nin Diyos. Imbes, nanginot si Jesus sa ‘pagpaliwanag manungod sa Saiya.’ (Juan 1:17, 18) Halimbawa, ihinahayag kan Hebreong Kasuratan na si Jehova mahihirakon asin mapagmalasakit. (Exo. 34:5-7) Lalo pang lininaw ni Jesus an katotoohan na iyan kan isaysay niya an parabula manungod sa ama asin sa aki kaini na naparaot an buhay. Pag nababasa ta an manungod sa amang iyan na kan matanaw an saiyang nagsusulsol na aki “mantang harayo pa” ini, duminalagan para sabaton an saiyang aki, kinugos ini, asin bilog na pusong pinatawad, mas maiimahinar ta kun gurano kamahihirakon asin kamapagmalasakit ni Jehova. (Luc. 15:11-32) Ihinayag ni Jesus kun anong klaseng persona talaga an saiyang Ama.

10. (a) Taano ta masasabi ta na ginamit ni Jesus an personal na pangaran kan saiyang Ama asin na gusto niya na gibuhon man iyan kan iba? (Marcos 5:19) (Hilingon man an ritrato.) (b) Ano an gusto ni Jesus na gibuhon ta ngunyan?

¹⁰ Gusto man daw ni Jesus na gamiton kan iba an personal na pangaran kan saiyang Ama? Siyertong iyo. Posibleng naniniwala an nagkapirang debotong lider nin relihiyon kan panahon na idto na sagradong marhay an pangaran nin Diyos para sambiton, pero dai nuarin man tinugutan ni Jesus an siring na bakong maka-Kasuratan na tradisyon na makaulang saiya para tawan nin onra an pangaran kan saiyang Ama. Pag-isipan an panahon kan paumayan niya an sarong lalaking sinaniban nin demonyo sa rehiyon kan mga Geraseno. Nagkatarakot an mga tawo  asin pinakiulayan ninda si Jesus na maghali, kaya naghali siya sa rehiyon na iyan. (Mar. 5:16, 17) Pero, gusto pa man giraray ni Jesus na mabisto kan mga tawo duman an pangaran ni Jehova. Kaya sinabihan niya an lalaking pinaumayan niya na sabihon sa mga tawo, bako kun ano an ginibo niya, kundi kun ano an ginibo ni Jehova. (Basahon an Marcos 5:19.) a Arog man kaiyan an gusto niya ngunyan​—na ipamidbid ta an pangaran kan saiyang Ama sa bilog na kinaban! (Mat. 24:14; 28:19, 20) Pag ginigibo ta an satong kabtang, napapaugma ta an satong Hadi, si Jesus.

11. Ano an itinukdo ni Jesus na ipamibi kan saiyang mga parasunod, asin taano ta mahalaga iyan? (Ezekiel 36:23)

¹¹ Aram ni Jesus na katuyuhan ni Jehova na pakangbanalon an Saiyang pangaran, na magin malinig iyan sa gabos na katuyawan. Iyan an dahilan kaya an satong Kagurangnan tinukduan an mga parasunod niya na mamibi: “Ama niyamo na nasa langit, pakangbanalon an pangaran mo.” (Mat. 6:9) Nasasabutan ni Jesus na ini an pinakamahalagang isyu na napapaatubang sa gabos na linalang. (Basahon an Ezekiel 36:23.) Mayo na nin ibang intelihenteng linalang sa uniberso an mas nagpakangbanal sa pangaran ni Jehova apuwera ki Jesus. Alagad, kan arestaron si Jesus, sa anong kasalan siya inakusaran kan mga kaiwal niya? Paglanghad! Para ki Jesus, an pagbasang-basang o pagpakaraot sa banal na pangaran kan saiyang Ama siyertong iyo an pinakamagabat na kasalan. Napurisaw siyang marhay na aakusaran siya asin sesentensiyahan kan krimen na iyan. Posibleng iyan an dahilan kun taano ta grabe nanggad an “pagkapurisaw” ni Jesus sa mga oras bago siya arestaron.​—Luc. 22:41-44.

12. Paano ni Jesus pinakangbanal an pangaran kan saiyang Ama sa pinakanangungurog na paagi?

¹² Para pakangbanalon an pangaran kan saiyang Ama, tinagalan ni Jesus an lambang pagpasakit, pang-iinsulto, asin pagpakaraot sa saiya. Aram niya na nagin makinuyog siya sa saiyang Ama sa gabos na bagay; mayo siya nin dapat na ikasupog. (Heb. 12:2) Aram niya man na direkta siyang inaatake ni Satanas sa masakit na panahon na idto. (Luc. 22:2-4; 23:33, 34) Siguradong nag-asa si Satanas na mararaot niya an integridad ni Jesus; alagad, dai nanggad nagin mapanggana si Satanas! Biyong pinatunayan ni Jesus na talagang putikon si Satanas asin na igwa si Jehova nin maimbod na mga lingkod na pinapagdanay an saindang integridad dawa nasa pinakamasakit na mga pagbalo!

13. Paano mo mapapaugma an saimong namamahalang Hadi?

 ¹³ Gusto mo daw na mapaugma an saimong namamahalang Hadi? Padagos na umawon an pangaran ni Jehova, na tinatabangan an iba na maaraman kun anong klaseng Diyos talaga siya. Sa paggibo mo kaiyan, sinusundan mo an mga lakad ni Jesus. (1 Ped. 2:21) Arog ni Jesus, napapaugma mo si Jehova asin napapatunayan mo na an Saiyang kaiwal, si Satanas, grabe nanggad kaputikon!

NAKAKATABANG KITA SA PAGLIGTAS NIN BUHAY PAG INUUMAW TA AN PANGARAN NI JEHOVA

14-15. Ano an kahanga-hangang nangyayari pag itinutukdo ta sa mga tawo an manungod ki Jehova?

¹⁴ Pag inuumaw ta an pangaran ni Jehova, nakakatabang kita sa pagligtas nin buhay. Paano? Buweno, “binuta [ni Satanas] an isip kan mga dai nagtutubod.” (2 Cor. 4:4) Bilang resulta, nagtutubod sinda sa mga kaputikan ni Satanas na arog kan: an Diyos dai nag-eeksister, an Diyos harayo sa sato asin dai nagmamalasakit sa katawuhan, an Diyos maringis asin pinapasakitan nin daing sagkod an mga parakasala. An siring na mga kaputikan dinidigtaan sana o rinaraot an pangaran asin reputasyon ni Jehova, para an mga tawo dai magin harani sa saiya. Pero huli sa satong gibuhon, dai nagigin mapanggana an katuyuhan ni Satanas. Itinutukdo ta sa mga tawo an katotoohan manungod sa satong Ama, asin nauumaw ta an banal na pangaran kan satong Diyos. Ano an resulta?

¹⁵ Mapuwersa an mga katotoohan sa Tataramon nin Diyos. Paagi sa pagtukdo sa mga tawo manungod ki Jehova asin sa magagayon niyang kuwalidad, may kahanga-hangang nangyayari. Padikit-dikit na naliliwanagan an isip kan mga tawo na nabuta kan mga kaputikan ni Satanas, asin nagpupuon nang mahiling ninda an magagayon na kuwalidad kan satong namumutan na Ama. Napapahanga sindang marhay sa daing sagkod na kapangyarihan niya. (Isa. 40:26) Nakanuod sindang magtiwala sa saiyang perpektong hustisya. (Deu. 32:4) Nakakanuod sindang marhay sa saiyang dai marurop na kadunungan. (Isa. 55:9; Roma 11:33) Asin nararanga sindang maaraman na siya an personipikasyon nin pagkamuot. (1 Juan 4:8) Mantang nagigin harani sinda ki Jehova, lalong nagigin totoong-totoo sainda an saindang paglaom na mabuhay nin daing sagkod bilang saiyang mga aki. Dakulaon na pribilehiyo nanggad para sa sato na tabangan an mga tawo na magin harani sa saindang  Ama! Sa paggibo kaiyan, ibinibilang kita ni Jehova na saiyang “mga kapwa trabahador.”​—1 Cor. 3:5, 9.

16. Ano an nagin epekto sa nagkapira kan naaraman ninda an pangaran nin Diyos? Magtao nin halimbawa.

¹⁶ Sa primero, tibaad itukdo ta lang sa mga tawo na Jehova an pangaran nin Diyos. Pero, puwede na iyan magkaigwa nin dakulang epekto sa mga tawong sadiyosan an puso. Halimbawa, an hoben na si Aaliyah b nagdakula sa pamilyang bakong Kristiyano. Bako siyang maugma sa saiyang relihiyon asin dai niya namamati na harani siya sa Diyos. Nagbago iyan kan makipag-adal siya nin Bibliya sa mga Saksi. Diyan nagpuon na mahiling niya an Diyos bilang saiyang Amigo. Asin nangalas siya kan naaraman niya na hinali sa dakul na Bibliya an pangaran nin Diyos asin rinibayan iyan nin mga titulo sana, arog kan Kagurangnan. Kan mabisto niya an pangaran ni Jehova, nabagong marhay an buhay niya. Huli sa kaugmahan, nasabi niya: “May pangaran palan an best Friend ko!” Ano an resulta? Sinabi niya: “Trangkilo nang marhay an puso ko ngunyan. Dakulang onra ini para sako.” An saro pa iyo si Steve na sarong musikero na nagdakula sa konserbatibong Judiong pamilya. Habo niyang magin miyembro nin sarong organisadong relihiyon huling kadakul niyang nahihiling na pagsagin-sagin. Alagad, kan panahon na grabe an saiyang kamunduan, nag-uyon siya na mag-obserbar sa sarong pag-adal sa Bibliya na ginigibo kan sarong Saksi ni Jehova. Napahiro siyang marhay kan maaraman niya an pangaran nin Diyos. Sinabi niya: “Ngunyan ko lang naaraman an pangaran nin Diyos.” Sinabi pa niya: “Sa kainot-inuting pagkakataon, nasabutan ko na totoo an Diyos! Nahihiling ko nang saro siyang Persona. Nakanumpong ako nin sarong Amigo.”

17. Taano ta determinado ka na padagos na umawon an pangaran ni Jehova? (Hilingon man an ritrato.)

¹⁷ Sa saimong paghuhulit asin pagtutukdo, ipinapabisto mo daw sa mga tawo an banal na pangaran, an Jehova? Tinatabangan mo daw sinda na mahiling kun anong klaseng Diyos talaga siya? Sa paggibo kaiyan, nauumaw mo an pangaran nin Diyos. Lugod na padagos mong umawon an banal na pangaran ni Jehova paagi sa pagtabang sa mga tawo na mamidbid kun anong klaseng Persona talaga siya. Paagi kaiyan, makakatabang ka sa pagligtas nin buhay. Makakasunod ka sa panginginot kan saimong Hadi, si Jesu-Cristo. Urog sa gabos, mapapaugma mo an saimong mamumuton na Ama, si Jehova. Lugod na ‘maumaw mo an saiyang pangaran sagkod nuarin pa man’!​—Sal. 145:2.