NARISA mo daw na dakul na tawo sa kinaban an nag-iisip na maninigo sindang tawan nin espesyal na mga pribilehiyo, deretso, o pagtrato? Gurano man kadakul an nareresibi ninda, para sa sainda maninigo sindang tawan nin mas dakul pa. An mga tawong may arog kaining kaisipan makasadiri asin dai tataong magpasalamat—mga ugali na kaiba sa tanda kan huring mga aldaw.​—2 Tim. 3:2.

Siyempre, igwa na nin mga tawong makasadiri kaidto pa. Si Adan asin Eva nagdesisyon na sinda an madeterminar kun ano an tama saka kun ano an sala, asin kapaha-pahamak an nagin resulta kaiyan. Pakalihis nin dakul na siglo, inisip ni Hading Uzias na tama sanang magtutong siya nin insenso sa templo, pero sala nanggad siya. (2 Cron. 26:​18, 19) Kaagid kaiyan, naniwala man an mga Fariseo asin Saduceo na maninigo sinda sa espesyal na pabor nin Diyos huli sana ta mga gikan sinda ni Abraham.​—Mat. 3:9.

Napapalibutan kita nin mga tawong makasadiri saka mapagpaimportante, asin an saindang mga ugali puwedeng makaimpluwensiya sa sato. (Gal. 5:26) Tibaad magpuon na kitang mag-isip na maninigo kitang tawan nin sarong partikular na pribilehiyo o nin espesyal na pagtrato. Paano ta malilikayan na magkaigwa kan kaisipan na ini? Dapat na aramon ta nguna an pagmansay ni Jehova sa bagay na iyan. Makakatabang sa sato an duwang prinsipyo sa Bibliya.

Si Jehova an nagdedeterminar kun ano an maninigo para sa sato. Pag-isipan an nagkapirang halimbawa.

• Sa areglo nin Diyos para sa pamilya, kaipuhan na mamati kan agom na lalaki na iginagalang siya kan saiyang agom asin kaipuhan na mamati kan agom na babayi na namumutan siya kan saiyang agom.  (Efe. 5:33) An agom na lalaki o babayi maninigo sanang pahilingan nin eksklusibong romantikong interes kan saiyang agom. (1 Cor. 7:3) Tama sana para sa mga magurang na hagadon sa mga aki ninda na magin makinuyog sa sainda, asin an mga aki maninigo man na mamutan na marhay asin suportaran kan saindang mga magurang.​—2 Cor. 12:14; Efe. 6:2.

• Sa laog kan kongregasyon, an mahigos na mga elder maninigo sa satong paggalang. (1 Tes. 5:12) Alagad, mayo sinda nin deretso na dominaron an saindang mga tugang.​—1 Ped. 5:​2, 3.

• Tinawan nin Diyos an mga gobyerno nin tawo kan deretso na magpataw nin buhis asin na tawan sinda nin onra kan mga nasasakupan ninda.​—Roma 13:​1, 6, 7.

Mamumuton na itinatao sa sato ni Jehova an labi pa sa maninigo sa sato. Huling makasalan kita, maninigo sana kitang magadan. (Roma 6:23) Pero, tinatawan kita ni Jehova nin dakul na bendisyon huli sa saiyang maimbod na pagkamuot sa sato. (Sal. 103:​10, 11) An lambang bendisyon o pribilehiyo na inaako ta hali sa saiya huli sana iyan sa saiyang daing kapantay na kabuutan.​—Roma 12:​6-8; Efe. 2:8.

Mag-ingat sa kaisipan kan kinaban. Dai ta naririsa, tibaad nagpupuon na kitang mag-isip na mas maninigo kitang tawan nin espesyal na mga pribilehiyo, deretso, o pagtrato kisa sa iba. Ipinahiling ni Jesus na puwedeng madali sana kitang magkaigwa kan siring na kaisipan paagi sa paggamit kan ilustrasyon manungod sa mga trabahador na tinangdanan nin sarong denario. May mga trabahador na nagpuon nin amay na aga dangan nagtrabaho nin bilog na aldaw asin nagkabaralad sa grabeng init; an iba nagtrabaho nin saro sanang oras. Inisip kan inot na grupo na maninigo sinda sa mas dakulang tangdan huling mas halawig sindang nagtrabaho. (Mat. 20:​1-16) Paagi sa ilustrasyon na ini, ipinahiling ni Jesus na an saiyang mga parasunod dapat na magin kontento sa kun ano an buot na itao nin Diyos.

Magin mapagpasalamat, asin dai pag-isipon na obligado an iba na tawan kita. (1 Tes. 5:18) Arugon si apostol Pablo na dai naghagad nin materyal na suporta sa mga tugang sa Corinto dawa ngani igwa siya nin deretsong gibuhon iyan. (1 Cor. 9:​11-14) Dapat niyatong apresyaron an lambang bendisyon  na inaako ta asin likayan na isipon na obligado an iba na tawan kita.

Magin mapakumbaba. Pag an saro halangkawon an paghiling sa saiyang sadiri, sa parati iisipon niya nang maninigo siyang tawan nin labi pa sa kun ano an igwa siya. An kapakumbabaan an pangontra sa siring na nakakaraot asin salang kaisipan.

Marahayon na halimbawa si propeta Daniel sa pagpahiling nin kapakumbabaan. Hali siya sa prominenteng pamilya, maitsura, madunong, asin dakul siyang kasanayan saka kakayahan. Kaya puwede kutanang mamati niyang maninigo siya sa espesyal na pagtratar asin mga pribilehiyong itinao sa saiya. (Dan. 1:​3, 4, 19, 20) Alagad, nagdanay na mapakumbaba si Daniel, asin an kuwalidad na iyan an dahilan kaya nagin mahalagang marhay siya para ki Jehova.​—Dan. 2:30; 10:​11, 12.

Isikwal niyato an makasadiri asin mapagpaimportanteng kaisipan na lakop na marhay sa kinaban ngunyan. Asin lugod na padagos niyatong ikaugma an lambang bendisyon na itinatao sa sato ni Jehova paagi kan saiyang daing kapantay na kabuutan.