Si Mary asin an agom niyang si John a nakaistar sa sarong nasyon kun sain puwedeng mahulitan kan maugmang bareta an dakul na Pilipinong nagtatrabaho diyan. Kaidtong COVID-19 na pandemya, nakapuon nin mga pag-adal sa Bibliya si Mary bako lang sa nasyon kun sain siya nakaistar kundi pati man sa iba pang mga lugar sa kinaban. Paano niya iyan nagibo?

Hinahapot ni Mary an mga Bible study niya, “May midbid kang gustong mag-adal nin Bibliya?” Kun magsabi sinda nin igwa, mahapot siya kun puwedeng ipabisto siya sa sainda. An paghapot kan simpleng hapot na iyan sa parati nagkakaigwa nin marahay na mga resulta. Taano? Huling an mga tawong may pagpapahalaga sa Tataramon nin Diyos sa parati gusto man na ihiras sa saindang mga kapamilya asin mga amigo kun ano an nanunudan ninda. Ano na an nagin resulta kan paghapot niya kaiyan?

An Bible study ni Mary na si Jasmin ipinamidbid siya sa apat na indibidwal na nagin bago niyang mga tinutukduan sa Bibliya. An saro sa sainda, si Kristine, nag-enjoy na marhay sa pag-adal ninda kaya nakiulay siya ki Mary kun puwedeng duwang beses siyang i-Bible study kada semana. Kan hinapot siya ni Mary kun igwa pa siyang midbid na gustong mag-adal nin Bibliya, sinabi ni Kristine, “Igwa, ipapabisto taka sa mga amiga ko.” Sa laog nin pirang semana, ipinamidbid ni Kristine si Mary sa apat niyang amiga na gustong mag-adal nin Bibliya. Kan huri, ipinabisto siya ni Kristine sa iba niya pang mga amiga, asin iyan man an ginibo kan mga ini.

Gusto man ni Kristine na makanuod manungod sa Bibliya an saiyang mga kapamilya sa Pilipinas. Kaya kinaulay niya an saiyang aking si Andrea. Kan primero, naisip ni Andrea, ‘An Mga Saksi kulto ’yan, dai sinda nagtutubod ki Jesus, saka an Lumang Tipan sana an ginagamit ninda.’ Pero pagkatapos lang nin sarong pag-adal, nawara na an salang mga paghuna niya sa Mga Saksi. Pag pigba-Bible study siya, makusog niyang sinasabi, “Kun ’yan an sinasabi kan Bibliya, siguradong totoo ’yan!”

Paghaloy-haloy, ipinamidbid ni Andrea si Mary sa duwa niya pang mga amiga asin sa sarong katrabaho niya na nagpuon na man na makipag-adal sa Bibliya. Apuwera kaiyan, an dai aram ni Mary, nagdadangog palan sa pag-adal ninda an butang tiyaon ni Andrea na si Angela. Dangan sarong aldaw, nakiulay si Angela ki Andrea na ipabisto siya ki Mary asin sinabi na gusto niya man na mag-adal sa Bibliya. Gustong-gusto ni Angela an mga nanunudan niya. Sa laog nin sarong bulan, dakulon siyang natuom na mga teksto saka gusto niya pa nganing i-Bible study siya nin apat na beses  kada semana! Sa tabang ni Andrea, regular na man na nag-aatender si Angela sa mga pagtiripon paagi sa videoconferencing.

Kan maaraman ni Mary na an agom ni Kristine na si Joshua pirmi lang na nasa harani pag nag-aadal sinda ni Kristine, hinapot siya ni Mary kun gusto niyang magbali. Sinabi ni Joshua, “Madangog lang ako, pero dai mo ako paghaputon; ta kun iyo, mahali ako.” Sa laog nin limang minutong pag-adal ninda, mas dakul pa siyang hapot kisa ki Kristine saka gusto niya na man na mag-adal nin Bibliya.

An simpleng hapot ni Mary nagresulta sa dakul na tinutukduan sa Bibliya. Iinareglo niya na tukduan nin ibang mga tugang an nagkapira sa mga ini. Kun susumahon, nakapuon si Mary nin 28 pag-adal sa Bibliya sa apat na nasyon.

Si Jasmin, an inot na Bible study na sinambit sa eksperyensiyang ini, nabawtismuhan kan Abril 2021. Si Kristine man nabawtismuhan kan Mayo 2022 asin nagbalik sa Pilipinas tanganing makaibanan an saiyang pamilya. An duwa sa iba pang mga tinutukduan na ipinamidbid ni Kristine ki Mary nabawtismuhan na man. Si Angela nabawtismuhan pakalihis nin pirang bulan asin regular payunir na ngunyan. An agom ni Kristine na si Joshua, an saindang aking babaying si Andrea, pati man an nagkapirang iba pang tinutukduan sa Bibliya padagos na nag-uuswag.

Kan inot na siglo, marikas na naglakop an maugmang bareta sa mga magkakapamilya saka sa mga mag-aramigo. (Juan 1:​41, 42a; Gibo 10:​24, 27, 48; 16:​25-33) Taano ta dai haputon an mga tinutukduan mo sa Bibliya asin an iba pang mga interesado, “May midbid kang gustong mag-adal nin Bibliya?” Dai mo aram kun gurano kadakul na pag-adal sa Bibliya an tibaad mapunan paagi sana sa simpleng hapot na iyan na puwedeng ihapot nin maski siisay.