Bareta kan mga Parabalangibog kan Kahadean

Nakanompong Sia nin Katuyohan sa Buhay

SINASABI ni Jesus na midbid nia an saiyang mga karnero. (Juan 10:14) Kun an saro may marahay na puso asin pagkamoot sa katoninongan asin katanosan, an tawong iyan maaakit na rumani sa mga parasunod ni Jesus. An siring na tawo makanonompong nin katuyohan sa buhay, arog kan sarong babae sa Belgium. Ini an saiyang estorya:

“Kan an mga Saksi ni Jehova tumoktok sa pinto ko, grabe an depresyon ko asin nag-iisip akong tapuson an sakong buhay. Nagustohan ko an sinabi kan mga Saksi manongod sa solusyon sa mga problema kan may diperensiang kinaban na ini pero dai ko nagustohan an ideya na an Dios may labot dian. Walong taon na akong nagpondo sa pagsimba, ta ikinaongis ko an pagsaginsagin na naheling ko dian. Pero sa mga Saksi, namidbid ko an tanog nin katotoohan sa saindang sinabi asin narealisar ko na, an totoo, depisil na mabuhay na mayo nin Dios.

“Makamomondo, pakalihis nin pirang pagsongko, napondo an komunikasyon ko sa mga Saksi. Nagin miserable ako. Naubos ko an duwang paketeng sigarilyo kada aldaw asin nagpoon pa ngani akong magdroga. Sa kamawotan na makikomunikar sa nagadan kong apoon, nakiayon ako sa espiritismo. Grabe an takot ko kan an resulta nakaeksperyensia ako nin mga pagsalakay nin demonyo kun nagsosolo ako kun banggi! Naglawig ini nin mga bulan. Kada banggi natatakot akong magsolo.

“Dangan, sarong aldaw naglakawlakaw ako, na laen an inagihan sa dati, asin naagihan ko an dakulang pagtogdok. Sa pagngalas ko nakaheling ako nin dakol na tawo. Kan ako rumani, naheling ko na idto mga Saksi ni Jehova na nagtotogdok nin Kingdom Hall. Nagirumdoman ko an mga pagsongko kan mga Saksi sa harong ko, asin inisip ko na magigin marahayon kun an bilog na kinaban makapamuhay arog kan mga tawong ini.

“Talagang boot ko na bumalik sa harong an mga Saksi, kaya kinaolay ko an nagkapirang nagtatrabaho sa edipisyo. Namibi ako sa Dios, asin pakalihis nin sampulong aldaw an lalaki na enot na nakanompong sa sako yaon na sa harong. Isinuherir nia na ipagpadagos mi an pag-adal sa Biblia, asin maogma akong nag-oyon. Tolos-tolos inimbitaran nia ako sa mga pagtiripon sa Kingdom Hall. Inako ko idto. Dai pa ako noarin man nakaheling nin arog kaidto! Haloyon na akong naghahanap nin mga tawong nagkakaminootan asin maogma. Asin sa katapustapusi uya sinda!

“Pakalihis kaidto nag-atender na ako sa gabos na pagtiripon. Pakalihis nin mga tolong semana, pinondo ko an bisyong pagsigarilyo. Iinapon ko an mga libro ko sa astrolohiya asin an mga plaka ko na may musikang sataniko, asin namamatean ko na nawawara na an impluwensia sa sako kan mga demonyo. Inareglar ko an buhay ko oyon sa mga pamantayan ni Jehova sa Biblia, asin pakalihis nin tolong bulan nagpoon akong maghulit kan maogmang bareta. Pakalihis nin anom na bulan nabautismohan ako. Duwang aldaw pakabautismohi, nagpoon akong mag-auxiliary payunir.

“Pinasasalamatan ko si Jehova para sa gabos na marahay na ginibo nia sa sako. Sa katapustapusi may katuyohan na an buhay ko. Iyo, an ngaran ni Jehova marigon na torre na dian ako nakanompong nin pailihan asin proteksion. (Talinhaga 18:10) Talagang an pagmate ko arog kan sa salmista kan sia sumurat sa Salmo 84:10: ‘An sarong aldaw sa saimong mga patyo orog na marahay kisa sarong ribo sa ibang lugar! Pinili kong tumindog sa tata kan harong kan sakuyang Dios kisa maglibotlibot sa mga tolda nin karatan.’”

An babaeng ini na mahoyo an puso nakanompong nin katuyohan sa buhay. Iyo man an siisay man na naghahanap ki Jehova na may marahay na puso.