Pakaaram kan “Isip ni Cristo”

“‘Siisay an nakaaram kan isip ni Jehova, tanganing sia makapagtokdo sa saiya?’ Alagad kita igwa kan isip ni Cristo.”—1 CORINTO 2:16.

1, 2. Sa saiyang Tataramon, pinagmarahay ni Jehova na ihayag an ano manongod ki Jesus?

ANO an itsura ni Jesus? Anong kolor kan buhok nia? kan kublit nia? kan mata nia? Gurano sia kalangkaw? Gurano sia kagabat? Sa nag-aging mga siglo, an artistikong mga representasyon ki Jesus nagkakalaenlaen poon sa tama sana sagkod sa harayong mangyari. An nagkapira ilinadawan sia bilang lalaking-lalaki asin buhay na buhay, mantang an iba man ilinadawan sia bilang maluya an hawak asin malungsi.

² Minsan siring, dai isinesentro kan Biblia an atension sa itsura ni Jesus. Imbes, pinagmarahay ni Jehova na ihayag an mas mahalaga nanggad: an pagkatawo ni Jesus. An mga pagkasaysay kan Ebanghelyo bako sanang nagsasabi kan sinabi saka ginibo ni Jesus kundi naghahayag man kan rarom nin saboot asin kan dalagan nin kaisipan sa likod kan saiyang mga tataramon saka gibo. An apat na ipinasabong na mga pagkasaysay na ini nagpapangyari sa sato na aninawon an inaapod ni apostol Pablo na “isip ni Cristo.” (1 Corinto 2:16) Importante na maaraman niato an kaisipan, saboot, asin personalidad ni Jesus. Taano? Huli sa kisuerra duwang dahelan.

3. An pakaaram niato kan isip ni Cristo makatatao sa sato nin anong pakarorop?

³ Enot, an isip ni Cristo nagtatao sato nin kadikit na ideya sa isip ni Jehova Dios. Midbid na marhay  ni Jesus an saiyang Ama kaya nasabi nia: “Kun siisay an Aki mayo nin siisay man na nakaaaram kundi an Ama; asin kun siisay an Ama, mayo nin siisay man na nakaaaram kundi an Aki, asin sia na sa saiya gusto kan Aki na ihayag sia.” (Lucas 10:22) Garo baga sinasabi ni Jesus, ‘Kun gusto nindong maaraman kun anong klase si Jehova, ako an asahan nindo.’ (Juan 14:9) Sa siring, kun pinag-aadalan niato kun ano an ihinahayag kan mga Ebanghelyo manongod sa kun ano an nagin kaisipan saka saboot ni Jesus, garo man sana nanonodan niato kun ano an kaisipan saka saboot ni Jehova. An siring na kaaraman nagpapangyari sa sato na rumani sa satong Dios.—Santiago 4:8.

4. Tangani na kita talagang makagawe nin arog ki Cristo, ano an dapat na manodan nguna niato, asin taano?

⁴ Ikaduwa, an pakaaram niato kan isip ni Cristo nakatatabang sa sato na ‘sunodon niato nin estrikto an saiyang mga lakad.’ (1 Pedro 2:21) An pagsunod ki Jesus bako sanang pag-otro sa saiyang mga tataramon asin pag-arog sa saiyang mga gibo. Mantang an pagtaram saka mga gibo impluwensiado nin kaisipan saka saboot, an pagsunod ki Cristo nagkakaipo na kultibaron niato an kaparehong “nasa isip na aktitud” na yaon sa saiya. (Filipos 2:5) Sa ibang pagtaram, tangani na kita talagang makagawe nin arog ki Cristo, dapat na kita makanood nguna na magin arog nia an kaisipan saka saboot, an boot sabihon, sa pinakamakakaya niato bilang mga tawong bakong sangkap. Kun siring, sa tabang kan mga kagsurat kan mga Ebanghelyo, aninawon niato an isip ni Cristo. Pag-oolayan nguna niato an mga bagay na nakaimpluwensia sa nagin kaisipan saka saboot ni Jesus.

An Saiyang Buhay Bago Nagin Tawo

5, 6. (a) An satong mga kaibaiba puedeng magkaigwa nin anong epekto sa sato? (b) Nagkaigwa nin anong pakikiasosyar an panganay na Aki nin Dios sa kalangitan bago nagdigdi sa daga, asin ano an nagin epekto kaini sa saiya?

⁵ An dayupot niatong mga kaibaiba puedeng magkaigwa nin epekto sa sato, na naiimpluwensiahan an satong kaisipan, saboot, asin gawe-gawe sa ikararahay o sa ikararaot. * (Talinhaga 13:20) Estudyare an pakikiasosyar ni Jesus sa kalangitan bago sia nagdigdi sa daga. An Ebanghelyo ni Juan nag-aapod nin atension sa buhay ni Jesus bago nagin tawo bilang “an Tataramon,” o Representante sa Pagtaram, nin Dios. Sabi ni Juan: “Sa kapinonan iyo an Tataramon, asin an Tataramon nasa kaibanan nin Dios, asin an Tataramon sarong dios. An sarong ini sa kapinonan nasa kaibanan nin Dios.” (Juan 1:1, 2) Mantang mayo nin kapinonan si Jehova, an pagigin nasa kaibanan nin Dios kan Tataramon poon “sa kapinonan” siertong nanonongod sa kapinonan kan paglalang nin Dios. (Salmo 90:2) Si Jesus “an panganay sa gabos na linalang.” Huli kaini, sia nabuhay bago linalang an ibang espiritung mga linalang asin an pisikal na uniberso.—Colosas 1:15; Kapahayagan 3:14.

⁶ Segun sa nagkapirang sientipikong pagkalkulo, an pisikal na uniberso kisuerra 12 bilyon na taon nang nag-eeksister. Kun an mga kalkulong iyan haros tama, an panganay na Aki nin Dios dayupot na nakiasosyar sa saiyang Ama sa laog nin haloyon na panahon bago linalang si Adan. (Ikomparar an Miqueas 5:2.) Sa siring, nagtalubo an mapagpadangat saka makosogon na bogkos sa pag-oltanan nindang duwa. Bilang kadonongan na napersonipikar, ining panganay na Aki sa saiyang buhay bago nagin tawo irinerepresentar na nagsasabi: ‘Ako an nangongorog na kinaoogmahan ni Jehova sa aroaldaw, mantang ako maogma sa atubangan nia sa gabos na panahon.’ (Talinhaga 8:30) Daing duwa-duwa na an haraning marhay na pakikiasosyar sa Burabod nin pagkamoot sa laog nin dai mabilang na panahon nagkaigwa nin hararom na epekto sa Aki nin Dios! (1 Juan 4:8) An Aking ini nakaaram asin nagpabanaag kan kaisipan, saboot, asin ugale kan saiyang Ama sa paaging dai mahihimo nin siisay pa man.—Mateo 11:27.

Nagin Buhay Asin mga Impluwensia Digdi sa Daga

7. Ano an saro sa mga dahelan kun taano ta kaipuhan na pumadigdi sa daga an panganay na Aki nin Dios?

⁷ Dakol pang dapat na manodan an Aki nin Dios, ta an katuyohan ni Jehova andamon an saiyang Aki na magin madinamayon na Halangkaw na Saserdote, na “makakapakidamay sa satong mga kaluyahan.” (Hebreo 4:15) An saro sa mga dahelan na an Aki napadigdi sa daga bilang tawo iyo na aboton an mga kahagadan para sa katongdan na ini. Digdi, bilang tawo na may laman asin dugo, si Jesus napairarom sa mga kamugtakan saka impluwensia na dati namamasdan sana nia duman sa langit. Ngonyan naeksperyensiahan nia mismo an saboot saka  emosyon nin tawo. Kun beses sia napapagal, napapaha, asin nagugutom. (Mateo 4:2; Juan 4:6, 7) Labi pa dian, tinagalan nia an gabos na klaseng kasakitan asin pagdusa. Sa siring, sia “nakanood nin pagkuyog” asin biyong nakualipikar para sa saiyang katongdan bilang Halangkaw na Saserdote.—Hebreo 5:8-10.

8. Ano an aram niato manongod sa enot na mga taon kan buhay ni Jesus digdi sa daga?

⁸ Kumusta man an mga eksperyensia ni Jesus durante kan enot na mga taon kan saiyang buhay digdi sa daga? Halipoton an rekord kan saiyang pagkaniaki. Sa katunayan, solamente si Mateo asin Lucas an nagsaysay kan mga pangyayari may labot sa saiyang pagkamundag. Aram kan mga kagsurat kan Ebanghelyo na si Jesus nabuhay na sa langit bago nagdigdi sa daga. An buhay na iyan bago nagin tawo, labi sa ano pa man, an nagin dahelan kan nagin pagkatawo nia. Minsan siring, si Jesus biyong sarong tawo. Minsan ngani sangkap, kaipuhan pa man giraray siang magdakula poon sa pagkaomboy dangan pagkaniaki saka pagkahoben sagkod sa pagkanasa edad na, na sa gabos na panahon may nanonodan. (Lucas 2:51, 52) An Biblia may ihinahayag na nagkapirang bagay manongod sa enot na mga taon kan buhay ni Jesus na daing duwa-duwa na nakaapektar sa saiya.

9. (a) Ano an nagpaparisa na si Jesus namundag sa sarong dukhang pamilya? (b) Sa anong klaseng buhay si Jesus posibleng marhay na nagdakula?

⁹ Minalataw na si Jesus namundag sa sarong dukhang pamilya. Ipinaririsa ini kan dolot na dinara ni Jose asin Maria sa templo mga 40 aldaw pagkamundag nia. Imbes na magdara nin ogbon na lalaking karnero bilang dolot na tinotong asin nin pitson o agbaan bilang dolot manongod sa kasalan, an dinara ninda magsalang “sarong padis na agbaan o duwang pitson.” (Lucas 2:24) Segun sa Ley ni Moises, an dolot na ini probisyon para sa mga dukha. (Levitico 12:6-8) Pag-abot nin panahon, duminakula an hamak na pamilyang ini. Si Jose asin Maria nagkaigwa nin kisuerra anom pang aki sa natural na paagi pakalihis kan milagrosong pagkamundag ni Jesus. (Mateo 13:55, 56) Kaya si Jesus nagdakula sa sarong dakulang pamilya, posibleng marhay na simple sana an buhay.

10. Ano an nagpapaheling na si Maria asin Jose mga tawong matatakton sa Dios?

¹⁰ Si Jesus pinadakula nin matatakton sa Dios na mga magurang na may pagmakolog sa saiya. An ina nia, si Maria, marahayon na babae. Girumdoma na kan tinataratara sia, an anghel na si Gabriel nagsabi: “Marahay na aldaw, ika na pinakapaorog, si Jehova nasa saimo.” (Lucas 1:28) Si Jose man tawong deboto. Taon-taon sia fiel na nagbabaklay nin 150 kilometros pasiring sa Jerusalem para sa Paskua. Nag-aatender man si Maria, dawa ngani mga lalaki sana an hinahagadan na mag-atender. (Exodo 23:17; Lucas 2:41) Sa saro kan siring na mga okasyon, si Jose asin Maria, pakalihis nin maigot na paghanap, nakua sa templo an 12 anyos na si Jesus sa tahaw kan mga paratokdo. Sa saiyang hadit na mga magurang, si Jesus nagsabi: “Dai kamo nakakaaram na ako dapat na nasa harong kan sakong Ama?” (Lucas 2:49) “Ama”—an terminong iyan seguradong may itinataong nagpapaogma asin positibong ideya sa hoben na si Jesus. Sarong bagay, minalataw na sinabi sa saiya na si Jehova an tunay niang Ama. Dugang pa, segurado na si Jose nagin marahay na nag-ampon na ama para ki Jesus. Daing duwa-duwa na si Jehova dai mapili nin daing herak o maringis na lalaki na mapadakula sa Saiyang mahal na Aki!

11. Anong trabaho an nanodan ni Jesus, asin kaidtong mga panahon kan Biblia, ano an kalabot sa trabahong ini?

¹¹ Durante kan saiyang mga taon sa Nazaret, nanodan ni Jesus an pagpapanday, posibleng marhay sa nag-ampon na ama nia, si Jose. Si Jesus nagin eksperto sa trabahong iyan kaya sia mismo  inapod na “an panday.” (Marcos 6:3) Kaidtong mga panahon kan Biblia, an mga panday kinukuang magtogdok nin mga harong asin gumibo nin muebles (pati mga lamesa, bangkito, asin bangko) saka mga kasangkapan sa pag-oma. Sa saiyang Dialogue With Trypho, si Justinong Martir, kan ikaduwang siglo C.E., nagsurat manongod ki Jesus: “Kaugalean niang magtrabaho bilang panday kan nasa kaibanan nin mga tawo, na naggigibo nin mga arado asin sakal.” Bakong pasil an trabahong iyan, ta posible na an panday kan suanoy daing kahoy na nababakal. Mas posibleng marhay na sia an minaluwas asin minapili nin poon nin kahoy, pinapalod iyan, asin ipinupuli an kahoy. Kaya tibaad naaraman ni Jesus an mga kadepisilan sa paghanapbuhay, pakikitransaksion sa mga parokyano, asin pagpatamatama kan entrada.

12. Ano an nagpaparisa na si Jose minalataw na naenot na nagadan ki Jesus, asin ano daw an nagin kahulogan kaini para ki Jesus?

¹² Bilang an matuang aki, si Jesus nagtabang gayod sa pag-asikaso sa pamilya, partikularmente huli ta minalataw na si Jose naenot na nagadan ki Jesus. * An Zion’s Watch Tower kan Enero 1, 1900, nagsabi: “Sinasabi nin tradisyon na si Jose nagadan kan hoben pa si Jesus, asin na si Jesus nagtrabaho bilang panday asin iyo an nagsustento sa pamilya. Ini suportado minsan paano kan patotoo sa Kasuratan na dian si Jesus mismo inaapod na panday, asin nasasambitan an saiyang ina saka mga tugang, alagad si Jose dai nasasambitan. (Marcos 6:3) . . . May posibilidad, kun siring, na an halawig na panahon na desiotsong taon kan buhay kan satong Kagurangnan, poon kaidtong insidente [na nasusurat sa Lucas 2:​41-​49] sagkod sa bautismo nia, ginamit sa ordinaryong mga katongdan sa buhay.” Si Maria asin an saiyang mga aki, pati si Jesus, posibleng marhay na nakamate kan kolog na ibinubunga kun nagadan an sarong namomotan na marhay na agom saka ama.

13. Kan ponan ni Jesus an saiyang ministeryo, taano ta idto may kaaraman, pakarorop, asin rarom nin saboot na dai puedeng mapasa siisay man na ibang tawo?

¹³ Malinaw nanggad, si Jesus dai namundag sa pasil na buhay. Imbes, naeksperyensiahan nia mismo an buhay nin ordinaryong mga tawo. Dangan, kan 29 C.E., uminabot na an panahon na otobon ni Jesus an asignasyon nin Dios na naghahalat sa saiya. Kan tigrakdag kan taon na idto, sia binautismohan sa tubig asin pinaniaki bilang espirituwal na Aki nin Dios. ‘An langit nabukasan para sa saiya,’ na minalataw na nagpaparisa na ngonyan nagigirumdoman na nia an saiyang buhay sa langit bago sia nagin tawo, pati an kaisipan saka saboot na kaiba kaiyan. (Lucas 3:21, 22) Kaya kan ponan ni Jesus an saiyang ministeryo, idto may kaaraman, pakarorop, asin rarom nin saboot na dai puedeng mapasa siisay man na ibang tawo. May marahay na dahelan, itinalaga kan mga kagsurat kan Ebanghelyo an kadaklan sa mga isinurat ninda sa mga pangyayari kaidtong ministeryo ni Jesus. Dawa siring, dai ninda kayang isurat an gabos na sinabi saka ginibo nia. (Juan 21:25) Alagad an ipinasabong na isurat ninda nagpapangyari sa sato na aninawon an isip kan pinakadakulang tawo na nabuhay kasuarin man.

Kun Anong Klase si Jesus Bilang Sarong Tawo

14. Paano si Jesus ilinaladawan kan mga Ebanghelyo bilang tawo na may mapagpadangat na init asin hararom na saboot?

¹⁴ An personalidad ni Jesus na minaluwas sa mga Ebanghelyo personalidad nin sarong tawo na may mapagpadangat na init asin hararom na saboot. Nagpaheling sia nin dakol na klase nin emosyonal na reaksion: pagkaherak sa sarong leproso (Marcos 1:40, 41); kamondoan huli sa sarong banwaan na dai naghihimate (Lucas 19:41, 42); matanos na gurobgutob sa mahanab na mga pararibay nin kuarta (Juan 2:13-17). Tawong may pakikidamay, si Jesus napapaluha, asin dai nia itinatago an saiyang emosyon.  Kan magadan an mahal niang katood na si Lazaro, an pakaheling ki Maria, tugang ni Lazaro, na nananangis nakapahirong marhay sa boot ni Jesus kaya sia mismo napaluha, naghibi na heling-heling nin iba.—Juan 11:32-36.

15. Paano an mapagpadangat na saboot ni Jesus risang-risa sa saiyang pagheling saka pagtratar sa iba?

¹⁵ An mapagpadangat na saboot ni Jesus nangorognang risang-risa sa saiyang pagheling saka pagtratar sa iba. Hiningoa niang maabot an mga dukha saka inaapi, na tinatabangan sindang ‘makakua nin kaginhawahan para sa saindang kalag.’ (Mateo 11:4, 5, 28-30) Sia bakong sobra kasibot tangani na mapanigoan an mga pangangaipo kan mga nagsasakit nin makuri, baga man sarong dinudugong babae na daing girong na dinuotan an saiyang gubing o sarong butang parapakilimos na dai mapaalo. (Mateo 9:20-22; Marcos 10:46-52) Hinanap ni Jesus an marahay sa iba asin inomaw sinda; pero, andam man siang tumao nin pagsagwe kun kaipuhan. (Mateo 16:23; Juan 1:47; 8:44) Sa panahon na kakadikit kan diretso nin mga babae, trinatar sinda ni Jesus na may timbang na sokol nin dignidad saka paggalang. (Juan 4:​9, 27) Natural sana, an sarong grupo nin mga babae boluntad na naglingkod sa saiya gikan sa sadiri nindang mga rogaring.—Lucas 8:3.

16. Ano an nagpapaheling na si Jesus may timbang na punto de vista sa buhay asin materyal na mga bagay?

¹⁶ Timbang an punto de vista ni Jesus sa buhay. An materyal na mga bagay bakong pinakaimportante para sa saiya. Minalataw na, kun sa materyal, kadikiton an rogaring nia. Sinabi nia na sia “mayo man lamang nin mahihigdaan.” (Mateo 8:20) Kadungan kaiyan, si Jesus nakadagdag sa kagayagayahan nin iba. Kan sia magduman sa sarong punsion sa kasal—sarong okasyon na sa tipikong mga kamugtakan may musika, karantahan, asin paggayagaya—malinaw na dai sia nagduman tanganing darahan nin kamondoan an okasyon. Sa katunayan, ginibo ni Jesus an enot niang milagro duman. Kan maubos an arak, an tubig ginibo niang de kalidad na arak, inomon na “nagpapagayagaya sa puso nin magagadanon na tawo.” (Salmo 104:15; Juan 2:1-11) Sa siring, nakapagpadagos an kaorogmahan, asin sierto na dai napasupog an nobya saka nobyo. An pagkatimbang nia orog na nababanaag sa bagay na mas dakol na marhay an okasyon na nasasambitan na si Jesus nagtrabaho nin halawig saka maigot sa saiyang ministeryo.—Juan 4:34.

17. Taano ta bakong makangangalas na si Jesus Pangenot na Paratokdo, asin ano an ipinabanaag kan saiyang mga tokdo?

¹⁷ Si Jesus Pangenot na Paratokdo. An dakol sa pagtotokdo nia nagpabanaag kan tunay na mga nangyayari sa pan-aroaldaw na buhay, na aram niang marhay. (Mateo 13:33; Lucas 15:8) An saiyang paagi nin pagtotokdo daing kaagid—pirmeng malinaw, simple, asin praktikal. Orog pang mahalaga an saiyang itinokdo. An saiyang mga tokdo nagpabanaag kan saiyang odok sa pusong kamawotan na ipamidbid sa mga naghihinanyog sa saiya an kaisipan, saboot, asin ugale ni Jehova.—Juan 17:6-8.

18, 19. (a) Paagi sa anong buhay na marhay na mga ilustrasyon ilinadawan ni Jesus an saiyang Ama? (b) Ano an tatrataron sa masunod na artikulo?

¹⁸ Parateng naggagamit nin mga ilustrasyon, ihinayag ni Jesus an saiyang Ama paagi sa buhay na marhay na mga ilustrasyon na bakong madaling malingawan. Madali sana an magtaram sa pankagabsan na mga termino manongod sa pagkaherak nin Dios. Pero iba nang orolay an ibaing si Jehova sa sarong mapagpatawad na ama na napahirong marhay an boot kan maheling an nagbalik niang aki kaya sia ‘duminalagan asin kinugos an liog kan saiyang aki patin mapagpadangat na hinadokan sia.’ (Lucas 15:11-24) Hinaboan an matagas na kultura na dian minemenus nin mga namomoon sa relihion an ordinaryong mga tawo, ipinaliwanag ni Jesus na an saiyang Ama Dios na madaling dolokon na mas suno an mga pagngayongayo nin sarong mapakumbabang parasingil nin buhis  kisa mapagpasikat na pamibi nin sarong mapaghambog na Fariseo. (Lucas 18:9-14) Si Jehova ilinadawan ni Jesus bilang nagmamakolog na Dios na aram kun may sadit na dignos na naholog sa daga. “Dai kamo matakot,” an pagpakosog liwat ni Jesus sa boot kan saiyang mga disipulo, “orog kamong mahalaga kisa dakol na dignos.” (Mateo 10:29, 31) Natural sana, an mga tawo napangalas nin makuri sa “paagi nin pagtotokdo” ni Jesus asin naakit sa saiya. (Mateo 7:28, 29) Tara, sarong beses may “dakulang kadaklan” na nagdanay harani sa saiya sa laog nin tolong aldaw, na nagtios pa nganing dai magkarakan!—Marcos 8:1, 2.

¹⁹ Makapagpapasalamat kita na ihinayag ni Jehova sa saiyang Tataramon an isip ni Cristo! Pero, paano niato makukultibar saka ikapaheheling an isip ni Cristo sa satong relasyon sa iba? Tatrataron ini sa masunod na artikulo.

[Mga Nota sa Ibaba]

Nagigirumdoman daw Nindo?

• Taano ta importante na maaraman niato an “isip ni Cristo”?

• Nagkaigwa nin anong pakikiasosyar si Jesus sa saiyang buhay bago nagin tawo?

• Durante kan saiyang buhay digdi sa daga, anong mga kamugtakan saka impluwensia an naeksperyensiahan mismo ni Jesus?

• Ano an ihinahayag kan mga Ebanghelyo manongod sa personalidad ni Jesus?

[Mga Hapot Para sa Pag-adal]

[Ritrato sa pahina 10]

Si Jesus nagdakula sa sarong dakulang pamilya, posibleng marhay na simple sana an buhay

[Mga Ritrato sa pahina 12]

An mga paratokdo nagngalas sa pakasabot saka mga simbag kan 12 anyos na si Jesus