Si Jehova—An Saro na Makosog sa Kapangyarihan

“Huli sa kadakolan nin dinamikong kosog, mantang sia man makosog sa kapangyarihan, ni saro sa sainda mayong nawawara.”—ISAIAS 40:26.

1, 2. (a) Sa anong pisikal na gikanan nin kapangyarihan asin enerhiya kita gabos nagdedepende? (b) Ipaliwanag kun taano ta si Jehova an pinaka-Gikanan nin gabos na kapangyarihan asin enerhiya.

AN KAPANGYARIHAN asin enerhiya mga bagay na ipinapasipara sana kan dakol sa sato. Halimbawa, dai niato iniisip an dapit sa koryente na nagtatao sa sato nin liwanag asin init o an kapasilan nin pagsaksak nin ano man na de koryenteng kasangkapan niato. Solamente an dai linalaoman na pagkawara nin koryente an nagpaparealisar sa sato na kun mayo nin koryente, an mga siudad nin tawo haros maontok sa pagpunsionar. An kadaklan sa elektrisidad na dian kita nagdedepende indirektang naghahale sa pinakamasasarigan na gikanan nin enerhiya kan daga—an saldang. * Kada segundo an reaktor solar na ini nagkokonsumo nin limang milyon na tonelada nin nuklear na gatong, na pinaooranan an daga nin enerhiya na nagsusustenir sa buhay.

² Saen hale an gabos na enerhiya solar na ini? Siisay an naghaman kan langitnon na planta na ini? Si Jehova Dios. Pinanonongdan sia, an Salmo 74:16 nagsasabi: “Ika mismo an nag-andam kan ilaw, pati kan saldang.” Iyo, si Jehova an pinaka-Gikanan nin gabos na kapangyarihan asin enerhiya, kun paanong sia an Gikanan nin gabos na buhay. (Salmo 36:9) Nungkang ipasipara ta sana an saiyang kapangyarihan. Paagi ki propeta Isaias, pinagigirumdom kita ni Jehova na tingagon an mga bagay sa langit, arog baga kan saldang asin kan mga bitoon, asin horophoropon kun paano naglataw an mga iyan. “Tingagan an saindong mga mata asin helinga nindo. Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa kabilangan, na gabos inaapod nia sa mismong ngaran. Huli sa kadakolan nin dinamikong kosog, mantang sia man makosog sa kapangyarihan, ni saro sa sainda mayong nawawara.”—Isaias 40:26; Jeremias 32:17.

3. Paano kita nakikinabang sa mga pagpaheling kan kapangyarihan ni Jehova?

³ Mantang si Jehova makosog  sa kapangyarihan, kita makasesegurado na an saldang padagos na magtatao sa sato nin liwanag asin init na dian nagdedepende an satong buhay. Minsan siring, kita nananarig sa kapangyarihan nin Dios para sa mga bagay na orog pa kisa pundamental na pisikal na mga pangangaipo niato. An pagkabalukat sa sato sa kasalan asin kagadanan, an satong paglaom para sa ngapit, asin an satong pagtitiwala ki Jehova gabos konektadong marhay sa saiyang paggamit nin kapangyarihan. (Salmo 28:​6-9; Isaias 50:2) An Biblia kadakol nin halimbawa na nagpapatotoo sa kapangyarihan ni Jehova na maglalang asin magbalukat, na magligtas kan saiyang banwaan asin maglaglag kan saiyang mga kaiwal.

An Kapangyarihan nin Dios Nahahayag sa Paglalang

4. (a) Ano an nagin epekto ki David kan pagmasid sa langit kun banggi? (b) Ano an ihinahayag kan mga bagay sa langit kun mapadapit sa kapangyarihan nin Dios?

⁴ Ipinaliwanag ni apostol Pablo na an ‘daing sagkod na kapangyarihan [kan satong Kaglalang] malinaw na mamamansayan sa mga bagay na ginibo nia.’ (Roma 1:20) Dakol na siglo bago kaini, namansayan ni salmista David, na bilang sarong pastor sierto na parateng nagtitingag sa langit kun banggi, an pagigin labi-labi kadakula kan uniberso asin an kapangyarihan kan Kaggibo kaiyan. Sia nagsurat: “Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo ta sia ginigirumdom mo, asin an aki nin daganon na tawo ta sia inaataman mo?” (Salmo 8:3, 4) Apisar kan saiyang limitadong kaaraman dapit sa mga bagay sa langit, nasabotan ni David na sia saditon kun ikokomparar sa Kaglalang kan satong mahiwason na uniberso. Ngonyan, mas dakol nang aram an mga astronomo manongod sa grabeng kadakulaan kan uniberso asin sa kapangyarihan asin puersa na nagsusustenir dian. Halimbawa, sinasabi ninda sa sato na an satong saldang kada segundo nagpapaluwas nin enerhiya na katumbas nin pagputok nin 100,000 milyones na megaton nin TNT. * Saditon na parte kan enerhiyang iyan an nakakaabot sa daga; pero igo na iyan tanganing susteniran an gabos na buhay digdi sa satong planeta. Pero, an satong saldang bako nanggad an bitoon na pinakamakosog na gikanan nin enerhiya  sa kalangitan. May mga bitoon na nagpapaluwas sa saro sanang segundo kan enerhiya na pinaluluwas kan saldang sa sarong bilog na aldaw. Imahinara, kun siring, an kapangyarihan na puedeng gamiton kan Saro na naglalang kan siring na mga bagay sa langit! Si Eliu tama sanang nagkagsing: “Kun dapit sa Makakamhan sa gabos, dai niato sia inaabot; sia halangkaw sa kapangyarihan.”—Job 37:23.

5. Anong ebidensia kan kosog ni Jehova an maheheling niato sa saiyang mga gibo?

⁵ Kun satong ‘hahanapon an mga gibo nin Dios’ arog kan ginibo ni David, maheheling niato an ebidensia kan saiyang kapangyarihan sa gabos na lugar—sa doros asin mga alon, sa dagoldol asin kitkilat, sa masulog na mga salog asin nakagugulat na kabukidan. (Salmo 111:2; Job 26:12-​14) Dugang pa, siring kan ipinagirumdom ni Jehova ki Job, an mga hayop nagpapatotoo sa Saiyang kosog. Kabilang digdi an Behemot, o an hipopotamo. Sinabihan ni Jehova si Job: “An puersa kaiyan yaon sa mga piad kaiyan . . . An purusog na tolang kaiyan garo pinanday na batbat na mga sogkod.” (Job 40:15-18) An makatatakot na puersa nin layas na toro midbid man na marhay kaidtong mga panahon kan Biblia, asin si David namibi na sia ikaligtas sa “ngoso kan leon, asin sa mga sungay nin layas na mga toro.”—Salmo 22:21; Job 39:​9-​11.

6. Ano an isinisimbolo kan toro sa Kasuratan, asin taano? (Helingon an nota sa ibaba.)

⁶ Huli sa kosog kaiyan, an toro ginagamit sa Biblia  bilang simbolo kan kapangyarihan ni Jehova. * An bisyon ni apostol Juan kan trono ni Jehova may ipinaheheling na apat na buhay na linalang, na an saro kaiyan igwa nin lalauogon na siring sa toro. (Kapahayagan 4:​6, 7) Minalataw na an saro sa apat na pangenot na atributo ni Jehova na ilinaladawan kan mga kerubin na ini iyo an kapangyarihan. An iba pa iyo an pagkamoot, kadonongan, asin hustisya. Mantang an kapangyarihan mahalagang marhay na aspekto kan personalidad nin Dios, an malinaw na pakasabot sa saiyang kapangyarihan asin kun paano nia iyan ginagamit mapadayupot sa sato sa saiya asin matabang sa sato na arogon an saiyang halimbawa paagi sa marahay na paggamit kan ano man na kosog na yaon sa sato.—Efeso 5:1.

“Si Jehova nin mga Hukbo, an Makapangyarihan na Saro”

7. Paano kita makasesegurado na dadaogon nin karahayan an karatan?

⁷ Sa Kasuratan, si Jehova inaapod na “Dios na Makakamhan sa gabos,” sarong titulo na nagpapagirumdom sa sato na maninigo na nungka niatong menuson an saiyang kapangyarihan o pagdudahan an saiyang kakayahan na daogon an saiyang mga kaiwal. (Genesis 17:1; Exodo 6:3) An maraot na sistema nin mga bagay ni Satanas tibaad garo baga nakaestablisar nang marhay, alagad sa pagheling ni Jehova “an mga nasyon siring sana sa sarong toro sa timba; asin siring sa kabokabo sa timbangan na sinda ibinibilang.” (Isaias 40:15) Huli sa siring na kapangyarihan nin Dios, daing duda na dadaogon nin karahayan an karatan. Sa panahon na lakop an karatan, puede kitang maranga sa pakaaram na “si Jehova nin mga hukbo, an Makapangyarihan na Saro nin Israel” hahaleon sagkod lamang an karatan.​—Isaias 1:​24; Salmo 37:​9, 10.

8. Anong langitnon na mga hukbo an sakop ni Jehova, asin ano an patotoo niato kan saindang kapangyarihan?

⁸ An pananaram na “Jehova nin mga hukbo,” na minalataw nin 285 beses sa Biblia, saro pang pagirumdom kan kapangyarihan nin Dios. An “mga hukbo” na sinambit digdi iyo an hukbo nin espiritung mga linalang na sakop ni Jehova. (Salmo 103:20, 21; 148:2) Sa saro sanang banggi, ginadan kan saro sana sa mga anghel na ini an 185,000 na Asiriong soldados na nanhuhuma sa Jerusalem. (2 Hade 19:35) Kun minimidbid ta an kapangyarihan kan langitnon na mga hukbo ni Jehova, dai kita madaling matakot sa mga nagtutumang. Si propeta Eliseo dai nahadit kan palibotan nin sarong bilog na hukbo na naghahanap sa saiya huli ta, bakong arog kan saiyang surogoon, naheheling nia paagi kan saiyang mata nin pagtubod an sarong dakulaon na langitnon na mga hukbo na nagsusuportar sa saiya.​—2 Hade 6:​15-​17.

9. Arog ki Jesus, taano ta maninigo kitang magkompiar sa pagprotehir nin Dios?

⁹ Aram man ni Jesus an dapit sa pagsuportar nin anghel kan sia mapaatubang sa sarong sururog na armado nin mga espada asin samulig sa hardin nin Getsemani. Pakatapos na sabihan si Pedro na isarung an saiyang espada, sinabi sa saiya ni Jesus na, kun kinakaipuhan, Sia puedeng humagad sa saiyang Ama nin “labi sa kagduwang hukbo nin mga anghel.” (Mateo 26:47, 52, 53) Kun kita igwa nin kaparehong pag-apresyar sa langitnon na mga hukbo na puedeng gamiton nin Dios, kita lubos man na magtitiwala sa pagsuportar nin Dios. Si apostol Pablo nagsurat: “Kun siring, ano an sasabihon niato sa mga bagay na ini? Kun an Dios nasa kampi niato, siisay an matumang sa sato?”—Roma 8:31.

10. Para kiisay ginagamit ni Jehova an saiyang kapangyarihan?

¹⁰ Kun siring, yaon sato an gabos na dahelan na magtiwala sa pagprotehir ni Jehova. Pirme niang ginagamit an saiyang kapangyarihan sa ikararahay asin kaoyon kan saiyang iba pang kualidad—an hustisya, kadonongan, asin pagkamoot. (Job 37:23; Jeremias 10:12) Mantang an poderosong mga tawo sa parate tinitimaktimakan an mga dukha asin mapakumbaba para sa paslong pakinabang, si Jehova “binabangon an hamak sa mismong kabokabo” asin “abunda sa kapangyarihan na magligtas.” (Salmo 113:5-7; Isaias 63:1) Siring kan nasabotan ni Maria, an mabini asin bakong maabhaw na ina ni Jesus, an “makapangyarihan na Saro” daing kaimotan na ginagamit an saiyang kosog para sa mga may takot sa saiya, na ibinababa an mga mapaabaw-abaw asin ilinalangkaw an mga may kababaan.​—Lucas 1:​46-​53.

Ihinahayag ni Jehova an Saiyang Kapangyarihan sa Saiyang mga Lingkod

11. Anong patotoo kan kapangyarihan nin Dios an naheling kan mga Israelita kan taon 1513 B.C.E.?

¹¹ Sa nagkapirang pangyayari, ihinayag ni Jehova an saiyang kapangyarihan sa saiyang mga lingkod.  An saro sa mga pangyayaring iyan duman sa Bukid nin Sinai kan 1513 B.C.E. Durante kan taon na iyan an mga Israelita nakaheling na nin makangangalas na ebidensia kan kapangyarihan nin Dios. Sampulong nakalalaglag nin biyo na damat an naghayag kan makosog na kamot ni Jehova asin kan kadaihan nin kamanungdanan kan mga dios sa Egipto. Dai nahaloy pakatapos kaiyan, an milagrosong pagbalyo sa Dagat na Pula asin an paglaglag sa hukbo ni Paraon nagtao nin dugang na prueba kan kosog nin Dios. Pakalihis nin tolong bulan, sa pamitisan kan Bukid nin Sinai, inimbitaran ni Jehova an mga Israelita na magin saiyang “espesyal na sadiri hale sa gabos na ibang banwaan.” Sa kabtang ninda, sinda nanuga: “Andam kaming gibohon an gabos na itinaram ni Jehova.” (Exodo 19:5, 8) Dangan, si Jehova nagtao nin malinaw na paheling kan saiyang kapangyarihan. Sa tahaw nin dagoldol asin kitkilat patin kan makosog na tanog nin amodyong, an Bukid nin Sinai nag-aso asin nagkunogkunog. An banwaan, na nasa harayo, natakot nin makuri. Alagad sinabihan sinda ni Moises na an eksperyensiang ini maninigo na magtokdo sa sainda nin diosnon na takot, takot na mapahiro sa sainda na kuyogon an saindang pinakamakapangyarihan asin iyo sanang tunay na Dios, si Jehova.​—Exodo 19:16-​19; 20:18-​20.

12, 13. Anong mga kamugtakan an nagin dahelan na binayaan ni Elias an asignasyon sa saiya, alagad paano sia pinakosog ni Jehova?

¹² Pakalihis nin nagkapirang siglo, durante kan panahon ni Elias, naheling sa Bukid nin Sinai an saro pang paheling kan kapangyarihan nin Dios. Naheling na kan propeta an kapangyarihan nin Dios na nagpupunsionar. Sa laog nin tolo may kabangang taon, “pinintoan [nin Dios] an kalangitan” dahel sa apostasiya kan nasyon nin Israel. (2 Cronica 7:13) Durante kan ibinungang tigmara, mga uwak an nagpakakan ki Elias sa kababan kan sapang masulog sa Kerit, asin kan huri an dikit na harina asin lana nin sarong babaeng balo milagrosong dinugangan tanganing matawan sia nin pagkakan. Tinawan pa ngani ni Jehova nin kapangyarihan si Elias na buhayon liwat an aking lalaki kan balong ini. Sa katapustapusi, sa sarong pambihirang pagbalo sa pagka-Dios duman sa Bukid nin Carmelo, may kalayo na huminilig hale sa langit asin tinumtom an atang ni Elias. (1 Hade 17:​4-​24; 18:36-​40) Minsan siring, dai nahaloy pagkatapos kaiyan, si Elias natakot asin nanluya an boot kan maghuma si Jezabel na gadanon sia. (1 Hade 19:​1-4) Duminulag sia sa nasyon, na naghohona na tapos na an saiyang gibohon bilang propeta. Tanganing aseguraron giraray asin pakosogon sia, si Jehova maboot na nagtao sa saiya nin personal na paheling nin kapangyarihan nin Dios.

¹³ Mantang si Elias nagtatago sa lungib, naheling nia an nakapupukaw nin hararom na paggalang na paheling kan tolo sa mga puersa na kontrolado ni Jehova: makosog na doros, linog, asin sa katapustapusi kalayo. Minsan siring, kan magtaram si Jehova ki Elias, ginibo nia iyan sa “kalmado, hababang tingog.” Tinawan nia sia nin dagdag pang mga gigibohon asin sinabihan sia na igwa pa nin 7,000 na fiel na nagsasamba ki Jehova sa nasyon. (1 Hade 19:​9-​18) Kun, arog ki Elias, kita enkaso panluyahan nin boot huli sa kadaihan nin bunga sa satong ministeryo, kita puedeng humagad ki Jehova nin “kosog na lihis sa ordinaryo”—kosog na puedeng magparigon sa sato na padagos na maghulit kan maogmang bareta na mayo nin ontok.—2 Corinto 4:7.

An Kapangyarihan ni Jehova Naggagarantiya sa Kaotoban kan Saiyang mga Panuga

14. Ano an ihinahayag kan personal na ngaran ni Jehova, asin paano konektado an saiyang kapangyarihan sa saiyang ngaran?

¹⁴ An kapangyarihan ni Jehova konektado man na marhay sa saiyang ngaran asin sa paghaman kan saiyang kabotan. An daing kaagid na ngaran na Jehova, na nangangahulogan “Saiyang Pinapangyayaring Magin,” naghahayag na saiyang pinapangyayari an saiyang sadiri na magin Paraotob nin mga panuga. Daing ano man na bagay o siisay man na makaoolang sa Dios sa pag-otob kan saiyang mga katuyohan, gurano man kaharayong mangyari an tibaad pagheling dian kan mga mapagduda. Arog kan sarong beses na sinabi ni Jesus sa saiyang mga apostol, “sa Dios an gabos na bagay posible.”—Mateo 19:26.

15. Paano ipinagirumdom ki Abraham asin Sara na mayo nin ekstraordinaryong marhay para ki Jehova?

¹⁵ Bilang ilustrasyon, sarong beses nanuga si Jehova ki Abraham asin Sara na saiyang gigibohon na magin sarong dakulang nasyon an saindang mga gikan. Minsan siring, sinda mayo pa giraray nin aki sa laog nin dakol na taon. Pareho sinda gurang nang marhay kan sabihon sa sainda ni Jehova na an panuga maootob na asin si Sara nagngisi. Bilang simbag, an anghel nagsabi: “Igwa daw nin ekstraordinaryong marhay para ki Jehova?” (Genesis 12:1-3; 17:4-8; 18:10-14) Pakalihis nin apat na siglo, kan sa katapustapusi tiponon ni Moises an mga gikan ni Abraham—na ngonyan saro nang dakulang nasyon—sa Kaplanodohan  nin Moab, ipinagirumdom nia sa sainda na inotob nin Dios an saiyang panuga. Si Moises nagsabi: “Ika nagdanay na buhay, huli ta namotan [ni Jehova] an saimong mga apoon kaya ngani nia pinili an saindang banhi na kasunod ninda asin ilinuwas ka sa Egipto sa saiyang pagheling paagi sa saiyang dakulang kapangyarihan, tanganing palayason sa atubangan mo an mga nasyon na mas darakula asin mas makapangyarihan kisa saimo, tanganing ikalaog ka, tanganing itao sa saimo an saindang daga bilang mana siring sa aldaw na ini.”—Deuteronomio 4:37, 38.

16. Taano an mga Saduceo ta napasala sa pagnegar sa pagkabuhay liwat kan mga gadan?

¹⁶ Pakalihis nin dakol na siglo, kinondenar ni Jesus an mga Saduceo, na dai naniniwala sa pagkabuhay liwat. Taano ta habo nindang paniwalaan an panuga nin Dios na saiyang bubuhayon liwat an mga gadan? Sinabihan sinda ni Jesus: “Dai nindo aram an Kasuratan ni an kapangyarihan nin Dios.” (Mateo 22:29) Inaasegurar kita kan Kasuratan na ‘an gabos na nasa mga lolobngan na girumdoman makadadangog kan tingog kan Aki nin tawo asin maruluwas.’ (Juan 5:27-29) Kun aram ta an sinasabi kan Biblia manongod sa pagkabuhay liwat, an satong kompiansa sa kapangyarihan nin Dios makombensir sa sato na an mga gadan bubuhayon liwat. “Totoong hahalonon [nin Dios] an kagadanan sagkod lamang, . . . huli ta si Jehova mismo an nagtaram kaiyan.”—Isaias 25:8.

17. Sa anong aldaw sa ngapit na an pagtitiwala ki Jehova kakaipuhanon sa espesyal na paagi?

¹⁷ Sa harani nang ngapit, maabot an panahon na an balang saro sa sato kaipuhan na magtiwala sa kapangyarihan nin Dios na magligtas sa espesyal na paagi. Si Satanas na Diablo malansar nin pagsalakay sa banwaan nin Dios, na magigin garo baga bakong protektado. (Ezequiel 38:14-​16) Sa panahon na iyan ipaheheling nin Dios an saiyang dakulang kapangyarihan para sa sato, asin an gabos kaipuhan na makaaram na sia si Jehova. (Ezequiel 38:21-​23) Ngonyan na an panahon na pakosogon ta an satong pagtubod asin kompiansa sa Dios na Makakamhan sa gabos tanganing dai kita mag-urong-sulong sa kritikal na panahon na iyan.

18. (a) Anong mga pakinabang an nakukua niato sa paghorophorop sa kapangyarihan ni Jehova? (b) Anong hapot an ipaliliwanag sa minasunod na artikulo?

¹⁸ Daing duda, dakol an dahelan na horophoropon an kapangyarihan ni Jehova. Mantang ineestudyaran ta an saiyang mga gibo, kita mapakumbabang napahihiro na omawon an satong Kaharohalangkaweng Kaglalang asin magpasalamat na saiyang ginagamit an kapangyarihan nia sa siring kadonong asin kamamomoton na paagi. Dai kita noarin man matatakot kun kita nagtitiwala ki Jehova nin mga hukbo. An satong pagtubod sa saiyang mga panuga magigin marigon. Pero girumdomon na kita linalang sono sa ladawan nin Dios. Huli kaini, kita igwa man nin kosog—minsan ngani sa limitadong paagi. Paano niato maaarog an satong Kaglalang sa paagi nin paggamit niato kan satong kosog? Ini ipaliliwanag sa minasunod na artikulo.

[Mga Nota sa Ibaba]

Masisimbag daw Nindo an mga Hapot na Ini?

• Paano pinatototoohan nin paglalang an kapangyarihan ni Jehova?

• Anong mga hukbo an puedeng gamiton ni Jehova tanganing suportaran an saiyang banwaan?

• Ano an nagkapirang pangyayari na ipinaheling ni Jehova an saiyang kapangyarihan?

• Ano an garantiya niato na ootobon ni Jehova an saiyang mga panuga?

[Mga Hapot Para sa Pag-adal]

Mga Ritrato sa pahina 10]

“Tingagan an saindong mga mata asin helinga nindo. Siisay an naglalang kan mga bagay na ini?”

[Credit Line]

Rinetrato ni Malin, © IAC/RGO 1991

[Mga Ritrato sa pahina 13]

An paghorophorop sa mga paheling kan kapangyarihan ni Jehova nagpaparigon kan pagtubod sa saiyang mga panuga