Kun Paano Makatatabang sa Sato si Jesu-Cristo

MAKANGANGALAS an ginibo ni Jesu-Cristo tanganing tabangan an mga tawo kan sia yaon digdi sa daga. Totoong marhay ini kaya pakatapos na isaysay an kadakol na pangyayari sa buhay ni Jesus, an sarong nakaheling mismo nagsabi: “Igwa, sa katunayan, nin dakol pang ibang bagay na ginibo man ni Jesus, na, kun an mga iyan isinurat sa bilog na detalye, paghona ko sana, an kinaban mismo dai magkakaigo na bugtakan kan mga balumbon na isinurat.” (Juan 21:25) Mantang kadakol kan ginibo ni Jesus sa daga, tibaad ihapot niato: ‘Paano sia puedeng magin satong paratabang sa langit? Puede daw kitang makinabang sa mamomoton na pakikidamay ni Jesus ngonyan?’

An simbag nakaoogma asin nakapakokosog na marhay liwat sa boot. An Biblia nagsasabi sa sato na si Cristo naglaog “sa langit mismo, tanganing tumindog sa atubangan nin Dios para sa sato.” (Hebreo 9:24) Ano an ginibo nia para sa sato? Si apostol Pablo nagpapaliwanag: “[Si Cristo] luminaog na dara, bako, bakong an dugo nin mga kanding asin nin mga torilyo, kundi an sadiri niang dugo, nin sararoan sana sa banal na lugar [“sa langit mismo”] asin nakakua nin daing katapusan na kaligtasan para sa sato.”​—Hebreo 9:12; 1 Juan 2:2.

Abaa kaogmang bareta iyan! Imbes na taposon an marahayon na gibo ni Jesus para sa mga tawo, an saiyang pagsakat sa langit nagpangyari na makagibo sia nin orog pa para sa katawohan. Iyan huli ta an Dios, huli sa saiyang dakulang dai na kutana maninigong kabootan, ninombrahan si Jesus na maglingkod bilang “pampublikong paralingkod”​—sarong halangkaw na saserdote​—“sa too kan trono kan Kamahalan sa kalangitan.”​—Hebreo 8:​1, 2.

“Sarong Pampublikong Paralingkod”

Sa langit, kun siring, si Jesus magigin pampublikong paralingkod sa katawohan. An trabaho nia kapareho kan ginibo kan halangkaw na saserdote sa Israel para sa mga nagsasamba sa Dios kaidtong suanoy na mga panahon. Asin ano an gibohon na iyan? Si Pablo nagpapaliwanag: “An lambang halangkaw na saserdote ibinugtak sa pagdolot nin mga balaog asin mga atang; kaya kaipuhan na an saro man na ini [an suminakat nang si Jesu-Cristo] magkaigwa nin ikadolot.”​—Hebreo 8:3.

Si Jesus igwa nin ikadodolot na nakalalabi nanggad kisa idinolot kan suanoy na halangkaw na saserdote. “Kun an dugo nin mga kanding asin nin mga toro” nakatao nin espirituwal na kalinigan sa suanoy na Israel, “gurano pa daw kaorog na an dugo kan Cristo . . . malilinigan an satong mga konsensia sa gadan na mga gibo tangani kitang makatao nin sagradong paglilingkod sa nabubuhay na Dios?”​—Hebreo 9:​13, 14.

Si Jesus marahayon man na pampublikong paralingkod huli ta tinawan sia nin inmortalidad. Sa suanoy na Israel “dakol an kinaipuhan na magin saserdote nin sunod-sunod huli ta inoolang sinda nin kagadanan sa pagpadagos na siring.” Alagad kumusta man si Jesus? Nagsurat si Pablo: “Sia . . . igwa kan saiyang pagkasaserdote na mayo nin siisay man na mga kasalihid. Kaya sia man lubos na makapagliligtas duman sa mga minadolok sa Dios paagi sa saiya, huli ta sia danay na buhay tanganing makimaherak para sa sainda.” (Hebreo 7:​23-25; Roma 6:9) Iyo, igwa kita sa too nin Dios sa langit nin pampublikong paralingkod na ‘danay na  buhay tanganing makimaherak para sa sato.’ Isip-isipa nanggad an kahulogan kaiyan para sa sato ngonyan!

Kan si Jesus yaon digdi sa daga, an mga tawo burunyog na nagduruman sa saiya tanganing humagad nin tabang, asin kun beses harayoon an binaklay ninda tanganing makua an tabang nia. (Mateo 4:​24, 25) Sa langit, si Jesus pasil na madodolokan kan mga tawo sa gabos na nasyon. Sa saiyang marahay na kamugtakan sa langit, sia danay na yaon bilang pampublikong paralingkod.

Anong Klaseng Halangkaw na Saserdote si Jesus?

Sa pagkaladawan ki Jesu-Cristo sa pagkasaysay kan Ebanghelyo dai niato mapagdududahan an saiyang pagkamatinabang asin mamomoton na pakikidamay. Kanigoan an pagkamapagsakripisyo nia! Bako sanang sarong beses na inabala an saiyang pagsosolo kan sia asin an saiyang mga disipulo gusto nang gayong magpahingalo. Imbes na mag-isip na inaagawan sia nin mahalagang marhay na oras nin katoninongan asin katrangkilohan, “sia napahiro nin pagkaherak” sa mga tawo na naghahagad kan saiyang tabang. Dawa kan si Jesus pagal, nagugutom, asin napapaha, ‘maboot na inako nia sinda’ asin andam siang dai nguna kumakan kun makatatabang sia sa sinserong mga parakasala.​—Marcos 6:​31-34; Lucas 9:​11-17; Juan 4:​4-6, 31-​34.

Huling napahiro nin pagkaherak, si Jesus naggibo nin praktikal na mga paagi tanganing panigoan an pisikal, emosyonal, asin espirituwal na mga pangangaipo kan mga tawo. (Mateo 9:​35-​38; Marcos 6:​35-​44) Dugang pa, tinokdoan nia sinda tanganing makanompong nin nagdadanay na kaginhawahan asin karangahan. (Juan 4:​7-​30, 39-​42) Halimbawa, abaa kanakaeenganyar an saiyang personal na imbitasyon: “Madia kamo sa sako, kamo gabos na nagpapagal asin nagagabatan, asin pagiginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakukua kamo nin kaginhawahan para sa saindong kalag.”​—Mateo 11:​28, 29.

Dakulaon an pagkamoot ni Jesus sa mga tawo kaya sa katapustapusi itinao nia an saiyang buhay para sa makasalan na katawohan. (Roma 5:​6-8) Mapadapit digdi si apostol Pablo nangatanosan: “Sia [si Jehova Dios] na minsan an saiya mismong Aki dai ilinikay kundi itinao sia dahel sa sato gabos, tadaw ta dai man sia maboot na magtatao sa sato kan gabos na iba pang bagay kaiba nia? . . . Si Cristo Jesus an saro na nagadan, iyo, mas marahay pa an saro na binuhay hale sa mga gadan, na yaon sa too nin Dios, na nakikimaherak man para sa sato.”​—Roma 8:​32-34.

Sarong Halangkaw na Saserdote na Puedeng Makidamay

Bilang tawo, si Jesus nag-agi nin gutom, paha, kapagalan, labi-labing kamondoan, kolog, asin kagadanan. An tension asin sakit na tinagalan nia inandam sia sa dai nanggad nin kaagid na paagi tanganing maglingkod bilang Halangkaw na Saserdote para sa nagsasakit na katawohan. Si Pablo nagsurat: “[Si Jesus] kinaipuhan na magin kabaing kan saiyang ‘mga tugang’ sa gabos na bagay, tangani na sia magin maheherakon asin fiel na halangkaw na saserdote sa mga bagay na manonongod sa Dios, tanganing makapagdolot nin pampagian nin boot na atang para sa mga kasalan kan banwaan. Huli ta mantang sia mismo nagtios kaidtong binabalo, sia makasosorog sa mga binabalo.”​—Hebreo 2:​17, 18; 13:8.

Ipinaheling ni Jesus na sia kualipikado asin andam na tabangan an mga tawo na makarani sa Dios. Minsan siring, boot sabihon daw kaini na kaipuhan niang kombensiron an sarong maisog asin daing herak na Dios na habong magpatawad? Dai nanggad, ta inaasegurar kita kan Biblia na si “Jehova . . . marahay asin andam na magpatawad.” Iyan nagsasabi man: “Kun ituga niato an satong mga kasalan, sia fiel asin matanos tanganing ipatawad sa sato an satong mga kasalan asin linigan kita sa gabos na kabikoan.” (Salmo 86:5; 1 Juan 1:9) An totoo, an mamomoton na mga tataramon asin gibo ni Jesus nagpapabanaag kan mismong pakikidamay,  pagkaherak, asin pagkamoot kan saiyang Ama.​​—Juan 5:​19; 8:​28; 14:​9, 10.

Paano si Jesus nagtatao nin kaginhawahan sa nagsosolsol na mga parakasala? Paagi sa pagtabang sa sainda na makanompong nin kagayagayahan asin satispaksion sa saindang sinserong mga paghihingoa na paogmahon an Dios. Sa pagsurat sa mga kapwa linahidan na Kristiano, sinumaryo ni Pablo an kamugtakan paagi sa pagsabi: “Kun siring mantang igwa kita nin dakulang halangkaw na saserdote na nakaagi na sa kalangitan, si Jesus na Aki nin Dios, magdanay kita sa satong pagtuga sa saiya. Huli ta an satong halangkaw na saserdote, bakong saro na dai makakapakidamay sa satong mga kaluyahan, kundi saro na nabalo na sa gabos na bagay arog sa sato, alagad dai nin kasalan. Kita, kun siring, dumolok na may katalingkasan sa pagtaram sa trono nin dai na kutana maninigong kabootan, tanganing kita magkamit nin pagkaherak asin makakua nin dai na kutana maninigong kabootan na makatatabang sa igong panahon.”​—Hebreo 4:​14-16.

‘Tabang sa Igong Panahon’

Pero ano an puede tang gibohon kun napapaatubang sa mga problema na sa pagmate ta mas magabat kisa makakaya ta​—grabeng helang, magabaton na pakamate nin kasalan, nakalulunos na pagkadesganar, asin depresyon? Magagamit ta an mismong probisyon na dayaday na sinarigan mismo ni Jesus​—an mahalagang marhay na pribilehio nin pamibi. Halimbawa, kan banggi bago nia itao an saiyang buhay para sa sato, “padagos siang namibi nin odok pa logod; asin an saiyang ganot nagin siring sa mga toro nin dugo na nagdadalahay sagkod sa daga.” (Lucas 22:44) Iyo, aram ni Jesus kun ano an pagmate kun namimibi nin maigoton sa Dios. Sia “nagdolot nin mga pagngayongayo patin nin mga kahagadan sa Saro na makapagliligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot.”​—Hebreo 5:7.

Aram ni Jesus kun gurano kahalaga para sa mga tawo na sinda ‘dangogon na may pabor’ asin mapakosog. (Lucas 22:43) Apuera kaini, sia nanuga: “Kun humagad kamo sa Ama nin ano man iyan itatao nia sa saindo sa ngaran ko. . . . Humagad kamo asin kamo mag-aako, tanganing an saindong kagayagayahan malubos.” (Juan 16:​23, 24) Huli kaini, kita makapagngangayongayo sa Dios na may kompiansa na totogotan nia an saiyang Aki na gamiton an saiyang autoridad asin an halaga kan saiyang pantubos na atang para sa sato.​​—Mateo 28:18.

Makaseseguro kita na sa saiyang langitnon na katongdan, itatao ni Jesus an tamang klase nin tabang sa igong panahon. Halimbawa, kun kita nakagibo nin kasalan na pinagbabasolan ta nin odok sa boot, mararanga kita kan asegurasyon na “igwa kita nin paratabang sa Ama, si Jesu-Cristo, sarong matanos.” (1 Juan 2:​1, 2) An satong Paratabang asin Pararanga sa langit makikimaherak para sa sato tanganing dangogon an satong mga pamibi  sa saiyang ngaran asin na oyon sa Kasuratan.​​—Juan 14:​13, 14; 1 Juan 5:​14, 15.

Pagpaheling nin Apresasyon sa Tabang ni Cristo

An kalabot bako sanang pagngayongayo sa Dios paagi sa saiyang Aki. Paagi sa halaga kan saiyang pantubos na atang, ‘paagi sa pagbakal si Cristo’ garo man sana nagin an “kagsadiri na buminakal” kan rasa nin tawo. (Galacia 3:​13; 4:5; 2 Pedro 2:1) Ikapaheheling ta an satong pasasalamat sa gabos na ginigibo ni Cristo para sa sato paagi sa pagrekonoser na sia an kagsadiri sa sato asin maogmang paghimate sa saiyang imbitasyon: “Kun an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin padagos na sumunod sa sako.” (Lucas 9:23) An ‘pagpainda nin saro sa sadiri’ bako sanang berbal na pagsabi na iba na an kagsadiri sa saiya. Total, si Cristo “nagadan para sa gabos tanganing idtong mga nabubuhay dai na mabuhay para sa sainda man sana, kundi para sa saiya na nagadan para sa sainda.” (2 Corinto 5:​14, 15) Kun siring, an pag-apresyar sa pantubos magkakaigwa nin hararom na epekto sa satong pananaw, mga pasohan, asin estilo nin pamumuhay. An satong daing sagkod na pagkakautang ki “Cristo Jesus, na itinao an saiyang sadiri para sa sato,” maninigo na magmotibar sa sato na makanood nin orog pa manongod sa saiya asin sa saiyang mamomoton na Ama, si Jehova Dios. Maninigo na mawoton man niatong tumalubo sa pagtubod, mamuhay sono sa kapakipakinabang na mga pamantayan nin Dios, asin magin “maigot sa marahay na mga gibo.”​—Tito 2:​13, 14; Juan 17:3.

An Kristianong kongregasyon iyo an paagi na dian kita nag-aako nin napapanahon na espirituwal na pagkakan, pagparigon sa boot, asin giya. (Mateo 24:​45-​47; Hebreo 10:​21-​25) Halimbawa, kun may naghehelang sa espirituwal, puede nindang “apodon . . . an kamagurangan na lalaki [nombradong kamagurangan] kan kongregasyon.” Idinugang ni Santiago an garantiya: “Asin an pamibi nin pagtubod magpapaomay sa may kamatean, asin babangonon sia ni Jehova. Siring man, kun sia nakaginibo nin mga kasalan, iyan ipapatawad sa saiya.”​—Santiago 5:​13-15.

Bilang ilustrasyon: An sarong lalaki na nabibilanggo sa Aprika del Sur nagsurat sa sarong magurang sa kongregasyon na nagpapahayag nin apresasyon  sa “gabos na Saksi ni Jehova na nagsasagibo kan marahay na gibo na pinonan ni Jesu-Cristo sa pagtabang sa mga tawo na magmaigot para sa Kahadean nin Dios.” Dangan nagsurat sia: “Labi-labi an paggayagaya ko na maresibi an saimong surat. An saimong pagmalasakit para sa sakong pagkabalukat sa espirituwal nakatudok na marhay sa boot ko. Lalo akong may dahelan na ponan na himateon an pangapodan ni Jehova Dios na magsolsol. Sa laog nin 27 taon nasingkog asin nalagalag ako sa kadikloman nin kasalan, panloloko, bawal na pagdodorog, inmoral na mga gibo, asin dudosong mga relihion. Pakatapos na ipamidbid ako sa mga Saksi ni Jehova, namatean ko na sa katapustapusi nanompongan ko an dalan​—an tamang dalan! An kaipuhan ko na sana sundan iyan.”

Orog Pang Tabang sa Harani Nang Ngapit

An nagraraot na mga kamugtakan sa kinaban maliwanag na ebidensia na kita nabubuhay na sa kritikal na peryodo nin panahon na susundan kan biglang pag-abot kan “dakulang kahorasaan.” Ngonyan mismo, an sarong dakulang kadaklan hale sa gabos na nasyon, tribo, banwaan, asin tataramon ‘naghuhugas kan saindang gubing asin pinapuputi iyan sa dugo kan Kordero.’ (Kapahayagan 7:​9, 13, 14; 2 Timoteo 3:​1-5) Paagi sa paggibo nin pagtubod sa atang na pantubos ni Jesus, sinda nag-aako nin kapatawadan sa saindang mga kasalan asin natatabangan na magkaigwa nin dayupot na relasyon sa Dios​—sa katunayan, nagigin saiyang mga katood.​—Santiago 2:​23.

An Kordero, si Jesu-Cristo, “papastoran [an mga maliligtas sa dakulang kahorasaan] asin gigiyahan sinda sa mga burabod kan tubig nin buhay. Asin papahidon nin Dios an gabos na luha sa saindang mga mata.” (Kapahayagan 7:17) Sa panahon na iyan biyo nang gigibohon ni Cristo an saiyang mga trabaho bilang Halangkaw na Saserdote. Tatabangan nia an gabos na katood nin Dios na makinabang nin lubos sa “mga burabod kan tubig nin buhay”​—sa espirituwal, pisikal, isip, asin emosyon. An pinonan ni Jesus kan 33 C.E. asin an ipinadagos nia gikan sa langit magpoon kaidto lubos nang hahamanon.

Kun siring, nungkang umontok sa pagpaheling nin hararom na apresasyon sa gabos na ginibo​—asin ginigibo​—nin Dios asin ni Cristo para sa sato. Si apostol Pablo nagsadol: “Danay kamong maggayagaya dian sa Kagurangnan. . . . Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”​—Filipos 4:​4, 6, 7.

Igwa nin mahalagang paagi na ikapaheling an saindong apresasyon ki Jesu-Cristo, an satong Paratabang sa langit. Pagkasolnop kan saldang sa Mierkoles, Abril 19, 2000, an Mga Saksi ni Jehova sa bilog na kinaban magtitiripon tanganing selebraron an Memorial kan kagadanan ni Cristo. (Lucas 22:19) Oportunidad ini na pararomon an saindong apresasyon sa pantubos na atang ni Cristo. Kamo maogmang marhay na iniimbitaran na umatender asin dangogon kun paano kamo makikinabang nin daing sagkod sa makangangalas na areglo nin Dios para sa kaligtasan paagi ki Cristo. Aramon tabi sa mga Saksi ni Jehova sa lokal an eksaktong oras asin lugar kan espesyal na pagtiripon na ini.

[Ritrato sa pahina 7]

Aram ni Jesus kun ano an pagmate kun namimibi nin maigoton sa Dios

[Mga Ritrato sa pahina 8]

Tatabangan kita ni Cristo na mapangganahan an mga problema na mas magabat kisa makakaya ta na kita sana

[Ritrato sa pahina 9]

Tinatabangan kita ni Cristo paagi sa mamomoton na kamagurangan