Mga Hapot Hale sa mga Parabasa

An tolo sa mga Ebanghelyo nagsasaysay kan reklamo manongod sa paglahid nin mamahalon na pahamot ki Jesus. Dakol daw na apostol an nagreklamo, o sa pangenot si Judas idto?

Maheheling ta an pangyayaring ini na isinaysay sa Ebanghelyo ni Mateo, Marcos, asin Juan. Minalataw na si Judas an nangenot sa pagreklamo, na kisuerra nagkapirang apostol kaidto an minaoyon na man sa saiya. Ipinaheheling kan pangyayaring ini kun taano ta makapagpapasalamat kita na yaon sa sato an apat na pagkasaysay kan Ebanghelyo. An isinurat kan lambang parasurat tama, alagad bakong gabos nagtatao nin pararehong mga detalye. Paagi sa pagkomparar sa magkakaagid na mga pagkasaysay, nakukua ta an mas lubos, mas detalyadong pagmansay sa dakol na pangyayari.

An pagkasaysay sa Mateo 26:​6-​13 itinatao an lugar​—an harong ni Simon na daoton, sa Betania​—alagad dai nginaranan an babae na nagpoon na ibubo an ungguento sa payo ni Jesus. Isinurat ni Mateo: “Kan maheling ini an mga disipulo naanggot” asin nagreklamo na an pahamot puedeng ikinapabakal kutana asin an kuarta ikinatao sa mga dukha.

An pagkasaysay ni Marcos iiniba an kadaklan sa mga detalyeng idto. Alagad idinugang nia na pinasa nia an lalagan. An laog kaiyan ungguento na “tunay na nardo,” na puedeng inimportar hale sa India. Kun manongod sa reklamo, si Marcos nagbabareta na “may nagkapira na nagpahayag nin paggurobgutob,” asin “sinda nauyam na marhay sa saiya.” (Marcos 14:​3-9) Kaya an duwang pagkasaysay nagpapaheling na bakong saro sanang apostol an nagreklamo. Pero paano iyan nagpoon?

Si Juan, na nakaheling mismo, idinugang an pertinenteng mga detalye. Nginaranan nia an babae​—si Maria, na tugang ni Marta asin Lazaro. Itinao man ni Juan an detalyeng ini, na puede niatong ibilang na kakomplemento imbes na kasarongat: “Linahidan nia an mga bitis ni Jesus asin pinahidan an saiyang mga bitis kan saiyang bohok.” Kun pagsararoon an mga pagkasaysay, maheheling niato na si Maria siertong ilinahid an pahamot, na pinatunayan ni Juan na “tunay na nardo,” sa payo asin bitis ni Jesus. Si Juan dayupot na marhay ki Jesus asin may tendensiang maggurobgutob sa mga pagdespresyar sa Saiya. Mababasa niato: “Si Judas Iscariote, saro sa saiyang mga disipulo, na madali nang magpasaloib sa saiya, nagsabi: ‘Tadaw ta dai ipinabakal an ungguentong ini nin tolong gatos na denario asin itinao sa mga tawong dukha?’”​—Juan 12:​2-8.

Siempre, si Judas “saro sa saiyang mga disipulo,” alagad mamamatean nindo an gurobgutob ni Juan na an saro na nasa posisyon na ini nagpaplanong pasaloiban si Jesus. An paratradusir na si Dr. C. Howard Matheny nagkomento manongod sa Juan 12:​4: “An present participle [sa Ingles] na ‘being about’ [o, “was about to”] (sa Bicol, “madali nang”) asin an present infinitive [sa Ingles] na ‘to be betraying’ (sa Bicol, “pinasasaloiban”) pareho nagpapahayag nin sunod-sunod o dagos-dagos na aksion. Ipinaheheling kaini na an pagpasaloib ni Judas ki Jesus bakong madali sanang aksion na ginibo na bigla na sana huli ta iyan pinag-isipan asin plinano sa laog nin dakol na aldaw.” Idinugang ni Juan an pakarorop na si Judas nagreklamo “bakong huli ta nagmamakolog sia sa mga dukha, kundi huli ta sia parahabon asin yaon sa saiya an kahon nin kuarta patin kinukua nia an kuarta na ilinalaog dian.”

Sa siring garo baga lohiko na an parahabon na si Judas an nagpoon kan pagreklamo huli ta mas dakol an mahahabon nia kun an mamahalon na pahamot ipabakal asin an kuarta ibugtak sa kahon nin kuarta na dinadara nia. Kan palatawon ni Judas an reklamong ini, an nagkapirang apostol tibaad naggumodgumod bilang pag-oyon sa garo baga balidong punto. Minsan siring, si Judas an pangenot na pundador kan reklamo.