Harani Na “an mga Panahon nin Pagbabalik”!

Kan madali nang sumakat si Jesus sa langit, an nagkapira sa saiyang fiel na mga disipulo hinapot sia: “Kagurangnan, ano ibabalik mo ngonyan an kahadean sa Israel?” An simbag ni Jesus nangahulogan na maagi an panahon bago dumatong an Kahadean. Durante kan panahon na iyan, an saiyang mga parasunod magkakaigwa nin dakol na gigibohon. Sinda magigin mga saksi ni Jesus “sa Jerusalem asin sa bilog na Judea asin Samaria patin sagkod sa kaporoporohi kan daga.”—Gibo 1:6-8.

AN ASIGNASYON na iyan dai magigibo nin pira sanang aldaw, semana, o bulan. Minsan siring, mayo lamang nin pag-alangan na pinonan kan mga disipulo na maghulit. Alagad dai nawara an saindang interes mapadapit sa pagbabalik. Sa sarong dakulang kadaklan na tiripon sa Jerusalem, si apostol Pedro nagtaram manongod kaiyan, na sinasabi: “Magsorolsol kamo . . . asin magbakle tanganing an saindong mga kasalan mapara, tanganing dumatong an mga panahon nin kaginhawahan hale sa persona ni Jehova asin tanganing isugo nia an Cristo na ninombrahan para sa saindo, si Jesus, na maninigo na papagdanayon nanggad kan langit dian sa saiya sagkod sa mga panahon nin pagbabalik kan gabos na bagay na isinabi nin Dios paagi sa ngoso kan saiyang banal na mga propeta kan suanoy na panahon.”—Gibo 3:19-21.

Iiintrodusir kan “mga panahon [na ini] nin pagbabalik” an “mga panahon nin kaginhawahan” hale ki Jehova. An ihinulang pagbabalik madatong sa duwang kabtang. Enot, magkakaigwa nin nakagiginhawang espirituwal na pagbabalik, na ngonyan nagpopoon na. Ikaduwa, ini susundan kan pag-establisar nin sarong pisikal na paraiso digdi sa daga.

Nagpopoon Na an Panahon nin Pagbabalik

Siring kan sinabi ni apostol Pedro sa kadaklan na idto sa Jerusalem, ‘si Jesus pinapagdanay kan langit dian sa saiya.’ Ini an kamugtakan sagkod kan 1914, kan akoon ni Jesus an saiyang makahadeng kapangyarihan asin magpoon na mamahala bilang Hade na ninombrahan nin Dios. Kan panahon na idto, ihinula ni Pedro, ‘isusugo’ ni Jehova an saiyang Aki sa sentido na totogotan Nia si Jesus na gibohon an saiyang papel bilang an pangenot na personahe sa mga katuyohan nin Dios. An pangyayari ilinaladawan kan Biblia sa simbolikong pananaram: “Asin [an langitnon na organisasyon nin Dios] nangaki nin sarong aking lalaki, sarong lalaki, [an Kahadean nin Dios sa kamot ni Jesu-Cristo] na magpapastor sa gabos na nasyon paagi sa sogkod na batbat.”—Kapahayagan 12:5.

Alagad an mga nasyon mayo nin intension na magpasakop sa pamamahala ni Cristo. Sa katunayan, sinalakay ninda an saiyang maimbod na mga sakop digdi sa daga, na midbid ngonyan na Mga Saksi ni Jehova. Arog kan mga naenot sa sainda na mga apostol, an mga Saksi daing pag-alangan na inako an “gibohon nin pagpatotoo ki Jesus.” (Kapahayagan 12:17) Biglang luminaad an pagtumang sa gibohon kan sinserong mga Kristianong ini sa sunod-sunod na nasyon. Kan 1918, an responsableng mga miembro kan mga tawohan sa opisina prinsipal kan Watch Tower Society sa Brooklyn, Nueva York, dinara sa korte huli sa falsong mga sahot asin daing katanosan na sinentensiahan nin  halawig na pagkabilanggo. Sa laog nin halipot na panahon luminuwas na garo masusudya an gibohon sa presenteng aldaw na pagpatotoo “sagkod sa kaporoporohi kan daga.”—Kapahayagan 11:7-10.

Minsan siring, kan 1919, an nabibilanggong mga miembro kan mga tawohan sa opisina prinsipal pinaluwas asin kan huri napatunayan na daing sala sa gabos na falsong sahot. Mayo sindang sinayang na panahon na ponan liwat an gibohon na espirituwal na pagbabalik. Poon kaidto, an banwaan ni Jehova nagkakamit nin espirituwal na prosperidad na dai pa nangyari kaidto.

Ginibo an mahiwas na kampanya na tokdoan an mga tawo kan gabos na nasyon na otobon an mga bagay na ipinagboot ni Cristo na gibohon kan saiyang mga parasunod. (Mateo 28:20) Kanigoan kanakagiginhawa kaidto na maheling an nagkapira na dati nagpapaheling nin mga ugale na arog sa hayop na binago an saindang pananaw! Hinuba ninda an daan na personalidad, na nagpapaluwas nin mga ugale na arog kan “kaanggotan,” “mapanlibak na pagtaram,” asin “malaswang orolay,” asin isinolog an bagong personalidad, “na binabago paagi sa tamang kaaraman segun sa ladawan [nin Dios] na naglalang kaiyan.” Sa espirituwal na sentido, an mga tataramon ni propeta Isaias naootob na maski ngonyan: “An lobo [saro na dati nagpapaheling nin ugaleng arog sa lobo] totoong mag-eerok sa kadikit na panahon na kasaro kan kordero [saro na nagpapaheling nin mahoyong ugale], asin an leopardo maghihigdang kadorog kan ogbon na kanding, asin an ogbon na baka saka an may bunday na ogbon na leon saka an hayop na basog nag-iiriba.”—Colosas 3:8-10; Isaias 11:6, 9.

Harani Na an Dugang Pang Pagbabalik

Apuera sa pagbabalik na nagbunga nin sarong espirituwal na paraiso ngonyan, marikas nang nagdadangadang an panahon na an satong planeta magigin pisikal na paraiso. An sarong sadit na parte kan daga paraiso kan ibugtak ni Jehova an satong mga apoon, si Adan asin Eva, sa tatamnan nin Eden. (Genesis 1:29-31) Iyan an dahelan na nasasabi ta na an Paraiso ibabalik. Pero bago iyan mangyari, dapat na haleon sa daga an falsong relihion na naglalapastangan sa Dios. An mga elementong politikal kan kinaban na ini an magibo kaini. (Kapahayagan17:15-18) Dangan, an mga elementong politikal asin komersial, kaiba an mga parasuportar kaiyan, lalaglagon. Sa katapustapusi, an ultimo sa mga kalaban nin Dios—si Satanas na Diablo asin an saiyang mga demonyo—ibibilanggo sa laog nin sangribong taon—an lawig kan proyektong pagbabalik. Durante kan panahon na iyan, “an kaawagan asin an alang na lugar magpapakagayagaya, saka an desierto maggagayagaya asin mamumurak arog kan azafran.” (Isaias 35:1) An bilog na daga mawawaran na nin karibokan. (Isaias 14:7) Pati an minilyon na nagadan bubuhayon liwat digdi sa daga. An gabos makaeeksperyensia kan nakaoomay na mga pakinabang kan pantubos na atang. (Kapahayagan 20:12-15; 22:1, 2) Mayo na nin buta, bungog, o pilay na mga tawo sa daga. “Mayo nin nag-eerok na masabi: ‘Naghehelang ako.’” (Isaias 33:24) Pagkatapos tolos kan Sangribong Taon na Paghade ni Cristo, an Diablo asin an mga demonyo nia paluluwason sa halipot na panahon asin maheheling ninda kun paano naotob sagkod sa puntong iyan an katuyohan nin Dios para sa daga. Sa katapustapusi, sinda lalaglagon sagkod lamang.—Kapahayagan 20:1-3.

Kun an daga makaabot na sa katapusan kan sangribong taon nin pagbabalik, “an lambang bagay na naghahangos” mag-oomaw ki Jehova, asin gigibohon ninda iyan sa bilog na panahon na daing sagkod. (Salmo 150:6) Magigin kabilang daw kamo sa sainda? Puede.