Maninigo daw Kamong Mag-imbestigar sa Ibang Relihion?

“NAKAATENDER na ako sa Kristianong mga pagtiripon sa laog nin haros sangtaon, asin naogma akong sabihon sa iba an manongod sa Kahadean nin Dios,” an sabi ni Miguel, na ngonyan saro na sa Mga Saksi ni Jehova sa Amerika del Sur. “Dangan nagpoon akong maghinanyog sa relihiosong mga programa sa radyo asin magdalan sa mga parahulit nin relihion sa telebisyon. Naghona ako na an siring na mga programa makatatabang sa sako na orog na masabotan an mga tawo na iba an relihion. Nasabotan ko na an saindang katokdoan bakong sono sa Biblia, alagad gusto kong mag-usisa.”

Sa iyo man sanang nasyon, si Jorge maigot na nagtotokdo sa iba manongod sa tunay na pagsamba. Pero, may panahon na sia nagpoon man na maghinanyog sa relihiosong mga programa sa radyo asin telebisyon. “Kaipuhan nindong maaraman kun ano an iniisip kan iba,” an pirme niang sinasabi kaidto. Kan hapoton manongod sa potensial na mga peligro nin siring na pagkalantad sa falsong katokdoan, an isinisimbag nia: “Mayo nin ano man na makararaot sa pagtubod nin saro na nakaaaram kan katotoohan sa Biblia.” An mga eksperyensiang ini nagpapalataw nin mahalagang hapot, Madonong daw na maghinanyog sa paniniwala nin iba?

Pagmidbid sa Tunay na Kristianismo

Pagkagadan kan mga apostol, an tunay na pagsamba naatian kan nag-ooswag na dakol na porma nin palsipikadong Kristianismo. Naheling ini antes pa, ibinuyagyag ni Jesus an sarong paagi tanganing ikalaen an palsipikadong klaseng ini nin Kristianismo sa tunay na Kristianismo. Enot, sia nagpatanid: “Magmaan kamo sa falsong mga propeta na minadolok sa saindo sa gubing nin karnero, alagad sa laog sinda naninibang mga lobo.” Dangan idinugang nia: “Paagi sa saindang mga bunga mamimidbid nindo sinda.” (Mateo 7:15-23) Inootob kan tunay na mga parasunod ni Jesus an saiyang itinokdo, asin pasil sindang mamidbid paagi sa saindang marahay na mga bunga. Arog kan ginibo ni Jesus mismo, sinosongko ninda an mga tawo tanganing ipaliwanag an  Kahadean nin Dios basado sa Kasuratan. Sinusunod an halimbawa ni Jesus, sinda siblag sa politika kan kinaban asin mga kontrobersia sosyal. Inaako ninda an Biblia bilang Tataramon nin Dios asin iginagalang iyan bilang an katotoohan. Ipinamimidbid ninda an ngaran kan Dios. Asin mantang pinagmamaigotan nindang otobon an pagkamoot na itinotokdo nin Dios, dai sinda nakikikabtang sa mga guerra. Imbes, tinatratar ninda an lambang saro bilang tugang.—Lucas 4:43; 10:1-9; Juan 13:34, 35; 17:16, 17, 26.

Segun sa Kasuratan, posibleng ‘maheling an kalaenan kan matanos asin maraot, kan naglilingkod sa Dios asin kan dai naglingkod sa saiya.’ (Malaquias 3:18) An tunay na mga parasamba ngonyan nagkakasararo sa isip asin gibo, arog kan mga Kristiano kan enot na siglo. (Efeso 4:4-6) Oras na mamidbid nindo an grupong iyan nin tunay na mga Kristiano, taano ta maninigo pa kamong mag-usisa sa mga paniniwala nin iba?

Magmaan sa Falsong mga Paratokdo

Rinerekonoser kan Biblia na dawa pakatapos na manodan an katotoohan sa Biblia, may peligro na maatian sa espirituwal kan falsong katokdoan. Si apostol Pablo nagpatanid: “Mag-ingat kamo: tibaad may saro na makadara sa saindo bilang saiyang biktima paagi sa pilosopiya asin basang na daya segun sa tradisyon nin mga tawo, segun sa enot na mga katokdoan kan kinaban asin bakong segun ki Cristo.” (Colosas 2:8) Kanigoan kaklarong paglaladawan kan tekstong ini! Siring sa mga hayop na nagmamawot na lalayon kamo asin sibaon kamo, an falsong mga paratokdo puedeng magin tunay na peligro.

Totoo, inobserbaran ni Pablo an paniniwala nin iba. Sarong beses pinonan nia an sarong pahayag paagi sa pagsabi: “Mga lalaki nin Atenas, naririsa ko na sa gabos na bagay garo kamo orog na natatakot sa mga dios kisa iba. Halimbawa, sa paglakaw ko asin maingat na pagmamasid sa mga sinasamba nindo nanompongan ko man an sarong altar na nasusuratan nin ‘Sa Dios na Dai Midbid.’” (Gibo 17:22, 23) Minsan siring, dai regular na pinano ni Pablo an saiyang isip kan mga pilosopiya kan Griegong mga orador.

Sarong bagay an impormaran nindo an saindong sadiri manongod sa mga ginikanan asin paniniwala kan falsong mga relihion alagad iba nang orolay an magpanigo sa mga iyan. * Ninombrahan ni Jehova “an fiel asin may diskresion na oripon” na magtao nin pagtotokdo na basado sa saiyang Tataramon. (Mateo 4:4; 24:45) Si Pablo mismo nagsurat: “Dai kamo puedeng makikakan sa ‘lamesa ni Jehova’ asin sa lamesa nin mga demonyo. O ‘pinapag-imon daw niato si Jehova’?”—1 Corinto 10:20-22.

May nagkapirang falsong paratokdo na kaidto tunay na mga Kristiano, alagad may panahon na binayaan ninda an katotoohan apabor sa sala. (Judas 4, 11) Dai ta ini maninigong ipagngalas. Pakatapos na magtaram dapit sa “fiel asin may diskresion na oripon” na nagrerepresentar sa grupo nin linahidan na mga Kristiano, si Jesus nagtaram manongod sa “maraot na oripon,” sarong grupo na nagrereklamo, “nag-aatraso an sakuyang kagurangnan,” asin nagpoon na bugbogon an mga kapwa oripon kaiyan. (Mateo 24:48, 49) Sa parate, an mga indibiduwal na ini asin an saindang mga parasunod mayo nin malinaw na katokdoan na sadiri ninda; sinda interesado sana sa pagraot kan pagtubod nin iba. May labot sa sainda, si apostol Juan nagsurat: “Kun may siisay man na magdolok sa saindo asin dai nagdadara kan katokdoan na ini, nungka na padagoson sia sa saindong harong o taratarahon sia.”—2 Juan 10; 2 Corinto 11:3, 4, 13-15.

An sinserong mga tawo na naghahanap nin katotoohan marahay na maingat na pensaron an saindang nadadangog sa laen-laen na relihion. Pag-abot nin panahon, bebendisyonan nin Dios an mga indibiduwal na sadiosan an puso na naghahanap kan katotoohan. An Biblia nagsasabi manongod sa diosnon na kadonongan: “Kun ika padagos na maghahanap kaiyan siring baga sa pirak, asin siring baga sa natatagong kayamanan ika padagos na magsusungkat kaiyan, sa siring . . . makukua mo an mismong kaaraman nin Dios.” (Talinhaga 2:4, 5) Huling nanompongan na an kaaraman na ini nin Dios paagi sa Biblia asin sa Kristianong kongregasyon asin huling naheling na kun paano binebendisyonan ni Jehova an mga ginigiyahan kan kaaraman na iyan, an tunay na mga Kristiano dai nagpapadagos na maghinanyog sa falsong relihiosong katokdoan.—2 Timoteo 3:14.

[Nota sa Ibaba]