Sairisay an Ministro nin Dios Ngonyan?

“An samong pagigin biyong kualipikado naghahale sa Dios, na talagang nagpagin biyong kualipikado sa samo na magin mga ministro nin sarong bagong tipan.”—2 CORINTO 3:5, 6.

1, 2. Ano an paninimbagan kan gabos na Kristiano kan enot na siglo, alagad paano nabago an mga bagay?

KAN enot na siglo kan satong Komun na Kapanahonan, an gabos na Kristiano parareho may mahalagang paninimbagan—an obligasyon na maghulit kan maogmang bareta. Sinda gabos linahidan asin ministro kan bagong tipan. An nagkapira may dagdag na mga paninimbagan, arog baga kan pagtotokdo sa kongregasyon. (1 Corinto 12:27-29; Efeso 4:11) An mga magurang may magagabat na obligasyon sa laog kan pamilya. (Colosas 3:18-21) Alagad an gabos nakikabtang sa pundamental asin mahalagang marhay na gibohon na paghuhulit. Sa orihinal na Griego kan Kristianong Kasuratan, an paninimbagan na ini sarong di·a·ko·niʹa—sarong paglilingkod, o ministeryo.—Colosas 4:17.

² Sa pag-agi nin panahon, nabago an mga bagay. May naglataw na grupo, na inapod na klero, na irineserba para sa sainda man sana an pribilehiong maghulit. (Gibo 20:30) An klero sadit na minoriya kan mga nag-aapod sa saindang sadiri na Kristiano. An dakulang mayoriya inapod na lego. Minsan ngani tinokdoan an lego na sinda may nagkapirang obligasyon, pati an pagtao nin kontribusyon para sa gastos sa klero, an kadaklan nagin na sanang daing hiro-hiro na mga naghihinanyog kun dapit sa paghuhulit.

3, 4. (a) Paano nagigin ministro an mga indibiduwal sa Kakristianohan? (b) Siisay an ibinibilang na ministro sa Kakristianohan, asin taano ta iba man sa Mga Saksi ni Jehova?

³ An klero naghihingako na mga ministro (hale sa  minister, Latin na traduksion kan di·aʹko·nos, “lingkod”). * Para digdi, naggagradwar sinda sa mga kolehio o seminaryo asin inoordenan. Sinasabi kan The International Standard Bible Encyclopedia: “An ‘ordenan’ asin ‘ordenasyon’ sa ordinaryong kamugtakan nanonongod sa espesyal na posisyon na itinatao sa mga ministro o padi paagi sa mga seremonya na may opisyal na permiso, na may asosyadong pagdodoon sa autoridad na ibalangibog an Tataramon o magtao nin mga sakramento, o gibohon iyan pareho.” Siisay an nag-oorden sa mga ministro? Sinasabi kan The New Encyclopædia Britannica: “Sa mga iglesia na pinapagdanay an historikong obispado, an ministrong nag-oorden pirmeng sarong obispo. Sa mga iglesiang Presbiteriano, an ordenasyon itinatao nin mga ministro kan presbiteryo.”

⁴ Huli kaini, sa mga iglesia nin Kakristianohan, nalimitaran na marhay an pribilehio nin pagigin ministro. Pero, bakong arog kaini sa Mga Saksi ni Jehova. Taano ta bako? Huli ta bako man na arog kaiyan sa Kristianong kongregasyon kan enot na siglo.

Sairisay Talaga an mga Ministro nin Dios?

5. Segun sa Biblia, sairisay an kaiba sa mga naglilingkod bilang ministro?

⁵ Segun sa Biblia, an gabos na nagsasamba ki Jehova—langitnon asin daganon—ministro. An mga anghel naglingkod (sa Ingles, ministered) ki Jesus. (Mateo 4:11; 26:53; Lucas 22:43) An mga anghel ‘naglilingkod [sa Ingles, minister] man sa mga magmamana kan kaligtasan.’ (Hebreo 1:14; Mateo 18:10) Si Jesus sarong ministro. Sabi nia: “An Aki nin tawo nagdigdi, bakong tanganing paglingkodan [sa Ingles, ministered to], kundi tanganing maglingkod [sa Ingles, to minister].” (Mateo 20:28; Roma 15:8) Kun siring, mantang an mga parasunod ni Jesus dapat na ‘sunodon nin estrikto an saiyang mga lakad,’ bakong makangangalas na sinda man dapat na magin mga ministro.—1 Pedro 2:21.

6. Paano ipinarisa ni Jesus na an saiyang mga disipulo maninigo na magin mga ministro?

⁶ Dai nahaloy bago sia sumakat sa langit, sinabi ni Jesus sa saiyang mga disipulo: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) An mga disipulo ni Jesus dapat na magin mga paragibo nin disipulo—ministro. An gigibohon nindang bagong mga disipulo makakanood na otobon an gabos na ipinagboot ni Jesus, pati an pagboot na paduman asin gumibo nin mga disipulo. Lalaki man o babae, nasa edad na o aki, an tunay na disipulo ni Jesu-Cristo magigin sarong ministro.—Joel 2:28, 29.

7, 8. (a) Anong mga teksto an nagpapaheling na an gabos na tunay na Kristiano ministro? (b) Anong mga hapot an pinalalataw manongod sa ordenasyon?

⁷ Kaoyon digdi, kan aldaw nin Pentecostes 33 C.E., an gabos na disipulo ni Jesus na presente, lalaki asin babae, nakiiba sa pagpahayag kan “makangangalas na mga bagay nin Dios.” (Gibo 2:1-11) Dugang pa, isinurat ni apostol Pablo: “Paagi sa puso an saro naggigibo nin pagtubod para sa katanosan, alagad ta paagi sa ngoso na an saro nagpapahayag sa publiko para sa kaligtasan.” (Roma 10:10) Sinabi ni Pablo an mga tataramon na idto, bakong sa sarong limitadong grupong klero, kundi “sa gabos na nasa Roma bilang mga namomotan na marhay nin Dios.” (Roma 1:1, 7) Kaagid kaiyan, an gabos na ‘banal sa Efeso asin mga fiel na kasaro ni Cristo Jesus’ dapat na an “bitis nasasapinan kan kasangkapan kan maogmang bareta nin katoninongan.” (Efeso 1:1; 6:15) Asin an gabos na nakadangog kan surat para sa mga Hebreo dapat na ‘mangapot nin higot sa pagpapahayag sa publiko kan saindang paglaom na daing pag-urong-sulong.’—Hebreo 10:23.

 ⁸ Pero, noarin nagigin ministro an saro? Sa ibang pagtaram, noarin sia inoordenan? Asin siisay an nag-oorden sa saiya?

Ordenasyon Bilang Ministro—Noarin?

9. Kasuarin inordenan si Jesus, asin niisay?

⁹ Kun dapit sa kun noarin inoordenan asin kun siisay an nag-oorden sa saro, estudyare an halimbawa ni Jesu-Cristo. Mayo sia nin sertipiko nin ordenasyon o titulo hale sa sarong seminaryo tanganing magpatunay na sia ministro, asin dai sia inordenan nin siisay man na tawo. Kun siring, taano ta masasabi niato na sia ministro? Huli ta an ipinasabong na mga tataramon ni Isaias naotob sa saiya: “An espiritu ni Jehova yaon sa sako, huli ta linahidan nia ako na magpahayag kan maogmang bareta.” (Lucas 4:17-19; Isaias 61:1) Sinisierto kan mga tataramon na iyan na si Jesus isinugo na magpahayag kan maogmang bareta. Niisay? Mantang an espiritu ni Jehova an naglahid sa saiya para sa gibohon na iyan, malinaw na an nag-orden ki Jesus iyo si Jehova Dios. Kasuarin ini nangyari? An espiritu ni Jehova talagang huminilig ki Jesus kan sia bautismohan. (Lucas 3:21, 22) Kun siring, sia inordenan sa panahon kan saiyang bautismo.

10. Paagi kiisay na an sarong ministrong Kristiano nagigin “biyong kualipikado”?

¹⁰ Kumusta man an mga parasunod ni Jesus kan enot na siglo? An saindang posisyon bilang mga ministro gikan man ki Jehova. Sinabi ni Pablo: “An samong pagigin biyong kualipikado naghahale sa Dios, na talagang nagpagin biyong kualipikado sa samo na magin mga ministro nin sarong bagong tipan.” (2 Corinto 3:5, 6) Paano pinagigin kualipikado ni Jehova an mga nagsasamba sa saiya na magin mga ministro? Estudyare an halimbawa ni Timoteo, na inapod ni Pablo na “ministro nin Dios sa maogmang bareta dapit kan Cristo.”—1 Tesalonica 3:2.

11, 12. Paano nag-oswag si Timoteo pasiring sa pagigin ministro?

¹¹ An minasunod na mga tataramon para ki Timoteo nakatatabang sa sato na masabotan kun paano sia nagin ministro: “Minsan siring, ika magpadagos sa mga bagay na saimong nanodan asin nakombensir na paniwalaan, mantang aram mo kun kiisay mo iyan nanodan asin na poon sa pagkaomboy naaraman mo na an banal na mga kasuratan, na nakakapagpadonong sa saimo para sa kaligtasan paagi sa pagtubod mapadapit ki Cristo Jesus.” (2 Timoteo 3:14, 15) An pundasyon kan pagtubod ni Timoteo, na mapahiro sa saiya na gumibo nin pagpapahayag sa publiko, iyo an kaaraman sa Kasuratan. An kinaipuhan sana daw digdi personal na pagbasa? Bako. Kinaipuhan ni Timoteo an tabang tanganing magkamit nin tamang kaaraman asin espirituwal na pakasabot sa saiyang nabasa. (Colosas 1:9) Sa siring, si Timoteo ‘nakombensir na maniwala.’ Mantang naaraman nia an Kasuratan “poon sa  pagkaomboy,” an enot na mga paratokdo nia sierto na an saiyang ina asin lola, ta an saiyang ama minalataw na daing pagtubod.—2 Timoteo 1:5.

¹² Minsan siring, labi pa dian an kalabot sa pagigin ministro ni Timoteo. Sarong bagay, napakosog an saiyang pagtubod nin pakikiasosyar sa mga Kristiano sa kaharaning mga kongregasyon. Paano niato iyan naaraman? Huli ta kan enot na makamidbid ni Pablo si Timoteo, an hoben na lalaking ini ‘marahay an patotoo kan mga tugang sa Listra asin Iconio.’ (Gibo 16:2) Saro pa, kan mga aldaw na idto an nagkapirang tugang nagsusurat sa mga kongregasyon tangani na pakosogon sinda. Asin sinosongko sinda nin mga paraataman tangani na parigonon sinda. An siring na mga probisyon nakatabang sa mga Kristiano na arog ni Timoteo na umoswag sa espirituwal.—Gibo 15:22-32; 1 Pedro 1:1.

13. Kasuarin inordenan na ministro si Timoteo, asin taano ta sasabihon nindo na dai natapos duman an saiyang espirituwal na pag-oswag?

¹³ Huli sa pagboot ni Jesus na nasusurat sa Mateo 28:19, 20, masisierto niato na uminabot an panahon na an pagtubod ni Timoteo nagpahiro sa saiya na arogon si Jesus asin magpabautismo. (Mateo 3:15-17; Hebreo 10:5-9) Ini simbolo kan bilog na kalag na pagdusay ni Timoteo sa Dios. Sa panahon kan saiyang bautismo si Timoteo nagin ministro. Poon kaidto, an saiyang buhay, an saiyang kosog, asin an gabos na sadiri nia rogaring na nin Dios. Ini mahalagang kabtang kan saiyang pagsamba, “sarong sagradong paglilingkod.” Minsan siring, si Timoteo dai nakontento na sana sa onra niang idto. Sia nagpadagos na magtalubo sa espirituwal, na nagin maygurang na ministrong Kristiano. Ini nangyari huli sa dayupot na pakikiasosyar ni Timoteo sa maygurang na mga Kristiano na arog ni Pablo, sa saiyang personal na pag-adal, asin sa saiyang maigot na paghuhulit.—1 Timoteo 4:14; 2 Timoteo 2:2; Hebreo 6:1.

14. Ngonyan, paano an saro na “may tamang tendensia sa buhay na daing katapusan” nag-ooswag pasiring sa pagigin ministro?

¹⁴ Ngonyan, kaagid man dian an ordenasyon para sa Kristianong ministeryo. An saro na “may tamang tendensia sa buhay na daing katapusan” tinatabangan na makanood manongod sa Dios asin sa saiyang mga katuyohan paagi sa sarong pag-adal sa Biblia. (Gibo 13:48) An tawo nakakanood na iaplikar sa saiyang buhay an mga prinsipyo sa Biblia asin mamibi sa Dios sa makahulogan na paagi. (Salmo 1:1-3; Talinhaga 2:1-9; 1 Tesalonica 5:17, 18) Nakikiasosyar sia sa ibang may pagtubod asin inaaprobetsaran nia an mga probisyon saka areglo na ginibo kan “fiel asin may diskresion na oripon.” (Mateo 24:45-47; Talinhaga 13:20; Hebreo 10:23-25) Sa siring, sia nag-ooswag sa aregladong proseso nin edukasyon.

15. Ano an nangyayari kun an saro mabautismohan? (Helingon man an nota sa ibaba.)

¹⁵ Pag-abot nin panahon, an estudyante sa Biblia, huling nakapatalubo na nin pagkamoot ki Jehova Dios asin makosog na pagtubod sa atang na pantubos, boot nang idusay nin lubos an saiyang sadiri sa saiyang langitnon na Ama. (Juan 14:1) Ginigibo nia an pagdusay na iyan sa personal na pamibi dangan nagpapabautismo sia bilang hayag sa gabos na simbolo kan ginibong iyan sa pribado. An bautismo nia iyo an seremonya nin ordenasyon nia ta iyan an panahon na sia minimidbid bilang biyong nagdusay na lingkod, sarong di·aʹko·nos, nin Dios. Sia dapat na magdanay na siblag sa kinaban. (Juan 17:16; Santiago 4:4) Saiyang iprinesentar an bilog niang sadiri na “buhay na atang, banal, inaako nin Dios” na mayo  nin pagduda o kondisyon. (Roma 12:1) * Sia ministro nin Dios, na inaarog si Cristo.

Ano an Kristianong Ministeryo?

16. Ano an nagkapira sa paninimbagan ni Timoteo bilang sarong ministro?

¹⁶ Ano an kaiba sa ministeryo ni Timoteo? Sia may espesyal na mga katongdan bilang kaiba ni Pablo sa pagbiahe. Asin kan sia magin magurang sa kongregasyon, si Timoteo naghigos sa pagtotokdo saka pagpakosog sa mga kapwa nia Kristiano. Alagad an prinsipal na kabtang kan saiyang ministeryo, arog ni Jesus asin ni Pablo, iyo an paghuhulit kan maogmang bareta asin paggibo nin mga disipulo. (Mateo 4:23; 1 Corinto 3:5) Sinabihan ni Pablo si Timoteo: “Pero ika, papagdanayon mo an toltol na pag-iisip sa gabos na bagay, tioson mo an karatan, gibohon mo an gibohon nin sarong paraebanghelyo, lubos mong otobon an saimong ministeryo.”—2 Timoteo 4:5.

17, 18. (a) Anong ministeryo an ginigibo nin mga Kristiano? (b) Gurano kahalaga an paghuhulit para sa sarong ministrong Kristiano?

¹⁷ Arog man kaiyan an mga ministrong Kristiano ngonyan. Sinda nakikakabtang sa pampublikong ministeryo, sa gibong pag-ebanghelyo, na inaapodan an atension nin iba sa kaligtasan basado sa atang ni Jesus asin tinotokdoan an mga mahoyo na mag-apod sa ngaran ni Jehova. (Gibo 2:21; 4:10-12; Roma 10:13) Pinatutunayan ninda hale sa Biblia na an Kahadean iyo an solamenteng paglaom para sa nagdudusang katawohan asin ipinaliliwanag na dawa ngonyan mas marahay an kamugtakan nin mga bagay kun kita namumuhay sono sa diosnon na mga prinsipyo. (Salmo 15:1-5; Marcos 13:10) Alagad an ministrong Kristiano dai naghuhulit nin ebanghelyo para sa reporma sosyal. Imbes, sia nagtotokdo na ‘an diosnon na debosyon may panuga sa buhay ngonyan asin sa madatong.’—1 Timoteo 4:8.

¹⁸ Totoo, an kadaklan na ministro may dagdag pang mga paagi na maglingkod, na tibaad laen-laen sa kada Kristiano. An dakol may mga obligasyon sa pamilya. (Efeso 5:21–6:4) An mga magurang sa kongregasyon asin ministeryal na mga lingkod may mga katongdan sa kongregasyon. (1 Timoteo 3:1, 12, 13; Tito 1:5; Hebreo 13:7) An dakol na Kristiano nagtatabang sa pagtogdok nin mga Kingdom Hall. An nagkapira igwa kan marahayon na pribilehio na magtrabaho bilang mga boluntaryo sa saro sa mga erokan na Bethel kan Watch Tower Society. Minsan siring, an gabos na ministrong Kristiano nakikakabtang sa paghuhulit kan maogmang bareta. Mayo nin eksepsion. An pakikikabtang sa gibohon na ini iyo an nagpapamidbid sa publiko na an saro tunay na ministrong Kristiano.

An Aktitud nin Sarong Ministrong Kristiano

19, 20. Anong aktitud an dapat na kultibaron nin mga ministrong Kristiano?

¹⁹ An kadaklan na ministro kan Kakristianohan nag-aasang tawan nin espesyal na paggalang, asin naggagamit sinda nin mga titulo na arog baga kan “reberendo” asin “padre.” Minsan siring, aram nin sarong ministrong Kristiano na si Jehova sana an maninigong tawan nin reberensia. (1 Timoteo 2:9, 10) Mayo nin ministrong Kristiano na naghahagad nin siring na halangkawon na paggalang o nagmamawot nin espesyal na mga titulo. (Mateo 23:8-12) Aram nia na an pundamental na kahulogan nin di·a·ko·niʹa “paglilingkod.” An berbo na asosyado dian kun beses ginagamit sa Biblia mapadapit sa personal na mga serbisyo, arog baga nin pagigin serbidor. (Lucas 4:39; 17:8; Juan 2:5) Dawa ngani mas may dignidad an paggamit dian may koneksion sa ministeryong Kristiano, an sarong di·aʹko·nos saro pa man giraray na lingkod.

²⁰ Kun siring, mayo nin ministrong Kristiano na may dahelan na makamate nin sobrang pagtao nin importansia sa sadiri. An tunay na mga ministrong Kristiano—dawa an may mga espesyal na paninimbagan sa kongregasyon—mapakumbabang mga oripon. Sinabi ni Jesus: “An siisay man na boot na magin dakula sa saindo dapat na iyo an mani paralingkod [sa Ingles, minister] sa saindo, asin an siisay man na boot mangenot sa saindo dapat na iyo an mani oripon nindo.” (Mateo 20:26, 27) Kan ipinaheheling sa saiyang mga disipulo an tamang aktitud na dapat kultibaron, hinanawan ni Jesus an saindang mga bitis, na ginigibo an trabaho kan pinakahamak na oripon. (Juan 13:1-15) Abaa kamapakumbabang paglilingkod! Huli kaini, an mga ministrong Kristiano mapakumbabang naglilingkod ki Jehova Dios asin ki Jesu-Cristo. (2 Corinto 6:4; 11:23) Sinda nagpapaheling nin kababaan nin boot sa paglilingkod sa lambang saro. Asin kun naghuhulit sinda kan maogmang bareta, sinda daing kaimotan na naglilingkod  sa saindang kataraed na daing pagtubod.—Roma 1:14, 15; Efeso 3:1-7.

Magtagal sa Ministeryo

21. Paano binalosan si Pablo huli sa pagtagal sa ministeryo?

²¹ Para ki Pablo, an pagigin ministro nangaipo nin pakatagal. Sinabi nia sa mga taga Colosas na dakol an tinios nia tangani na ikahulit an maogmang bareta sa sainda. (Colosas 1:24, 25) Minsan siring, huli ta sia nagtagal, dakol an nag-ako kan maogmang bareta asin nagin mga ministro. Sinda pinaniaki bilang mga aki nin Dios asin tugang ni Jesu-Cristo, na may esperansang magin espiritung mga linalang kaiba nia sa langit. Abaa kamamuraway na balos sa pakatagal!

22, 23. (a) Taano an mga ministrong Kristiano ngonyan ta nagkakaipo nin pakatagal? (b) Ano an marahayon na mga bunga nin Kristianong pakatagal?

²² An pakatagal kaipuhan ngonyan para sa mga talagang ministro nin Dios. An dakol nasasakitan aroaldaw huli sa helang o mga kolog nin paggurang. An mga magurang naghihigos—na an dakol sa sainda mayong agom—tanganing mapadakula an saindang mga aki. An mga aking nag-eeskuela makosog an boot na linalabanan an salang mga impluwensia na nasa palibot ninda. An dakol na Kristiano napapaatubang sa grabeng paglapigot sa pagbuhay. Asin an dakol pinaglalamag o napapaatubang sa mga kadepisilan huli sa “delikadong mga panahon na masakit pakibagayan” ngonyan! (2 Timoteo 3:1) Iyo, an haros anom na milyon na ministro ni Jehova ngonyan makasasabi kaiba ni apostol Pablo: “Sa lambang paagi irinerekomendar niamo an samong sadiri bilang mga ministro nin Dios, sa pagtagal nin dakol.” (2 Corinto 6:4) Dai minasuko an mga ministrong Kristiano. Tunay na sinda dapat na omawon huli sa saindang pakatagal.

²³ Apuera dian, arog kan nangyari ki Pablo, an pakatagal nagtatao nin marahayon na mga bunga. Paagi sa pagtagal, naiingatan niato an satong dayupot na relasyon ki Jehova asin pinagagayagaya an saiyang puso. (Talinhaga 27:11) Napakokosog niato an satong pagtubod asin naggigibo kita nin mga disipulo, na dinudugangan an kasararoan nin magturugang na Kristiano. (1 Timoteo 4:16) Inaataman ni Jehova an saiyang mga ministro asin binebendisyonan an saindang ministeryo durante kaining huring mga aldaw. Bilang resulta, an natatada pa sa 144,000 natipon na, asin minilyon pa an may kompiadong paglaom na magkamit nin buhay na daing katapusan sa sarong paraisong daga. (Lucas 23:43; Kapahayagan 14:1) Totoo nanggad, an ministeryong Kristiano sarong kapahayagan kan pagkaherak ni Jehova. (2 Corinto 4:1) Logod na kita gabos pakamahalon iyan asin magpasalamat na an mga bunga kaiyan magdadanay sagkod lamang.—1 Juan 2:17.

[Mga Nota sa Ibaba]

Ikapaliliwanag daw Nindo?

• Ano an paninimbagan kan gabos na Kristiano kan enot na siglo?

• Noarin inoordenan asin siisay an nag-oorden sa ministrong Kristiano?

• Anong aktitud an maninigong kultibaron nin ministrong Kristiano?

• Taano ta maninigong magtagal an ministrong Kristiano sa ibong nin mga problema?

[Mga Hapot Para sa Pag-adal]

[Mga Ritrato sa pahina 16, 17]

Si Timoteo tinokdoan kan Tataramon nin Dios poon sa pagkaomboy. Nagin siang ordenadong ministro kan sia bautismohan

[Ritrato sa pahina 18]

An bautismo simbolo nin pagdusay sa Dios asin nagsesenyalar kan ordenasyon nin saro bilang ministro

[Ritrato sa pahina 20]

An mga ministrong Kristiano andam na maglingkod